Duti na Ngia na yâ Nzapa so Ayeke na Ngia

“Aita, mbeni tene ayeke, i duti na ngia . . . na fade Nzapa ti ndoye na ti siriri aduti na i.”​—2 ACORINTHIEN 13:11.

1, 2. (a) Ngbanga ti nyen tâ ngia atia azo mingi na yâ fini ti ala? (b) Ngia aye ti tene nyen, na tongana nyen e lingbi ti lë ni?

NA YÂ angoi ti bingo so, azo mingi aba so aye so amu ngia ayeke kete. Tongana kpale asi na ala wala na mbeni zo so ala ndoye, bibe ti ala alingbi ti duti tongana ti Job ti giriri so atene: “Zo so wali adü lo ayeke na lâ mingi pepe, na vundu ti lo asi singo.” (Job 14:1) A bata pepe aChrétien nde na akota kpale ti bibe na yâ “ngoi ti kpale na ti ngangu,” na a yeke ye ti dongo bê pepe tongana ngoi na ngoi bê ti awakua be-ta-zo ti Jéhovah anze.​—2 Timothée 3:1, NW.

² Ye oko, aChrétien alingbi ti duti na ngia, même na gbele tara. (Kusala 5:40, 41) Ti hinga tongana nyen ye so alingbi ti duti, ba kozoni nda ti tene “ngia.” A fa nda ti ngia tongana “kota nzerengo tele so aga na peko ti so zo awara wala ayeke ku mbeni ye ti nzoni.”a Tongaso, tongana e mu ngoi ti bi bê na ndo aye ti nzoni so e yeke na ni laso na ngoi so e yeke gbu li na ndo adeba nzoni so a yeke ku e na yâ fini sese, e lingbi ti duti na ngia.

3. Na lege wa alingbi ti tene so zo oko oko ayeke kamême na anda ti tene ti duti na ngia?

³ Zo oko oko kue ayeke na adeba nzoni so lo lingbi ti kiri singila ndali ni. Peut-être mbeni mokonzi ti sewa aglisa kua ti nginza ti lo. A yeke na lege ni ti tene ye ni a gbu bê ti lo.Lo ye ti bata azo ti lo so lo ndoye. Ye oko, tongana lo ngbâ ngangu na lege ti mitele na lo yeke na nzoni seni, lo lingbi ti kiri singila ndali ni teti so, tongana lo wara kua ti nginza, fade lo lingbi ti sala kusala ngangu. Na mbeni mbage, mbeni wali Chrétien ayeke peut-être na mbeni kobela so ayeke sala si zo awoko. Ye oko, lo lingbi ti kiri singila teti mungo maboko ti akamarade na azo ti sewa so lo ndoye ala, na so ayeke mu maboko na lo ti luti na gbele kobela ti lo na nengo tele nga na bê so akpengba. Nga atâ Chrétien kue, atä ye so ayeke si na ala na yâ fini, alingbi ti wara ngia na yâ matabisi ti ala ti hinga Jéhovah, “Nzapa so ayeke na ngia,” na Jésus Christ, “Gbia so ayeke na ngia, na so ayeke gi oko.” (1 Timothée 1:11; 6:15, NW) Biani, Jéhovah Nzapa na Jésus Christ ayeke na ngia ti kota ahon kue. Ala bata ngia ti ala atä so dutingo ti aye na sese ague nde mingi na ye so Jéhovah aleke na bê ti lo la ni ti sala na tongo nda ni. Tapande ti ala alingbi ti fa na e ye mingi na ndo lege ti bata ngia ti e.

Ala Glisa Ngia ti Ala Lâ Oko Pepe

4, 5. (a) Jéhovah asala ye tongana nyen tongana akozo koli na wali ake yanga? (b) Na lege wa Jéhovah abata nzoni bango ndo na mbage ti azo?

⁴ Na yâ yaka ti Éden, Adam na Ève ayeke la ni na pendere seni so asala si ala za zango, nga na bibe so ayeke mbilimbili-kue. Ala yeke na kusala so alë lengo ti sala nga na pendere ndo ti sala ni dä. Ye ti nzoni mingi ahon kue ayeke so ala yeke la ni na matabisi ti sala lisoro lakue na Jéhovah. A yeke ye so bê ti Nzapa aye ti tene ala wara gigi ti kekereke so ayeke na ngia. Me akozo babâ na mama ti e awara ngia pepe na yâ apendere matabisi so kue; ala nzi lê ti “keke ti hinga nzoni na ti hinga sioni” so a gbanzi ni. Kengo yanga so azia gunda ti aye ti vundu kue so e, ahale ti ala, e yeke hinga ni laso.​—Genèse 2:15-17; 3:6; aRomain 5:12.

⁵ Ye oko, Jéhovah azia lege pepe na salango ye na lege ti kion ti Adam na Ève ti sala si lo glisa ngia ti lo. Lo hinga na bê kue so kamême bê ti ambeni zo na popo ti ahale ti ala ayeke pusu ala ti sala na lo. Biani, lo hinga la ni so ye ni ayeke ga ande tâ tene, ni la si même kozoni si Adam na Ève adü kozo molenge ti ala, lo fa na gigi ye so lo ye ti sala ti ton ahale ti ala so amä yanga! (Genèse 1:31; 3:15) Na yâ asiècle so aga na pekoni, mingi ti azo atambela na ndo senda-gere ti Adam na Ève, me Jéhovah avi peko ti lo pepe na sewa ti azo ngbanga ti kengo yanga so amu ndo kue. Nde na so, lo bi bê ti lo mbilimbili na ndo akoli na awali so ‘amu ngia na bê ti lo,’ ala so asala tâ ngangu ti nzere na lê ti lo ngbanga ti so ala ndoye lo.​—aProverbe 27:11; aHébreu 6:10.

6, 7. Aye wa amu maboko na Jésus ti ngbâ ti duti na ngia?

⁶ Ka ti Jésus ayeke tongana nyen? Tongana nyen lo bata la ni ngia ti lo? Na ngoi so lo de na yayu tongana mbeni ngangu zo ti yingo, Jésus awara alege kue ti ba akusala ti akoli na ti awali na ndo sese. Awokongo ti ala ayeke la ni polele; me Jésus andoye ala. (aProverbe 8:31) Na pekoni, tongana lo ga na sese, na biani “lo duti na popo” ti azo, bango ndo ti lo na mbage ti azo agbian pepe. (Jean 1:14) Ye nyen amu lege la ni na Molenge ti Nzapa so ayeke mbilimbili-kue ti bata mara ti nzoni bango ndo so na mbage ti sewa ti azo ti siokpari?

⁷ Kozoni kue, Jésus ayeke sala ye la ni na lege ni na yâ aye so lo yeke ku na mbage ti lo mveni nga na mbage ti ambeni zo. Lo hinga so fade lo yeke ga ande pepe na azo ti sese kue ti gbian lege ti vorongo ti ala. (Matthieu 10:32-39) Tongaso, lo duti na ngia tongana même gi zo oko ayeda na tâ bê kue na tokua ti Royaume. Atä so tambela na bango ndo ti adisciple ti lo ayeke lakue nzoni kue pepe, Jésus ahinga so na bê ti ala, ala ye biani ti sala ye so bê ti Nzapa aye, na lo ndoye ala ngbanga ni. (Luc 9:46; 22:24, 28-32, 60-62) Na lege ni, na yâ sambela so lo tene na Babâ ti lo ti yayu, Jésus afa na ndulu tene nzoni lege so adisciple ti lo atambela dä tongana lo tene: “Ala bata tene ti mo.”​—Jean 17:6.

8. Fa ambeni lege so na yâ ni e lingbi ti mu tapande ti Jéhovah na Jésus na ndo tene ti batango ngia ti e.

⁸ Kite ayeke pepe so e kue e yeke wara ande ye ti nzoni na bingo bê na tapande so Jéhovah Nzapa na Jésus Christ azia na lege so. E lingbi ti mu tapande ti Jéhovah nzoni ahon, peut-être na gingo bê pepe ahon ndo ni na ngoi so aye ayeke tambela nzoni pepe tongana ti so e ye fade? E lingbi ti tambela na senda ti Jésus ndulu mingi ahon, na batango mbeni nzoni bango ndo na mbage ti aye so a yeke si laso, nga na salango ye na lege ni na yâ aye so e yeke ku na mbage ti e mveni nga na mbage ti ambeni zo? Zia e ba tongana nyen a lingbi ti sala kusala na mbeni lege so alingbi na ambeni kpengba-ndia so na yâ mbeni ye so agbu bê ti aChrétien so ayeke sala kusala na wâ na ndo kue: kusala ti fango tene.

Bata Nzoni Bango Ndo na Mbage ti Fango Tene

9. Tongana nyen a kiri a zingo ngia ti Jérémie, na tongana nyen tapande ti lo alingbi ti mu maboko na e?

⁹ Jéhovah aye si e duti na ngia na yâ kusala ti lo. A lingbi e zia pepe si ngia ti e aga gi na lege ti anzoni lengo so e yeke wara. (Luc 10:17, 20) Prophète Jérémie afa tene la ni teti angu mingi na yâ mbeni territoire so alë alengo pepe. Tongana lo yeke ba gi sioni salango ye ti azo ni, lo glisa ngia ti lo. (Jérémie 20:8) Me tongana lo yeke gbu li na ndo pendere ti tokua ni mveni, lo kiri lo wara ngia. Jérémie atene na Jéhovah: “A wara tene ti Mo, na mbi te awe, tene ti Mo aga ye ti ngia na tâ ngia na bê ti mbi; teti a di iri ti Mo na ndo mbi, O L’Eternel.” (Jérémie 15:16) Biani, Jérémie awara ngia na yâ matabisi ti lo ti fango tene ti Nzapa. E nga kue.

10. Tongana nyen e lingbi ti bata ngia ti e na yâ kusala ti fango tene atä territoire ti e ayeke lë lengo fade fade pepe ?

¹⁰ Même tongana mingi ti azo ake ti yeda na nzo tene, e yeke na anda ti tene kue ti duti na ngia tongana e yeke mu tele ti e na yâ kusala ti fango tene. Dabe ti mo so Jéhovah ahinga na bê kue so bê ti ambeni zo ayeke pusu ala ti sala na lo. Legeoko na Jéhovah, a lingbi e zia pepe ti duti na beku so kamême ambeni zo ayeke gbu ande nda ti kpengba tene ni, na ayeke yeda na tokua ti Royaume. A lingbi e glisa pepe so aye so a yeke si na yâ fini ti azo ayeke gbian. Tongana lo yeke luti na gbele kpale ti glisango ye so lo yeke ku pepe wala mbeni kota kpale nde, même zo so aba so ye kue alingbi na lo awe a lingbi ti to nda ti gbu li na bê kue na ndo nda ti fini. Fade mo yeke duti dä ti mu maboko tongana mbeni zo tongaso aba so ‘ye ti yingo atia lo’? (Matthieu 5:3) Biani, peut-être mbeni zo na yâ territoire ti mo ayeke ndulu ti mä nzo tene ni na ngoi so mo yeke si ande ti peko na yanga-da ti lo!

11, 12. Ye nyen asi na yâ mbeni gbata, na ye nyen e lingbi ti manda na lege so?

¹¹ Azo so ayeke lango na yâ territoire ti e alingbi nga ti gbian. Zia e ba mbeni tapande. Mbeni bungbi ti ambeni pendere koli na awali ti ala so asala mariage, so songo ti ala akpengba mingi, ayeke lango na yâ mbeni kete gbata na amolenge ti ala. Tongana aTémoin ti Jéhovah ague ti fa tene kâ, ala tingbi gi na oko kiringo tene ti azo ni na ayanga-da oko oko: “Tene ni anzere na e pepe!” Tongana mbeni zo asala nzala ti nzo tene ti Royaume ni, azo so ayeke ndulu na lo ayeke sala kue fade fade ti tene lo tingbi mbeni pepe na aTémoin ni. Biani, a yeke la ni ngangu mingi ti fa tene na ndo ni so. Ye oko, aTémoin akiri na peko pepe; ala ngbâ lakue ti fa tene. Lengo ti pekoni ayeke so wa?

¹² Tongana ngoi ayeke hon, mingi ti amolenge ni na yâ gbata so akono, asala mariage, na aleke ndo ti lango ti ala mveni na yâ gbata ni so. Tongana ala ba so dutingo ti ala aga pepe na tâ ngia, ambeni na popo ti apendere so ato nda ti gi tâ tene. Ala wara ni na ngoi so ala yeda na bê kue na nzo tene so aTémoin afa. Tongaso, angu mingi na pekoni, kete kongrégation ni ato nda ti maï. Bi bê kete na ngia ti awafango tene ti Royaume so akiri la ni na peko pepe! Zia si ngbango lakue ti kangbi tokua ti Royaume ti gloire aga na ngia na e nga!

Afon Mo Wamabe Ayeke Mu Ande Maboko na Mo

13. E lingbi ti ba ndo na mbage ti zo wa na ngoi so e nze?

¹³ Tongana akpale ayeke gue na li ni wala tongana ye ti ngangu asi, mo lingbi ti ba ndo na mbage wa ti wara dengo bê? Azo kutu mingi ti awakua so amu tele na Jéhovah ayeke ba ndo kozoni kue na mbage ti Jéhovah na yâ sambela, na pekoni, ala yeke ba ndo na mbage ti aita ti ala Chrétien ti koli na ti wali. Tongana lo de na sese, Jésus lo mveni aba mungo maboko ti adisciple ti lo tongana ye ti ngele ngangu. Na bï ni kozoni na kuâ ti lo, lo sala tene ti ala tongana “ala so angbâ na Mbi na yâ ye ti handa so atara Mbi.” (Luc 22:28) Tâ tene, adisciple so ayeke mbilimbili-kue pepe, me dutingo be-ta-zo ti ala aduti ye ti dengo bê teti Molenge ti Nzapa. E nga e lingbi ti wara ngangu na lege ti afon e wamabe.

14, 15. Ye nyen amu maboko na mbeni koli na wali ti hon ndo ti kuâ ti molenge ti ala ti koli, na mo manda nyen na ndo ye so asi na ala?

¹⁴ Mbeni koli na wali so iri ti ala ayeke Michel na Diane amanda tongana nyen mungo maboko ti aita ti ala ti koli na ti wali alingbi ti duti ye ti ngele ngangu. A ba so molenge ti ala Jonathan ti ngu 20, so ayeke na nzoni seni na nzoni beku ti kekereke, ayeke na mbeni kobela ti cancer ti mongoli. Awanganga atara kue ti sö fini ti lo, me seni ti Jonathan ayeke kiri gi na peko ngangu mingi juska na mbeni bekombite, lo kui. Bê ti Michel na Diane awoko kue. Ala ba so Bungbi ti Kusala so a leke teti lakui ni so aga ndulu ti hunzi. Ye oko, teti ala yeke na kota nzala ti wara dengo bê, ala hunda na ancien so ayeke na tele ti ala ti gue na ala na Da ti Royaume. Ala si gi na ngoi so a yeke tene tokua ti kuâ ti Jonathan na kongrégation. Na peko ti bungbi ni, aita ti ala ti koli na ti wali angoro babâ na mama so ayeke toto, ala zia maboko na ndo go ti ala na amu na ala atene ti dengo bê. Diane adabe ti lo: “Bê ti e awoko kue la ni na ngoi so e si na da ti Royaume, me so tâ dengo bê si e wara na mbage ti aita ti e! Ye so amu na e ngangu. Atä so ala lingbi pepe ti zi pasi ti e, ala mu maboko na e ti wara ngangu na gbele atene ti gingo bê!”​—aRomain 1:11, 12; 1 aCorinthien 12:21-26.

¹⁵ Ye ti ngangu so asi na ala apusu Michel na Diane ti ga ndulu mingi na aita ti ala. A mu nga lege na ala ti kpengba songo na popo ti ala. Michel atene: “Mbi manda ti ndoye wali ti mbi, même mingi ahon. Na yâ angoi so e nze, e yeke sala tene na popo ti e na ndo tâ tene ti Bible nga na tongana nyen Jéhovah ayeke mu maboko na e.” Diane akiri atene: “Beku ti Royaume aye ti tene ye mingi ahon teti e laso.”

16. Ngbanga ti nyen a yeke kota ye ti mu li ni ti fa na aita ti e aye so e yeke na bezoin ni?

¹⁶ Biani, aita ti e ti koli na ti wali alingbi ti sala kusala tongana “ye ti mungo maboko so akpengba” e na yâ angoi ti kpale ti fini, na tongaso ayeke mu maboko na e ti bata ngia ti e. (aColossien 4:11, NW) Biani, ala lingbi pepe ti hinga ye so ayeke na bê ti e. Tongaso, tongana e hunda ti wara mungo maboko, a yeke nzoni ti sala tene ni na ala. Na pekoni, e lingbi ti fa tâ yekiango ndo ti e teti dengo bê kue so aita ti e awara lege ti mu na e, na bango ni tongana ye so alondo na Jéhovah.​—aProverbe 12:25; 17:17.

Ba Kongrégation ti Mo

17. Aye wa mbeni mama so ayeke bata amolenge ti lo gi lo oko asala ngangu ti hon ndo ni, na tongana nyen e yeke ba azo tongana lo?

¹⁷ Tongana mo yeke ba mingi ahon afon mo na yâ vorongo, fade mo yeke manda mingi ahon lege ti yekia ala na ti wara ngia na yâ salango songo na ala. Ba kongrégation ti mo. Ye nyen mo yeke ba? Mo yeke ba mbeni mama so ayeke sala ngangu ti bata gi lo oko amolenge ti lo na yâ lege ti tâ tene? Mo yeke bi bê mingi na ndo nzoni tapande so lo yeke zia? Tara ti ba na li ambeni kpale so lo yeke luti na gbele ni. Mbeni mama so ayeke bata gi lo oko sewa ti lo, so iri ti lo ayeke Jeanine, afa ambeni kpale ni: dutingo gi lo oko, tara so alondo na akoli ti ndokua so aye ti bungbi na lo koli na wali, dutingo na nginza mingi pepe. Me lo tene so kpale ti kota ahon kue ayeke ti sala ye alingbi na tene ti bibe ti amolenge ti lo, teti so molenge oko oko ayeke nde na atanga ni. Jeanine afa na gigi mbeni kpale nde: “A lingbi ti duti ngangu mingi ti ke bibe ti zia molenge ti mo ti koli ti duti mokonzi ti da ni si lo sala kusala na place ti mbeni koli ti da. Mbi yeke na mbeni molenge ti wali, na a yeke ngangu mingi ti dabe ti mbi so alingbi mbi zia pepe kungba na ndo ti lo ahon ndo ni na lege ti fango na lo atene ti mbi ti lingo.” Legeoko na ababâ na mama saki mingi so ayeke kpe mbito ti Nzapa, na so ayeke bata sewa ti ala gi ala oko, Jeanine ayeke sala kusala na ngoi kue na lo yeke bata azo ti da ti lo. Lo yeke manda nga Bible na amolenge ti lo, lo fa lege na ala na yâ kusala ti fango tene, na lo gue na ala na abungbi ti kongrégation. (aEphésien 6:4) So tâ kota ngia si Jéhovah ayeke na ni ti ba lâ na lâ ngangu so sewa so ayeke sala ti ngbâ be-ta-zo! So a yeke ga na ngia na bê ti e pepe ti duti na azo tongaso na popo ti e? Biani!

18, 19. Fa na tapande tongana nyen e lingbi ti kono yekiango ndo ti e teti azo ti kongrégation.

¹⁸ Kiri mo ba kongrégation ti mo. Peut-être mo yeke ba awomua be-ta-zo wala akoli so wali ti ala akui awe so azia “lâ oko pepe” ti gue na abungbi. (Luc 2:37) Ala yeke ba tele ti ala gi ala oko na ambeni ngoi? Biani. Akoli na awali ti ala atia ala mingi! Me ala yeke na aye mingi ti sala na yâ kusala ti Jéhovah na ala yeke bi bê ti ala mveni na ndo ambeni zo. Nzoni bango ndo ti ala so ayengi pepe asala si ngia ti kongrégation ague na li ni! Mbeni ita-wali Chrétien so asala kusala ti ngoi kue teti angu ahon 30 atene: “Mbeni oko ti angia ti mbi ti kota ahon ayeke ti ba akangba ita ti koli na ti wali so ahon na yâ ti atara mingi na so angbâ lakue ti sala na Jéhovah be-ta-zo!” Biani, aChrétien kangba so ayeke na popo ti e ayeke kota ye ti kpengba teti ala so ade apendere.

¹⁹ Ka ti afini zo so ato nda ni aninga mingi pepe ti bungbi na kongrégation? E wara wâ pepe tongana ala yeke fa na gigi mabe ti ala na abungbi? Gbu li na ndo guengo na li ni ti ala ngbele ye na ngoi so ala to nda ti manda Bible. Kite ayeke pepe so Jéhovah ayeke tâ na ngia na mbage ti ala. E yeke nga na ngia? E yeke fa na gigi so e yeda na ala, na sepelango ala teti ngangu so ala yeke sala?

20. Ngbanga ti nyen a lingbi ti tene so zo oko oko na yâ kongrégation ayeke sala kpengba kusala?

²⁰ Mo sala mariage awe, mo yeke kumbamba, wala mo yeke bata amolenge ti mo gi mo oko? Mo yeke mbeni molenge ti koli wala ti wali so babâ (wala mama) ti mo akui awe, mbeni womua wala mbeni koli so wali ti lo akui? Mo yeke na yâ kongrégation teti angu mingi awe, wala mo to nda ni aninga mingi pepe ti bungbi na kongrégation? Hinga so tapande ti mo ti be-ta-zo ayeke kpengba e kue. Na tongana mo bungbi na aita ti he mbeni bia ti Royaume, tongana mo yeke kiri tene na bungbi wala mo yeke sala mbeni devoir na Ekole ti Kusala ti Théocratie, mo yeke sala si ngia ti e ague na li ni. Na mingi ahon, a yeke zia ngia na bê ti Jéhovah.

21. E yeke na anda ti tene mingi ti sala nyen, na ahundango tene wa alondo?

²¹ Biani, même na yâ angoi ti ngangu so, e lingbi ti wara ngia na vorongo Nzapa ti e so ayeke na ngia. E yeke na anda ti tene mingi ti sala ye alingbi na kpengba wango ti Paul so: “I duti na ngia; . . . na fade Nzapa ti ndoye na ti siriri aduti na i.” (2 aCorinthien 13:11) Ye oko, ka tongana e tingbi na ye ti ngangu ti ndagigi, salango ngangu, wala ngangu kpale ti konomi? E lingbi lakue ti bata ngia ti e même na yâ aye ti ngangu so? Kiri tene mo mveni tongana mo yeke ba article ti peko.

[Kete Tene na Gbe Ni]

Mo Lingbi ti Kiri Tene?

• Tongana nyen a fa nda ti ngia?

• Tongana nyen batango nzoni bango ndo alingbi ti mu maboko na e ti duti lakue na ngia?

• Ye nyen alingbi ti mu maboko na e ti bata nzoni bango ndo na ndo territoire ti kongrégation ti e?

• Na yâ alege wa mo yekia aita ti koli na ti wali na yâ kongrégation ti mo?

[Afoto na lembeti 21]

Azo ti territoire ti e alingbi ti gbian

[Foto na lembeti 23]

Aye wa azo ti kongrégation ti mo ayeke sala ngangu ti hon ndo ni?