Azendo ti Royaume ni: A sara si ye kue aga fini

MO FÂ mbeni lê ti keke, mo mä fion ni, na pekoni mo zia ni na yâ ti sakpa so ambeni lê ni ayeke dä awe. A ninga awe la mo yeke sara kua ni so, me mo woko pëpe. Mama ti mo ayo na tere ti keke ni ape, lo yeke sara kua na ngia nga lo yeke sara lisoro na ambeni zo ti sewa ti ala nga na akamarade ti ala so ayeke mû maboko na ala na yâ ti kua ni.​—Lo kpa maseka mingi, tongana ti ândö so mo de kete molenge. A yeke ngangu na mo ti bâ so mo bâ lo lani na gango mbakoro na yâ ti dunia so ahon ngbene ye giriri awe. Mo bâ lani tongana nyen la kobela awoko lo, mo gbu maboko ti lo na ngoi so lo yeke wu pupu, ti ndangba ni, na mo toto na ndo ti cimetière ti lo. Me lo la ge fadeso, na tere ti ambeni zo mingi. Lo yeke na fini nga na nzoni seni!

E hinga so, mara ti ngoi tongaso aga nduru ti si awe. E hinga ni ngbanga ti so azendo ti Nzapa ayeke ga tâ tënë lakue. Na yâ ti mbage so, e yeke bâ tongana nyen la ambeni zendo ti Royaume ni ayeke ga tâ tënë na yâ ti ngoi kete, so ayeke gue ti si na bira ti Harmaguédon. E yeke bâ nga ambeni zendo ti Royaume ni so ayeke ga tâ tënë na pekoni. So nzerengo tere si e yeke wara ande ti bâ ngoi so, na yâ ni, Royaume ti Nzapa asara kua na ndo ti sese kue, ti sara si ye kue aga fini!