Jésus Christ: Lo ngbâ bébé wala lo ga gbia awe?

Lakue na nze ti décembre, azo na ndo ti dunia mobimba ayeke bâ afoto ti Jésus so a fa lo tongana mbeni bébé. A zia lo na yâ ti mbeni sanduku so a bata pere dä ti tene anyama ate. Na mo, a yeke nzoni e bâ Jésus lakue tongana mbeni bébé?—a Zia e bâ ye so adoit ti ga na li ti e tongana e pensé na lo. E lingbi ti hinga ni na lege ti ye so asi lani na ambeni berger na mbeni bï na yâ ti ngonda nduru na Bethléhem.

Gi gbagburu tongaso, mbeni ange asi na aberger ni. Lo tene na ala, lo tene: “A dü na ala laso, . . . mbeni Sauveur, so ayeke Christ Seigneur.” Ange ni atene nga na ala so ala yeke wara Jésus ni “so a kanga lo na bongo na lo yeke lango na yâ ti mbeni ndo ti tengo kobe ti anyama.” Gi na ngoi ni so, gbâ ti ambeni ange ni asi, na ala komanse ti “sepela Nzapa”.

Tongana mo mä a-ange ayeke sepela Nzapa, a yeke sara mo tongana nyen?— Tere ti aberger ni anzere! Ala tene: “Zia e sara kue ti gue na Bethléhem ti bâ ye so asi.” Na ngoi so ala si kâ, ala wara “Marie na Joseph nga na foroto ni so alango na yâ ti ye ti tengo kobe ti anyama.”

Ambeni zo nga kue aga na Bethléhem, kodoro so Marie na Joseph ayeke dä. Tongana aberger ni afa peko ti aye kue so asi na azo ni, a nzere na ala mingi. Mo kue, a nzere na mo ti mä mara ti pendere tënë tongaso? E kue so e ye Nzapa, a nzere na e. Fadeso, zia e bâ ndani so dungo Jésus anzere na azo mingi tongaso. Ti hinga ni, e yeke kiri na peko ti bâ ye so asi kozo si Marie amû koli.

Lani, mbeni ange so iri ti lo ayeke Gabriel asi na Marie. Lo tene na Marie so ande Marie ni ayeke dü mbeni molenge so lo yeke “ga kota na a yeke iri lo Molenge ti Lo so ayeke na nduzu na ndo ti aye kue.” Ange ni atene nga, atene: “Fade lo yeke komande . . . Nga, royaume ti lo ayeke hunzi lâ oko pëpe.”

Marie aye ti hinga wala ye ni so ayeke si ande tongana nyen, so lo de ti bungbi na mbeni koli pëpe so. Ni la Gabriel atene na lo: “Ngangu ti Lo so ayeke na nduzu na ndo ti aye kue ayeke zu ti duti na ndo ti mo.” Nga lo tene: “Molenge so mo yeke dü lo, lo yeke duti ande nzoni-kue, na a yeke iri lo Molenge ti Nzapa.” Ti mû fini ti Molenge ti Nzapa na yayu kâ ti zia na yâ ti Marie si lo kono ti ga bébé, a yeke mbeni kota miracle!

Na yâ ti afoto wala ascénette a yeke fa ka aberger nga na ambeni koli ota so a iri ala a tene amage, ala ga ti bâ Jésus. Mo bâ ni awe?— Na ngoi ti Noël, a yeke fa ka ni mingi. Me aye ni so ayeke tâ tënë ape. Agbia ni so ayeke azo ti gingo nda ti aye na lege ti atongoro, kua ti ala ni so Nzapa ake ni. Zia e bâ ye so asi na ngoi so ala si. Bible atene: “Na ngoi so ala lï na yâ ti da ni, ala bâ kete molenge ni na Marie, mama ti lo.’’ Ye so afa so na ngoi ni so Jésus ayeke lani pëpe mbeni bébé na yâ ti mbeni sanduku ti tengo kobe ti anyama, me lo kono kete awe, nga Joseph na Marie alango na yâ ti mbeni da nde.

Azo ti gingo nda ti aye na lege ti atongoro asara tongana nyen la si ala wara Jésus?— A yeke mbeni “tongoro” la afa lege na ala. Me “tongoro” ni ague na ala kozo na Gbia Hérode na Jérusalem awe si lo ga ti gue na ala na Bethléhem ni. Bible atene so Hérode aye lani ti wara Jésus ni ti tene lo fâ lo. Bâ kete si! Mo pensé zo wa la asara si tongoro so asigigi ti fa lege na akoli so ti gue na Hérode so?— A yeke lani tâ Nzapa, Jéhovah ape, me a yeke wato ti lo Satan Zabolo!

Laso Satan atara ti sara si azo angbâ ti bâ Jésus gi tongana mbeni kete bébé. Me ange Gabriel atene lani na Marie, atene: “Fade lo yeke komande . . . Nga, royaume ti lo ayeke hunzi lâ oko pëpe.” Laso Jésus ayeke Gbia kâ na yayu, na lo ga nduru awe ti futi awato ti Nzapa kue. Tongaso, tongana e pensé na Jésus, zia e bâ lo tongana Gbia, nga e sara tënë ni na ambeni zo.