Chapitre 5

Dungo Jésus—Na ndo wa nga lawa?

CÉSAR Auguste, togbia ti Rome, alu ndia ti tene azo kue akiri na kodoro so adu ala da ti zia iri ti ala na mbeti. Ni laa, Joseph amu lege ti gue na Bethléhem, ndo so adu lo da.

Azo mingi aga na Bethléhem ti zia iri ti ala na mbeti, na ndo oko so Joseph na Marie awara ti lango da na bi ni so ayeke ndo so abata alele na anyama da. A yeke ndo so si adu Jésus da. Marie akanga lo na bongo na azia lo na ya mbeni sanduku, ndo so azia kobe da teti anyama.

A yeke biani Nzapa so apusu César Auguste ti mu yanga ti zia iri ti azo na mbeti. Taa tene, gi na lege ti yanga so si adu Jésus na Bethléhem. Na Mbeti ti Nzapa afa giriri kozoni awe so gbia ti zendo ayeke baa ande gigi na gbata so.

Bi so ayeke kota mingi! Na gigi, na ya ayaka, mbeni kota wa aza na angoro bungbi ti azo ti batango ataba. A yeke gloire ti Jéhovah! Ange ti Jéhovah atene na ala: “Zia mbito, baa! mbi ga na i na nzo tene ti taa ngia teti azo kue. Teti adu Sauveur na i laso na kodoro ti David lo so ayeke Christ! Na so ayeke fa so amu na i: fade i wara molenge so ala kanga lo na bongo, na lo yeke lango na ya sanduku ti kobe ti abagara.” Kete na pekoni, wungo ti a-ange mingi abaa gigi na ala yeke he bia: “Gloire na Nzapa na yayu ka, na sese siriri na popo ti azo so aga nzoni na le ti lo.”

Tongana a-ange ague awe, awabatango taba atene na popo ti ala: “Zia e gue juska na Bethléhem, e baa ye so asi, ye so Jéhovah afa na e!” Tongaso ala mu loro na ala wara Jésus gi na ndo so ange afa na ala. Tongana awabatango taba afa ye so ange atene na ala, be ti azo kue so ayeke na ala ado. Marie abata atene so mbilimbili, na lo bi be ti lo da.

Azo mingi na ngoi ti e ama na be so adu Jésus na lango 25 ti nze ti décembre. Ye oko, nze ti décembre ayeke nze so de ayeke da mingi na ngu ayeke pika mingi na Bethléhem. Tongaso, awabatango taba alingbi pepee ti lango na gigi na bi na anyama ti ala na ngoi tongaso. Na ndoni, César ti Rome alingbi ti hunda pepee na mara so aduti ndulu ti ke yanga ti lo ti tambela na ngoi so de ayeke mingi ti zia iri ti ala na mbeti. Biani adu Jésus na nze ti septembre wala octobre. Luc 2:1-20; Michée 5:2.

▪ Ngbanga ti nyen Joseph na Marie ague na Bethléhem?

▪ Aye ti kpene wa asi na bi ni so adu Jésus?

▪ Ngbanga ti nyen e hinga so adu Jésus pepee na lango 25 ti nze ti décembre?