Jéhovah Amu Ngangu na Azo
1 Mo ba bazengele Paul tongana nyen? Tongana e diko buku ti Kusala, e yekia wâ so lo yeke na ni na yâ kusala ti Jéhovah. Tongana nyen Paul asala aye so kue? Lo tene: “Mbi wara ngangu teti aye kue na lege ti lo so amu na mbi ngangu.” (aPhil. 4:13, NW) E nga e lingbi ti wara nzoni na lege ti ngangu so Jéhovah amu. Tongana nyen? Na warango ye ti nzoni na lege ti aye omene so lo leke ti tene e kiri e wara ngangu na e kpengba na lege ti yingo.
2 Tene ti Nzapa: Legeoko tongana ti so a lingbi e te kobe ti bata ngangu ti e ti mitele, a lingbi e kpengba tele ti e na Tene ti Nzapa ti ngbâ na fini na lege ti yingo. (Mat. 4:4) Bible amu ngangu so alingbi ti kpengba e. Ti bata lakue wâ ti e teti tâ tene, a lingbi e bi tele ti e na yâ mandango ye e mveni nga na gbungo li so mbilimbili nda ni ayeke dä. A yeke nzoni ti sala ni lâ oko oko tongana lege ayeke dä.—Ps. 1:2, 3.
3 Sambela: A yeke kota ye ti ga ndulu na Jéhovah, mbilimbili na angoi ti angangu kpale.Na lege ti yingo ti lo, lo mu ngangu na azo so ahunda ni na yâ sambela. (Luc 11:13; aEph. 3:16) Mbeti ti Nzapa awa e ti “zia ti sambela pepe.” (aRom. 12:12) Mo yeke sala ni?
4 Kongrégation: E wara nga ngangu na mungo maboko na lege ti abungbi ti kongrégation nga na lege ti songo ti wâ so e wara ni kâ na aita ti e ti koli na ti wali. (aHéb. 10:24, 25) Tongana e yeke na yâ ti akpale, ala kpengba e nga na lege ti ndoye ala mu maboko na e.—aProv. 17:17; Zo-ti. 4:10.
5 Kusala ti fango tene: Mungo mbage lakue na yâ kusala ti fango tene amu maboko na e ti bata lê na ndo Royaume nga na adeba nzoni ti lo. E kiri e wara ngia tongana e mu maboko na azo ti manda ye na ndo Jéhovah. (Kus. 20:35) A yeke pepe e kue si e lingbi ti gue na ndo so a hunda ti fa tene dä mingi wala ti mu kusala ti ngoi kue, me e lingbi na ambeni lege nde ti mu mbage biani na yâ kusala ti fango tene.—aHéb. 6:10-12.
6 Asurveillant Chrétien: E wara ye ti nzoni na lege ti wango so akpengba zo na maboko so a-ancien ayeke mu. Jéhovah ahiri ala ti bata kundu ti Nzapa so a zia ni na maboko ti ala. (1 Pi. 5:2) Asurveillant so ague na ndo nde nde akpengba akongrégation so ala sala kusala dä, legeoko tongana ti so Paul asala giriri na ngoi ti lo.—aRom. 1:11, 12.
7 Atapande ti abe-ta-zo: A yeke ye ti mungo ngangu na e ti ba anzoni tapande ti afon e wakua be-ta-zo ti giriri na ti laso nga. (aHéb. 12:1) Tongana mo ye ti kiri ti wara ngangu, ngbanga ti nyen pepe ti diko ambaï ti azo na yâ ti apériodique ti e, mbeni ye so asi so akpengba zo na yâ ti Annuaire, wala ambeni pendere mbaï ti aTémoin ti Jéhovah ti ngoi ti e na yâ ti buku Prédicateurs?
8 Mbeni ita-koli, so fadeso lo yeke na ngu 90 na ndo ni, ayeda na tâ tene na ngoi so lo de pendere. Na ngoi ni kâ, a tara mabe ti lo. Kozoni kue, ambeni ita so amu la ni mbage ti ala mingi na yâ ti kongrégation azia bungbi ti Jéhovah. Na pekoni, a to nda ti sala kusala ti fango tene da na da, kusala so lo ba a yeke la ni ngangu na lo mingi. Ye oko, lo zia bê ti lo lakue na Jéhovah. Na yâ ngoi kete, kusala ni anzere na lo. Ka laso, a yeke tongana nyen? Atä so seni ti lo ayeke nzoni mbeni pepe, lo ngbâ lakue mbeni oko ti sewa ti Béthel ti Brooklyn, na salango kusala tongana oko ti Wabatango Bungbi. Vundu asala lo oko pepe so lo ngbâ lakue ndulu na bungbi ti Jéhovah.
9 Mbeni ita-wali so ayeke mbeni oko ti sewa ti Béthel ti Grande Bretagne akamata la ni batême na ngoi so lo yeke na ngu 13. Na ngu ti peko, lo to nda ti sala kusala ti pionnier legeoko na yaya ti lo ti koli, nga na ngu ti pekoni, a kanga babâ ti lo teti so lo duti nde na ngoi ti Use Bira so Amu Sese Kue. Lo ngbâ ti zia bê ti lo na Jéhovah ti wara ngangu, na lo ngbâ lakue ti sala na tâ Nzapa. Na pekoni, lo sala mariage na mbeni ita-koli so ayeke be-ta-zo, nga ala use angbâ ti sala lakue ye so bê ti Jéhovah aye. Na peko ti angu 35 ti mariage, koli ti lo akui gi tongaso san kobela. Ti so nga lo wara ngangu na lege ti Jéhovah, na lo ngbâ ti sala na Lo juska na ngoi so, na bibe ti sala lakue tongana mbeni oko ti sewa ti azo ti Jéhovah na ndo sese.
10 Jéhovah ayeke mu maboko nga ngangu na awakua be-ta-zo ti lo. “Lo mu ngangu na zo so anze; na zo so ayeke na ngangu pepe, Lo sala si ngangu ti lo awu.” E lingbi ti wara ngangu na yâ lingu ti ngangu so katikati ni ayeke pepe na warango ye ti nzoni na lege ti aye omene so afa ge. Dabe mo: “Azo so aku L’Eternel, fade ala kiri ala wara ngangu; . . . fade ala kpe, me ala nze pepe; fade ala tambela, me ngangu ti ala awe pepe.” (Es. 40:29-31) Paul azia la ni bê ti lo kue na Jéhovah ti wara ngangu, na a lingbi e sala tongaso nga.