“Deba Nzoni ti Jéhovah, Ba Ye so Aga na Mosoro”

E KUE e ye si a hiri deba nzoni na ndo ti e. Abakari atene so adeba nzoni amaï tâ ngia, nzoni duti, wala maïngo ti aye. Teti so Jéhovah ayeke Wamungo “matabisi kue ti nzoni na matabisi kue so alingbi kue,” atâ deba nzoni kue so aninga alondo na Wasalango e ti ndoye. (Jacques 1:17) Lo tuku adeba nzoni mingi na ndo ti azo kue, même na ndo ala so ahinga lo pepe. Na ndo Babâ ti lo, Jésus atene: “Lo sala si lâ ti lo asu na ndo azo ti sioni nga na ndo azo ti nzoni, na lo sala si ngu-nduzu apika na ndo azo ti mbilimbili nga na ndo azo ti kirikiri.” (Matthieu 5:45, NW) Ye oko, Jéhovah abi bê ti lo mbilimbili na ndo azo so andoye lo.​—Deutéronome 28:1-14; Job 1:1; 42:12.

Wasungo psaume asû na mbeti: “Ala so atambela mbilimbili, Lo gbanzi ye oko ti nzoni na ala pepe.” (Psaume 84:12 [84:11, NW]) Biani, ala so asala na Jéhovah ayeke na fini so ayeke na mosoro nga so nda ni ayeke dä. Ala hinga so ‘deba nzoni ti Jéhovah, ayeke ye so aga na mosoro, na lo zia vundu dä oko pepe.’ Bible atene nga: “Sese ni aga ye ti héritier ti azo so [Jéhovah a] hiri tene nzoni na ndo ala.” (aProverbe 10:22, NW; Psaume 37:22, 29) So tâ deba nzoni si ayeke duti ande!

Tongana nyen e lingbi ti wara deba nzoni ti Jéhovah? Kozoni kue, a lingbi e lë alengo so anzere na lo. (Deutéronome 30:16, 19, 20; Michée 6:8) E hinga ye so na lege ti atapande ti awakua ota ti Jéhovah ti ngoi ti giriri.

Jéhovah Ahiri Deba Nzoni na ndo Awakua ti Lo

Noé ayeke la ni mbeni wakua ti Nzapa so ayeke nde mingi. Na Genèse 6:8, e diko: “Noé aga nzoni na lê ti L’Eternel.” Ngbanga ti nyen? Ngbanga ti so Noé amä yanga. Mbaï ni atene: “Noé atambela na Nzapa.” Noé asala ye alingbi na ambilimbili kpengba-ndia ti Jéhovah na lo bata akomandema ti Lo. Na mbeni ngoi so sese alï mingi na yâ ye ti ngangu na salango pitan kirikiri, bê ti Noé apusu lo ti sala “ye kue so Nzapa akomande lo, lo sala tongaso.” (Genèse 6:9, 22) Ye ti pekoni ayeke so Jéhovah afa lege na lo ti leke mbeni “arche ti sö azo ti da ti [Noé].” (aHébreu 11:7) A yeke tongaso si Noé na sewa ti lo, nga na lege ti ala mara ti azo kue, asö kuâ na futingo ti wagame so. Na Noé akui na beku ti kiri ti wara fini ti lakue lakue na ndo sese so ayeke ga paradis. Biani, lo wara akota deba nzoni!

Abraham kue ayeke la ni na alengo so anzere na Jéhovah. Kota lengo ni ahon na popo ti ala ayeke mabe. (aHébreu 11:8-10) Abraham azia mbeni nzoni dutingo na Our nga na pekoni na Harân teti so lo mä na bê na zendo ti Jéhovah so fade na lege ti lo hale ti lo ayeke ga mingi na ayeke duti ande mbeni deba nzoni teti amara kue. (Genèse 12:2, 3) Atä so a tara lo teti angu mingi, Nzapa afuta mabe ti lo tongana a dü molenge ti lo Isaac. Na lege ti lo, Abraham aga kotara ti mara so Nzapa asoro, Israël, nga na nda ni ti Messie. (aRomain 4:19-21) Na ndo ni, lo yeke “babâ ti ala kue so amä na bê,” na a ga ti hiri lo “ndeko ti Nzapa.” (aRomain 4:11; Jacques 2:23; aGalate 3:7, 29) Biani lo yeke na mbeni fini so nda ni ayeke dä, na ba tongana nyen lo wara akota deba nzoni!

Ba nga tapande ti Moïse, koli so ayeke be-ta-zo. Lengo ti lo so ayeke kota mingi ayeke bê ti kiri singila ti lo teti aye ti yingo. Moïse avi peko ti lo na amosoro kue ti Égypte na lo “gbu ngangu legeoko tongana lo yeke ba Lo so zo aba Lo pepe.” (aHébreu 11:27) Na peko ti angu 40 na Madiân, lo kiri na Égypte tongana mbeni mbakoro koli na lo luti na gbele lo ti ngangu ahon ti ngoi ni kâ, Pharaon, ti hunda si a zi aita ti lo na gbe ti ngba. (Exode 7:1-7) Lo ba tâ na lê ti lo akä bale oko ni, fango yâ ti Kota Ngu Bengba, nga na futingo ti bungbi ti aturugu ti Pharaon. Jéhovah asala kusala na lo ti mu Ndia na Israël na ti sala songo na popo ti mbele ti Lo na fini mara ni. Teti angu 40, Moïse afa lege na mara ti Israël na yando. Fini ti lo ayeke na tâ nda ni, na lo wara gbâ ti apendere matabisi ti kusala.

Adeba Nzoni ti Laso

Ambaï so afa so fini ti azo so asala na Nzapa ayeke biani na nda ni. Na ngoi so azo ti Jéhovah alë alengo tongana mango yanga, mabe, nga na bê ti kiri singila teti aye ti yingo, ala wara akota deba nzoni mingi.

A hiri deba nzoni na ndo ti e tongana nyen? Biani, na ngoi so kota nzala ti kobe ti yingo asala azo kutu mingi na yâ Chrétienté, e lingbi ti “su na be-ti-sala-nzoye ti Jéhovah.” (Jérémie 31:12, NW) Na lege ti Jésus Christ nga na “ngba ti be-ta-zo na ti ndara,” Jéhovah amu gbâ ti kobe ti yingo so amu maboko na e ti ngbâ ti tambela na ndo ‘lege so ague na fini.’ (Matthieu 7:13, 14, NW; 24:45, NW; Jean 17:3) Dutingo ndulu na aita ti e Chrétien ayeke nga mbeni kota deba nzoni. Na abungbi nga na ambeni ngoi nde, ti duti na tele ti afon e awavorongo Nzapa so afa na gigi ndoye na so asala ngangu na bê kue ti yü “zo-ti-fini” ayeke mbeni lingu ti kota ngia. (aColossien 3:8-10; Psaume 133:1) Ye oko, deba nzoni ti kota ahon so e wara ayeke matabisi ti e ti ngele ngangu ti lë mbeni kpengba songo na Jéhovah Nzapa na ti tambela na senda ti Molenge ti lo, Christ Jésus.​—aRomain 5:1, 8; aPhilippien 3:8.

Tongana e gbu li na ndo ti mara ti adeba nzoni tongaso, e ba tongana nyen kusala so e sala na Nzapa ayeke biani ti ngele ngangu. Peut-être e bi bê ti e na tondo ti Jésus na ndo mbeni wadengo buze so atambela na akodoro nde nde na so agi anzoni perle. Na ndo koli so, Jésus atene: “Na tongana lo wara perle oko ti ngele ngangu, lo gue lo kä ye ti lo kue, na lo vo perle so.” (Matthieu 13:46) Biani a yeke tongaso si e yeke ba songo ti e na Nzapa, matabisi ti e ti sala na lo, songo ti e ti Chrétien, beku ti e ti Chrétien, na ambeni deba nzoni kue so andu mabe ti e. Mbeni ye ti ngele ngangu mingi ahon ala so na yâ fini ti e ayeke dä oko pepe.

Kiri Ye na Jéhovah

Teti so e hinga Jéhovah tongana Wamungo matabisi kue ti nzoni apusu bê ti e ti fa na gigi kiringo singila teti adeba nzoni so e wara. E lingbi ti sala ni tongana nyen? Mbeni lege ni ayeke ti mu maboko na azo ti wara a-oko deba nzoni so. (Matthieu 28:19) Na yâ ti akodoro ahon 230, aTémoin ti Jéhovah ayeke mu ngoi ti ala mingi ti sala vizite na azo so ayeke ndulu na ala gi ti sala ye so. Na ngoi so ala yeke sala tongaso, ala mu akete ye so ala yeke na ni, ngoi, ngangu, na akungba, ti mu maboko na azo ti ‘wara tâ hingango ye ti tâ tene.’​—1 Timothée 2:4, NW.

Ba tapande ti apionnier so alango na Glendale, Californie, États-Unis ti Amerika. Lakue na samedi na ndapelele, ala yeke tambela akilomètre 100 ti gue na mbeni da ti kanga ti letäa ti sala vizite dä na ti kiri. Atä so na vizite oko oko so ala sala na azo ti kanga ala lingbi ti sala gi akete ngbonga, bê ti ala anze pepe. Oko ti ala atene: “Ti sala kusala na yâ territoire so ayeke nde ayeke biani senge ye pepe. E yeke sala ni na ngia mingi na bê. E yeke na gbâ ti azo so asala nzala ti tene ni tongaso a yeke ngangu na e ti ba lege ti ala kue. Na ngoi so, e yeke manda Bible na azo oku, na ambeni osio ahunda ti manda Bible.”

Awakua Chrétien so ayeke na wâ ayeke na ngia ti mu senge senge aye so ala yeke na ni ti sala na kusala so asö fini. Ala fa na gigi bango ndo ti Jésus, so atene: “A mu ye na i senge senge, i mu ye na azo senge senge.” (Matthieu 10:8) Azo kutu mingi na ndo sese ayeke bi tele ti ala nga na yâ mara ti kusala so a sala na bê kue, na ye ti pekoni ayeke so azo ti bê ti mbilimbili mingi mingi ayeda na ni na aga adisciple. Gi na yâ angu oku so ahon, azo ndulu na kutu 1.7 amu fini ti ala na Jéhovah. Mungo aye so alingbi teti wungo ti azo so angbâ lakue ti gue na li ni ahunda ti tene a leke aBible na ambeti so aluti na ndo ti Bible nga ti leke afini Da ti Royaume nga na ambeni ndo nde ti sala na abungbi. Anginza so a mu ti sala na akusala so alondo na ndo wa? Ala kue ayeke gi amatabisi so azo amu na bê ti ala mveni.

Teti so dutingo ti konomi na ambeni mbage ti sese ayeke nzoni pepe, azo mingi atiri ngangu ti mu akota ye so a hunda ti bata sewa ti ala na fini. Na lege ti mbeti-sango New Scientist, azo ndulu na ngbundangbu oko ayeke mu pata 70 na ndo ti pata 100 ti nginza so ala wara ti vo gi na kobe. Mingi ti aita ti e ti koli na ti wali Chrétien ayeke na yâ dutingo so. Tongana afon ala wamabe amu maboko na ala pepe, ka ala lingbi pepe ti wara aye tongana ambeti ti Chrétien wala aDa ti Royaume so alingbi.

Biani, ye so aye ti tene pepe so ala yeke duti gi tongaso si azo nde ayö kungba ti ala. Me a lingbi a mu maboko na ala. Tongana Moïse awa azo ti Israël ti mu aye ti mitele tongana matabisi ti fa bê ti kiri singila ti ala na Jéhovah teti adeba nzoni so ala wara, lo tene: “Akoli kue amu ye alingbi na ye so ayeke na ala, na lege ti ndoye so L’Eternel Nzapa ti ala amu na ala.” (Deutéronome 16:17) Tongaso, tongana Jésus aba mbeni womua amu na matabisi “kete nginza use” na yâ temple, lo gonda womua ni na lê ti adisciple ti lo. Womua ni asala ye kue so lo lingbi ti sala. (Luc 21:2, 3) Legeoko nga, aChrétien so ayeke na mosoro mingi pepe ayeke sala ye so a lingbi na ala. Na tongana ye atia ala, a lingbi ti mu ni na lege ti amatabisi so alondo na afon ala Chrétien so ayeke na ye kete ahon na lege ti mitele.​—2 aCorinthien 8:13-15.

Tongana e kiri ye na Jéhovah na alege so, a yeke kota ye ti tene nda ti ye so apusu e ti sala ni ayeke nzoni. (2 aCorinthien 8:12) Paul atene: “Zia azo oko oko kue amu ye tongana bê ti ala aye, na vundu pepe, wala na forcé pepe; teti Nzapa andoye zo so amu matabisi na ngia.” (2 aCorinthien 9:7) Na mungo aye na bê ti e kue, e yeke mu mbage ti e na konongo ti bungbi ti Jéhovah so ayeke tambela fadeso nga e yeke kono ngia ti e.​—Kusala 20:35.

Ti mu mbage na kusala ti fango tene na ti mu amatabisi na bê ti e mveni ayeke alege use so e lingbi ti kiri ye na Jéhovah ngbanga ti adeba nzoni so lo mu na e. Na ba tongana nyen a mu ngangu na e ti hinga so Jéhovah ayeke na nzala ti hiri deba nzoni ti lo na ndo azo mingi mingi ahon ti bê ti mbilimbili, so peut-être na ngoi so ala de ti hinga lo pepe! (2 Pierre 3:9) Tongaso, zia e ngbâ ti mu aye ti e na yâ kusala ti Nzapa si a lingbi wara azo ti bê ti mbilimbili na ti mu maboko na ala ti lë alengo tongana mango yanga, mabe, na bê ti kiri singila. Na lege so, e yeke wara ande ngia so aga na lege ti mungo maboko na ala ti ‘tara na ti ba so Jéhovah ayeke nzoni.’​—Psaume 34:8, NW.

[Tene na lembeti 28, 29]

Alege Nde Nde so A Soro ti Mu na

A-OFFRANDE TETI KUSALA SO A SALA NA NDO SESE KUE

Azo mingi azia nde wala aleke na yâ mama-nginza ti ala mbeni wungo ti nginza so ala zia na yâ asanduku teti a-offrande so kete mbeti “A-offrande teti kusala na ndo sese kue​—Matthieu 24:14” ayeke na ndo ni.

Nze oko oko, akongregation ayeke tokua anginza ni na kota ndokua ti aTémoin ti Jéhovah na Brooklyn wala na filiale so ayeke na kodoro ti ala. A lingbi nga ti tokua a-offrande so a mu na bê kue gi na Biröo so aba lege ti nginza, (Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483) wala na filiale so aba lege ti kusala ni na kodoro ti mo. A lingbi nga ti mu tongana matabisi a-bijou na ambeni ye nde ti ngele ngangu. Fade a sû na tele ni mbeni mbeti ti fa so amatabisi so ayeke a-offrande so a mu biaku.

AMATABISI SO A HUNDA MBENI YE KOZONI

Mbeni zo alingbi ti mu nginza tongana mbeni matabisi na hundango mbeni ye kozoni, so tongana zo ni ayeke na yâ ti bezoin, a lingbi ti kiri na lo nginza so lo mu tongana offrande. Ti wara sango mingi na ndo ni, sû mbeti na Biröo so aba lege ti nginza na adresse so a fa na nduzu ge.

AMATABISI

Nde na amatabisi ti nginza so a mu biaku na ti so a hunda mbeni ye kozoni, ambeni lege nde nde ayeke dä ti mu maboko na lege ti nginza na kusala ti fango tene ti Royaume na ndo kue. Aye so andu:

Assurance: A lingbi ti zia ni na iri ti Société Watch Tower ti tene lo wara ande nginza so mbeni zo amu assurance ndali ni, wala nginza so mbeni zo abata ngbanga ti retraite ti lo.

Nginza na Banque: Na yâ ti ambeni kodoro, a lingbi ti bata teti Société Watch Tower nginza so a zia na banque, mbeni mbeti so afa atene a zia nginza kâ, wala mbeti ti nginza so a bata teti lâ ti retraite, wala so a zia na iri ti Société ti tene lo wara ni tongana zo ni akui.

Ambeti ti Mosoro na ti Mbele: A lingbi ti mu ambeti ti mosoro na ti mbele na Société Watch Tower tongana mbeni matabisi so a hunda mbeni ye na pekoni pepe.

Ada: A lingbi ti mu na Société Watch Tower ada so alingbi ti kä ni; zo ni alingbi ti mu ni biaku, wala lo fa so Société ayeke mu ni ande na peko ti kuâ ti lo na lo yeke ngbâ ti lango na yâ ni na ngoi kue so lo de na fini. Kozoni ti mu na filiale mbeni matabisi ti da tongaso, a yeke nzoni ti ba lo si.

Testament na Amatabisi so A Bata ti Mu na Mbeni Ngoi: A lingbi ti zia na Société Watch Tower ada na nginza na lege ti mbeni testament so ndia ayeda na ni, wala a lingbi ti sû mbeni mbeti ti fa so fade Société Watch Tower ayeke ga mveni ti mbage ti mosoro ni na mbeni ngoi. Lekengo ye ti tene mbeni lege ti vorongo aga ande mveni ti mbeni mosoro alingbi ti zi lege ti kiri na peko alampo so a lingbi a futa ni.

Amara ti mungo amatabisi tongaso ahunda ti tene zo ni agbu li ti lo nzoni. Ti mu maboko na ala so aye ti mu matabisi teti kusala ti aTémoin ti Jéhovah na ndo sese kue na alege nde nde, a leke mbeni brochure na yanga ti Anglais nga na Espagnole, Charitable Planning to Benefit Kingdom Service Worldwide. A sala brochure so ti kiri tene na gbâ ti ahundango tene so a yeke hunda na ndo mungo amatabisi, a-testament, nga na amatabisi so a bata ti mu na mbeni ngoi. A wara nga na yâ ni ambeni nzoni tene na ndo warango akungba na peko ti kuâ ti mbeni zo, tene ti lampo, na bango lege ti akungba ti zo mveni. A leke ni nga ti mu maboko na ala so alango na États-Unis ti Amerika so ayeke leke ti mu mbeni matabisi nde fadeso wala na peko ti kuâ ti ala ti soro alege so ayeke nzoni ahon teti ala na so alingbi na dutingo ti sewa ti ala wala ti ala mveni. A lingbi ti hunda brochure ni senge na Ndokua ti lekengo tene ti amatabisi.

Na peko ti dikongo brochure so nga na salango lisoro na aita ti Ndokua ti lekengo tene ti amatabisi, azo mingi awara lege ti mu maboko na aTémoin ti Jéhovah na ndo sese kue nga ti wara ye ti nzoni na lege ti futango lampo. A lingbi a tokua na Société mbeni oko ti testament ni wala mbeni oko ti mbeti ti amatabisi so a bata ti mu na mbeni ngoi. Tongana mbeni oko ti alege ti mungo matabisi so anzere na mo, mo lingbi ti gi ti tingbi na Ndokua ti lekengo tene ti amatabisi na lege ti tokuango mbeti wala na pikango singa, na lege ti adresse so a mu na gbe ni ge wala na filiale ti aTémoin ti Jéhovah so ayeke ba lege ti kusala ni na kodoro ti mo.

CHARITABLE PLANNING OFFICE (NDOKUA TI LEKENGO TENE TI AMATABISI)

Watch Tower Bible and Tract Society of Pennsylvania

100 Watchtower Drive,

Patterson, New York 12563-9204

Singa: (845) 306-0707