Ababâ na mama, i bata ye ti héritier ti i ti ngele ngangu

“Ndara ayeke ye ti bata zo . . . ndara abata fini ti zo so ayeke na ni.”​—ZO-TI-FA-TENE 7:12.

ABABÂ na mama ayeke dü mbeni fini zo so aye ti tele ti lo nga na asalango ye ti lo ayeke tongana ti ala. Bible ahiri akete molenge so “ye ti héritier so L’Eternel amû na zo.” (Psaume 127:3). Jéhovah ayeke tâ Lingu ti fini. Tongaso, ye so lo mû na ababâ na mama ti bata ayeke biani ti lo (Psaume 36:10). Ababâ na mama, i yeke bâ mara ti matabisi ti ngele ngangu so Nzapa amû na i so tongana nyen?

² Biani, a lingbi a kamata mara ti mbeni matabisi tongaso na bê ti kiri singila nga a bâ ni na nene ni. A hon fadeso ngu 3 000 awe, mbeni zo ti Israël so iri ti lo ayeke Manoah asala tongaso na ngoi so mbeni ange atene na wali ti lo so lo yeke dü mbeni molenge. Na mango nzoni tënë so, Manoah asambela: “O Seigneur, mbi voro Mo, Mo zia Zo ti Nzapa, Lo so Mo to Lo kozoni, asi na mbi mbeni, si Lo fa na e ye so alingbi e sala na molenge so fade mbi dü lo.” (aJuge 13:8). Ababâ na mama, ye nyen i lingbi ti manda na ndo tapande ti Manoah?

Nda ni so a hunda mungo maboko ti Nzapa laso

³ A yeke laso si ababâ na mama ayeke na bezoin ti mungo maboko ti Jéhovah mingi ahon ti kozo ti bata na amolenge ti ala. Ngbanga ti nyen? A tomba Satan Zabolo na a-ange ti lo na yayu na a bi ala na ngangu na sese. Bible atene: “Vundu aga na sese . . . Teti zabolo azu na sese na i na ngonzo mingi, teti lo hinga lâ ti lo angbâ mingi pëpe.” (Apocalypse 12:7-9, 12). Bible afa so “tongana bamara so atoto,” Satan ayeke “gi zo so lo lingbi te lo.” (1 Pierre 5:8). Mingi ni bamara ayeke gbu nyama so ayeke na ngangu pëpe, so ti tene nyama so ade kete. Ni la, na lege ti ndara, ababâ na mama so ayeke aChrétien ayeke gi fango lege na mbage ti Jéhovah ti bata na amolenge ti ala. Mo yeke sala ngangu mingi ti bata amolenge ti mo?

⁴ Tongana mo hinga so mbeni bamara ayeke fono ndulu na ndo so mo lango dä, kozo ye so ayeke gbu bê ti mo biani ayeke batango amolenge ti mo. Satan ayeke tongana mbeni nyama so ayeke te amba ti lo. Lo yeke gi ti buba lege ti azo ti Nzapa, si Nzapa ayeda na ala mbeni pëpe (Job 2:1-7; 1 Jean 5:19). A yeke amolenge si sioni ayeke wara ka ala hio mingi. Ti kpe agbanda ti Zabolo, a lingbi amolenge ahinga Jéhovah na ala mä yanga ti lo. A hunda ti wara hingango ye ti Bible. Jésus atene: “So ayeke fini ti lakue lakue: ti hinga Mo, Mo so gi Mo oko ayeke tâ Nzapa, na ti hinga Jésus Christ, Lo so Mo to Lo awe.” (Jean 17:3). Na ndo ni, amolenge ayeke na bezoin ti ndara, so ti tene ngangu ti gbungo nda ti ye nga na ti salango ye alingbi na ye so ala manda. Teti so “ndara abata fini ti zo so ayeke na ni”, i ababâ na mama, a lingbi i yôro tâ tënë na bê ti amolenge ti i (Zo-ti-fa-tene 7:12). Mo lingbi ti sala ni tongana nyen?

⁵ Mo lingbi, nga a yeke ngbanga ti mo, ti diko Tënë ti Nzapa na amolenge ti mo. Me ti mû maboko na ala ti ndoye Jéhovah na ti mä yanga ti lo ahunda ye mingi ahon senge dikongo mbeti na ala: a hunda ti tene ala wara gbungo nda ti ye. Zia e mû mbeni tapande: a lingbi ti fa na molenge so kozo si lo fâ lege, a yeke nzoni lo bâ ndo si. Ye oko, ambeni molenge ayeke mä tënë so pëpe. Ngbanga ti nyen? Peut-être ade a fa na ala mbilimbili pëpe so oto alingbi ti kpo ala wala kode so a tene na tënë ni na ala aga na ala pëpe ti hinga so sioni alingbi ti wara ala, tongaso si ala lingbi ti kpe “ye ti buba” so alingbi ti ga na ndao. Ti mû maboko na mbeni zo ti wara ndara ahunda ngoi nga na kangango bê mingi. Me ndara ayeke tâ ye ti ngele ngangu! Bible atene: “Lege ti [ndara] ayeke lege ti nzoni mingi, na lege ti lo kue ayeke siriri. Lo yeke keke so amû fini na ala so agbu lo, na ngia ayeke na azo oko oko kue so abata lo.”​—aProverbe 3:13-18; 22:15.

Mbeni fango ye so amû ndara

⁶ Fani mingi amolenge ayeke sala ye kirikiri. A yeke pëpe ngbanga ti so a fa pëpe na ala ye so ayeke nzoni, me nda ni ayeke so fango ye ni andu tâ bê ti ala pëpe. Zabolo ayeke tiri lakue ti komande bê ti amolenge. Kode ti lo ayeke ti zia na gbele ala aye ti sese ti lo so ake Nzapa. Lo yeke sala kusala na bibe ti sala siokpari so a dü ala na ni (Genèse 8:21; Psaume 51:7). Ni la, a lingbi ababâ na mama ahinga so ambeni ye ayeke dä so ayeke gi ti komande bê ti amolenge ti ala.

⁷ Mingi ni, ababâ na mama ayeke sala tënë na molenge na ndo ye so ayeke nzoni wala sioni. Ti ala, na salango tongaso ala fa awe na molenge ni mbeni kpengba-ndia ti nzoni salango ye. Ala lingbi ti tene na molenge ni so a yeke sioni ti tene mvene, ti nzi wala ti bungbi koli na wali na mbeni zo so mo sala mariage na lo pëpe. Ye oko, a lingbi ye so apusu molenge ni ti mä tënë aduti ngangu ahon senge ye so babâ na mama ti lo atene. Aye so ayeke andia ti Jéhovah. A lingbi molenge ni amanda so lege ti ndara ayeke ti bata akomandema ti Nzapa.​—aProverbe 6:16-19; aHébreu 13:4.

⁸ Ambeni ye ayeke dä so alingbi ti mû maboko na mbeni molenge ti yeda so mbeni Wasalango ye so lo yeke na ndara mingi ayeke dä. A yeke aye tongana aye ti yâ ti dunia so a yeke ngangu ti gbu nda ni, mara ti anyama nde nde so ayeke dä, ngoi ti buru na ti ngu, ngoi ti dê na ti ndowa (aRomain 1:20; aHébreu 3:4). Nga, a lingbi a fa na molenge ni so Nzapa aye lo, Nzapa aleke ye na lege ti sandaga ti Molenge ti Lo ti mû na lo fini ti lakue lakue, nga so lo molenge ni lo lingbi ti zia ngia na bê ti Nzapa na mango ye so Lo tene. Peut-être na pekoni molenge ni ayeke duti ande na nzara ti sala na Jéhovah, atâa aye so Zabolo ayeke ga na ni ti kanga lege na lo.​—aProverbe 22:6; 27:11; Jean 3:16.

⁹ Fango ye so ayeke bata mbeni molenge na ayeke pusu lo ti sala ye so ayeke nzoni ahunda ngoi, bingo bê na ndo zo nga na lekengo ye. A hunda ti tene ababâ na mama ayeda na fango lege so alondo na Nzapa. Bible atene: “I, ababâ, . . . i bata [amolenge ti i], i fa lege na ala na wango [“fango lege ti bibe”, NW ] ti Seigneur.” (aEphésien 6:4). Tënë so aye ti tene nyen? Na yanga ti Grec so a sû na Bible, “fango lege ti bibe” aye ti tene “yorongo bibe na yâ”. Tongaso, a yeke wa biani ababâ ti yôro bibe ti Jéhovah na yâ amolenge ti ala. Fade ye so ayeke duti biani ye ti batango amolenge ni! Tongana a yôro abibe ti Nzapa na yâ li ti amolenge, a yeke bata ala si ala sala ye ti sioni pëpe.

A lingbi ndoye si apusu mo ti sala ye

¹⁰ Ye oko, ti tene mo sala ye alingbi na nzara ti mo ti fa ye nzoni na molenge, a lingbi ngangu so mo yeke sala aluti na ndo ndoye. Mbeni kota ye ni ayeke nzoni lisoro. Gi ti hinga aye so ayeke si na yâ fini ti molenge ti mo nga gi ti hinga bango ndo ti lo na ndo ti aye ni. Na sorongo mbeni ngoi so ayeke nzoni, na kode gue na molenge ti mo ti fa atënë ti bê ti lo na gigi. Ngoi na ngoi, li ti mo ayeke kpe ti mä ambeni ye so lo tene. Sala hange mingi ti fa so ye ni andu bê ti mo ngangu, me dengi mê nzoni ti mä lo.

¹¹ Biani, peut-être mo diko awe na amolenge ti mo na yâ ti Bible andia ti Nzapa so ake salango pitan, même mo sala tongaso lege mingi awe (1 aCorinthien 6:18; aEphésien 5:5). Kode so alingbi ti fa tâ na amolenge ti mo ye so anzere na Jéhovah na ye so anzere na lo pëpe. Ye oko, ti yôro bibe ti Jéhovah na yâ bê ti mbeni molenge ahunda ye mingi ahon so. Amolenge ayeke na bezoin ti mungo maboko ti tene ala mveni agbu li na ndo nene ti andia ti Jéhovah. Ala yeke tâ na bezoin ti hinga biani so andia ti lo ayeke tâ na lege ni na ayeke nzoni, nga batango ni ayeke nzoni na ayeke salango ye na ndoye. Tongana amolenge ti mo ayeda na bango ndo ti Nzapa gi na lege ti ye so mo fa na ala na yâ Mbeti ti lo, a lingbi ti tene biani so mo ‘yôro bibe ti Nzapa’ na yâ bê ti ala.

¹² Tongana mo yeke sala tënë na ndo bungbingo ti koli na wali, mo lingbi ti hunda: “Ti mo, tongana zo abata ndia ti Jéhovah so ake bungbingo koli na wali kozoni na mariage, a yeke kanga ande lege na lo ti wara tâ ngia?” Wa molenge ti mo ti fa nda ti kiringo tënë ti lo. Na peko ti so ala kiri ala bâ pendere kode so Nzapa aleke ti tene a dü na molenge, mo lingbi ti hunda lo: “Mo pensé so Nzapa ti e so lo yeke na ndoye amû andia ti kanga lege na e ti wara ngia na yâ fini ti e? Wala mo bâ ti mo so andia ti lo ayeke ti mû ngia na e na ti bata e?” (Psaume 119:1, 2; Esaïe 48:17). Hunda lo ti fa bibe ti lo na ndo tënë ni. Na pekoni mo lingbi ti fa atapande so afa tongana nyen salango pitan ayeke ga na vundu nga na kpale na popo ti azo (2 Samuel 13:1-33). Na salango tënë na molenge ti mo ti tene lo gbu nda ti bango ndo ti Nzapa nga lo yeda na ni, mo sala ye mingi awe na yâ ngangu so mo yeke sala ti yôro bibe ti Nzapa na yâ bê ti lo. Me, mbeni ye nde so mo lingbi ti sala ayeke dä.

¹³ Na ndara, mo yeke fa ande gi pëpe na lo asioni so lo yeke wara tongana lo ke yanga ti Jéhovah, me mo yeke fa nga tongana nyen salango ye ti e ayeke ndu bê ti Jéhovah. Fa na molenge ti mo na lege ti Bible so e lingbi ti mû vundu na Jéhovah tongana e sala pëpe ye so lo ye (Psaume 78:41). Mo lingbi ti hunda lo: “Ngbanga ti nyen mo ye ti mû vundu na Jéhovah pëpe?”, na mo fa na lo nda ni: “Satan so lo yeke wato ti Nzapa atene so e yeke sala na Jéhovah ndali ti so e ye ti tene lo mû na e aye, me pëpe ndali ti so e ye lo.” Na pekoni, fa tongana nyen na dutingo be-ta-zo Job azia ngia na bê ti Nzapa, na tongaso lo kiri tënë na mvene so Satan atene (Job 1:9-11; 27:5). Molenge ti mo ayeke na bezoin ti hinga so na lege ti salango ye ti lo, lo lingbi ti mû vundu na Jéhovah wala ti zia ngia na bê ti lo (aProverbe 27:11). A lingbi ti fa atënë so nga na ambeni nde na amolenge na salango kusala na buku Mä Kota Wafango ye.a

Anzoni ye ti pekoni

¹⁴ Mbeni mbakoro-koli na kodoro ti Croatie so lo diko buku Wafango ye na âta ti lo ti ngu mbasambala asû mbeti so ti fa ye so molenge ni atene: “Mama atene lani na mbi ti sala mbeni ye, me mbi ke. Na pekoni mbi dabe ti mbi na chapitre so atene ‘Mango yanga ayeke bata mo’, tongaso mbi kiri mbi bâ lo na mbi tene na lo so mbi yeke mä yanga ti lo.” Ti chapitre so li ti tënë ni ayeke “Nda ni so a lingbi e tene mvene pëpe”, mbeni koli na wali ti lo so ala yeke na Floride (Amerika) atene: “Mo yeke wara na yâ ni ahundango tënë so ayeke pusu amolenge ti fa na gigi ye so ayeke na yâ bê ti ala na ti fa afaute so kozo ala yeke fa ni pëpe.”

¹⁵ A yeke wara na yâ buku Wafango ye afoto ahon 230 nga na atënë so a zia na tele ti afoto oko oko wala mbeni bungbi ti afoto. Mbeni mama so lo bâ buku ni na nene ni mingi atene: “Fani mingi molenge ti mbi ti koli angbâ gi ti bâ mbeni foto na lo ye ti gue na mbeni lembeti nde pëpe. Afoto ni ayeke gi pendere pëpe, me ala yeke fa ye na zo, wala ala yeke pusu amolenge ti hunda tënë. Na mbeni foto so mbeni molenge ayeke bâ limon na yâ ti vukongo ndo, molenge ti mbi ni ahunda: ‘Mama, nyen la molenge ti koli so ayeke sala so?’ Lo hunda tënë ni na mbeni go so afa atene lo hinga so ye ni ayeke sioni.” Tënë ti tele ti foto ni ayeke so: “Zo wa la alingbi ti bâ ye kue so e yeke sala?”

Kota ye so a hunda ti fa ni laso

¹⁶ Amolenge ayeke na bezoin ti hinga ye so ayeke na lege ni wala ye so ayeke na lege ni pëpe na ndo kode ti salango kusala na tele ti ala ti koli wala ti wali. Ye oko, ti fa ye na ndo ni ayeke lakue kete ye pëpe. Mbeni wagosinga atene so lo kono na mbeni ngoi so azo abâ dingo iri ti tele ti koli wala ti wali tongana salango ye so ane zo pëpe. Na ndo tënë ti fango ye na amolenge ti lo, lo sû na mbeti: “A lingbi mbi hon ndo ti kamene so asala mbi.” Biani, tongana, ngbanga ti kamene, ababâ na mama akpe ti sala tënë na amolenge ni na ndo tele ti ala ti koli wala ti wali, so ayeke bata molenge ni pëpe. Teti so lê ti amolenge ahan pëpe, azo so aye ti wara nzerengo tele na lege ti bungbingo na amba ti ala ayeke gue gi na mbage ti amolenge. Mä Kota Wafango ye asala tënë na ndo ni na mbeni lege so ayeke nzoni nga ane zo. Fango ye na amolenge na ndo tënë ti dutingo koli na wali ayeke sala sioni na ala pëpe; nde na so, salango ni pëpe alingbi ti gue na ala ti buba tele ti ala.

¹⁷ Chapitre 10, so asala tënë na ndo a-ange ti sioni so aga lani na sese na ala dü amolenge, ahunda tënë so na molenge ni: “Ye nyen mo hinga na ndo tënë ti lango na koli wala na wali?” Buku ni amû kiringo tënë so akpengba pëpe nga ane zo. Na pekoni, chapitre 32 afa lege so a lingbi ti bata amolenge yongoro na azo so aye ti lango na ala. Mingi ti alettre so azo atokua na awasungo périodique so afa so fango ye na ndo tele ti koli wala ti wali ayeke tâ kota ye mingi. Mbeni mama atene: “Na yenga so ahon, tongana molenge ti mbi Javan ague ti bâ docteur ti lo, docteur ni ahunda mbi ti bâ wala e sala lisoro na Javan na ndo salango kusala na lege ni na tele ti zo ti koli wala ti wali. Bê ti lo adö mingi so e sala ni na salango kusala na fini buku so.”

¹⁸ Mbeni chapitre ni afa tondo ti Bible na ndo amaseka-koli ota so ayeke aHébreu, Sadrac, Mésac na Abed-Nego, so ake lani ti kuku na gbe ti mbeni image so aduti fä ti kodoro ti Babylone (Daniel 3:1-30). Ambeni zo alingbi pëpe ti bâ polele kamba so ayeke na popo ti vorongo image na balango drapeau tongana ti so buku Wafango ye afa ni. Ye oko, bâ ye so Edward Gaffney (so lo yeke wasungo mbeti) atene na hundango ndo ti mbeti-sango U.S. Catholic. Lo tene so na kozo lango so molenge ti lo ti wali ague na ekole si lo kiri na yanga-da, molenge ni atene so lo manda mbeni “fini sambela na ekole”. Tongaso lo hunda molenge ni ti tene peko ti sambela ni. Gaffney atene: “Lo zia maboko ti lo na ndo ti bê ti lo, nga na baba, lo to nda ti tene, ‘Mbi deba yanga ti mû bê ti mbi kue na drapeau . . .’ ” Gaffney angbâ ti tene: “Hio, mbi gbu nda ti mbeni ye. A-Témoin ti Jéhovah ayeke na raison. Mbeni mbage ti vorongo kodoro ayeke dä so azo ayeke maï ni na yâ ada-mbeti ti e tâ gi na tongo nda ti mandango ye: mungo bê ti mo kue na kodoro ti mo ahon tanga ti aye kue.”

Mo yeke wara nzoni na peko ti angangu kue so mo lingbi ti sala

¹⁹ Biani, mo yeke wara nzoni na peko ti angangu kue so mo lingbi ti sala ti fa ye na amolenge ti mo. Mbeni mama so alango na Kansas (Amerika) atoto tongana lo wara lettre ti molenge ti lo ti koli. Molenge ni asû mbeti: “Mbi bâ so mbi yeke tâ na pasa ti wara lani mbeni fango lege so asala si mbi yeke na gingo bê mingi pëpe nga mbi yeke duti nzoni. Mo na Papa, ala lingbi tâ na gonda.” (aProverbe 31:28). Mä Kota Wafango ye alingbi ti mû maboko na ababâ na mama mingi ti fa ye na amolenge ti ala, tongaso si ala bata ye ti héritier ti ala ti ngele ngangu so.

²⁰ Amolenge ti e alingbi na bingo bê kue, angangu kue nga na ngoi kue so e lingbi ti mû na ala. Ala yeke ngbâ lakue gi molenge pëpe. Sala kusala nzoni na alege kue so azi na mo ti duti na ala nga ti mû maboko na ala. Mo yeke wara ande vundu dä lâ oko pëpe, teti na nda ni ala yeke ye mo biani. Girisa pëpe so amolenge ti mo ayeke matabisi so Nzapa amû na mo. Ala yeke biani mbeni ye ti héritier ti ngele ngangu! (Psaume 127:3-5). Tongaso bata ala tongana mbeni matabisi so alondo na Nzapa, mo bâ mo tene mo yeke kiri tënë na Nzapa teti lege so mo bata na ala; biani mo yeke kiri tënë na Nzapa.

[Kete tënë na gbe ni]

Fade mo kiri tënë tongana nyen?

• Ngbanga ti nyen a yeke mbilimbili laso si ababâ na mama ayeke na bezoin ti bata amolenge ti ala?

• Mara ti fango ye wa amû ndara na zo?

• Akota tënë wa mo na amolenge ti mo alingbi ti sala lisoro dä?

• Tongana nyen buku Wafango ye amû maboko na ababâ na mama ti fa ye na amolenge ti ala?

[Ahundango tënë ti manda na ye]

1. Ngbanga ti nyen a lingbi ababâ na mama abâ amolenge ti ala tongana amatabisi?

2. Tongana Manoah amä so lo yeke dü mbeni molenge, lo sala ye tongana nyen?

3. Ngbanga ti nyen a yeke mbilimbili laso si a yeke na bezoin ti mungo maboko ti Nzapa ti bata na amolenge?

4. (a) Ababâ na mama ayeke sala nyen tongana ala hinga so mbeni bamara ayeke fono ndulu na ndo so ala yeke dä? (b) Ye nyen amolenge ayeke na bezoin ni ti bata ala?

5. (a) Tongana nyen a lingbi ti mû maboko na mbeni zo ti wara ndara? (b) Tongana nyen buku ti aProverbe afa ngele ti ndara?

6. (a) Ngbanga ti nyen fani mingi amolenge ayeke sala ye na lege ti ndara pëpe? (b) Tiri wa ayeke kporo fadeso?

7. Ngbanga ti nyen ti sala gi tënë na molenge na ndo ye so ayeke nzoni wala sioni alingbi pëpe?

8. Mara ti fango ye wa alingbi ti mû maboko na amolenge ti sala ye na ndara?

9. (a) Ti fa ye na zo si a bata lo na fini ahunda nyen? (b) Ye nyen a hunda na ababâ? Na a ndu ye wa?

10. Ti fa ye nzoni na molenge ti mo, a yeke kota ye ti hinga nyen?

11. Tongana nyen mbeni babâ wala mama alingbi ti yôro bibe ti Nzapa na yâ bê ti molenge ti lo?

12. Tongana nyen mbeni babâ wala mama alingbi ti mû maboko na molenge ti lo ti wara nzoni bango ndo na ndo tënë ti bungbingo ti koli na wali?

13. Mbeni molenge ayeke na bezoin ti hinga nyen si a pusu lo ti mä yanga ti Jéhovah?

14, 15. (a) Atënë wa na yâ buku Wafango ye ayeke apusu amolenge ti sala ye? (b) Aye ti nzoni wa mo wara na salango kusala na buku ni? (Bâ nga tënë so ayeke na lembeti 18-19.)

16. Ye wa ayeke kota ye ti fa ni na amolenge laso? Na ngbanga ti nyen?

17. Tongana nyen buku Wafango ye amû maboko na ababâ na mama ti fa ye na amolenge ti ala na ndo bungbingo ti koli na wali?

18. Tongana nyen buku Wafango ye asala tënë na ndo mungo gonda na aye tongana drapeau?

19. Fango ye na amolenge ayeke ga na aye ti nzoni wa?

20. Ye nyen a lingbi ababâ na mama adabe ti ala lakue na ni? Na ye so a lingbi ti sala nyen na ndo ti ala?

[Encadré/Afoto na lembeti 18, 19]

Mbeni buku teti azo kue

A leke buku Mä Kota Wafango ye ti mû maboko na ababâ na mama wala na akota zo ti diko na ti sala lisoro na amolenge na ndo afango ye ti Jésus Christ. Ye oko, akota zo so adiko buku ni awe afa tâ singila ti ala teti ye so ala manda.

Mbeni koli na Texas (Amerika) atene: “Mä Kota Wafango ye apika bê na lege so lo kpengba pëpe, a ndu azo ti ngu kue, même mbi so mbi yeke na ngu 76. Tongana mbeni zo asala na Jéhovah ngbele ye na lâ ti pendere ti lo, mbi ye ti tene na ala singila mingi ndali ti mbeti ni.”

Mbeni wadikongo mbeti na Londres, na Angleterre, atene: “Apendere tapande ti yâ ni ayeke ndu biani bê ti ababâ na mama nga na amolenge. Ahundango tënë nga lege so a leke na buku ni ayeke pendere mingi, na a yeke ye ti pendere mingi ti bâ tongana nyen a fa tënë ti ambeni ye so a yeke ngangu na zo ti sala lisoro dä, tongana ti so a yeke na yâ ti chapitre 32, ‘Lege so a bata lani na Jésus.’ ” Na lo hunzi tongaso: “Atâa so a leke buku so kozoni ndali ti amolenge ti aTémoin ti Jéhovah, mbi bâ so awafango mbeti na ambeni zo ayeke duti ande na ngia ti wara mbeni oko nga. Mbi leke ti sala kua na ni na yâ ti anze na angu so ayeke ga.”

Mbeni wali ti Massachusetts (Amerika) asala tënë na ndo gbâ ti “afoto so a gbu li na ndo ni nzoni si a sala ni.” Lo tene: “Mbi bâ so, atâa so a sala mbeti ni ndali ti amolenge, atënë ti yâ ni alingbi nga ti mû maboko na e akota zo ti gbu li na ndo songo ti e na Jéhovah.”

Mbeni wali na kodoro ti Maine (Amerika) atene na kongo: “So pendere mbeti kue! Mbeti ni ayeke gi pëpe ndali ti amolenge, me teti e kue so e yeke amolenge ti Nzapa. Atënë ni andu tâ bê ti mbi ngangu na asala si na pekoni bê ti mbi adë, tongaso mbi duti na siriri. Mbi ga ndulu mingi na Jéhovah tongana Babâ ti mbi. Lo bi yongoro avundu kue so asi na mbi na yâ ti angu mingi na lo fa polele ye so lo ye ti sala.” Lo tene na nda ni: “Na zo kue mbi yeke tene: ‘Diko ni.’ ”

Mbeni wali ti gbata ti Kyoto, na Japon, atene so na ngoi so lo yeke diko mbeti ni na atarä ti lo, ala yeke hunda na lo atënë tongana: “ ‘Nyen la molenge-koli so ayeke sala so? Ngbanga ti nyen a yeke suku na kete molenge-wali so? Mama so ayeke sala nyen la? Ka ti bamara so?’ Buku ni afa aye so agbu bê ti e, tongaso mbi ye ni mingi ahon ambeti kue so mbi lingbi ti wara na yâ ti mbeni bibliothèque.”

Mbeni babâ na Calgary (Canada) atene so gi na ngoi so lo wara mbeti ni, lo to nda ti diko ni fade fade na kete molenge ti lo ti wali ti ngu omene na ti koli ti ngu gumbaya. Lo tene: “Fade fade, salango ye ti amolenge ni anzere mingi. Amolenge ni adengi mê mingi na ye ni, na ala kiri tënë na ahundango tënë ni na bê ti ala. Ala bâ so mandango ye ni abâ ala, na a mû na ala pasa ti fa tënë ti bê ti ala. Tele ti ala anzere mingi, na lo ti wali ni atene so lo ye ti manda fini buku ni lakue na bï.”

Na peko ti mbeni étude ni oko, babâ ni atene: “Mbi na molenge ti mbi ti koli e mû angbonga mingi ti sala tënë na ndo Jéhovah na aye so lo leke ti sala. Lo yeke na atënë mingi ti hunda na ndo mbeti ni. Ngu ti lê ti mbi aga tongana lo tene na mbi ti lango nzoni na lo hunda na mbi: ‘Babâ, e lingbi ti sala ni mbeni? Mbi yeke na gbâ ti atënë ti hunda na mo, na mbi ye ti hinga ye kue na ndo Jéhovah.’ ”

[Foto na lembeti 15]

Ababâ na mama, ye wa i lingbi ti manda na ndo tapande ti Manoah?

[Foto na lembeti 16]

Amolenge, ye wa i lingbi ti manda na ndo tapande ti aHébreu ota?

[Afoto na lembeti 17]

Afoto na yâ buku “Wafango ye” na atënë so ayeke na tele ni ayeke akpengba gbakuru ti fango na ye

Mvene wa Ananias ayeke tene na Pierre?

Zo wa la alingbi ti bâ ye kue so e yeke sala?