A-ange asara tënë ti dungo Jésus

César Auguste, so ayeke gbia ti kodro-togbia ti Rome, amû yanga ti tene aJuif kue akiri na gbata ti ala wani, tongaso si a zia iri ti ala na mbeti. Tongaso Joseph na Marie asara voyage ti gue na Bethléhem, kodro ti Joseph. Marie aga nduru mingi awe ti dü.

Na ngoi so ala si na Bethléhem, oko ndo so ala wara ti lango dä ayeke mbeni ndo so a yeke bata anyama dä. A yeke na ndo ni so la si Marie adü molenge ti lo Jésus. Lo kanga lo na ambeni nduru yanga ti bongo na lo zia lo yeke na yâ ti place so anyama ni ayeke te kobe dä.

Nduru na Bethléhem, ambeni berger ayeke lango na gigi, ala yeke bâ ndo na ndö ti anyama ti ala. Mo ye ti bâ, mbeni ange aluti na devant ti ala, na wâ ti gloire ti Jéhovah angoro ala kue. Mbeto ahon ndö ti aberger ni, me ange ni atene: ‘Ala sara mbeto ape. Mbi yeke na mbeni pendere sango. A dü Messie laso na Bethléhem.’ Droit, gbâ ti a-ange asigi na lê ti nduzu, ala tene: ‘Gloire na yayu, nga siriri na sese.’ Na pekoni a-ange ni angbâ agirisa. Nyen la aberger ni asara?

Aberger ni atene na popo ti ala, atene: ‘E londo e gue na Bethléhem.’ Ala ngbâ alondo ague hio, na ala wara Joseph na Marie nga na fini bébé ti ala na yâ ti ndo so a yeke bata anyama dä.

Li ti azo kue akpe tongana ala mä tënë ti aye so mbeni ange atene na aberger ni. Marie agbu li ti lo mingi na ndö ti atënë so ange ni atene so, lo girisa ni lâ oko ape. Aberger ni akiri na terê ti anyama ti ala, ala mû merci na Jéhovah ndali ti aye kue so ala bâ na ala mä so.