Atënë So Azo Ahunda
A yeke na lege ni ti tene so be-nzoni ti Jéhovah awoko ngangu ti mbilimbili ti lo?
Atâa so a sala kusala na tënë so kozoni awe, a yeke nzoni ahon ti zia lege ni, teti salango tënë tongaso apusu zo ti bi bê so be-nzoni ti Jéhovah ayeke woko yâ ti mbilimbili ti lo wala a yeke kanga lege na mbilimbili ti lo ti sala mbeni ye, mo bâ mo tene be-nzoni ti Jéhovah ayeke kota ahon lengo ti lo ti mbilimbili so akpengba mingi ahon. Bibe so ayeke na lege ni pëpe.
Tënë ti yanga ti Hébreu so a sû pekoni na “mbilimbili” aye nga ti tene “fango ngbanga.” Mbilimbili ague oko na salango ye tâ na lege ni. Ye oko, mbilimbili andu ti lo fani mingi tënë ti ndia. Me mingi ni, salango ye tâ na lege ni andu pëpe tënë ti ndia. A yeke tâ tënë so mbilimbili ti Jéhovah alingbi ti ndu sengo ndo so a mû ni alingbi na sioni so zo asala, me a lingbi nga ti ndu mungo salut na ala so alingbi na ni. (Genèse 18:20-32; Esaïe 56:1; Malachie 4:2) Tongaso, a lingbi a bâ pëpe mbilimbili ti Jéhovah tongana mbeni lengo so akpengba mingi wala so a lingbi a woko ngangu ni.
Tënë ti yanga ti Hébreu so a sû pekoni na “be-nzoni” alingbi ti ndu gbanzingo tele ti salango mbeni ye na yâ ti fango ngbanga. A lingbi nga ti sala tënë ti fango na gigi na wâ be-ti-ndoye, mungo maboko na azo so ye atia ala.—Deutéronome 10:18; Luc 10:29-37.
Jéhovah ayeke Nzapa ti mbilimbili nga na ti be-nzoni. (Exode 34:6, 7; Deutéronome 32:4; Psaume 145:9) Mbilimbili na be-nzoni ti lo use kue ayeke mbilimbili-kue, na ala bungbi oko ti sala kusala legeoko. (Psaume 116:5; Hoshéa 2:19) Alengo ni use kue alingbi tele tâ na lege ni. Tongaso, tongana e tene so be-nzoni ti Jéhovah ayeke woko ngangu ti mbilimbili ti lo, a lingbi e tene nga so mbilimbili ti lo ayeke woko ngangu ti be-nzoni ti lo.
Isaïe amû prophétie so: “Fade L’Eternel [“Jéhovah,” NW] aku si Lo lingbi sala na i na lege ti grâce; tongaso fade a yä iri ti Lo, si Lo lingbi sala be-nzoni na i; teti L’Eternel ayeke Nzapa ti fango ngbanga ti mbilimbili.” (Esaïe 30:18) Na ndo so, Isaïe afa so mbilimbili ti Jéhovah ayeke maï akusala ti be-nzoni, me pëpe so be-nzoni ti lo ayeke woko yâ ti mbilimbili ti lo wala ayeke kanga lege na ni ti sala mbeni ye. Jéhovah afa na gigi be-nzoni ngbanga ti so lo yeke mbilimbili, nga ngbanga ti so lo yeke na ndoye.
Tâ tënë, wasungo Bible Jacques atene: “Be-nzoni ahon ngbanga na tënë.” (Jacques 2:13b) Ye oko, tongana a bâ atënë so angoro ni, Jacques ayeke sala tënë pëpe ti Jéhovah me ti aChrétien so ayeke fa be-nzoni, na tapande na mbage ti ala so a sala ngangu na ala nga ala so ayeke na yâ nzinga. (Jacques 1:27; 2:1-9) Tongana a ga na azo ti be-nzoni so na gbele ngbanga, Jéhovah ayeke bi bê na tambela ti ala na lo yeke mû pardon na ala na be-nzoni na lege ti sadaka ti Molenge ti lo. Na lege so, salango ye ti ala na lege ti be-nzoni ahon na tënë fango ngbanga kue ti sioni so ala lingbi peut-être ti wara.—aProverbe 14:21; Matthieu 5:7; 6:12; 7:2.
Tongaso, a yeke na lege ni pëpe ti tene so be-nzoni ti Jéhovah ayeke woko ngangu ti fango ngbanga ti lo ti fa so a lingbi be-nzoni awoko yâ ti mbilimbili ti lo. Ti Jéhovah, alengo use so kue alingbi tele mbilimbili-kue. Ala sala kusala alingbi na ni na popo ti ala, legeoko tongana ti so ala sala kusala alingbi na atanga ti alengo ti Jéhovah, tongana ndoye na ndara.