“I Ga na Mbi, . . . na Fade Mbi Mû na I Lege ti Hu Tele”

‘Fango Tënë ni’ Aga na Dengo Bê

LO YEKE giriri mbeni zo so ayeke mbilimbili-kue so aga teti mbeni kota kusala. Akode ti fango ye ti lo alë lengo mingi na asala si “bê ti azo adö ndali ti lege ti fango ye ti lo.” (Matthieu 7:28, NW) Lo yeke nga mbeni wafango tënë so anze pëpe. Lo mû kozoni kue ngoi, ngangu, na aye so lo yeke na ni teti fango tënë ti Royaume ti Nzapa. Biani, Jésus Christ atambela na yâ kodoro ti lo kue tongana mbeni kota wafango tënë na wafango ye.—Matthieu 9:35.

Kusala so a lingbi Jésus asala fade fade ayeke ti fa “nzo tënë ti royaume” na azo ti ngoi ti lo na ti fa na adisciple ti lo ti sala oko kusala so na ndo sese kue. (Matthieu 4:23 NW; 24:14; 28:19, 20) Fade nengo kungba ti kusala ti ala ti fango tënë so a lingbi ala sala ni fade fade nga na kota ti kusala tongaso ayeke hon ngangu ti adisciple ti lo so ayeke mbilimbili-kue pëpe na so ayeke na akatikati?

Biani oko pëpe! Na peko ti so lo hunda na adisciple ti lo ti sambela ti tene “Mveni ti le-kobe ni,” Jéhovah Nzapa, ato gbâ ti awakua, Jésus ato ala ti fa ye na azo. (Matthieu 9:38; 10:1) Na pekoni lo dë bê ti ala so kungba ti dutingo disciple ti lo, so andu nga kusala ti fango tënë, ayeke ga na tâ hungo tele na dengo bê. Jésus atene: “I ga na mbi, . . . na fade mbi mû na i lege ti hu tele.”—Matthieu 11:28, NW.

Mbeni Lingu ti Ngia

Bâ tongana nyen tisango ndo so asi na be-nzoni, na ndoye, nga na nzobe! A fa na gigi bingo bê so Jésus ayeke na ni teti adisciple ti lo. Adisciple ti lo awara biani dengo bê na salango kusala ti ala ti fa “nzo tënë” ti Royaume ti Nzapa. Ye so aga na ala tâ ngia na nzerengo tele.—Jean 4:36.

Ngoi mingi kozoni si Jésus aga na sese, Mbeti ti Nzapa agboto lê mingi so a lingbi ngia aduti mbeni mbage ti kusala ti nzoni-kue so a mû na Nzapa. A fa ni polele tongana wasungo psaume ahe na bia: “Fade mbi sala bia ti nzobe na ti fango ngbanga ti mbilimbili. O L’Eternel, fade mbi sala bia ti sepela Mo. Sala na L’Eternel na ngia, ga na gbele Lo na lege ti salango bia.” (Psaume 100:1, 2) Laso, azo ti amara kue aduti na ngia na yâ Jéhovah, na atënë ti sepela ti ala ayeke tongana dengo kongo ti hongo na ngangu ti aturugu. Ala so amû tele ti ala biani na Nzapa aga na gbele lo “na lege ti salango bia.” Na, biani, ye so alingbi na ni teti so Jéhovah ayeke “Nzapa so ayeke na ngia,” so aye si awakua ti lo aduti na ngia ti sala ye alingbi na mungo tele ti ala na lo.—1 Timothée 1:11, NW.

Awakua so Akiri Awara Ngangu

A lingbi ti duti tongana nyen so ngangu kusala so e sala na yâ fango tënë asala si e nze pëpe me a kiri a mû ngangu na e? Biani, na lê ti Jésus salango kusala ti Jéhovah ayeke tongana kobe so akiri amû ngangu na zo. Lo tene: “Kobe ti Mbi ayeke ti sala ye so Lo so ato Mbi aye, na ti sala kusala ti Lo kue.”—Jean 4:34.

Legeoko nga, awafango tënë so ayeke na wâ laso awara ngia tongana ala “fa tënë ni.” (2 Timothée 4:2, NW) Connie, mbeni kangba-wali Chrétien so asala angbonga ahon 70 nze oko oko na yâ kusala ti fango tënë, atene: “Na peko ti so mbi bi tele ti mbi na yâ fango tënë, bê ti mbi anzere na ayeke na ngia, même tongana mbi nze na nda ti lango ni.”

Ye ni ayeke duti tongana nyen tongana azo ayeda pëpe na tokua ti Royaume ni? Connie angbâ ti tene: “Atâa kiringo tënë ni ayeke so wa, na mbeni ngoi oko pëpe vundu asala mbi teti so mbi mû mbage ti mbi na yâ kusala ni. Nde na hingango so mbi yeke sala ye so anzere na Jéhovah, salango tënë na ndo tâ tënë amû ngia na mbi teti so na ngoi so mbi yeke sala ni, pendere beku so Bible amû akpengba na yâ bê ti mbi.”

Ambeni nde abâ so mungo maboko na azo ti wara tâ hingango ye ti Nzapa asala si fini ti ala mveni ayeke na nda ni. Meloney, mbeni maseka wali so asala lakue angbonga ahon 50 nze oko oko na yâ kusala ti fango tënë, asala tënë so: “Fango tënë adë bê ngbanga ti so a sala si fini ti mbi aluti na ndo mbeni ye oko na ayeke na nda ni. Akpale ti mbi mveni nga na aye so asala ngangu na ndo bibe ti zo lâ oko oko aga aye so mbi bi bê dä mingi pëpe tongana mbi yeke na fango tënë.”

Millicent, mbeni wakua Témoin ti Jéhovah nde so ayeke na wâ, atene: “Fango tënë amû ngele ngangu na lango oko oko so mbi mû ti sala lisoro na azo na ndo ye so Nzapa aleke ti sala teti azo na ti fa tongana nyen a yeke kiri ti leke Paradis na ndo sese. A sala si Jéhovah aga tâ zo na lê ti mbi lâ na lâ na amû na mbi siriri na mbeni ngia ti bê so mbi lingbi pëpe ti wara ni na lege ti ambeni ye nde.”

Azo so Awara Dengo Bê

Kusala ti Chrétien adë biani bê ti awafango tënë ti Royaume, na a lungula vundu ti ala so ayeda na tokua so amû fini. Atâa so amamère na aprêtre si afa ye na lo, mbeni wafango-mbeti na Portugal abâ so église ti lo akaï nzala ti lo pëpe na lege ti yingo. Ade a kiri tënë pëpe na ahundango tënë ti lo na ndo Bible. Mandango Bible lâ oko oko na lege ti mbeni Témoin ti Jéhovah asala si yeke na yeke lo gbu nda ti aversê ti Bible. Tele ti wafango-mbeti ni anzere lani mingi. Lo tene: “Na mercredi oko oko mbi yeke ku mandango ye ti mbi na bê kue, teti so a yeke kiri tënë na ahundango tënë ti mbi oko na oko na lege ti ye so Bible afa biani.” Laso, wali so ayeke mbeni wakua so amû tele kue na Jéhovah, na lo nga kue lo yeke dë bê ti azo na lege ti tâ tënë ti Bible.

Tongaso, a yeke polele so nengo ti kusala ti fango tënë ti aTémoin ti Jéhovah wala kota ti territoire ti ala so amû sese kue ahon ndo ti ala pëpe. Salango nzala ti tënë ni pëpe nga kangango lege asala si bê ti ala anze pëpe. Ala sala kusala ti ala ti fango tënë ti Royaume na ngangu ti ala kue. Ala kangbi nzo tënë ni na azo na ndo kue so ala lingbi ti wara ala dä: na ndo ti lutingo ti akota kutukutu na États-Unis (1), na mbeni aéroport na Corée (2), na Andes (3), wala na mbeni gala na Londres (4). Na ngia adisciple ti Jésus ti laso ayeke sala na ndo sese kue kusala ti ala so aga na futa. Nga na salango ye alingbi na zendo ti lo, lo dë bê ti ala na lo sala kusala na ala ti dë bê ti ambeni zo nde mingi.—Apocalypse 22:17.