Ngbanga ti Nyen Petengo Goro Ayeke Mingi Tongaso?

“A LINGBI I KAMATA GORO PEPE, TETI GORO AYEKE VUKO LÊ TI ALA SO ABA NDO NZONI NA A BA YÂ TI TENE TI AZO TI MBILIMBILI.”​—Exode 23:8, NW.

A SALA ngu saki ota na ngbangbo oku awe, Ndia ti Moïse ake tene ti petengo goro. Teti asiècle mingi ngbele ye na ngoi ni kâ, andia ti kanga lege na petengo goro aba gigi mingi. Ye oko, lungo andia awara ngangu pepe ti kanga lege na petengo goro. Lâ oko oko, anginza kutu mingi ti petengo na goro ayeke tambela na yâ maboko ti azo, na azo ngbundangbu mingi ayeke ba pasi na pekoni.

Petengo goro akono amu ndo sese kue, na kode ti salango ni amaï mingi, tongaso a ga ndulu ti buba même gunda ti ye so abungbi azo na ndo oko. Na yâ ti ambeni kodoro, tongana zo azia ye na yâ ti sembe pepe, a lingbi pepe ti sala mbeni ye teti lo. Petengo goro na mbeni zo so ayeke na mbilimbili ndo alingbi ti zi lege na zo ti wara mbeni mandako, ti wara permis, ti wara mbeni contrat, wala ti sö benda na yâ mbeni fango ngbanga. Arnaud Montebourg, mbeni wagbungo koko na Paris, adema tele: “Petengo goro ayeke tongana mbeni kota bubango ye so ane na ndo bibe ti azo na a sala si ala nze.”

Petengo goro amu ndo mbilimbili mingi ahon na popo ti azo ti dengo buze. Tongana amu nginza kue ti ndo ni so ambeni ndokua ayeke wara, na akangbi yâ ni ota, ala zia mbage ni oko gi ti futa ye na akota zo ti ngorogbia so ayeke yeda na goro. Na lege ti mbeni mbeti-sango ti Grande-Bretagne (The Economist), tongana a mu angbundangbu 25 ti dollar ti Amérika so ayeke futa ngu oko oko na yâ dengo buze ti agbakuru ti bira na ndo sese kue na a kangbi yâ ni ngbangbo oko, ambage ni bale oko ayeke ti petengo na goro na ala so alingbi ti duti a-client. Na ngoi so petengo goro ague na li ni mingi, ye ti pekoni aga sioni mingi. Na yâ ti angu bale oko so ahon, a tene so capitalisme ti “akamarade,” kode ti dengo buze so goro ahon ndo ni, na so asala nzoni mbilimbili gi na mbeni kete wungo ti azo so ahinga akota zo, afuti konomi ti ambeni kodoro kue.

Biani, na mbeni lege so zo alingbi ti kpe ni pepe, azo so ayeke ba pasi mingi ahon ndali ti petengo goro nga na futingo yâ ti konomi so lo ga na ni ayeke awanzinga, ala so a yeke ngangu ti tene dutingo ti ala amu lege na ala ti pete goro na mbeni zo. Tongana ti so The Economist atene ni polele, “petengo goro ayeke gi mbeni oko ti alege ti sioni komandema.” A lingbi ti hon ndo ti mara ti sioni komandema tongaso, wala a lingbi pepe ti kpe petengo goro? Ti kiri tene na hundango tene so, a lingbi kozoni kue e hinga ambeni kozo gunda ti petengo goro.

Agunda ti Petengo Goro Ayeke so Wa?

Ngbanga ti nyen azo asoro ti tene apete goro na ala ahon ti tene ala sala ye na lege ni? Ti ambeni, ti tene mbeni zo apete goro na ala alingbi ti duti lege so ayeke ngangu pepe, wala a yeke biani gi oko lege, ti wara ye so ala ye. Ngoi na ngoi, petengo goro alingbi ti duti nzoni lege ti kpe sengo ndo. Ambeni zo mingi ayeke mu gi tapande ti azo ti poroso, azo ti polisi, na awafango ngbanga, teti ala ba so azo tongaso ayeke sala mbeni ye so akpa kangango lê na ndo petengo goro wala ala yeke sala ni.

Na ngoi so petengo goro ayeke gue na li ni na loro, azo mingi ahon ayeke yeda na ni si na nda ni a ga gi mbeni ye so zo kue ayeke sala. Azo so nginza so ala wara akono oko pepe, biani dutingo ti ala amu vundu, aga ti ba so mbeni lege nde ti sala ye ayeke dä pepe. A lingbi ala hunda goro tongana ala ye ti wara nginza so ayeke na lege ni. Na tongana a se pepe ala so ayeke hunda goro na ngangu wala ala so ayeke pete ni ti wara ye ti nzoni na mbeni lege so ayeke sioni, azo mingi pepe ayeke ndulu ti tiri ti ke petengo goro. Gbia Salomon aba: “Teti a fâ ngbanga fade pepe na ndo sio kusala, tongaso bê ti amolenge ti azo akpengba ti sala sioni.”​—Zo-ti-fa-tene 8:11.

Akota ngangu use angbâ lakue ti hulu wâ na gbe ti petengo goro: bibe ti kion nga na kota bê ti wara ye. Ndali ti bibe ti kion, azo so ayeke kamata goro akanga lê na ndo pasi so yengo na goro ayeke sala na ambeni zo, na ala yeke gbu koko ti petengo goro gi ngbanga ti so ala yeke wara ye ti nzoni na pekoni. Tongana azo so ayeke mu ka goro awara amosoro ti mitele mingi ahon, kota bê ti ala ti wara ye ayeke kiri akono nga mingi ahon. Salomon aba: “Zo so andoye argent, fade argent alingbi na nzala ti lo pepe; wala lo so andoye ye mingi, fade wungo ni alingbi na nzala ti lo pepe.” (Zo-ti-fa-tene 5:9 [5:10, NW]) Tâ tene, kota bê ti wara ye alingbi ti duti nzoni teti warango gbâ ti nginza, me mingi a kanga lê na ndo petengo goro nga na aye so ague nde na ndia.

Mbeni ye nde so a lingbi ahulu ndo ni pepe ayeke kusala ti mokonzi ti sese so lê aba lo pepe, lo so Bible atene ayeke Satan Diable. (1 Jean 5:19; Apocalypse 12:9) Satan ayeke hulu wâ ngangu mingi na gbe ti petengo goro. Petengo goro so ayeke kota ahon atanga ni kue ayeke ti so Satan azia la ni na gbele Christ. ‘Tongana mo kuku na sese, mo sambela mbi, fade mbi mu na mo ye so kue.’​—Matthieu 4:8, 9.

Ye oko, a lingbi la ni pepe ti pete goro na Jésus, na lo fa na adisciple ti lo ti sala tongaso nga. Fango ye ti Christ alingbi ti duti mbeni kpengba gbakuru teti tiringo na petengo goro laso? Article so aga na peko ayeke gi ande nda ti hundango tene so.