Bata Ngia ti Mo na yâ Kusala ti Jéhovah

“I duti na ngia lakue na yâ Seigneur; mbi tene na i mbeni, i duti na ngia.”​—APHILIPPIEN 4:4.

1, 2. Tongana nyen mbeni ita-koli na sewa ti lo awara lege ti bata ngia ti ala atä so ala glisa ye kue so ala yeke na ni?

JACQUES, mbeni Chrétien ti ngu 70 so alango na Sierra Leone, asala kusala ngangu na yâ fini ti lo kue. Bi bê kete na ngia ti lo tongana, na nda ni, lo bungbi wungo ti nginza so alingbi ti vo mbeni da ti kubu osio so agboto lê mingi pepe! Ye oko, na peko ti so Jacques na sewa ti lo ague na yâ ti da ni awe, bira alondo na popo ti azo ti kodoro so, na a gbi da ti lo ni kue na sese. Ala glisa da ti ala, me ala glisa ngia ti ala pepe. Ngbanga ti nyen?

² Jacques na sewa ti lo azia lê ti ala la ni pepe na ndo aye so ala glisa ni, me na ndo aye so angbâ na ala. Jacques atene: “Même na ngoi ti aye ti sioni, e ngbâ lakue ti sala abungbi, ti diko Bible, ti sambela legeoko na ti kangbi na ambeni zo kete ye so e yeke na ni. E wara lege ti bata ngia ti e ngbanga ti so e bata lê ti e na ndo pendere songo so e yeke na ni na Jéhovah.” Na bingo bê na ndo aye ti nzoni so ala wara, so ye ti nzoni ahon na popo ni ayeke kpengba songo ti ala na Jéhovah, aChrétien be-ta-zo so alingbi ti “duti na ngia.” (2 aCorinthien 13:11) Biani, a yeke la ni ngangu mingi ti hon ndo ti aye ti vundu so asi na yâ fini ti ala. Me ala zia pepe ti duti na ngia na yâ Jéhovah.

3. Tongana nyen ambeni kozo Chrétien abata ngia ti ala?

³ Akozo Chrétien awara atara so alingbi ti haka ni na so Jacques na sewa ti lo awara. Ye oko, bazengele Paul asû na mbeti atene so na aChrétien Hébreu: “Tongana azo afuti ye ti i, i duti na ngia.” Na pekoni, Paul afa lingu ti ngia ti ala: “I hinga i yeke na ye ti nzoni ahon so angbâ lakue.” (aHébreu 10:34) Biani, aChrétien ti kozo siècle so ayeke na mbeni beku so ayeke ngangu. Ala ku na bê kue ti wara mbeni ye so alingbi ti nzi ni pepe: “couronne ti gloire” ti lakue lakue na yâ Royaume ti Nzapa na yayu. (Apocalypse 2:10) Laso, beku ti e ti Chrétien, wala a yeke ti gue na yayu wala ti ngbâ na sese, alingbi ti mu maboko na e ti bata ngia ti e même na ngoi so e yeke luti na gbele aye ti ngangu.

“Duti na Ngia na yâ Beku”

4, 5. (a) Ngbanga ti nyen wango ti Paul ti “duti na ngia na yâ beku” ayeke tâ na ngoi ni? (b) Ye nyen alingbi ti pusu mbeni Chrétien ti glisa ti bata lê na ndo beku ti lo?

⁴ Bazengele Paul awa afon lo wamabe na Rome ti “duti na ngia na yâ beku” ti fini ti lakue lakue. (aRomain 12:12) A yeke la ni mbeni wango so asi na ngoi ni teti aRomain. Kozo na nda ti angu bale oko na pekoni so Paul asû mbeti na ala, ala lï na yâ angangu ye ti pono, na Togbia Néron amu yanga ti sala sana na ambeni juska na kuâ. Kite ayeke pepe so mango na bê so fade Nzapa ayeke mu na ala couronne ti fini, so a mu zendo ni amu maboko na ala na yâ ye ti pono ti ala. Ka ti e laso?

⁵ Tongana aChrétien, e nga e yeke ku ti tene a sala ngangu na e. (2 Timothée 3:12) Na ndo ni, e hinga so “ngoi na ye so zo aku pepe” ayeke si na e kue. (Zo-ti-fa-tene 9:11, NW) Mbeni zo so e ndoye alingbi ti kui na yâ mbeni ndao. Mbeni sioni kobela alingbi ti fâ mbeni sewa wala mbeni kamarade ti e so e ndoye. Tongana e bata lê nzoni pepe na ndo beku ti Royaume, e lingbi ti wara kpale na lege ti yingo tongana amara ti tara tongaso asi. Tongaso, e yeke sala nzoni ti hunda tele ti e mveni: ‘Mbi yeke “na ngia na yâ beku”? Fani oke mbi yeke mu ngoi ti gbu li na ndo ni? Paradis so ayeke ga ayeke tâ ye na lê ti mbi? Mbi yeke ba mbi mveni na yâ ni? Mbi yeke ku na wâ hunzingo ti aye ti sese so tongana ti so mbi yeke ku ni la ni na ngoi so mbi manda tâ tene ti fani kozo?’ Ndangba hundango tene so ahunda ti gbu li dä nzoni. Ngbanga ti nyen? Ngbanga ti so, tongana e yeke na nzoni seni, na nzoni dutingo, na e yeke lango na yâ mbeni mbage ti sese so bira, kota nzala, wala ye ti ngangu ti ndagigi andu ni mingi wala kete, e lingbi kamême na ngoi ti fadeso ti glisa batango lê nzoni na ndo ngangu nzala ti ba fini sese ti Nzapa na gango ni.

6. (a) Tongana Paul na Silas ahu pono, ala bata lê ti ala na ndo nyen? (b) Tongana nyen tapande ti Paul na Silas alingbi ti mu ngangu na e laso?

⁶ Na ndo ni, Paul awa azo ti Rome ti tene ‘bê ti ala azia pepe na yâ ye ti pono.’ (aRomain 12:12) Paul ahinga la ni ye ti pono nzoni. Mbeni lâ, lo ba na suma mbeni koli so atisa lo ti “ga na Macédoine” ti mu maboko na azo kâ ti manda ye na ndo Jéhovah. (Kusala 16:9) Na ndo tene so, Paul nga na Luc, Silas, na Timothée, ague na Poto. Ye nyen a yeke ku amissionnaire so asala kusala na wâ? Ye ti pono! Na pekoni so ala fa tene na Philippes, gbata ti Macédoine, a pika Paul na Silas na zaza na a bi ala na da ti kanga. Biani, ambeni zo ti gbata ti Philippes ayeke pepe gi azo so asala nzala ti tokua ti Royaume ni oko pepe; ala yeke kanga nga lege na ni na ngangu kue. Gbiango ti aye so apusu amissionnaire so asala kusala na wâ ti glisa ngia ti ala? Oko pepe. Na peko ti so a pika ala na a bi ala na da ti kanga, “ndulu na bebi, Paul na Silas ayeke sambela, ala yeke sala bia ti sepela Nzapa.” (Kusala 16:25, 26) Tâ tene, pasi so aga na lege ti pikango ala amu ngia pepe na Paul na Silas, me a yeke pepe ye so amissionnaire use so abata lê ti ala dä. Bibe ti ala ague na ndo Jéhovah na alege so na yâ ni lo yeke mu deba nzoni na ala. Na batango na ngia si ‘bê ti ala azia pepe na yâ ye ti pono,’ Paul na Silas azia apendere tapande na aita ti ala na Philippes nga na ambeni ndo nde.

7. Ngbanga ti nyen a lingbi e yôro na yâ asambela ti e atene ti kiringo singila?

⁷ Paul asû na mbeti: “I zia ti sambela pepe.” (aRomain 12:12) Mo yeke sambela tongana bê ti mo ayeke gi mo na ambeni ngoi? Mo yeke sambela na ndo ye wa? Peut-être mo yeke fa mbeni mbilimbili kpale ti mo na mo yeke hunda na Jéhovah ti mu maboko na mo. Me mo lingbi nga ti zia na yâ ni atene ti kiringo singila teti aye ti nzoni so mo yeke wara. Tongana akpale alondo, gbungo li na ndo nzobe so Jéhovah ayeke fa na yâ salango ye ti lo na mbage ti e ayeke mu maboko na e ti “duti na ngia na yâ beku.” David, so fini ti lo asi na akpale, asû na mbeti: “O L’Eternel [“Jéhovah,” NW] Nzapa ti mbi, kusala ti kpene ti Mo, na bibe ti Mo teti e awu mingi; zo oko ti lingbi na Mo ayeke pepe; tongana mbi ye ti sala tene ti kusala ti Mo, fade a yeke mingi mingi, zo alingbi diko kue pepe.” (Psaume 40:6 [40:5, NW]). Tongana, legeoko na David, e gbu li lakue lakue na ndo adeba nzoni so e yeke wara na mbage ti Jéhovah, fade e yeke ba so a yeke ngangu oko pepe ti duti na ngia.

Bata Mbeni Bibe so Ayeke Nzoni

8. Ye nyen ayeke mu maboko na mbeni Chrétien ti duti na ngia tongana lo yeke luti na gbele salango ngangu?

⁸ Jésus awa adisciple ti lo ti bata mbeni bibe so ayeke nzoni tongana ala tingbi na atara nde nde. Lo tene: “Ngia ayeke na i, tongana azo azonga i, na ala sala ngangu na i, na ala sala tene ti mvene sioni nde nde na li ti i, ngbanga ti Mbi.” (Matthieu 5:11) Nda ti tene wa e yeke na ni ti duti na ngia na gbele aye tongaso? Ngangu ti e ti luti na gbele kangango lege ayeke fa na gigi so yingo ti Jéhovah ayeke na ndo e. Bazengele Pierre atene na afon lo Chrétien ti ngoi ti lo: “Ngia ayeke na i, tongana ala sala tene ngangu na li ti i teti iri ti Christ, teti Yingo ti Gloire na ti Nzapa aduti na ndo i.” (1 Pierre 4:13, 14) Na lege ti yingo ti lo, fade Jéhovah ayeke mu maboko nga na e ti gbu ngangu na ti bata ngia ti e.

9. Ye nyen amu la ni maboko na ambeni ita ti wara anda ti ye ti duti na ngia atä so ala yeke sala kanga teti mabe?

⁹ Même tongana e yeke na yâ aye ti sioni ahon kue ti fini ti e, e lingbi ti wara anda ti ye ti duti na ngia. Mbeni Chrétien so iri ti lo ayeke Adolf aba tâ tene ti ye so. Lo yeke na yâ mbeni kodoro so a kanga lege na kusala ti aTémoin ti Jéhovah teti angu mingi awe. A gbu Adolf na ambeni mingi ti afon lo na a fâ ngbanga na ndo ala ti sala kanga aninga teti so ala ke ti zia lege ti atene ti mabe ti ala so aluti na ndo Bible. Dutingo na da ti kanga ni ayeke la ni ngangu, me legeoko na Paul na Silas, Adolf na afon lo ayeke la ni na anda ti ye ti kiri singila na Nzapa. Ala ba so ye so asi na ala na da ti kanga amu maboko na ala ti kpengba mabe ti ala na ti maï alengo ti Chrétien ti ngele ngangu, tongana bê ti mu ye, be-nzoni, na ndoye ti ita. Na tapande, tongana mbeni zo ti kanga oko awara ambeni ye so alondo na azo ti da ti lo, lo kangbi ni na afon lo wamabe so ayeke ba aye so a mu na ala na ndo ni tongana ye so alondo na Jéhovah, Wamungo ye ti kota ahon ti “matabisi kue ti nzoni na matabisi kue so alingbi kue alondo.” Akusala ti nzobe tongaso ayeke ga na ngia na zo so ayeke kangbi ni nga na ala so ayeke wara ni. Tongaso, tâ ye so a leke ni ti futi mabe ti ala ayeke biani ye so akiri akpengba ala mingi ahon na lege ti yingo!​—Jacques 1:17; Kusala 20:35.

10, 11. Tongana nyen mbeni ita-wali asala ye na gbele angangu hundango tene na lo so fango ngbanga ti salango yongoro kanga aga na pekoni?

¹⁰ A gbu Ella, so alango nga na yâ mbeni kodoro so a kanga lege na kusala ti Royaume dä a ninga awe, teti so lo yeke kangbi beku ti lo ti Chrétien na ambeni zo. Teti anze miombe, a hunda na lo angangu hundango tene. Tongana na nda ni a ga na lo na gbele ngbanga, a fâ ngbanga na ndo ti lo ti sala ngu 10 na yâ mbeni da ti kanga so mbeni wavorongo Jéhovah nde ayeke dä pepe. Ella ayeke la ni gi na ngu 24 na ngoi ni.

¹¹ Biani, Ella aye la ni pepe ti sala mingi ti ngoi ti pendere ti lo na yâ mbeni da ti kanga. Me teti so lo lingbi pepe ti gbian mbeni ye na yâ ye so asi na lo, lo yeda ti gbian bango ndo ti lo. Tongaso, lo to nda ti ba da ti kanga ni tongana territoire ti lo mveni ti fango tene. Lo tene: “Ye mingi ayeke dä ti sala na yâ kusala ti fango tene, a sala si angu ni ahon hio mingi.” Na peko ti angu oku na ndo ni, a kiri ahunda tene na Ella. Na bango so kanga ni afuti mabe ti lo pepe, akoli so ayeke hunda tene na lo atene: “E lingbi pepe ti zi mo; mo gbian pepe.” Me Ella akiri tene na bê kue: “Me mbi gbian awe! Dutingo ti mbi na lege ti yingo aga nzoni ahon fadeso tongana a haka ni na ngoi so mbi lï kpâ na da ti kanga, na mabe ti mbi akpengba mingi ahon ti kozo!” Na lo kiri lo tene: “Tongana i ye ti zi mbi pepe, fade mbi yeke ngbâ juska na ngoi so Jéhovah aba so a lingbi lo zi mbi.” Ngu oku na ndambo na da ti kanga afuti ngia ti Ella pepe! Lo manda ti wara ngia na yâ aye kue so lo yeke tingbi na ni. Mo lingbi ti manda mbeni ye na lege ti tapande ti lo?​—aHébreu 13:5.

12. Ye nyen alingbi ti ga na siriri ti bibe na mbeni Chrétien na yâ aye ti ngangu?

¹² Tene pepe na nda ni so Ella ayeke na mbeni matabisi nde so amu lege na lo ti luti na gbele mara ti atara tongaso. Na dango bê na ngoi ti ahundango tene so lo hon na yâ ni na yâ anze so aga kozoni si a fâ ngbanga ti kanga na ndo lo, Ella atene: “Mbi dabe ti mbi so apembe ti mbi ayeke pika tele na yâ ni, na mbi yeke tongana mbeni kete ndeke so ayeke na mbito.” Ye oko, Ella ayeke na mabe so akpengba na mbage ti Jéhovah. Lo manda ti zia bê kue na lo. (aProverbe 3:5-7) Na nda ni, Nzapa aga tâ zo na lê ti lo ahon ti kozo. Lo tene: “Ngoi oko oko kue so mbi yeke lï na yâ kubu ti hundango tene ni, mbi ba so siriri ayeke ga na ndo mbi. . . . Tongana ye ni ayeke mu mbito mingi ahon, siriri ni ayeke kono nga mingi ahon.” Jéhovah ayeke la ni lingu ti siriri so. Bazengele Paul atene: “I gi bê ti i na ye oko pepe; me na yâ ye kue i fa na Nzapa ye so i ye, na lege ti sambela na ti hunda mingi na tene ti singila. Na fade siriri ti Nzapa so ahon bibe kue abata bê ti i na abata bibe ti i na yâ Christ Jésus.”​—aPhilippien 4:6, 7.

13. Ye nyen adë bê ti e so tongana e yeke na yâ aye ti pono, fade e yeke wara ngangu ti hon ndo ni?

¹³ Ella so asigigi na da ti kanga awe, abata ngia ti lo atä aye ti ngangu. Lo sala tongaso, pepe na ngangu ti lo mveni, me na ngangu so Jéhovah amu na lo. A yeke nga oko ye so asi na Paul so asû na mbeti: “Tongaso mbi yeke na ngia mingi ahon ti yä iri ti mbi teti ngangu pepe ti mbi, si ngangu ti Christ alingbi duti na ndo mbi. . . . Teti tongana mbi woko, a yeke na ngoi so si mbi wara ngangu.”​—2 aCorinthien 12:9, 10, NW.

14. Fa na tapande tongana nyen mbeni Chrétien alingbi ti bata mbeni nzoni bango ndo na mbage ti mbeni ye ti ngangu so asi na yâ fini ti lo na ye so alingbi ti ga na pekoni.

¹⁴ Akpale so mo yeke luti na gbele ni mo mveni laso alingbi peut-être ti duti nde kete na akpale so e ba tene ni ge. Ye oko, atä mara ti kpale ni ayeke tongana nyen, a yeke ngangu ti luti na gbele ni. Na tapande, peut-être patron ti mo ayeke kasa kusala ti mo sioni mingi, même mingi ahon kusala so ambeni zo ti kua ni nde so ayeke ti ambeni lege ti vorongo nde. Peut-être mo lingbi pepe ti gi mbeni kusala nde. Tongana nyen mo lingbi ti bata ngia ti mo? Dabe ti mo na Adolf na afon lo, so dutingo ti ala na da ti kanga amu lege na ala ti lë alengo so ayeke kota ye mingi. Tongana mo sala ngangu na bê kue ti nzere na patron ti mo, même na lo so ‘bê ti lo ayeke ngangu,’ fade mo yeke lë alengo tongana gbungo ngangu na be-nze-pepe. (1 Pierre 2:18) Na ndo ni, mo lingbi ti ga mbeni zo ti kua so ngele ti lo ayeke kota mingi, na ye so ayeke kono alege ti mo ti wara mbeni lâ kusala so ayeke nzoni mingi ahon. Zia e ba fadeso ambeni lege nde so na yâ ni e lingbi ti bata ngia ti e na yâ kusala ti Jéhovah.

Salango si Fini ti Mo Akpengba Pepe Ayeke Gue ti Si na Ngia

15-17. Ye nyen mbeni koli na wali amanda so alingbi ti hon ndo ti kpale ti ala atä so a lingbi pepe ti lungula gunda ni kue?

¹⁵ Peut-être mo yeke na alege mingi pepe ti soro mara ti kusala ti sese so mo ye ti sala wala place so mo yeke sala kusala ni dä, me peut-être ambeni mbage nde ti fini ayeke dä so mo lingbi ti duti na ngangu na ndo ni. Ba tapande so.

¹⁶ Mbeni koli na wali Chrétien atisa mbeni ancien na da ti ala ti kangbi mbeni kobe. Gi na yâ lakui ni, koli so na wali ti lo afa na bê ti ala kue so, a de ti ninga pepe, akpale ti gigi ahon ndo ti ala. Atä so akusala so ala yeke sala na ngoi kue ayeke hunda na ala ngoi na ngangu mingi, ala lingbi pepe ti gi mbeni kua nde. Ala yeke hunda tele ti ala teti angoi oke ala lingbi ande ti luti na gbele aye so.

¹⁷ Tongana ala hunda ti wara wango, ancien ni atene: “I sala si fini ti i akpengba pepe.” Tongana nyen? Koli ni na wali ti lo ayeke mu angbonga ndulu na ota ti gue na ti kiri na kua lâ na lâ. Ancien ni, so ahinga koli na wali so nzoni mingi, awa ala ti ba lege ti gue ti lango ndulu na ndokua ti ala, tongaso ala yeke wara lege ti sala si ngoi so ala yeke mu lâ na lâ ti gue na ti kiri na kua akiri na peko. Ala lingbi ti mu ngoi ni so ala yeke vo ti sala ambeni ye nde so ayeke kota ye mingi, na tapande ti hu tele ti ala kete ahon. Tongana akpale ti gigi ayeke mu mbage ti ngia ti mo, ngbanga ti nyen pepe ti ba wala mo lingbi ti wara ngangu na gbiango ambeni ye?

18. Ngbanga ti nyen a yeke kota ye mingi ti gbu li nzoni kozoni ti mu adesizion?

¹⁸ Mbeni lege nde ti sala si kpale akiri na peko ayeke ti gbu li nzoni kozo ti mu adesizion. Na tapande, mbeni Chrétien amu desizion ti leke mbeni da. Lo soro mbeni plan ti da so akpengba mingi atä so lo leke mbeni da kozoni lâ oko pepe. Fadeso, lo ba so lo lingbi fade ti kpe ambeni senge kpale tongana lo ‘bata lege ti lo’ kozoni ti soro plan ti da ti lo. (aProverbe 14:15) Mbeni Chrétien nde ayeda ti futa mbeni bon ti nginza na place ti mbeni fon lo wamabe. Na yâ mango tele ni, tongana lo so asala bon ti nginza ni alingbi pepe ti kiri na ni, fade a yeke hunda na zo so ayeda ti futa ni na place ti lo ti sala ni. Na tongo nda ni, ye kue atambela nzoni, me a si na mbeni ngoi, zo so akamata bon ti nginza ni ato nda ti sala ye alingbi na mango tele ni pepe. Tongana wasalango bon ni aba tongaso, lo hunda na lo so ayeda ti futa bon na place ti zo so akamata bon ni ti kiri na nginza ni kue. Ye so aga na kota kpale mingi na lo so amu yanga ti futa nginza na place ti mba ti lo. Lo lingbi fade ti kpe ye so pepe tongana lo bi bê nzoni na ndo aye kue kozoni ti yeda ti yö kungba ti kuda ni?​—aProverbe 17:18.

19. Na yâ ambeni lege wa e lingbi ti sala si akpale ti e akiri na peko na yâ fini ti e?

¹⁹ Tongana e nze, zia e tene lâ oko pepe na nda ni so e lingbi ti sala si akpale ti e akiri na peko na ti kiri ti wara ngia ti e na mungo gi angoi kete teti mandango Bible e mveni, salango kusala ti fango tene, nga guengo na abungbi. Nde na ni, aye so ayeke akota ye mingi so na lege ni e lingbi ti wara yingo ti nzoni-kue ti Jéhovah, so mbeni lengo ni ayeke ngia. (aGalate 5:22) Akusala ti Chrétien ayeke mu ngangu lakue, na mingi ni ayeke nze zo ahon ndo ni pepe. (Matthieu 11:28-30) Peut-être a yeke akusala ti sese so wala ti salango ngia si asala si e nze, pepe akusala ti yingo. Tongana e manda ti gue na gbogbo na mbeni l’heure so alingbi, peut-être fade a yeke mu maboko na e ti kiri ti wara ngangu. Mungo ngoi mingi ahon ti wo tele alingbi ti ga na ye ti nzoni mingi. N. H. Knorr, so asala kusala tongana mbeni oko ti Wabatango Bungbi ti aTémoin ti Jéhovah juska na kuâ ti lo, ayeke tene ka lakue na amissionnaire: “Tongana i nze, kozo ye ti sala ayeke ti mu ngoi ti wo tele kete. Bê ti mo ayeke dö ti ba tongana nyen a yeke duti pepe ngangu mingi ahon na mo ti hon ndo ti akpale kue na pekoni so mo mu ngoi ti lango nzoni na bï!”

20. (a) Fa na ndulu tene ambeni lege so na yâ ni e lingbi ti bata ngia ti e. (b) Anda ti tene wa mo lingbi ti bi bê dä ti duti na ngia? (Ba encadré na lembeti 27.)

²⁰ A-Chrétien ayeke na matabisi ti sala na “Nzapa so ayeke na ngia.” (1 Timothée 1:11, NW) Tongana ti so e ba, e lingbi ti bata ngia ti e même tongana akpale ahon ndo ti e. Zia e bata beku ti Royaume na gbele e, e gbian bango ndo ti e tongana a hunda ti sala tongaso, na e sala si fini ti e akpengba pepe. Tongaso, atä ye kue so asi na yâ fini ti e, fade e yeke sala ye alingbi na tene ti bazengele Paul: “I duti na ngia lakue na yâ Seigneur; mbi tene na i mbeni, i duti na ngia.”​—aPhilippien 4:4.

Bi Bê Nzoni na ndo Ahundango Tene so:

• Ngbanga ti nyen a lingbi aChrétien abata beku ti Royaume nzoni na gbele ala?

• Ye nyen alingbi ti mu maboko na e ti bata ngia ti e na yâ aye ti ngangu?

• Ngbanga ti nyen a lingbi e gi ti sala si fini ti e akpengba pepe?

• Na yâ alege wa ambeni zo asala si fini ti ala akpengba pepe?

[Encadré/Afoto na lembeti 27]

Ambeni Nda ti Tene Nde ti Duti na Ngia:

Tongana aChrétien, e yeke na anda ti tene mingi ti duti na ngia. Zia e ba ambeni:

1. E hinga Jéhovah.

2. E yeke manda tâ tene ti Mbeti ti Nzapa.

3. A lingbi ti mu pardon na siokpari ti e na lege ti mabe ti e na yâ sadaka ti Jésus.

4. Royaume ti Nzapa ayeke komande; fini sese ayeke ndulu ti si!

5. Jéhovah ague na e na yâ mbeni paradis ti yingo.

6. E wara ngia na yâ mbeni sewa ti aita na ndo kue.

7. E yeke na matabisi ti mu mbage na yâ kusala ti fango tene.

8. E yeke na fini, na e yeke kamême na mbeni ngangu.

Mo lingbi ti fa ambeni nda ti dutingo na ngia nde oke?

[Foto na lembeti 24]

Paul na Silas ayeke na ngia même na da ti kanga

[Afoto na lembeti 26]

Mo yeke bata lê na ndo beku ti ngia ti fini sese ti Nzapa?