Adeba nzoni ti kusala ti pionnier
1, 2. Adeba nzoni wa ague biani oko na kusala ti pionnier, na ngbanga ti nyen?
1 Mbeni pionnier atene: “Mbi hinga so mbeni kusala nde alingbi pëpe ti ga na mbi nzerengo tele so aga na lege ti kangbingo tâ tënë na ambeni zo.” Mbeni nde atene: “Na hunzingo ti lango oko oko, mbi lango nzoni, na bê ti mbi asi singo na ngia.” Apionnier so asala tënë na iri ti aita ti ndo ti sese kue so awara adeba nzoni ti kusala ti pionnier.—aPr. 10:22.
2 Ti mû maboko na ambeni zo nde ti wara hingango ye ti Tënë ti Nzapa so amû fini aga na tâ ngia (Kusala 20:35; 1 aThes. 2:19, 20). Mbeni ita-koli so lo yeke pionnier teti angu mingi asû na mbeti: “A yeke ye ti kota ngia nga ti kpengbango mabe ti bâ tongana nyen Tënë ti Nzapa ayeke na ngangu ti pusu azo ti gbian aye na yâ fini ti ala.” Biani, na mungo tele ti ala mveni ti mû maboko na azo nga ti mû li ni na yâ amandango Bible, apionnier ayeke wara na pekoni adeba nzoni.
3, 4. Na lege wa kusala ti pionnier afa na zo ti zia bê kue na Jéhovah, nga amû maboko na zo ti maï na lege ti yingo?
3 Ziango bê kue na Jéhovah: Ziango bê lâ oko oko na Yingo ti Nzapa ti sala na kusala ti ala amû maboko na apionnier ti gi ti lë “lengo ti Yingo” nga aduti tongana mbeni batango ndo teti ala (aGal. 5:16, 22, 23). Na ndo ni, teti so ala yeke sala kusala lakue na Tënë ti Nzapa, mingi ni apionnier alingbi kue ti sala kusala na Mbeti ti Nzapa ti fa nda ti tâ tënë nga ti mû ngangu na ambeni zo (2 Tim. 2:15). Mbeni ita-koli so ayeke pionnier asala angu mingi awe atene: “Kusala ti pionnier amû maboko na mbi ti hinga Bible nzoni mingi, na mbi sala kusala na ye so ti mû maboko na azo mingi ti hinga Jéhovah na aye so lo leke ti sala.” So tâ ye ti ngia!
4 Apionnier permanent alingbi nga ti zia bê kue na Jéhovah na ambeni lege nde. Mabe ti ala ayeke kpengba tongana ala bâ lege so lo hiri deba nzoni na ndo angangu so ala yeke sala ti wara na aye ti mitele so atia ala. Mbeni ita-koli so ngu ti lo ayeke 72 na so lo yeke pionnier teti angu 55 atene: “Jéhovah azia lâ oko pëpe vundu na bê ti mbi.” Na ndo ni, na dutingo na mbeni fini so akpengba pëpe, apionnier abata ala mveni yongoro na agingo bê ti fini. Ye tongaso anzere na mo?—Mat.6:22; aHéb. 13:5, 6.
5. Tongana nyen kusala ti pionnier amû maboko na zo ti ga ndulu na Jéhovah?
5 E ga ndulu na Nzapa: Songo ti e na Jéhovah ayeke mbeni ye ti ngele ngangu so e yeke na ni ahon atanga ni kue (Ps. 63:4). Songo ti e na Jéhovah ayeke ga nzoni mingi tongana, ndali ti ndoye so e yeke na ni na mbage ti lo, e mû mbage ti e kue na yâ fango tënë (Jacq. 4:8). Mbeni ita-koli so ayeke pionnier ahon angu 18 awe atene: “Kusala ti pionnier amû lege na e ti ‘tara na ti bâ so Jéhovah ayeke nzoni,’ na lekengo lâ na lâ na Wasalango e mbeni songo so akpengba lakue ahon ti kozo.”—Ps. 34:9.
6. Ye wa a lingbi apionnier aduti na ni, nga nde na apionnier ni mveni, azo wa ayeke wara ye ti nzoni?
6 A lingbi dutingo ti apionnier amû lege na ala ti ngbâ na yâ kusala ni. Na nga a lingbi ala yeke na mabe so akpengba, tâ ndoye teti Nzapa nga teti azo so ayeke ndulu na ala, nga na mbeni nzoni bibe ti gbanzingo ye na tele (Mat. 16:24; 17:20; 22:37-39). Ye oko, tongana ti so lê ti apionnier so ayeke na ngia na ndo kue afa ni, adeba nzoni ti kusala ti pionnier ahon aye so ala gbanzi na tele ti ala (Mal. 3:10). Adeba nzoni so angbâ gi na apionnier pëpe, asewa ti ala nga na kongregation kue ayeke wara ye ti nzoni na lege ti nzoni bibe so apionnier ayeke fa na gigi.—aPhil. 4:23.