E Yeke Mara ti Azo So Ayeke na Mabe
Fango Nzo Tene na yâ Ayaka ti Lôso ti Taïwan
MINGI ni, Taïwan ayeke wara gbâ ti ngu-nduzu, so amu lege na azo ti kodoro ni ti ko apendere kobe ti lôso use na yâ ngu oko oko. Ye oko, ngoi na ngoi, ngu-nduzu ni ayeke tï pepe na ngoi so alingbi a tï, na afini lë ti kobe ni akui. Tongana ye so asi, wafango yaka ni ayeke zia ti sala kusala? Pepe. Lo hinga a hunda na lo ti ngbâ ti sala kusala. Lo sala si afini le-kobe amaï na lo kiri lo lu ye na yâ ayaka ni. Na pekoni, tongana dutingo ti aye ni aga nzoni, wafango yaka ni ayeke ko mbeni nzoni le-kobe. Ngoi na ngoi, lungo na kongo le-kobe na lege ti yingo ayeke nga tongaso.
Gbungo Ngangu na yâ Kongo Le-kobe na Lege ti Yingo
Teti angu mingi, aTémoin ti Jéhovah na Taïwan asala kusala ngangu ti lu na ti ko le-kobe ti tâ tene ti Mbeti ti Nzapa na yâ ambeni ndo so aba ni tongana ando so alë lengo pepe. Mbeni tapande ni ayeke ti kete kodoro ti Miao-li. A wara la ni gi kete kiringo tene na ngangu so aTémoin asala ngoi na ngoi ti fa tene na yâ ndo so. Tongaso, na ngu 1973, a tokua mbeni koli na wali ti lo so ayeke apionnier spécial ti sala kusala kâ tongana awafango tene ti ngoi kue ti Royaume. Na tongo nda ni, ambeni zo afa na gigi nzala teti nzo tene ni. Ye oko, ngoi kete na pekoni, nzala ti tene ni akui. Tongaso, a tokua apionnier spécial ni na mbeni ndo nde.
Na ngu 1991, a tokua ambeni apionnier spécial nde kâ. Me na ndo so nga, agbiango ye afa so dutingo ti ndo ni alingbi pepe na maïngo ti aye na lege ti yingo. Angu kete na pekoni, a tokua apionnier spécial so na ambeni ndo nde so beku ayeke dä ti tene a duti ayaka so alë mingi ahon. Tongaso, kodoro ni awo tele ti lo teti mbeni ngoi.
Afini Ngangu so A Sala Aga na Nzoni Lengo
Na nze ti septembre ti ngu 1998, a mu desizion ti sala ngangu ti wara na yâ ti kota territoire ti Taïwan, so ade ti mu ni na mbeni wafango tene pepe, ando so alingbi ti lë mingi ahon. Tongana nyen a lingbi asala kusala so? Na hiringo apionnier spécial teti kete ngoi so wungo ti ala ayeke ndulu na 40 ti sala kusala na yâ aterritoire so a de ti mu na mbeni wafango tene pepe, na so wungo ti azo so alango dä ayeke mingi ahon.
Ambeni gbata use so ayeke na tele ti tele na yâ kete kodoro ti Miao-li ayeke la ni na popo ti aterritoire so a soro ni teti kota kapa ti fango tene. A tisa aita-wali kumbamba osio ti sala kusala kâ teti anze ota ti tara territoire ni. Ngoi kete na peko ti singo ti ala, ala sû na mbeti atondo ti wâ na ndo wungo ti azo so asala nzala ti tene, so ala wara. Na ngoi so ala hunzi anze ota ti kusala ti ala ti pionnier na yâ ndo ni, ala yeke manda Bible na azo mingi na yanga-da. Ala zia nga na sese mbeni bungbi ti mandango buku na lege ti mungo maboko ti mbeni ancien so alondo na mbeni kongrégation so ayeke ndulu.
Ota na popo ti aita wali so afa polele so ala ye ti ala ti ngbâ ti sala kusala ti bata apendere “fini le-kobe” so ayeke maï nzoni. Tongaso, a hiri use na popo ti ala ti sala kusala tongana pionnier spécial lakue, na ota ita-wali ni angbâ ti sala na ndo ni tongana mbeni pionnier permanent. Mbeni ancien ti kongrégation so ayeke ndulu na ndo ni aga juska kâ ti mu maboko na ala. Wungo ti azo ahon 60 aga ti mä kozo kota diskur so a mu na yâ ndo ni so. Fadeso, kongrégation so ayeke ndulu na ni ayeke mu maboko na kete wungo ti azo so ti ngbâ ti sala abungbi ti dimanche lakue lakue, nde na abungbi ti mandango buku nde nde. Na yâ ngoi kete, peut-être a yeke leke mbeni fini kongrégation na ndo ni.
Gbungo Ngangu Aga na Adeba Nzoni na Ambeni Mbage Nde ti Taïwan
Ambeni ndo nde akiri tene legeoko tongaso nga. Na kete kodoro ti I-lan na banga-to ti zoa ni, a zia na sese mbeni fini Bungbi ti Mandango Buku na ndo so ambeni pionnier spécial teti kete ngoi ayeke sala kusala dä.
Na ngoi so lo yeke fa tene da na da na mbeni lakui, mbeni pionnier spécial teti kete ngoi atingbi na mbeni pendere koli, na lo fa na lo mbeni kete mbeti so ayeke na molongo ti abungbi ti kongrégation. Pendere koli so hunda hio: “Mbi lingbi ti ga na bungbi kekereke na bï? Tongana mbi lingbi ti ga, bongo wa a lingbi mbi yü?” Na nda ni, na yenga oko oko, pionnier ni ayeke manda Bible na azo miombe so asala nzala ti tene. Na yâ ngoi kete, ambeni oko oko ti awamandango Bible ni asala programme ti ga awafango nzo tene ala mveni, na ziango na gbele ala ti wara batême.
Mbeni wali na yâ oko gbata so ayeke gue na église lakue teti angu mingi, me lo lingbi pepe ti wara mbeni zo ti fa na lo Bible. Tongana lo mä tene na ndo lekengo ye so andu mandango Bible, lo gbu ngoi ni so. A wa lo ti leke aye ti manda ni kozoni na lango ti mandango ye ni. Tongana pionnier spécial teti kete ngoi asi teti mandango Bible ni, lo ba so wali ni asala “adevoir” ti lo ni na vongo mbeni kete mbeti so na yâ ni lo sû ahundango tene ti yâ ti buku ti mandango ye ni. Na pekoni, lo sû na mbeti akiringo tene ti lo na ahundango tene oko oko kue. Lo sû nga na yâ kete mbeti ti lo ni aversê kue so ayeke na yâ ti ye ti lo ti manda. Na ngoi so ita-wali ni aga ti sala kozo mandango ye ni, wali ni aleke awe akozo ye ti manda ota!
A ba nga ambeni mara ti lengo tongaso na yâ gbata ti Dongshih so ayeke na bê ti Taïwan. A-pionnier spécial teti kete ngoi azia abrochure ahon 2 000 na yâ anze ota so ala sala kusala kâ. Na ota nze ni, ala yeke manda Bible na yanga-da ti azo 16. Mbeni yengingo ti sese so asi na bê ti Taïwan na lango 21 ti septembre 1999 afuti gbata ni mingi, me ambeni zo so asala nzala ti tene angbâ ti gue na li ni na lege ti yingo, atä so a lingbi ala tambela teti ngbonga oko ti ga na abungbi na Da ti Royaume so ayeke ndulu na ala. Biani, a hunda gbungo ngangu ti ko mbeni pendere le-kobe, atä na lege ti mitele wala na lege ti yingo.
[Carte na lembeti 8]
(Ti ba tene ni mbilimbili, ba buku ni)
CHINE
Détroit ti Taïwan
TAÏWAN
[Lingu ti foto]
Mountain High Maps® Copyright © 1997 Digital Wisdom, Inc.