Miracle na Kota Ngu-Bengba

Gï so Pharaon amä so azo ti Israël asigi na Égypte awe, lo changé yanga ti lo, lo ke ti zia ala ti gue. Lo mû yanga na aturugu ti lo, lo tene: ‘Ala leke apuse ti mbarata ti mbi, na zia e tomba peko ti ala! E doit fade ti zia ala ala hon ape.’ Lo na azo ti lo ni akomanse ti tomba peko ti azo ti Israël.

Na kota lâ, Jéhovah afa lege na azo ti lo na lege ti mbinda. A si na bï, lo yeke fa lege na ala na lege ti mbeni wâ. Lo gue na ala na mbage ti Kota Ngu-Bengba, na lo tene na ala ti sara mbeni camp.

Na pekoni, azo ti Israël abâ Pharaon nga na aturugu ti lo so ayeke tomba peko ti ala. Kota Ngu-Bengba ayeke na devant ti ala, aturugu ti Égypte ayeke na peko ti ala. Ala ngbâ ala dekongo na Moïse, ala tene: ‘E yeke kui! Ala doit fade ti zia e, e ngbâ na Égypte.’ Me Moïse atene na ala: ‘Ala sara mbeto ape. Ala luti kpô na ala bâ tongana nyen la Jéhovah ayeke sö e.’ Moïse azia lani bê ti lo biani na Jéhovah, ni la ape?

Jéhovah atene na azo ti Israël ti sara camp. Na bï ni so, Jéhovah amû mbinda ni lo zia ni na popo ti azo ti Israël na azo ti Égypte. Na mbage ti azo ti Égypte, ndo avuko pitipiti. Me na mbage ti azo ti Israël, lumière ayeke dä.

Jéhovah atene na Moïse ti yôro maboko ti lo na ndö ti ngu-ingo ni. Na pekoni, Jéhovah asara si mbeni kota pupu aya na bï ni so. Yâ ti ngu ni akangbi use, mbeni lege ahon na milieu ni. Azo ti Israël so ayeke gbani gbani ayeke tambela na ndö ti kuru sese na popo ti ngu so aluti tongana amur mbage na mbage.

Aturugu ti Pharaon amû peko ti azo ti Israël na ndö ti kuru sese. Na pekoni, Jéhovah asara si li ti aturugu ni aga kirikiri. Aroue ti apuse ti mbarata ti ala akomanse ti zi. Aturugu ni adekongo, atene: ‘E kpe! Jéhovah ayeke tiri ndali ti ala.’

Jéhovah atene na Moïse: ‘Mo yôro maboko ti mo na ndö ti ngu-ingo ni.’ Mo ye ti bâ, angu so aluti tongana mur so atuku na ndö ti aturugu ti Égypte. Pharaon nga na azo ti lo kue akui. Mbeni zo oko na popo ti ala angbâ ape.

Na mbage ti ngu ni kâ, gbâ ti azo ni ahe bia ti sepela Nzapa, ala tene: “Ala he bia na Jéhovah, ngbanga ti songo benda so amû na lo kota gloire. Lo bi mbarata na zo ti kpengo na mbarata ni na yâ ti ngu-ingo.” Na ngoi so azo ayeke he bia, awali ayeke dodo nga ala yeke pika mozoko na lege ti tambourin. Terê ti azo kue anzere mingi so fadeso ala yeke biani na liberté.