Wara Ngia na yâ Mungo Ye!
“Ngia ayeke na zo so amu ye, ahon ngia ti lo so akamata ye.”—KUSALA 20:35.
1. Tongana nyen Jéhovah afa na gigi ngia ti mungo ye na zo?
NGIA ti hingango tâ tene na aye ti nzoni so aga na pekoni ayeke amatabisi ti ngele ngangu so alondo na Nzapa. Ala so ahinga Jéhovah ayeke na anda ti tene mingi ti duti na ngia. Me atä so ngia ti kamata mbeni matabisi ayeke dä, a yeke wara nga ngia na yâ mungo matabisi na mbeni zo. Jéhovah ayeke Wamungo “matabisi kue ti nzoni na matabisi kue so alingbi,” na lo yeke “Nzapa so ayeke na ngia.” (Jacques 1:17; 1 Timothée 1:11, NW) Lo mu anzoni fango ye na azo kue so ayeke mä tene, na lo wara ngia ti ba so ala so lo fa ye na ala amä yanga, legeoko tongana ti so ababâ na mama ayeke na ngia tongana amolenge ti ala ayeda na fango ye na lege ti ndoye.—aProverbe 27:11.
2. (a) Jésus atene nyen la ni na ndo mungo ye? (b) Ngia ti nyen e wara tongana e fa na ambeni zo tâ tene ti Bible?
2 Legeoko nga, na ngoi so lo de na sese, Jésus ayeke la ni na ngia ti ba azo so ayeda na fango ye ti lo. Bazengele Paul afa peko ti tene ti Jésus tongana lo tene: “Ngia ayeke na zo so amu ye, ahon ngia ti lo so akamata ye.” (Kusala 20:35) Ngia so e wara tongana e fa na ambeni zo tâ tene ti Bible ayeke pepe gi ngia ti wara mbeni zo so ayeda na atene ti mabe ti lege ti vorongo ti e. Mingi ahon so, e yeke na ngia ti hinga so e yeke mu mbeni tâ ye ti ngele ngangu so aninga. Na mungo ye na lege ti yingo, e lingbi ti mu maboko na azo ti wara ye ti nzoni ala mveni fadeso nga teti lakue lakue.—1 Timothée 4:8.
Mungo Ye Aga na Ngia
3. (a) Tongana nyen abazengele Paul na Jean afa na gigi ngia ti ala ti mu maboko na ambeni zo na lege ti yingo? (b) Ngbanga ti nyen fango tâ tene ti Bible na amolenge ti e ayeke mbeni fä ti ndoye?
3 Biani, legeoko tongana ti so Jéhovah na Jésus ayeke na ngia na mungo amatabisi ti yingo, aChrétien nga ayeke wara ngia na salango tongaso. Bazengele Paul awara ngia ti hinga so lo mu maboko na ambeni zo ti manda tâ tene ti Mbeti ti Nzapa. Lo sû na mbeti na kongregation ti Thessalonique: “Tongaso, beku, wala tâ ngia, wala couronne ti gloire ti e na gbele Seigneur ti e Jésus na lâ ti singo ti Lo ayeke nyen? A yeke i mveni pepe? Teti i yeke gloire na tâ ngia ti e.” (1 aThessalonicien 2:19, 20) Legeoko nga, bazengele Jean, na salango tene ti amolenge ti lo na lege ti yingo, asû na mbeti: “Mbi yeke pepe na mbeni tene so ahon aye so teti kiri singila, so mbi mä so amolenge ti mbi angbâ lakue ti tambela na yâ tâ tene.” (3 Jean 4, NW) Bi bê kete nga na ngia so a yeke dä ti mu maboko na amolenge ti e mveni ti ga amolenge ti e na lege ti yingo! Batango amolenge “na yâ wango-tene nga na fango lege ti bibe ti Jéhovah” ayeke fä ti ndoye so alondo na babâ na mama. (aÉphésien 6:4, NW) Na lege so, ababâ na mama ayeke fa so ala bi bê na ndo nzoni duti ti lakue lakue ti amolenge ti ala. Tongana amolenge ni ayeda na fango lege so ala wara, ababâ na mama ayeke duti na kota ngia na bê ti ala ayeke nzere.
4. Tapande wa afa polele ngia ti mungo ye na lege ti yingo?
4 Dell ayeke mbeni wakua ti ngoi-kue na lo yeke mama ti amolenge oku. Lo tene: “Mbi lingbi nzoni ti gbu nda ti atene ti bazengele Jean ngbanga ti so mbi kiri singila mingi teti so osio na popo ti amolenge ti mbi ayeke ‘tambela na yâ tâ tene.’ Mbi hinga so a yeke ga na yekiango ndo na gloire na Jéhovah tongana asewa asala beoko na yâ tâ vorongo, tongaso mbi yeke na kota ngia ti ba deba nzoni ti lo na ndo angangu so mbi yeke sala ti yôro tâ tene na yâ bê ti amolenge ti mbi. Pendere beku ti fini ti lakue lakue na yâ paradis na sewa ti mbi asala si beku asi singo na yâ mbi, na a pusu mbi ti luti ngangu atä akpale na aye ti kangango lege so ayeke dä.” Mawa ni ayeke so, a bi na gigi ti bungbi mbeni oko ti amolenge ti Dell ti wali teti lo bata tambela ti lo ti Chrétien pepe. Ye oko, Dell asala ngangu kue ti bata mbeni nzoni bango ndo. Lo tene: “Mbi yeke na beku so mbeni lâ, fade molenge ti mbi ti wali ayeke kiri na Jéhovah na tâ be-ti-molenge nga na tâ bê kue. Me mbi kiri singila na Nzapa teti so mingi ti amolenge ti mbi angbâ lakue ti sala na lo na dutingo be-ta-zo. Ngia so mbi wara aduti tâ lingu ti ngangu teti mbi.”—Néhémie 8:10.
Warango Andeko Teti Lakue Lakue
5. Tongana e mu tele ti e kue na yâ kusala ti salango adisciple, hingango ye wa ayeke mu ngia na e?
5 Jésus afa na adisciple ti lo ti sala adisciple Chrétien na ti fa na ala ye na ndo Jéhovah nga aye so lo hunda. (Matthieu 28:19, 20) Na bê ti kion pepe, Jéhovah na Jésus nga amu maboko na azo ti manda lege ti tâ tene. Tongaso, tongana e mu tele ti e kue na yâ kusala ti salango adisciple, e yeke na ngia ti hinga so e yeke mu tapande ti Jéhovah na Jésus, tongana ti so akozo Chrétien asala. (1 aCorinthien 11:1) Tongaso, tongana e sala kusala maboko na maboko na Nzapa ti Ngangu Ahon Kue nga na Molenge ti lo so lo ndoye, nda ti fini ti e ayeke duti dä biani. So tâ deba nzoni si a yeke ti diko e na popo ti “afon Nzapa na kusala”! (1 aCorinthien 3:9) Na a yeke pepe ye ti dongo bê ti ba so même a-ange amu mbage na yâ kusala ti fango nzo tene so?—Apocalypse 14:6, 7.
6. Tongana e yeke mu ye na lege ti yingo, azo wa ayeke ga andeko ti e?
6 Biani, na mungo mbage na yâ kusala so ti mungo ye na lege ti yingo, e lingbi ti ga ye mingi ahon gi ti duti afon Nzapa na kusala; e lingbi ti sala songo na lo teti lakue lakue. Teti mabe ti lo, a hiri Abraham ndeko ti Jéhovah. (Jacques 2:23) Tongana e sala ngangu ti sala ye so bê ti Nzapa aye, e lingbi nga ti ga andeko ti Nzapa. Tongana e sala tongaso, e yeke ga nga andeko ti Jésus. Lo tene na adisciple ti lo: “Mbi di iri ti i andeko, teti ye kue so Mbi mä na yanga ti Babâ ti Mbi, Mbi fa na i awe.” (Jean 15:15) Mingi ti azo ayeke na ngia tongana a diko ala andeko ti azo so ayeke na ngangu wala akota zo, me a lingbi ti diko e tongana andeko ti azo use ti kota ahon kue ti ndagigi!
7. (a) Tongana nyen mbeni wali awara mbeni tâ kamarade? (b) Mara ti ye tongaso asi na mo nga?
7 Na ndo ni, tongana e mu maboko na azo ti hinga Nzapa, ala ga nga andeko ti e, na ye so amu na e mbeni ngia so ayeke nde. Joan, so ayeke na États-Unis ti Amérika, ato nda ti manda Bible na mbeni wali so iri ti lo ayeke Thelma. Atä so sewa ti Thelma agi ti kanga lege na mandango ye ti lo, lo gbu ngangu na lo wara batême ngu oko na pekoni. Joan asû na mbeti: “Songo ti e ahunzi gi ge pepe; nde na so, a maï na a ga mbeni salango kamarade so aninga teti angu ndulu na 35 fadeso awe. Fani mingi, e gue legeoko na kusala ti fango tene nga na akota bungbi. Na nda ni, mbi gue na yâ ti mbeni fini da so ayeke na kilomètre 800 yongoro. Me Thelma angbâ lakue ti tokua na mbi a-lettre ti ndoye so amu wâ na bê mingi ahon, lo tene na mbi so lo bi bê na mbi na lege ti ndoye, na lo kiri singila na mbi teti so mbi yeke ndeko nga tapande teti lo, na teti so mbi fa na lo tâ tene so alondo na Bible. Dutingo na mara ti ndeko tongaso, so ayeke ndulu na mbi na so mbi ndoye mingi ayeke mbeni pendere matabisi teti ngangu so mbi sala ti mu maboko na lo ti hinga Jéhovah.”
8. Nzoni bango ndo wa ayeke mu ande maboko na e na yâ kusala ti fango tene?
8 Beku ti wara mbeni zo so aye ti manda tâ tene alingbi ti mu maboko na e ti gbu ngangu même tongana mingi ti azo so e tingbi na ala asala nzala ti Tene ti Jéhovah mingi pepe wala oko pepe. Mara ti salango pepe nzala ti tene ni tongaso alingbi ti ga na kpale na mabe ti e nga na gbungo ngangu ti e. Ye oko, nzoni bango ndo ayeke mu ande maboko na e. Fausto, so ayeke zo ti Guatemala, atene: “Tongana mbi yeke fa tene na ambeni zo, mbi bi bê na ndo ye ti pendere so a lingbi ti duti tongana zo so mbi yeke sala tene na lo aga mbeni ita-koli wala ita-wali na lege ti yingo. Mbi tene na bê ti mbi so kamême mbeni zo oko so mbi yeke tingbi ande alingbi na nda ni ti yeda na tâ tene ti Tene ti Nzapa. Bibe tongaso amu maboko na mbi ti ngbâ lakue ti fa tene, na a ga na mbi tâ ngia.”
Bungbingo Mosoro na Yayu
9. Ye nyen Jésus atene la ni na ndo mosoro ti yayu, na ye wa e lingbi ti manda na lege so?
9 Salango adisciple, atä na popo ti amolenge ti e wala na popo ti ambeni zo nde, ayeke lakue kete ye pepe. A lingbi ti hunda ngoi, be-nze-pepe, na gbungo ngangu. Ye oko, dabe mo so azo mingi ayeke ndulu ti sala kusala ngangu ti bungbi gbâ ti amosoro na lege ti mitele, aye so fani mingi aga na ngia pepe na a ninga pepe teti lakue lakue. Jésus atene na ala so ayeke mä lo so a yeke nzoni ahon ti sala kusala teti amosoro na lege ti yingo. Lo tene: “I zia ti bungbi mosoro teti i mveni na ndo sese so, na ndo so papalapo na soko ate, na ndo so awanzi alï na ngangu ti nzi ye. Me i bungbi mosoro teti i na yayu, ndo so papalapo wala soko ate pepe, na ndo so awanzi alï na ngangu ti nzi ye pepe.” (Matthieu 6:19, 20, NW) Na tombango peko ti aye ti yingo so e zia na gbele e, so a ndu nga mungo mbage na kota kusala ti salango adisciple, e lingbi ti wara ngia ti hinga so e yeke sala ye so bê ti Nzapa aye, na so lo yeke futa e ande nzoni. Bazengele Paul asû na mbeti: “Nzapa ayeke kirikiri pepe si Lo lingbi glisa kusala ti i, ndoye so i fa giriri teti iri ti Lo.”—aHébreu 6:10.
10. (a) Ngbanga ti nyen Jésus ayeke la ni na amosoro na lege ti yingo? (b) Tongana nyen Jésus amu tele ti lo mveni, na kota ye ti nzoni wa ye so aga na ni na ambeni zo?
10 Tongana e sala kusala na wâ ti sala adisciple, e yeke bungbi teti e mveni ‘mosoro na yayu,’ legeoko na ye so Jésus atene. Ye so amu na e ngia ti kamata ye. Tongana e yeke mu ye na kion pepe, na nda ni e yeke bungbi mosoro teti e mveni. Jésus mveni asala na Jéhovah na dutingo be-ta-zo teti angu gbundangbu mingi. Bi bê kete na mosoro so lo bungbi na yayu! Ye oko, Jésus agi lâ ni pepe gi ti wara aye teti lo mveni. Bazengele Paul asû na mbeti: “[Jésus] amu lo mveni giriri teti siokpari ti e, si lo lingbi lungula e na yâ ngoi ti sioni ti fadeso, na lege ti ye so Nzapa Babâ ti e aye.” (aGalate 1:4, e la e sû gere ti ambeti so nde) Jésus amu pepe gi tele ti lo kue na yâ kusala ti lo, me lo mu nga tâ fini ti lo tongana kota ngele si ambeni zo nde alingbi ti wara lege ti bungbi amosoro na yayu.
11. Ngbanga ti nyen amatabisi ti yingo ayeke nzoni ahon amatabisi ti mitele?
11 Na fango ye na azo na ndo Nzapa, e yeke mu maboko na ala ti ba tongana nyen ala nga alingbi ti bungbi mosoro so afuti pepe na lege ti yingo. Matabisi ti kota ahon wa mo lingbi ti mu? Tongana mo mu na mbeni kamarade mbeni montre ti ngele ngangu, mbeni kutukutu, wala même mbeni da, peut-être kamarade so ayeke fa bê ti kiri singila na lo yeke wara ngia, na fade mo yeke wara ngia ti mungo ye na zo. Me ye nyen ayeke si ande na matabisi so na yâ ti ngu 20? Na yâ ti ngu 200? Na yâ ti ngu 2000? Na mbeni mbage, tongana mo mu tele ti mo mveni ti mu maboko na mbeni zo ti sala na Jéhovah, lo lingbi ti wara nzoni na yâ matabisi so teti lakue lakue.
Gingo Azo so Aye Tâ Tene
12. Tongana nyen azo mingi amu tele ti ala mveni ti mu maboko na ambeni zo na lege ti yingo?
12 Ti wara ngia ti mu ye na lege ti yingo, azo ti Jéhovah ague juska na anda ti sese kue. Ala saki mingi azia da ti ala na sewa ti ala ti mu kusala ti missionnaire na yâ akodoro so a hunda na ala ti manda afini yanga ti kodoro na afini ngobo ti salango ye. Ambeni azia ndo ti ala ti gue na ambeni mbage nde ti kodoro ti ala mveni na ndo so a hunda mingi awafango tene ti Royaume dä. Ambeni nde amanda mbeni fini yanga ti kodoro, na salango tongaso azi lege na ala ti fa tene na awande na ndo so ala yeke dä. Na tapande, na pekoni so ala bata amolenge ti koli use so laso ayeke sala kusala na kota ndokua ti aTémoin ti Jéhovah, mbeni koli na wali ti lo na New Jersey, na États-Unis ti Amérika, ato nda ti sala kusala tongana pionnier, na ala manda yanga ti Chinois. Na yâ angu ota na ndo ni, ala manda Bible na azo 74 so atene yanga ti Chinois na so ague na mbeni ekole so ayeke ndulu na ndo ni. Mo lingbi ti kono yâ ti kusala ti mo ti fango tene na mbeni lege ti wara ngia mingi ahon na yâ kusala ti salango adisciple?
13. Ye nyen mo lingbi ti sala tongana mo ye si kusala ti mo alë lengo mingi ahon?
13 Peut-être mo yeke na nzala ti to nda ti mbeni mandango Bible, me ade mo wara lege ti sala ni pepe. Na yâ ti ambeni kodoro, a yeke ngangu ti wara azo so asala nzala ti tene ni. Peut-être azo so mo tingbi na ala asala nzala ti tene ti Bible oko pepe. Tongana a yeke tongaso, peut-être mo lingbi ti fa nzala ti bê ti mo fani mingi ahon na yâ sambela, na hingango so Jéhovah na Jésus Christ abi bê mingi na ndo kusala ni, na ala lingbi ti fa lege na mo ti tingbi na mbeni zo so ayeke ngasangbaga. Gi ti wara awango na mbage ti ala so na yâ ti kongregation ti mo ayeke na kode mingi wala so kusala ti ala alë lengo mingi ahon. Wara ye ti nzoni na yâ fango lege na awango so a yeke mu na abungbi ti Chrétien. Wara nzoni na yâ wango ti asurveillant so ague na ndo nde nde nga na awali ti ala. Na ndo ni kue, zia lâ oko pepe ti sala ngangu. Wandara asû na mbeti: “Na ndapelele mo lu le-kobe ti mo, na lakui mo duti senge pepe, teti mo hinga pepe fade ye so aga nzoni.” (Zo-ti-fa-tene 11:6) Na oko ngoi ni, dabe ti mo na akoli be-ta-zo tongana Noé na Jérémie. Atä so gi wungo ti azo kete si ayeda na bê kue na ye so ala fa tene ni, kusala ti ala ti fango tene atambela nzoni. Na ndo ni kue, a nzere na lê ti Jéhovah.
Sala Ye Kue so Mo Lingbi ti Sala
14. Tongana nyen Jéhovah ayeke ba ala so aga mbakoro na yâ kusala ti lo?
14 Peut-être dutingo ti mo amu pepe lege na mo ti sala ye mingi tongana ti so mo ye ti sala na yâ ti kusala ti fango tene. Na tapande, gango mbakoro alingbi ti zia katikati na ye so mo lingbi ti sala na yâ kusala ti Jéhovah. Ye oko, dabe mo na ye so wandara asû na mbeti: “Kuali so avulu ayeke couronne ti gloire, Zo awara so na lege ti mbilimbili.” (aProverbe 16:31) Ti Jéhovah, fini so a mu ti sala na kusala ti lo ayeke ye so amu ngia na lo mingi. Na ndo ni, Mbeti ti Nzapa atene: “Même juska i ga mbakoro, Mbi [Jéhovah] yeke Lo, na fade Mbi yö i juska kuali ti i avulu; Mbi sala i, na fade Mbi yö i; biani, fade Mbi yö i na Mbi sö i.” (Esaïe 46:4) Babâ ti e ti yayu so ayeke ndoye amu zendo ti bata na ti mu maboko na abe-ta-zo ti lo.
15. Mo mä na bê so Jéhovah ahinga dutingo ti mo? Ngbanga ti nyen?
15 Peut-être mo yeke tiri na kobela, kangango lege so alondo na koli wala wali ti mo so amä na bê pepe, kungba ti sewa so ane, wala mbeni kpale ti ngangu nde. Jéhovah ahinga akatikati ti e na dutingo ti e, na lo ndoye e teti angangu so e mu na bê kue ti sala na lo. Ye so ayeke tâ tene atä so ye so e yeke sala alingbi peut-être ti duti kete ahon so ambeni zo asala. (aGalate 6:4) Jéhovah ahinga so e yeke mbilimbili-kue pepe, na lo yeke sala ye na lege ni na yâ ye so lo ku na mbage ti e. (Psaume 147:11) Tongana e sala ngangu ti e kue, bê ti e alingbi ti dë biani so e yeke na ngele ngangu na lê ti Nzapa, na so fade lo yeke glisa pepe akusala ti e ti mabe.—Luc 21:1-4.
16. Na lege wa azo kue ti kongregation ayeke mu mbage na yâ salango mbeni disciple?
16 Dabe mo nga so kusala ti salango adisciple ayeke kusala so azo mingi si amu mbage dä. Zo oko ayeke sala pepe mbeni disciple, gi tongana ti so mbeni lê ti ngu-nduzu oko alingbi pepe si mbeni kete keke amaï. Tâ tene, mbeni Témoin oko alingbi peut-être ti wara mbeni zo so asala nzala ti tene ni, na ti manda Bible na lo. Me na ngoi so zo ni aga na Da ti Royaume, kongregation ni kue ayeke mu maboko na lo ti hinga tâ tene. Wâ ti songo ti aita afa na gigi kusala ti yingo ti Nzapa. (1 aCorinthien 14:24, 25) Amolenge na apendere ayeke kiri atene so akpengba zo, na fango na fini zo ni so apendere ti e ayeke nde na apendere ti sese. Azo ti kobela, azo so mbeni mbage ti tele ti ala anze, na ambakoro na yâ ti kongregation ayeke fa na afini zo ye so gbungo ngangu aye ti tene. Atä ngu ti e wala akatikati ti e ayeke so wa, e kue e yeke sala kota kusala ti mu maboko na afini zo tongana ala yeke kono ndoye ti ala teti tâ tene ti Bible, na ala yeke gue na li ni ti wara batême. A lingbi ba tongana senge senge ye ngbonga kue so e sala na yâ kusala ti fango tene, vizite oko oko so e sala, lisoro oko oko na ambeni zo so asala nzala ti tene na yâ ti da ti Royaume, me a yeke mbage ti mbeni kpengba kusala so Jéhovah ayeke sala.
17, 18. (a) Na ndo ti mungo mbage na kusala ti salango adisciple, tongana nyen e lingbi ti mu mbage na ngia ti mungo ye? (b) Na warango ngia na lege ti mungo ye, e yeke mu tapande ti zo wa?
17 Biani, nde na mungo mbage na yâ kpengba kusala ti salango adisciple, e so e yeke aChrétien e yeke wara ngia ti mu ye na ambeni lege nde. E lingbi ti zia nginza nde ti mu maboko na tâ vorongo nga na ala so ye atia ala. (Luc 16:9; 1 aCorinthien 16:1, 2) E lingbi ti gi alege ti yamba ambeni zo. (aRomain 12:13) E lingbi ti sala ngangu ti “sala ye ti nzoni na azo kue; na ahon kue, a lingbi e sala ye ti nzoni na aita ti e awamabe.” (aGalate 6:10) Nga na ambeni lege so akpengba pepe me so ayeke kota ye, e lingbi ti mu na ambeni zo tene so akpengba ala na lege ti mbeni lettre so e tokua, pikango singa, matabisi, nga na mbeni mungo maboko so alingbi na ngoi ni.
18 Na mungo ye, e fa so e mu tapande ti Babâ ti e ti yayu. E fa nga na gigi ndoye ti e teti aita, ndoye so ayeke fä so amu lege ti hinga na atâ Chrétien. (Jean 13:35) Dango bê na aye so alingbi ti mu maboko na e ti wara ngia na yâ mungo ye.
Mo Lingbi ti Fa Nda ni?
• Tongana nyen Jéhovah na Jésus azia tapande ti mungo ye na lege ti yingo?
• Tongana nyen e lingbi ti wara akamarade teti lakue lakue?
• Aye wa e lingbi ti sala si kusala ti e ti fango tene alë lengo mingi ahon?
• Tongana nyen azo kue na yâ kongregation ayeke mu mbage na ngia ti mungo ye?
[Afoto na lembeti 27]
Tongana amolenge ayeda na fango lege, ababâ na mama ayeke wara kota ngia na bê so anzere
[Foto na lembeti 29]
Na salango adisciple, e lingbi ti wara atâ kamarade
[Foto na lembeti 30]
Jéhovah amu maboko na e na lâ ti mbakoro
[Afoto na lembeti 31]
Na ambeni lege so akpengba pepe me so ayeke kota ye, e wara ngia na yâ mungo ye