Azendo so mo lingbi zia bê dä

MICHÉE, prophète ti Nzapa, ahinga so fani mingi zo alingbi zia bê kue pëpe na azendo so azo amû. Na ngoi ti lo, même atâ kamarade alingbi lakue ti zia bê kue na tënë ti yanga ti ala pëpe. Tongaso, Michée agboto mê: “Zia bê ti mo pëpe na zo so ayeke ndulu na mo; zia bê ti mo na ita ti mo pëpe; bata yanga ti mo, même na gbele wali so alango na libe ti mo.”​—Michée 7:5.

Michée azia ândö lege na sioni kpale so ti sala si lo dë kite na azendo kue? Oko pëpe! Lo fa na gigi ziango bê kue na yâ azendo ti Jéhovah Nzapa ti lo. Michée asû na mbeti: “Me ti mbi, fade mbi yä lê ti mbi na L’Eternel; mbi ku Nzapa ti salut ti mbi.”​—Michée 7:7.

Ngbanga ti nyen Michée ayeke lani na mara ti ziango bê kue tongaso? Ngbanga ti so lo hinga so Jéhovah ayeke sala ye lakue alingbi na tënë ti lo. Ye kue so Nzapa aze na akotara ti Michée aga biani tâ tënë (Michée 7:20). Dutingo be-biani ti Jéhovah giriri amû anda ti tënë oko oko kue na Michée ti yeda so Jéhovah ayeke bata ande tënë ti Lo.

“Mbeni tënë oko . . . atï na sese senge pëpe”

Na tapande, Michée ahinga so Jéhovah azi lani mara ti Israël na ngbâa na Egypte (Michée 7:15). Josué, so ayeke lani dä na ngoi ti zingo Israël so, awa amba ti lo ti duti na mabe na yâ azendo kue ti Nzapa. Mabe so aluti na ndo nyen? Lo dabe ti ala: “Na i hinga na bê ti i kue na âme ti i kue, ye oko atï pëpe ti nzoye kue so L’Eternel Nzapa ti i aze na i; ye ni kue aga tâ tënë awe, mbeni tënë oko ti tënë so kue atï na sese senge pëpe.”​—Josué 23:14.

Amolenge ti Israël ahinga nzoni so Jéhovah asala ândö apendere ye ndali ti ala. Lo bata zendo so lo sala na kotara ti ala Abraham so akpe mbito ti Nzapa so fade hale ti lo ayeke ga gbâ ni tongana atongoro, nga so ala yeke mû ande sese ti Canaan. Jéhovah atene nga na Abraham so ahale ti lo ayeke hu pono teti angu 400, me na pekoni, ala yeke kiri na Canaan “na lâ ti awagame ti osio ni”. Aye so kue asi biani.​—Genèse 15:5-16; Exode 3:6-8.

A yamba lani amolenge ti Israël nzoni na Egypte na ngoi ti Joseph, molenge ti Jacob. Na pekoni azo ti Egypte amû amolenge ti Israël na ngangu ti sala kua ti ngbâa. Ye oko, gi tongana ti so Nzapa amû zendo ni, na yâ ngoi ti awagame osio so aga na ndo ti tele, alondo na ngoi so ala lï na Egypte, a zi ahale ti Abraham so na ngbâa na Egypte.a

Na yâ ti angu 40 so aga na pekoni, mara ti Israël akiri abâ polele so Jéhovah ayeke bata lakue azendo ti lo. Tongana azo ti Amalek aga ti sala bira senge senge na amolenge ti Israël, Nzapa atiri ndali ti azo ti lo na lo bata ala. Lo mû na ala aye kue so atia ala na lege ti mitele na ngoi ti tambela teti angu 40 na yando, nga na nda ni, lo zia ala na Sese ti Zendo. Tongana Josué akiri abâ mbaï ti salango ye ti Jéhovah na mbage ti ahale ti Abraham, lo lingbi ti tene na bê kue: “Mbeni ye oko ti nzoni amanke pëpe ti ye kue so L’Eternel aze na azo ti da ti Israël; tënë ni kue aga tâ tënë.”​—Josué 21:45.

Kpengba ziango bê na azendo ti Nzapa

Tongana nyen mo lingbi ti kpengba mabe na azendo ti Jéhovah legeoko na tapande ti Michée na Josué? Biani, tongana nyen mo lingbi ti kpengba ziango bê kue na ambeni zo? A yeke nzoni mo sala kue ti gi ti hinga ala nzoni. Na tapande, mo lingbi peut-être ti manda wala azo alingbi biani ti zia bê kue na ala na bango so ala yeke tara ti bata na be-biani azendo ti ala kue. Na ngoi so hingango ye ti mo na ndo azo tongaso ague na li ni, mo yeke maï yeke yeke ziango bê kue na ala. Mo lingbi ti sala nga tongaso tongana a ndu tënë ti kpengbango mabe na yâ azendo ti Nzapa.

Mbeni lege so mo lingbi ti sala ni ayeke ti gbu li na ndo création nga na ndo andia so afa lege na ni. Awasendaye azia bê na andia so, na tapande andia so afa lege so cellule ti zo oko alingbi ti kangbi yâ ti lo na ti wu mingi ti dü a-cellule ngbundangbu mingi si a leke tele ti mo nzoni. Biani, a lingbi mbeni Walungo ndia so zo alingbi zia bê kue na lo aduti dä ti zia na sese andia so afa lege na tambelango ti aye nga na ngangu na yâ ndagigi kue. Mo lingbi biani ti zia bê kue na azendo ti lo legeoko tongana ti so mo yeke zia bê kue na yâ andia so afa lege na aye so lo leke.​—Psaume 139:14-16; Esaïe 40:26; aHébreu 3:4.

Na lege ti prophète Esaïe so aduti na fini na oko ngoi ti Michée, Jéhovah asala kusala na angoi nde nde so ayeke si lakue nga na ndia ti tambelango ti ngu so adö bê ti fa so e lingbi ti zia bê kue na tënë ti lo. Ngu oko oko, ngu-nzapa ayeke pika, atï na sese na amû lege na azo ti lu na ti ko le-kobe ti ala. Na ndo tënë so Jéhovah atene: “Legeoko tongana ngu-nduzu na neige alondo na yayu apika, na a kiri kâ pëpe, me a sa ngu-nduzu na sese, na a sala si le-kobe asigigi na sese, na a [maï], na a mû le-kobe na zo ti lu yaka, na a mû kobe na zo so ate kobe ni, fade tënë so asigigi na yanga ti Mbi ayeke legeoko tongaso; fade tënë ti Mbi akiri na Mbi senge pëpe, me a sala ye so Mbi ye, na fade tënë ni awu na kusala so Mbi to lo dä.”​—Esaïe 55:10, 11.

Azendo ti Paradis ayeke tâ ye biani

Bingo lê na ndo création alingbi ti kpengba ziango bê kue na yâ Wasalango ye ni. Ye oko, a hunda mbeni ye ahon so tongana mo ye ti manda ye na ndo azendo so ayeke mbage ti “tënë so asigigi na yanga ti [lo]”. Ti manda ye na ndo azendo so si mo lingbi ti zia bê ti mo kue dä, a hunda na mo ti gi ti bâ tondo ti ye so Nzapa aleke na bê ti lo ti sala teti sese nga salango ye ti lo na mbage ti azo, so alingbi ti wara ni na yâ Mbeti ti lo so a sû na gbe ti yingo.​—2 Timothée 3:14-17.

Prophète Michée azia bê ti lo kue na yâ azendo ti Jéhovah. Mo lingbi ti wara laso atënë so a sû na gbe ti yingo ti Nzapa mingi ahon ti so Michée ayeke na ni. Tongana mo yeke diko Bible na mo gbu li na ndo ni, mo nga mo lingbi kpengba mabe ti mo na yâ gango tâ tënë ti azendo ti Nzapa. Azendo so abâ gi pëpe ahale ti Abraham, me a bâ nga azo kue. Na kotara so akpe mbito ti lo, Jéhovah amû zendo so: “Na yâ ahale ti mo fade amara kue ti sese awara tënë nzoni, teti mo mä yanga ti Mbi.” (Genèse 22:18). Kozo mbage ti “hale” ti Abraham ayeke Messie, Jésus Christ.​—aGalate 3:16.

Na lege ti Jésus Christ, Jéhovah ayeke sala ande si adeba nzoni so atuku na ndo azo so amä yanga. Ye nyen Nzapa amû zendo ti sala na ngoi ti e? Michée 4:1, 2 akiri tënë na atënë ti prophétie so: “Na lâ ti nda ni fade tënë asi tongaso, A sala si hoto ti da ti L’Eternel aga li ti ahoto kue, na A yä hoto so na nduzu ahon ambeni hoto kue; na azo ague kâ tongana ngu so asua. Amara mingi ague, ala tene, I ga, zia e ma na Hoto ti L’Eternel, na da ti Nzapa ti Jacob; fade Lo fa lege ti Lo na e, na e tambela na lege ti Lo.”

Ala so amanda ye na ndo lege ti Jéhovah ayeke “pika épée ti ala si a ga soc, na likongo ti ala si a ga zeme ti fâ tikeke”. Anzara ti salango bira kue ayeke girisa biaku. Na yâ ngoi kete, fade sese ayeke si singo na azo ti mbilimbili, na zo oko ti zia mbito na bê ti ala ayeke dä pëpe (Michée 4:3, 4). Biani, Mbeti ti Nzapa amû zendo so, na gbe ti komandema ti Royaume ti Jésus Christ, fade Jéhovah ayeke lungula na ndo sese azo ti salango ngangu kue.​—Esaïe 11:6-9; Daniel 2:44; Apocalypse 11:18.

Même ala so ahu pono na awara kuâ ndali ti kengo yanga ti zo na mbage ti Nzapa, fade a yeke zingo ala na kuâ na beku ti duti na fini na ndo sese teti lakue lakue (Jean 5:28, 29). Satan na ayingo sioni ti lo, azo ti hurungo wâ na gbe ti sioni, ayeke duti ande dä pëpe. Na fade a yeke lungula, na lege ti sandaga ti kota ngele ti Jésus, ngangu so siokpari ti Adam ayeke sala na ndo zo (Matthieu 20:28; aRomain 3:23, 24; 5:12; 6:23; Apocalypse 20:1-3). Azo so amä yanga ayeke wara ande nyen? Biani, fade a yeke deba nzoni na ndo ala ti wara fini ti lakue lakue na ndo sese ti Paradis na yâ seni ti tele so ayeke mbilimbili-kue!​—Psaume 37:10, 11; Luc 23:43; Apocalypse 21:3-5.

So apendere zendo biani! Ye oko, mo lingbi ti mä na bê na ni? Biani mo lingbi. A yeke pëpe azendo ti azo so alingbi peut-être ti duti na anzoni bibe, me so ayeke na ngangu pëpe ti sala ni. A yeke azendo ti Nzapa ti Ngangu Ahon Kue so alingbi tene mvene pëpe na so “asala ye pëpe yeke yeke na ndo tënë ti zendo ti lo”. (2 Pierre 3:9, NW; aHébreu 6:13-18). Mo lingbi ti zia bê kue na yâ azendo kue so ayeke na yâ Bible, teti so Lingu ni ayeke ‘Jéhovah Nzapa ti tâ tënë!’​—Psaume 31:6.

[Kete tënë na gbe ni]

[Kete tënë na lembeti 6]

“Ye oko atï pëpe ti nzoye kue so L’Eternel Nzapa ti i aze na i”.​—JOSUÉ 23:14

[Afoto na lembeti 4, 5]

Jéhovah abata azendo ti lo na mbage ti Israël na Ngu Bengba nga na yando

[Afoto na lembeti 7]

Zendo ti Jéhovah na mbage ti Abraham aga tâ tënë. Fade hale ti lo Jésus Christ ayeke ga na adeba nzoni na ndo azo