Amatabisi so amû ngia na Nzapa

YE SO asi lani anzere oko pëpe. Wali-gbia Athalie amû mbata ti gbia ti kodoro ti Juda na ngangu na lo fâ amolenge ti gbia ni kue. Ti lo, lo tene so zo oko angbâ pëpe, na tongaso lo wani lo sala tele ti lo gbia. Me mbeni wali nde ayeke dä so aye Jéhovah mingi nga na Ndia ti lo. Iri ti lo ayeke Joséba. Lo mû tanga ti molenge ti gbia ni lo honde lo. Molenge ni ayeke Joas. Joséba na koli ti lo Jehojada, so ayeke Kota Prêtre, ahonde molenge ni so ngu omene na yâ ti temple.​—2 aGbia 11:1-3.

Kota Prêtre Jehojada azia na sese mbeni ye ti tene a zi Wali-gbia Athalie na ndo mbata ti gbia so lo mû ni na ngangu. Na tongana Joas awara ngu mbasambala awe, Kota Prêtre Jehojada abâ so a yeke ngoi fadeso ti tene a tomba Athalie na ndo mbata ni. Lo sigigi na molenge ni na lê ti azo kue, lo zia couronne na li ti lo tongana mbilimbili gbia ni. Aturugu ti gbia ni amû Wali-gbia Athalie na yâ ti temple asigigi na lo, si ala fâ lo. Tele ti azo ti kodoro ni kue anzere. Biani, ye so Jehojada nga na Joséba asala amû maboko mingi ti kiri na tâ vorongo Nzapa na yâ sese ti Juda. Me kota ye so ahon ni ayeke so ala sala si hale ti David angbâ na ndo mbata ti gbia. Hale so ayeke gue ti si na Messie.​—2 aGbia 11:4-21.

Fini gbia ni nga kue asala mbeni kota ye so azia ngia na bê ti Nzapa. Na tango ni kâ, da ti Jéhovah abuba ngangu si a hunda ti tene a leke ni. Wali-gbia Athalie abâ lani lege ti temple ni oko pëpe nga lo nzi aye ti yâ ni kue. A yeke gi ngbanga ti so kota bê ti komande asala lo; lo ye si gi lo oko akomande. Tongaso, Joas aleke na bê ti lo ti kiri ti leke temple ni si a ga pendere tongana ti kozo. Hio lo to mbela, lo hunda na azo ti mû nginza ndali ni. Lo tene: “Nginza kue ti ye so azo azia nde teti Nzapa na ala ga na ni na da ti L’Eternel, nginza ti azo so mo diko ala, na nginza so a diko ti ton ala, na nginza kue so bê ti zo aye ti ga na ni na da ti L’Eternel, zia asacrificateur akamata nginza so na tïtî azo so ala hinga ala; na a lingbi ala leke da ni na ndo so afuti.”​—2 aGbia 12:4, 5.

Azo amû aye gbâ ni gbâ ni. Ye oko, aprêtre ni ane nengo na yâ ti kua ti ala ti lekengo temple ni. Gbia ni abâ gbä si lo mû ye ni na maboko ti lo, lo mû yanga ti tene azo abi nginza gi na yâ ti mbeni sanduku so lo leke ni gi ndali ni. Lo mû Jehojada lo zia lo na ndo ni. Mbaï ni akiri atene: “Sacrificateur Jehojada akamata sanduku na lo koro dû na ndo ni, na lo zia sanduku so na tele ti balaga, a yeke na mbage ti koti tongana zo alï na da ti L’Eternel; na asacrificateur so abata yanga ti da, ala zia nginza kue na yâ ni, nginza so azo aga na ni na da ti L’Eternel. Na tene asi tongaso, tongana ala bâ nginza ayeke mingi na yâ sanduku, écrivain ti gbia na kota sacrificateur aga, na ala zia nginza na yâ bozo na ala diko nginza so ala wara na da ti L’Eternel. Ala kamata nginza so ala diko kilo ni, ala zia na tïtî azo ti kusala so abata da ti L’Eternel; na ala futa acharpentier na azo ti sala da, ala so asala kusala ti leke da ti L’Eternel, na amaçon na azo so adë tênë, na ala vo keke na tênë so adë tele ni awe ti leke na da ti L’Eternel, na ala vo mbeni ye kue ti leke na da ni.”​—2 aGbia 12:9-12.

Azo ti kodoro ni aga na aye mingi mingi. Ye so asala si a kiri a leke da ti Jéhovah, si azo alingbi ti voro lo dä na lege so ane lo. Biani, aye kue so azo amû ti leke na temple ni, a sala kusala na ni tâ na lege ni. Gbia Joas abâ lani ti tene a sala tongaso.

Laso, bungbi ti Jéhovah so ayeke na ndo ti sese ge ayeke bâ nzoni si a sala kusala nzoni mingi na anginza so azo amû ti pusu na kua ti Jéhovah na nduzu. Na atâ Chrétien asala ye tâ tongana ti azo ti Israël ti giriri, ala mû ye gbâ ni gbâ ni. Hinga pëpe mo yeke na popo ti ala so amû nginza ti tene a maï na aye ti Royaume na ngu ti kusala so ahon. Zia e bâ tongana nyen a sala kusala na ambeni nginza ni so.

AMBETI SO ALA SIGIGI NA NI

Na ndo lê sese kue, a sigigi na ambeti so ti manda ni na ti kangbi ni na azo:

• Abrochure: 167 854 462

• Abuku: 47 490 247

• Acalendrier: 5 405 955

• Akasete vidéo: 3 168 611

• Akete brochure: 6 834 740

• Apériodique: 1 179 266 348

• Atract: 440 995 740

A yeke pete ambeti ni na Afrika, na Amerika ti Banga, ti Mbongo nga na ti Bê ni, na Asie, na Poto nga na azoa ti Pacifique; akodoro ni kue asi 19.

“Iri ti mbi ayeke Katelyn May. Mbi yeke na ngu miombe. Mbi yeke na pata 14 430. Mbi ye si ala mû ni ndali ti amasini ti petengo mbeti. Kete ita ti ala, Katelyn.”

“E na amolenge ti e, e sala lani lisoro na ndo ti afini masini ti petengo mbeti. Ni la amolenge ti e so ngu ti ala ayeke 11 nga na 9 ayeda ti mû mbage ti nginza so ala bata ti mû ni na ala. E yeke na ngia ti tokua na ala matabisi ti ala so nga na ti e.”

ADA SO A LEKE NI

Bâ ada so a yeke leke ni ndali ti kusala ti aTémoin ti Jéhovah:

• Ada ti Royaume na yâ ti akodoro so amaï na lege ti mosoro pëpe: 2 180

• Ada ti assemblée: 15

• Afiliale: 10

• Awakua ti ngoi kue so ayeda na bê ti ala ti sala kua na akodoro wande: 2 342

“Na nda-yenga so, e sala kozo bungbi ti e na yâ ti fini Da ti Royaume ti e. Bê ti e anzere mingi ti wara mbeni nzoni ndo ti sepela na Babâ ti e, Jéhovah Nzapa. Singila ti e kue ague na Jéhovah nga na ala so apensé na e na lekengo aDa ti Royaume mingi. Biani, Da ti Royaume ti e asala si vaka ti e ni aga pendere.”​—Chili.

“Bê ti aita asi na singila mingi ndali ti maboko so bungbi ti Jéhovah amû. Même laso, e ngbâ ti sala lakue tënë ti apendere ngoi so e sala na aita so aga lani ti leke na e Da ti Royaume ni.”​—Moldavie.

“Ade ti ninga pëpe, mbi na wali ti mbi e sala matanga ti ngu 35 ti mariage ti e. E yeke gi lani ti bâ ye wa si e yeke mû na mba ndali ti ngoi so, me e bâ so a yeke nzoni e mû mbeni ye na Jéhovah nga na bungbi ti lo. Ngbanga ti so, tongana a yeke ndali ti ala pëpe, ka peut-être laso e yeke duti na ngia na yâ ti mariage ti e ni pëpe. E tokua nginza so na ala ndali ti lekengo aDa ti Royaume na yâ ti akodoro so ayeke na kpale ti nginza.”

“Ade ti ninga pëpe, mbi wara mbeni nginza na peko ti mbeni zo. Me teti so bezoin ti mbi ayeke mingi pëpe, mbi tokua nginza ni na ala ti tene ala leke na aDa ti Royaume, so akodoro mingi ayeke na kota bezoin ni.”

NDALI TI AYE TI NGANGU SO ASI

Na lâ ti nda ni so, aye ti ngangu tongana kota pupu ti ngu atï na ndo ti azo gi tongaso. A-Témoin ti Jéhovah mingi amû ambeni ye ahon ti so ala yeke mû ka lakue ndali ti aita so aye tongaso asi na ala. Hinga so a yeke sala kusala na a-offrande tongaso teti kusala ti Nzapa na ndo lê sese kue. Bâ ando so aTémoin ti Jéhovah amû maboko dä:

• A-Antille

• Afrika

• Asie

• Azoa ti Pacifique

“Mbi na koli ti mbi, e kiri singila mingi na ala ndali ti mungo maboko ti ala na ngoi so kota pupu ti ngu-nzapa aga na ndo ti e. E wara mbeni fini li ti da. E kiri singila mingi ndali ti so ala mû maboko na e hio.”

“Iri ti mbi ayeke Connor. Mbi yeke na ngu 11. Lani so mbi bâ tongana nyen kota ngu amû azo mingi a hon na ala, mbi ye ti sala mbeni ye. Ni la, mbi pensé so ye so ayeke mû ande maboko na aita ti mbi.”

AMBENI WAKUA TI NGOI KUE

Ambeni Chrétien amû ngoi ti ala kue ti fa tënë wala ti sala kua na Béthel. Ti ambeni na popo ti ala, a yeke anginza so azo amû ni si ayeke mû maboko na ala. Bâ ambeni tapande ni:

• Amissionnaire: 2 635

• Asurveillant so ague na ndo nde nde: 5 325

• A-Béthelite: 20 092

“Ti fadeso mbi lingbi pëpe ti gue ti sala kua na Béthel [lo yeke na ngu oku], ni la mbi ye ti tokua na ala matabisi so na ngia mingi na bê. Tongana mbi kono ande, mbi yeke gue ti sala kua ngangu na Béthel.”

A maï fango ye na ndo Bible

Jésus Christ amû yanga na adisciple ti lo ti sala si azo ti ‘amara kue aga adisciple’ ti lo (Matthieu 28:19). Ni la, aTémoin ti Jéhovah ayeke mû ngoi ti ala mingi ti fa ye na azo na ndo ti Bible na yâ ti akodoro 235. Ala yeke sigigi na ala yeke kangbi ambeti ti Nzapa ndenge na ndenge na ayanga ti kodoro 413.

Me kota ye so Chrétien alingbi ti mû ti tene azo mingi amanda ye na ndo ti Nzapa nga na ndo ti ye so Lo leke ti sala ayeke ngoi ti lo. A-Témoin ti Jéhovah amû ngoi ti ala mingi nga na ngangu ti ala ti mû maboko na azo. Ala mû nga gbâ ti nginza ndali ni. Na atâa ye wa ala mû, wala nginza wala mbeni ye nde, ye so kue amû maboko ti sala si azo na yâ dunia kue ahinga iri ti Jéhovah nga na aye so lo leke ti sala. Zia Jéhovah ahiri lakue deba nzoni na ndo angangu so e sala ti mû maboko na azo ti manda ye mingi na ndo ti lo (aProverbe 19:17). Mara ti nzoni bê tongaso anzere na Nzapa mingi!​—aHébreu 13:15, 16.

[Encadré na lembeti 28-30]

Alege nde nde so azo asoro ti mû na

A-OFFRANDE TETI KUSALA SO A SALA NA NDO SESE KUE

Azo mingi azia nde wala ala leke na yâ mama-nginza ti ala mbeni wungo ti nginza so ala zia na yâ asanduku teti a-offrande so kete mbeti “A-offrande teti kusala na ndo sese kue​—Matthieu 24:14” ayeke na ndo ni.

Nze oko oko, akongregation ayeke tokua anginza ni na biröo ti aTémoin ti Jéhovah so ayeke na kodoro ti ala. Mo lingbi nga ti tokua a-offrande so mo mû na bê kue gi na filiale ti aTémoin ti Jéhovah so abâ lege ti kusala ni na kodoro ti mo wala na Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483. Achèque so mo tokua na adresse so, a yeke nzoni mo sala ni na iri ti “Watch Tower”. Mo lingbi nga ti mû tongana matabisi aye ti go, ti mê, ti maboko na ambeni ye nde ti ngele ngangu. A yeke nzoni mo sû na tele ni mbeni mbeti ti fa so amatabisi so ayeke a-offrande so mo mû biaku.

AMATABISI SO A HUNDA MBENI YE KOZONI

Mbeni zo alingbi ti mû nginza tongana mbeni matabisi na Watch Tower ti sala na kua ti Nzapa na ndo lê sese kue. Tongana mbeni lâ zo ti mungo nginza ni ahunda ni, a lingbi ti kiri na lo nginza so lo mû tongana offrande. Ti wara sango mingi na ndo tënë so, sû mbeti na Biröo so abâ lege ti nginza na adresse so a fa na use paragraphe ni.

AMATABISI

Nde na amatabisi ti nginza so a mû biaku na ti so a hunda mbeni ye kozoni, ambeni lege nde nde ayeke dä ti mû nginza ndali ti kusala ti fango tënë ti Royaume na ndo kue. Aye so andu:

Assurance: A lingbi ti zia ni na iri ti Société Watch Tower ti tene lo wara ande nginza so mbeni zo amû assurance ndali ni, wala nginza so mbeni zo abata ngbanga ti retraite ti lo.

Nginza na banque: Na yâ ambeni kodoro, a lingbi ti bata teti Société Watch Tower nginza so a zia na banque, mbeni mbeti so afa atene a zia nginza kâ, wala mbeti ti nginza so a bata teti lâ ti retraite, wala so a zia na iri ti Société ti tene lo wara ni tongana zo ni akui.

Ambeti ti mosoro na ti mbele: A lingbi ti mû ambeti ti mosoro na ti mbele na Société Watch Tower tongana mbeni matabisi so a hunda mbeni ye na pekoni pëpe.

Ada: A lingbi ti mû ada so a lingbi ti kä ni; zo ni alingbi ti mû ni biaku, wala tongana a ndu tënë ti da ti lango, lo lingbi ti fa so Société ayeke mû ni ande na peko ti kuâ ti lo na lo yeke ngbâ ti lango na yâ ni na ngoi kue so lo de na fini. Kozoni ti mû na filiale mbeni matabisi ti da tongaso, a yeke nzoni a bâ lo si.

Testament na amatabisi so a bata ti mû na mbeni ngoi: A lingbi ti zia na Société Watch Tower ada na nginza na lege ti mbeni testament so ndia ayeda na ni, wala a lingbi ti sû mbeni mbeti ti fa so fade Société Watch Tower ayeke ga mveni ti mbage ti mosoro ni na mbeni ngoi. Lekengo ye ti tene mbeni lege ti vorongo aga ande mveni ti mbeni mosoro alingbi peut-être ti zi lege ti kiri na peko alampo so a lingbi a futa ni.

Amara ti mungo amatabisi tongaso ahunda ti tene zo so aye ti mû ye agbu li ti lo nzoni kozoni. Ti mû maboko na ala so aye ti mû matabisi teti kusala ti aTémoin ti Jéhovah na ndo sese kue na alege nde nde, a leke mbeni brochure na yanga ti Anglais nga na Espagnole, Charitable Planning to Benefit Kingdom Service Worldwide. A sala brochure so ti kiri tënë na gbâ ti atënë so a yeke hunda na ndo mungo amatabisi, atestament nga na amatabisi so a bata ti mû na mbeni ngoi. A wara nga na yâ ni ambeni nzoni tënë na ndo warango akungba na peko ti kuâ ti mbeni zo, tënë ti lampo, na bango lege ti akungba ti zo mveni. A fa na azo alege nde nde ti mû mbeni matabisi fadeso wala na peko ti kuâ ti ala. Na peko ti so ala diko brochure so, nga ala sala lisoro na awamungo wango ti ala na ndo tënë ti lampo nga na aita ti filiale ti kodoro ti ala, azo mingi awara lege ti mû maboko na aTémoin ti Jéhovah ti ndo ti sese kue. A yeke ti tene ala sala na kua ti ala ti Nzapa nga ti mû maboko na azo nde nde na nga ti wara ye ti nzoni na lege ti wungo ti lampo so ala futa ni. A lingbi ti hunda brochure ni senge na Filiale so ayeke bâ lege ti kusala ni na kodoro ti mo.

Ti wara ambeni sango na ndo ni, mo lingbi ti sala tënë ni na Filiale. Mo lingbi ti tokua mbeti wala ti pika singa, na lege ti adresse so a mû na gbe ni ge.

Filiale ti aTémoin ti Jéhovah

Association “Les Témoins de Jéhovah”

B.P. 662, Bangui, R.C.A.

Singa: 61 20 70

[Lingu ti foto na lembeti 27]

Kasete vidéo Fidèles: Staline: U.S. Army photo