Mä na Bê na Atene ti Prophétie ti Nzapa!

“E yeke na atene ti prophétie so aga tâ ye mingi ahon.”​—2 PIERRE 1:19, NW.

1, 2. Kozo prophétie so asû na mbeti ayeke so wa, na mbeni oko ti ahundango tene so lo sigigi na ni ayeke so nyen?

JÉHOVAH ayeke giriri Lingu ti kozo prophétie so asû na mbeti. Na pekoni so Adam na Ève asala siokpari, Nzapa atene na ngbo: “Fade Mbi zia tene ti ke na popo ti mo na wali so, na popo ti hale ti mo na hale ti lo; fade lo mboko li ti mo, na fade mo mboko ndagere ti lo.” (Genèse 3:1-7, 14, 15) A lingbi angu ngbangbo mingi ahon kozoni si a gbu nda ti atene ti prophétie so nzoni.

² Kozo prophétie so ayeke na tâ beku teti azo so ayeke awasiokpari. Na pekoni, Tene ti Nzapa afa Satan Diable tongana “ngbo ti giriri.” (Apocalypse 12:9) Me zo wa ayeke duti Hale ti zendo ti Nzapa?

Gingo Hale Ni

3. Tongana nyen Abel afa na gigi mabe na yâ kozo prophétie ni?

³ Nde na babâ ti lo, Abel, so amu mbage ti Nzapa, afa na gigi mabe na yâ kozo prophétie ni. Abel aba biani so a hunda ti sa mênë ti kanga ndo ti siokpari. Tongaso mabe apusu lo ti mu mbeni nyama na sadaka so anzere na Nzapa. (Genèse 4:2-4) Ye oko, hingango Hale ti zendo ni angbâ mbeni ye so ahonde nda ni.

4. Nzapa amu na Abraham zendo wa, na a fa nyen na ndo Hale ti zendo ni?

⁴ Ndulu na angu 2 000 na peko ti ngoi ti Abel, Jéhovah amu na Abraham zendo ti prophétie so: “Fade mbi hiri deba nzoni biani na ndo mo, na fade mbi sala si hale ti mo awu mingi legeoko tongana atongoro ti yayu . . . Na fade biani amara kue ti sese ahiri deba nzoni na ndo ala mveni na lege ti hale ti mo.” (Genèse 22:17, 18, NW) Atene so azia kamba na popo ti Abraham na gango tâ tene ti kozo prophétie so. Ala fa so Hale ni, so na lege ti lo ayeke futi akusala ti Satan, ayeke sigigi na lege ti hale ti Abraham. (1 Jean 3:8) “[Abraham a] zia bê ti lo na zendo ti Nzapa, lo dë kite pepe, me lo kpengba na yâ mabe” nga atémoin ti Jéhovah so aga kozo na aChrétien asala tongaso, ala so “awara ye ti zendo ni pepe.” (aRomain 4:20, 21; aHébreu 11:39) Nde na so, ala bata mabe na yâ atene ti prophétie ti Nzapa.

5. Na yâ zo wa si zendo ti Nzapa ti Hale ni aga tâ tene, na ngbanga ti nyen mo kiri tene tongaso?

⁵ Bazengele Paul afa na gigi Hale ti zendo ti Nzapa tongana lo sû na mbeti: “Amu azendo ni na Abraham na hale ti lo. A tene pepe: ‘Na ahale,’ ti tene so ala yeke mingi, me a tene gi na oko: ‘Na hale ti mo,’ so ayeke Christ.” (aGalate 3:16, NW) Hale so na lege ti lo a lingbi amara ahiri deba nzoni na ndo ala mveni andu pepe ahale kue ti Abraham. A sala kusala pepe na ahale ti lo na lege ti molenge ti lo Ismaël nga na amolenge ti lo so lo wara na Qetoura ti hiri deba nzoni na ndo azo kue. Hale ti deba nzoni aga na lege ti molenge ti lo Isaac na tarä ti lo Jacob. (Genèse 21:12; 25:23, 31-34; 27:18-29, 37; 28:14) Jacob afa so “azo” ayeke mä yanga ti Shilo ti kete mara ti Juda, me na pekoni Hale ni angbâ gi na popo ti amolenge ti David. (Genèse 49:10; 2 Samuel 7:12-16) A-Juif ti kozo siècle ayeke ku giriri mbeni zo oko ti ga tongana Messie, wala Christ. (Jean 7:41, 42) Na prophétie ti Nzapa ti Hale ni aga tâ tene na yâ Molenge ti lo, Jésus Christ.

Messie Ni Asigigi!

6. (a) Tongana nyen a lingbi e gbu nda ti prophétie ti ayenga 70? (b) Lawa na tongana nyen Jésus “alungula siokpari”?

⁶ Prophète Daniel asû na mbeti mbeni kota prophétie na ndo ti Messie. Na yâ kozo ngu ti Darius ti Médie, Daniel aba so dutingo yangbato teti ngu 70 ti Jérusalem aga ndulu ti hunzi awe. (Jérémie 29:10; Daniel 9:1-4) Na ngoi so Daniel ayeke sambela, ange Gabriel aga na afa na gigi so ‘a diko yenga bale mbasambala ti sala si siokpari awe.’ A yeke lungula Messie na popo ti yenga 70 ni. “Mbeni ngoi ti ngu mbasambala fani bale mbasambala” ato nda ni na ngu 455 K.N.E., tongana Artaxerxès I, Gbia ti Perse, ‘atokua yanga ti kiri ti leke Jérusalem.’ (Daniel 9:20-27; La Bible en français courant; Néhémie 2:1-8) Messie ni ayeke ga na peko ti ayenga 7 nga ayenga 62. Angu 483 so alondo na 455 K.N.E. ti si na 29 N.E., tongana Jésus akamata batême na Nzapa asa yingo na ndo lo tongana Messie, wala Christ. (Luc 3:21, 22) Jésus ‘asala si siokpari awe’ na mungo fini ti lo tongana mbeni kota ngele na ngu 33 N.E. (Marc 10:45) So tâ anzoni nda ti tene ti mä na bê na atene ti prophétie ti Nzapa!a

7. Na salango kusala na Mbeti ti Nzapa, fa tongana nyen Jésus asala si prophétie ti Messie aga tâ tene?

⁷ Mabe na yâ atene ti prophétie ti Nzapa asala si lege ayeke dä teti e ti hinga Messie ni. Na ndo gbâ ti aprophétie na ndo Messie so a sû pekoni na yâ Mbeti ti Nzapa so asala na yanga ti Hébreu, aChrétien so asû Mbeti ti Nzapa na yanga ti Grec azia kamba polele na popo ti mingi ti ala na Jésus. Na tapande: mbeni masia adü Jésus na Bethléhem. (Esaïe 7:14; Michée 5:1 [5:2, NW]; Matthieu 1:18-23; Luc 2:4-11) A hiri lo ti sigigi na Égypte, na a fâ aforoto na peko ti dungo lo. (Jérémie 31:15; Osée 11:1; Matthieu 2:13-18) Jésus ayö akobela ti e. (Esaïe 53:4; Matthieu 8:16, 17) Tongana ti so a fa ni giriri, lo lï na Jérusalem na ndo mbeni molenge ti lele ti koli. (Zacharie 9:9; Jean 12:12-15) Atene ti wasungo psaume aga tâ tene na pekoni so apika Jésus na ndo keke ti pasi tongana aturugu akangbi yâ ti abongo ti lo na popo ti ala na ala bi ye na popo ti ala ti kangbi bongo ti lo ti ndo ni. (Psaume 22:19 [22:18, NW]; Jean 19:23, 24) So a fâ abio ti Jésus pepe na a koro kate ti lo a sala nga si prophétie aga tâ tene. (Psaume 34:21 [34:20, NW]; Zacharie 12:10; Jean 19:33-37) So ayeke gi ambeni tapande oko oko ti aprophétie ti Messie so aga tâ tene na ndo Jésus, so Nzapa apusu awasungo Bible ti sû ni.b

E Gonda Gbia Messie Ni!

8. Zo wa ayeke Lo Ti Giriri, na tongana nyen prophétie so asû na Daniel 7:9-14 aga tâ tene?

⁸ Na yâ kozo ngu ti Belshatsar gbia ti Babylone, Jéhovah amu na prophète ti lo Daniel mbeni bango li na akpengba suma. Prophète ni aba kozoni akota nyama osio. Ange ti Nzapa afa nda ti ala tongana “agbia osio,” na fango na gigi so ala yeke fä ti angangu ti komande so aga na peko ti tele. (Daniel 7:1-8, 17) Na pekoni Daniel aba Jéhovah, “Lo Ti Giriri,” na dutingo na ndo trône ti gloire. Na fango sioni ngbanga na ndo anyama ni, lo zi ngangu ti komande na maboko ti ala na lo futi nyama osio ni. A mu ngangu ti komande so aninga na ndo “azo kue, amara kue, na azo ti yanga nde nde kue” na mbeni “Zo oko tongana Molenge Ti Zo.” (Daniel 7:9-14) So mbeni pendere prophétie na ndo ziango “Molenge Ti Zo,” Jésus Christ, na mbata ti gbia na yayu na ngu 1914!​—Matthieu 16:13.

9, 10. (a) Ambage nde nde ti yanda ti suma ni agboto lê na ndo nyen? (b) Tongana nyen mo yeke fa nda ti gango tâ tene ti Daniel 2:44?

⁹ Daniel ahinga so Nzapa ayeke “lungula agbia, Lo yä agbia.” (Daniel 2:21) Na mabe na Jéhovah, zo so “afa tene ti lingo na gigi,” prophète ni afa nda ti bango li ti kota yanda so Neboukadnetsar Gbia ti Babylone awara. Ambage nde nde ti lo agboto lê na ndo londongo na tingo ti angangu ti komande tongana Babylone, Médo-Perse, Grèce, na Rome. Nzapa asala nga kusala na Daniel ti fa molongo ti aye so ayeke si na ndo sese juska na ngoi ti e, na même a hon ni.​—Daniel 2:24-30.

¹⁰ Prophétie ni atene: “Na lâ ti agbia so, fade Nzapa ti yayu ayä royaume so afuti lâ oko pepe, na Lo zia royaume ni na tïtî ambeni zo nde pepe; me fade royaume so afâ mbeni royaume so kue ndulu ndulu, na a sala si royaume nde nde so kue awe; na fade royaume so angbâ lakue lakue.” (Daniel 2:44) Tongana “angoi so adiko teti amara” ahunzi na ngu 1914, Nzapa aleke gere ti Royaume ti yayu na gbe ti Christ. (Luc 21:24, NW; Apocalypse 12:1-5) Na pekoni, na lege ti ngangu ti Nzapa, a lungula tênë ti Royaume ti Messie na tele ti “hoto” so ayeke kota yanga-ti-komande ti Nzapa ti ndagigi kue. Na Har-Maguédôn fade tênë so ayeke pika yanda so na a neka ni ti ga fuku. Tongana mbeni hoto ti ngorogbia so amu “sese kue,” Royaume ti Messie ni ayeke ngbâ ande teti lakue lakue.​—Daniel 2:35, 45; Apocalypse 16:14, 16.c

11. Gbiango tele ti Jésus ayeke giriri fä ti ye wa, na suma so asala nyen na ndo Pierre?

¹¹ Na bingo bê na ndo komandema ti Royaume ti lo, Jésus atene na adisciple ti lo: “Ambeni zo ayeke na popo ti ala so aluti na ndo so, so fade kui atara ala pepe juska ala ba Molenge Ti Zo aga na royaume ti Lo.” (Matthieu 16:28) Alango omene na pekoni, Jésus amu Pierre, Jacques, na Jean ti ma na mbeni hoto so ayo, so tele ti Jésus agbian na gbele ala kâ. Na ngoi so mbeni mbinda so aza mingi angoro abazengele ni, Nzapa atene: “So ayeke Molenge ti Mbi so Mbi ndoye Lo, Lo mu ngia na Mbi mingi. I mä Lo.” (Matthieu 17:1-9; Marc 9:1-9) So tâ mbeni fä ti gloire ti Royaume ti Christ! A yeke pepe ye ti dongo bê so Pierre asala tene ti suma so aza ngangu na lo tene: “Tongaso, e yeke na atene ti prophétie so aga tâ ye mingi ahon.”​—2 Pierre 1:16-19, NW.d

12. Ngbanga ti nyen a yeke mbilimbili ngoi ti fa na gigi mabe ti e na yâ atene ti prophétie ti Nzapa?

¹² “Atene ti prophétie” andu peut-être pepe gi aprophétie ti Mbeti ti Nzapa so asala na Hébreu na ndo Messie, me nga tene ti Jésus so atene lo yeke ga “na ngangu na gloire mingi.” (Matthieu 24:30) Gbiango tele ni akiri amu ngangu na atene ti prophétie na ndo gango ti Christ ti gloire na yâ ngangu ti Royaume. Na yâ ngoi kete mingi, fade fango lo na gigi na yâ gloire aye ti tene ande futingo teti azo so ayeke na mabe pepe, nga adeba nzoni teti ala so afa mabe na gigi. (2 aThessalonicien 1:6-10) Gango tâ tene ti prophétie ti Bible afa so ngoi ti e ayeke “lâ ti nda ni.” (2 Timothée 3:1-5, 16, 17; Matthieu 24:3-14) Kota Wasalango ye alingbi na fango ngbanga ti Jéhovah, Mikaël, so ayeke Jésus Christ, ayeke ndulu ti hunzi sioni bungbi ti aye so na ngoi ti “kota ye ti vundu.” (Matthieu 24:21, NW; Daniel 12:1) Tongaso, a yeke biani ngoi ti fa na gigi so e yeke na mabe na yâ atene ti prophétie ti Nzapa.

Bata Mabe na yâ Atene ti Prophétie ti Nzapa

13. Ye wa alingbi ti mu maboko na e ti bata ndoye ti e teti Nzapa na ti bata na fini mabe ti e na yâ tene ti lo?

¹³ Biani e yeke na kota ngia tongana e manda kozoni ye na ndo gango tâ tene ti atene ti prophétie ti Nzapa. Me ngbele ye na ngoi ni kâ ti si ge mabe ti e akiri na peko wala ndoye ti e aga dê? Zia si e ga lâ oko pepe tongana aChrétien na Éphèse so ‘azia kozo ndoye ti ala.’ (Apocalypse 2:1-4) Atä e ninga ngoi oke na yâ salango na Jéhovah, e lingbi ti glisa aye tongaso tongana e ‘ngbâ lakue pepe ti gi royaume na mbilimbili ti lo kozoni’ ti bungbi mosoro na yayu. (Matthieu 6:19-21, 31-33, NW) Mandango Bible na bê kue, mungo mbage lakue na abungbi ti Chrétien, na kusala ti fango tene ti Royaume na wâ ayeke mu ande maboko na e ti bata ndoye ti e teti Jéhovah, teti Molenge ti lo, na teti Mbeti ti Nzapa. (Psaume 119:105; Marc 13:10; aHébreu 10:24, 25) Na mbage, fade ye so ayeke mu maboko ti bata mabe ti e na fini na yâ tene ti Nzapa.​—Psaume 106:12.

14. Tongana nyen a yeke futa aChrétien so asa yingo na ndo ti ala teti mabe ti ala na yâ atene ti prophétie ti Jéhovah?

¹⁴ Legeoko tongana ti so atene ti prophétie ti Nzapa aga tâ tene giriri, tongaso e lingbi ti mä na bê na ye so lo sala tene ni kozoni teti kekereke. Na tapande, singo ti Christ na yâ gloire ti Royaume ayeke fadeso mbeni tâ ye, na aChrétien so asa yingo na ndo ti ala, so aduti be-ta-zo juska na kui, aba gango tâ tene ti zendo ti prophétie so: “Zo so ahon na ngangu, fade Mbi mu na lo lege ti te lê ti keke so amu fini, so ayeke na Paradis ti Nzapa.” (Apocalypse 2:7, 10; 1 aThessalonicien 4:14-17) Jésus amu na azo so ahon na ngangu matabisi ti “te lê ti keke so amu fini” na yâ “paradis ti Nzapa” so ayeke na yayu. Na lâ ti londongo ti ala na popo ti awakinda nga na lege ti Jésus Christ, ala wara fini so alingbi ti kui pepe nga a lingbi pepe ti futi, ye so Jéhovah, “Gbia ti lakue lakue, Lo so alingbi kui pepe, Lo so zo aba Lo pepe, gi Lo oko ayeke Nzapa” amu ni. (1 Timothée 1:17; 1 aCorinthien 15:50-54; 2 Timothée 1:10) So mbeni kota matabisi teti ndoye ti ala so angbâ lakue teti Nzapa nga mabe ti ala so ayengi lâ oko pepe na yâ atene ti prophétie ti lo!

15. Na ndo azo wa a leke gere ti “fini sese,” na azo wa ayeke afon ala?

¹⁵ Fade fade na peko ti so a yä na popo ti awakinda abe-ta-zo so asa yingo na ndo ti ala ti lï na yâ “paradis ti Nzapa” ti yayu, a zi tanga ti Israël ti yingo, so ayeke na ndo sese, na yâ “Babylone ti Kota,” bungbi ti alege ti vorongo ti wataka ti sese kue. (Apocalypse 14:8, NW; aGalate 6:16) Na ndo ala a leke gere ti “fini sese.” (Apocalypse 21:1, NW) Na lege so, a sigigi na mbeni “sese,” na a maï ti ga mbeni paradis ti yingo so ambumba na ndo sese kue laso. (Esaïe 66:8) Gbâ ti afon wakua ti Israël ti yingo, so ayeke tongana angasangbaga, ayeke sua fadeso na yâ ni, “na lâ ti nda ni.”​—Esaïe 2:2-4; Zacharie 8:23; Jean 10:16; Apocalypse 7:9.

A Sala Tene ti Kekereke ti Azo na yâ Atene ti Prophétie ti Nzapa

16. Abeku wa ayeke teti azo so amu maboko na be-biani na ala so asa yingo na ndo ti ala?

¹⁶ Abeku wa ayeke teti azo so amu maboko na be-biani na ala so asa yingo na ndo ti ala? Ala nga ayeke na mabe na yâ atene ti prophétie ti Nzapa, na beku ti ala aluti na ndo ti lingo na yâ sese ti Paradis. (Luc 23:39-43) Na yâ ni fade ala yeke nyon “ngu so amu fini” so ayeke bata zo na fini, na fade a kaï kobela ti ala na lege ti ‘akugbe ti akeke’ so a lu na tele ni. (Apocalypse 22:1, 2) Tongana mo yeke na mara ti pendere beku so, zia mo ngbâ ti fa na gigi kota ndoye teti Jéhovah nga mabe na yâ atene ti prophétie ti lo. Zia mo duti na popo ti ala so awara kota ngia ti fini ti lakue lakue na yâ sese ti Paradis.

17. Fini na yâ Paradis ti sese ayeke ndu adeba nzoni wa?

¹⁷ Azo so ayeke mbilimbili-kue pepe alingbi biani pepe ti fa peko ti fini na yâ sese ti Paradis so ayeke ga, me atene ti prophétie ti Nzapa amu lege na e ti ba nda ti adeba nzoni ti ngoi ni kâ, so a bata teti azo so amä yanga. Na ngoi so Royaume ti Nzapa akomande na awato ayeke dä pepe, nga a sala na sese ye so bê ti lo aye tongana ti so a sala na yayu, fade azo ti sioni, atä anyama, ‘asala sioni oko pepe wala asala pepe si afuti ye.’ (Isaïe 11:9, NW; Matthieu 6:9, 10) Fade azo ti be-ti-molenge aduti na ndo sese, na “biani fade ala wara kota ngia na yâ ti siriri so asi singo.” (Psaume 37:11, NW) Fade azo mingi mingi so ayeke na nzala ayeke dä mbeni pepe, teti “fade ale-kobe awu mingi na ndo sese; fade a si singo na li ti ahoto.” (Psaume 72:16, NW) Fade azo ayeke tuku mbeni pepe ngu-le ti vundu. Kobela ahon awe, na même kui ayeke mbeni pepe. (Esaïe 33:24; Apocalypse 21:4) Mo lingbi ti bi bê kete so awanganga, ayorö, ada-nganga wala ando ti azo ti kobela ti li, na totongo kuâ ayeke mbeni pepe. So tâ apendere beku!

18. (a) A dë bê ti Daniel na ndo ye wa? (b) “Ndo” ti Daniel ayeke duti ande nyen?

¹⁸ Même yâ ti du-kua teti azo kue ayeke duti ande senge na ngoi so kui azia place na londongo ti awakinda. Job, zo ti mbilimbili, ayeke giriri na mara ti beku so. (Job 14:14, 15) Prophète Daniel nga, teti ange ti Jéhovah amu na lo dengo bê so: “Me mo gue ti mo juska nda ni asi; teti fade mo hu tele ti mo, na fade mo luti na ndo ti mo, na nda ti lâ ni.” (Daniel 12:13) Daniel asala na Nzapa na be-ta-zo juska na nda ti fini ti lo. Fadeso lo yeke hu tele na yâ kui, me fade lo “luti” na “lâ ti londongo ti awakinda ti mbilimbili” na ngoi ti Komandema ti Ngu Saki Oko ti Christ. (Luc 14:14) Fade “ndo” ti Daniel ayeke nyen? Na yâ gango tâ tene ti lo ti Paradis, prophétie ti Ézékiel afa so fade azo kue ti Jéhovah ayeke wara mbeni ndo, na a kangbi sese ni na lege ni nga na mungo pepe mbage ti mbeni zo. (Ezéchiel 47:13–48:35) Tongaso Daniel ayeke wara ande mbeni ndo na yâ Paradis, me ndo ti lo ayeke ndu ye mingi ahon gi sese. Fade a yeke ndu place ti lo na yâ ye so Jéhovah aleke ti sala.

19. Ye wa ahunda ti duti na fini na Paradis ti sese?

¹⁹ Ti mo na ti ndo ti mo a yeke tongana nyen? Tongana mo yeke na mabe na yâ Tene ti Nzapa, Bible, mo yeke biani na kota nzala ti wara fini na yâ Paradis na ndo sese. Mo lingbi même ti ba tele ti mo na yâ ni, na warango adeba nzoni mingi ti lo, na batango sese, na yambango na ngia awakinda so azingo. Teti biani, Paradis ayeke ndo ti azo. Nzapa aleke giriri kozo koli na kozo wali ti duti na yâ mara ti ndo tongaso. (Genèse 2:7-9) Na lo ye si azo so amä yanga aduti na yâ Paradis teti lakue lakue. Fade mo yeke sala ye alingbi na Mbeti ti Nzapa si mo lingbi ti duti na popo ti azo ngbundangbu mingi so ayeke duti na fini ande na yâ Paradis ti sese? Mo lingbi ti duti dä tongana mo yeke na tâ ndoye teti Babâ ti e ti yayu, Jéhovah, nga mbeni mabe so angbâ lakue na yâ atene ti prophétie ti Nzapa.

[Akete Tene na Gbe Ni]

Mo Yeke Kiri Tene Tongana Nyen?

• Kozo prophétie ayeke so wa, na zo wa ayeke Hale ti zendo ni?

• Ambeni prophétie wa ti Messie aga tâ tene na ndo Jésus?

• Fade Daniel 2:44, 45 ayeke ga tâ tene tongana nyen?

• Atene ti prophétie ti Nzapa agboto lê na ndo kekereke wa teti azo so amä yanga?

[Foto na lembeti 16]

Mo yeke na beku ti duti na fini na yâ Paradis na ndo sese?