Mbeni Tokua so Ayeke Nde

NA HUNZINGO ti kota bungbi so ayeke sala ni ngu oko oko ti Watch Tower Bible and Tract Society ti Pennsylvanie, na lango 7 ti nze ti octobre 2000, président ni, John E. Barr, ti Wabatango Bungbi, amu mbeni tokua so ayeke nde. Tokua so aluti na ndo adiskur so Théodore Jaracz na Daniel Sydlik amu ni kozo, gi na yâ lango ni so.​—Ba alembeti 6-10 na 29-32 ti périodique so.

Na fango na gigi mbeni kpengba tene, Ita Barr atene: “A mu na ‘ngba ti be-ta-zo na ti ndara’ nga na Wabatango Bungbi ti lo aye so ayeke kota mingi ahon na so a bungbi aye mingi ahon aye so a mu na abungbi so ndia azi lege na ni. Na yâ aye so aleke ti sala na lege ti mama-ndia ti amara ti bungbi tongaso so ndia azi lege na ni, a yeke wara atene so ngangu ti sala kusala na ala ayeke na katikati ti lo. Me, Maître ti e, Jésus Christ, azia na sese bungbi ti ngba ti be-ta-zo na ti ndara ti ba ndo na ndo “aye ti lo kue,” so ti tene aye ti Royaume ge na sese.”​—Matthieu 24:45-47.

Na ndo bungbi ti Pennsylvanie so ndia azi lege na ni, Ita Barr atene: “A to nda ni na ngoi so ndia ti Letäa azi lege na ni na 1884, Watch Tower Bible and Tract Society ti Pennsylvanie asala kota kusala mingi na yâ mbaï ti e ti ngoi ti laso. Ye oko, a yeke gi mbeni senge ye ti kusala so ndia azi lege na ni, so ‘ngba ti be-ta-zo na ti ndara’ ayeke sala na kusala tongana a hunda.”

Na yâ adiskur ti ala, Ita Sydlik na Ita Jaracz afa so mungo na “ngba ti be-ta-zo na ti ndara” aye kue ti Seigneur so ayeke na sese akanga lege pepe na bungbi ti ngba so ti mu lege na ambeni ita so alingbi na so ayeke ti “ambeni ngasangbaga” ti yö ambeni kota kungba ti bango lege ti kusala so ayeke sala ka lakue. (Jean 10:16) Nga, a yeke wara oko pepe na yâ Bible mbeni tene so alingbi aluti na ndo ni ti hunda si awayinda kue wala ambeni na popo ti azo ti abungbi so ndia azi lege na ni ti aTémoin ti Jéhovah aduti gi aChrétien so asa yingo na ndo ala.

Ita Barr atene na bungbi ti azo so aga ti mä tene so, a de ti ninga pepe, ambeni zo ti Wabatango Bungbi ti aTémoin ti Jéhovah so asala kusala tongana wayinda na so ayeke na kungba na yâ bungbi ni azi tele ti ala yamba na yâ abungbi kue so ndia azi lege na ni, so “ngba ti be-ta-zo na ti ndara” ayeke sala na kusala na États Unis. A soro na place ti ala ambeni ita so alingbi, na so ayeke ti ambeni ngasangbaga.

Desizion so ayeke biani ye ti nzoye mingi. A yeke mu lege na azo ti yâ ti Wabatango Bungbi ti mu ngoi mingi ahon ti leke kobe ti yingo na nga ti ba lege ti aye ti yingo teti bungbi ti aita ti ndo lê sese kue.

Ti ko nda ni, président ni atene na azo so ayeke na ngia na so aga: “Atä so a mu na aita biazo akungba nde nde so ndia azi lege na ni nga ti bango lege ti kusala, . . . ala kue ayeke sala kusala na gbe ti fango lege ti yingo ti Wabatango Bungbi. . . . Ala kue ayeke ba ndo na mbage ti Jéhovah na yâ sambela ti wara deba nzoni ti lo na ndo ngangu so e yeke bungbi oko ti sala ye so bê ti lo aye, teti gonda na gloire ti kota iri ti lo.”