Yâ ti mbeni royaume akangbi

Na angoi kue so Salomon avoro Jéhovah, siriri ayeke na kodro ti Israël. Me Salomon amû awali mingi so ayeke ti kodro-wande. Na awali ni so avoro ayanda. Yeke na yeke sarango ye ti Salomon achangé na lo nga kue lo komanse ti voro ayanda. Ngonzo asara Jéhovah. Lo tene na Salomon: ‘A yeke zi ande royaume ti Israël na maboko ti amolenge ti mo nga yâ ni ayeke kangbi use. Mbi yeke mû mbage ni na mbeni wakua ti mbi nga ahale ti mo ayeke komande gï na ndö ti kete mbage ni.’

Jéhovah asara si desizion so lo mû aga polele na mbeni lege nde. Mbeni zo ti kua ti Salomon, so iri ti lo ayeke Jéroboam, ayeke voyagé na lege na ngoi so lo tingbi na prophète Ahijah. Ahijah asuru yâ ti yongoro bongo ti lo kete kete 12 na lo tene na Jéroboam: ‘Jéhovah ayeke mû royaume ti Israël so alondo na afami ti Salomon nga lo yeke kangbi yâ ni use. Lo yeke mû mbage ni bale-oko na mo ndali ti so mo yeke ga ande gbia ti akete mara bale-oko.’ Tongana Gbia Salomon amä tënë ni so, lo gi lege ti fâ Jéroboam. Tongaso, Jéroboam akpe lo gue na Égypte. Na pekoni Salomon akui na molenge ti lo Roboam aga gbia. Tongaso, Jéroboam abâ so lo peut ti kiri na Israël senge.

Amokonzi ti Israël atene na Roboam: ‘Tongana mo sara ye ti nzoni na azo ni, ala yeke duti be-ta-zo na mo.’ Me akamarade ti Roboam so ayeke amaseka atene na lo: ‘Mo doit ti sara ala pasi! Forcé ala ti sara ngangu kua!’ Roboam amû peko ti wango so akamarade ti lo amû na lo. Lo sara ye ti ngangu na azo ni, a sara si ala ke yanga ti lo. Ala soro Jéroboam ti ga gbia na ndö ti amara bale-oko ni, so a hinga ni na iri ti royaume ti Israël. Tanga ti amara use ni so a hinga ni na iri ti royaume ti Juda, na ala ngbâ be-ta-zo na Roboam. Fadeso, yâ ti amara 12 ti Israël akangbi awe.

Jéroboam aye ti tene azo ti lo ague avoro Nzapa na Jérusalem ape ndali ti so a yeke na yâ ti royaume ti Roboam. Mo hinga ngbanga ti nyen la lo ke? A yeke ngbanga ti so mbeto asara lo, lo pensé so ala yeke ke lo ti mû peko ti Roboam. Tongaso lo sara statue ti akete bagara use na lor na lo tene na azo ni: ‘Jérusalem ayo mingi. Ala peut ti voro Nzapa ge.’ Azo ni akomanse ti voro astatue ti akete bagara ti lor ni na ala kiri agirisa Jéhovah.