Ye so a lingbi ababâ na mama amû na amolenge ti ala

ABABÂ na amama kue ayeke mû mbage ti ala na yâ mbeni ye so ahon hingango ndo ti zo. Ala oko oko kue ayeke mû mbeni ye ti tele ti ala, si na lege ni, mbeni zo ayeke kono yeke yeke na yâ ti mama ti lo. Ni la, a yeke ye ti dongo bê pëpe so tongana a dü mbeni bébé, azo ayeke tene ka so a yeke mbeni ye ti kpene.

Biani, mengo ngo nga dungo molenge ayeke gi tongo nda ti kungba so ababâ na mama ayeke na ni ti yô. Kozoni kue, a hunda mingi ni ti tene ababâ na mama abâ ye oko oko kue na ndo abébé ti ala. Me na ndembe so ala yeke kono, a lingbi a bâ lege ti ala gi na lege ti mitele oko pëpe. A lingbi a mû nga maboko na ala ti maï na lege ti bibe, ti tënë ti bê, ti salango ye nga na ti yingo.

Ti tene amolenge amaï nzoni, a lingbi mbilimbili ababâ na mama ti ala aye ala. Atâa so a yeke kota ye ti tene ababâ na mama atene na amolenge ti ala so ala ye ala, a lingbi ala fa ni nga na lege ti akusala. Biani, a lingbi ababâ na mama aduti anzoni tapande, ala fa na amolenge ti ala ti sala ye alingbi na akpengba-ndia ti nzoni tambela, ngbele ye na ngoi so ala de kete. Tongana a ku ngbii si a fa ye so na ala, aye so ayeke mû vundu mingi na bê alingbi ti si, na ayeke si biani.

A yeke na yâ Bible si a lingbi ti wara akpengba-ndia so ayeke nzoni ahon atanga ni kue. Mbeni ye nde ti hon nzoni so fango ye so aluti na ndo Bible aga na ni ayeke dä pëpe. Na lege ti fango ye so, amolenge ayeke ga ti bâ so ye so a yeke fa na ala alondo na zo pëpe, me na Wasalango ala, Babâ ti ala ti yayu. Ye so ayeke sala si wango ni ane ahon tanga ti awango kue.

Bible awa ababâ na mama ti sala kua ngangu ti yôro na yâ li ti amolenge ti ala akpengba-ndia so ayeke mbilimbili. Ye oko, tongana amolenge ni ayeke kono, ababâ na mama abâ so mingi ni a yeke ngangu ti sala lisoro na ala na ndo aye so ayeke kota mingi. Ni la, a leke mbeti so, Mä Kota Wafango ye, ti kanga lege na ye tongaso ti si. Mbeti so asala tënë na ndo aye ti yingo so mo na amolenge ti mo alingbi ti diko ni legeoko. Me mingi ahon so, a lingbi a sala si lisoro aduti na popo ti amolenge nga na ala so ayeke diko mbeti so na ala.

Mo yeke bâ ande so, na lege ti ahundango tënë so alingbi biani, mbeti so ayeke pusu amolenge ti kiri tënë. Tongana mo si na ahundango tënë ni so, mo yeke bâ fä so (​—). A yeke ti tene mo luti kete na mo wa molenge ni ti sala tënë. Amolenge aye ka ti tene a yôro ala na yâ lisoro, teti tongana a sala tongaso pëpe, nzara ti ye ni ayeke sigigi hio na yâ ti ala.

Me mingi ahon so, ahundango tënë ni ayeke mû maboko na mo ti hinga ye so ayeke na yâ li ti molenge ni. Biani, molenge ni alingbi ti mû akiringo tënë so ayeke na lege ni pëpe. Me atënë so aga na peko ti hundango tënë ni oko oko ayeke mû ande maboko na lo ti leke lege so lo yeke gbu na li ti lo nzoni.

Mbeni ye so ayeke nde mingi na yâ mbeti so ayeke afoto ahon 230. Mingi ti ala ayeke na akete tënë na tele ni so ahunda ti tene molenge ni akiri tënë na ni. Atënë ni aluti na ndo ye so lo bâ na ye so lo diko awe. Tongaso, kiri mo bâ afoto ni na lo. Ala lingbi ti mû maboko nzoni mingi na mo ti gboto lê na ndo ti akota ye so lo manda awe.

Tongana molenge ni ahinga ti diko mbeti, wa lo ti diko mbeti so na mo nga ndali ti lo mveni. Tongana lo diko ni lege mingi, anzoni wango ni ayeke lï ngangu na yâ li nga na bê ti lo. Me ti tene songo ti mo na lo akpengba, si ala ne mba, a yeke nzoni ala diko mbeti so legeoko, nga lakue.

Laso, a yeke zia amolenge na gbe ti salango ye ti ayingo sioni, bungbingo ti koli na wali so ayeke na lege ni pëpe nga na ambeni sioni salango ye nde. A yeke lani ngangu ti bâ aye tongaso na yâ ti angu so ahon ade ti ninga pëpe. Tongaso, a lingbi a bata ala nzoni. Ni la, mbeti so ayeke mû lege ti sala tongaso na mbeni lege so angoro ye ngorongo pëpe, na so asala ni na yekiango ndo. Ye oko, a lingbi a gue na amolenge mbilimbili na mbage ti Lingu ti ndara kue, Jéhovah Nzapa, Babâ ti e ti yayu. A yeke ye so lani Jésus, Kota Wafango ye, asala lakue. E yeke biani na beku so mbeti so ayeke mû ande maboko na mo nga na sewa ti mo ti leke gigi ti ala si anzere na Jéhovah, nga ti wara aye ti nzoni teti lakue lakue.