Fango Lege ti Christ Ayeke Tâ Ye Teti Mo?

“I zia ala di iri ti i aMaître [“awafango lege,” NW] pëpe, teti Oko ayeke Maître [“Wafango Lege,” NW] ti i, Christ mveni.”​—MATTHIEU 23:10.

A YEKE mardi, lango 11 ti nze ti Nisan. Na yâ alango ota so ayeke ga na pekoni, fade a yeke fâ Jésus Christ. A yeke lani ndangba vizite ti lo na temple. Na lâ ni so, Jésus amû mbeni kpengba fango ye na azo mingi so abungbi na ndo so, nga na adisciple ti lo. Lo tene: “I zia azo adi iri ti i Rabbi pëpe, teti Oko ayeke Maître ti i, na i kue i yeke aita. I di iri ti mbeni zo Babâ ti i na sese so pëpe, teti Oko ayeke Babâ ti i, Lo so ayeke na yayu. Na i zia ala di iri ti i aMaître [“awafango lege,” NW] pëpe, teti Oko ayeke Maître [“Wafango Lege,” NW] ti i, Christ mveni.” (Matthieu 23:8-10) A yeke polele so Jésus Christ ayeke Wafango Lege ti atâ Chrétien.

² Tongana e yeda na fango lege ti Jésus, a ga na tâ ye ti nzoni na yâ fini ti e! Na salango tënë ti gango ti Wafango Lege so, Jéhovah Nzapa atene na lege ti prophète ti lo Isaïe: “Héi, i oko oko kue so i yeke na nzala ti ngu, i ga na lingu! na i so i yeke na nginza pëpe, i ga, i vo, na i te! biani, i ga, i vo vin na dulait, me na nginza pëpe, wala ti ngele pëpe. . . . I mä Mbi nzoni, na i te ye so ayeke nzoni, na zia âme ti i awara ngia na ye ti nzoni mingi. . . . Bâ, Mbi mû Lo ti ga témoin ti azo, Zo ti fa lege, na Zo ti komande azo.”​—Esaïe 55:1-4.

³ Isaïe asala kusala na lege ti fä na aye so ayuru yurungo tongana ngu, dulait, na vin, ti fa na lege wa fini ti e mveni ayeke gbian tongana e dengi mê ti mä Jéhovah, na e mû peko ti Wafango Lege na Zo ti komande so lo mû na e. Ye ti pekoni ayeke dengo bê. A yeke tongana mbeni dede kopo ti ngu so zo anyon na mbeni lango ti ndowa. A yeke dë nzala ti e ti ngu ti tâ tënë na ti mbilimbili. Legeoko tongana ti so dulait ayeke kpengba aforoto na ayeke mû maboko na ala ti maï, ‘dulait ti tënë ni’ ayeke kpengba e na a yeke sala si e maï na lege ti yingo na yâ songo ti e na Nzapa. (1 Pierre 2:1-3) Nga, zo wa alingbi ti ke so vin ayeke mû lege na zo ti wara ngia na angoi ti amatanga? Legeoko tongaso nga, ti voro tâ Nzapa na ti tambela na ndo asenda ti Wafango Lege so lo soro ayeke sala si fini ‘aduti na tâ ngia mingi.’ (Deutéronome 16:15) Tongaso, a yeke tâ kota ye mingi ti tene e kue, atâa e yeke pendere wala kangba, atâa e yeke koli wala wali, e fa so fango lege ti Christ ayeke tâ ye teti e. Ye oko, tongana nyen e lingbi ti fa na gigi na yâ fini ti e ti lâ oko oko so Messie ayeke Wafango Lege ti e?

Apendere: I Ngbâ Lakue ti “Maï na Ndara”

⁴ Bi bê na tapande so Wafango Lege ti e azia teti apendere. Atâa so a hinga tënë mingi pëpe na ndo ngoi so Jésus angbâ molenge, mbeni ye oko so asi na yâ fini ti lo afa na gigi kota ye na ndo lo. Tongana Jésus ayeke lani na ngu 12, ababâ na mama ti lo amû lo na tele ti ala ti gue na vizite ti ala ti ngu oko oko na Jérusalem teti Pâque. Na ngoi ni so, lo bi tele ti lo na yâ mbeni lisoro na ndo Mbeti ti Nzapa, na sân ti tene ala hinga, sewa ti lo azia lo na peko tongana ala hon. Lango ota na pekoni, ababâ na mama ti lo, Joseph na Marie so ayeke na kota gingo bê, awara lo na yâ temple, ‘lo duti na popo ti amaître, lo yeke mä ala, na lo yeke hunda ala na nda ti tënë.’ Na ndo ni, “bê ti ala kue so amä Lo adö teti ndara ti Lo na teti tënë so Lo kiri na ala.” Bi bê kete: gi na ngu 12 senge, Jésus alingbi lani gi pëpe ti hunda atënë so andu aye ti yingo na so asala si zo agbu li, me nga ti mû akiringo tënë so afa tâ hingango ndo! Kite ayeke pëpe so fango lege ti babâ na mama ti lo amû maboko na lo.​—Luc 2:41-50.

⁵ Peut-être mo yeke mbeni maseka. Tongana ababâ na mama ti mo ayeke awakua so amû tele ti ala kue na Nzapa, peut-être mbeni kapa ti mandango Bible na sewa ayeke tambela lakue na yâ da ti mo. Bango ndo ti mo ayeke tongana nyen na mbage ti mandango Bible na sewa so? Ngbanga ti nyen pëpe ti gbu li na ndo ahundango tënë tongana ti so: ‘Mbi yeke mû maboko na bê ti mbi kue na ye so a leke teti mandango Bible na yâ sewa ti mbi? Mbi yeke mû mbage ti mbi kue na ni, na salango ye oko pëpe ti buba yâ ti ngoi so a zia nde teti mandango ye ni?’ (aPhilippien 3:16) ‘Mbi yeke mû mbage ti mbi na wâ na yâ mandango ye ni? Tongana a yeke na lege ni, mbi yeke hunda tënë na ndo ye so e yeke manda, na mbi yeke fa tongana nyen ti sala kusala na ni? Tongana mbi yeke gue na li ni na lege ti yingo, mbi yeke lë nzala teti “kobe so akpengba [so] ayeke ti ala so aga biazo”?’​—aHébreu 5:13, 14, NW.

⁶ Mbeni kapa ti dikongo Bible lâ oko oko ayeke nga kota ye mingi. Wasungo psaume ahe na bia: “Ngia ayeke na zo so atambela pëpe na lege ti wango ti azo ti sioni, . . . Me ye so anzere na lo ayeke na yâ ndia ti Jéhovah, nga na yâ ndia ti lo, lo yeke diko na kete go lâ na bï.” (Psaume 1:1, 2, NW) Josué, so a sala lani kusala na peko ti Moïse, ‘adiko lani buku ti ndia na kete go lâ na bï.’ Ye so amû lege lani na lo ti sala ye na lege ti ndara, na ti wara ye ti nzoni na salango kusala so Nzapa amû na lo. (Josué 1:8) Wafango Lege ti e, Jésus Christ, atene: “Mbeti ti Nzapa atene, Fade zo angbâ na fini gi na lege ti mapa pëpe, me na lege ti tënë kue so asigigi na yanga ti Nzapa.” (Matthieu 4:4) Tongana e yeke na bezoin ti te kobe ti mitele lâ oko oko, e yeke nga na bezoin mingi ahon ti te kobe ti yingo lakue!

⁷ Na bango so aye atia lo na lege ti yingo, Nicole so ayeke na ngu 13 ato nda ti diko Bible lâ oko oko.a Fadeso, na ngu 16, lo diko Bible kue fani oko awe, na lo yeke ndulu na ndambo ti dikongo ni kue ti fani use ni. Kode so lo yeke sala na kusala akpengba pëpe. Lo tene: “Mbi leke na bê ti mbi ti diko kamême mbeni chapitre oko lâ oko oko.” Tongana nyen dikongo Bible ti lo ti lâ oko oko amû maboko na lo? Lo kiri tënë: “Aye ti pusu zo ti sala sioni ayeke mingi laso. Lâ na lâ, mbi yeke tingbi na asalango ngangu na ekole nga na ambeni ndo nde so ayeke tara mabe ti mbi ngangu. Dikongo Bible lâ na lâ amû maboko na mbi ti dabe mbi hio na akomandema nga na akpengba-ndia ti Bible so amû wâ na mbi ti luti na gbele ngangu ti akpale so. Ye ti pekoni ayeke so mbi bâ so mbi ga ndulu mingi ahon na Jéhovah nga na Jésus.”

⁸ A yeke lani na yâ ngobo ti salango ye ti Jésus ti dengi mê nga ti mû mbage na dikongo Mbeti ti Nzapa na yâ synagogue. (Luc 4:16; Kusala 15:21) So tâ ye ti nzoni teti apendere ti mû peko ti tapande so, na guengo lakue na abungbi ti aChrétien na ndo so a yeke diko na a yeke manda Bible dä! Na fango bê ti kiri singila teti mara ti abungbi tongaso, Richard so ayeke na ngu 14 atene: “Abungbi ayeke ye ti ngele mingi na lê ti mbi. Na ndo so, mbi yeke wara lakue adango bê na ndo ye so ayeke nzoni na ye so ayeke sioni, tambela so ayeke na lege ni na so ayeke na lege ni pëpe, ye so ague oko na salango ye ti Christ na ye so ague nde na ni. Mbi yeke na bezoin pëpe ti hinga ni na tarango ni kozoni, ye so aga na vundu mingi.” Biani, “dango bê ti Jéhovah ayeke ye ti zia bê na ni, a mû ndara na lo so ahinga ye pëpe.” (Psaume 19:7, NW [19:8, Bible ti Sango]) Nicole nga aleke na bê ti lo ti gue na abungbi oku kue ti kongregation yenga oko oko. Lo yeke mû nga angbonga use ti si na ota ti leke abungbi so.​—aEphésien 5:15, 16.

⁹ Lâ ti pendere ayeke mbeni nzoni ngoi ti gi lege ti wara ‘hingango ye ti oko tâ Nzapa, na ti lo so Lo to lo, Jésus Christ.’ (Jean 17:3) Peut-être mo hinga apendere so amû ngoi ti ala mingi na dikongo ambeti so a sala a-dessin na yâ ni, na bango singale, na salango angia ti vidéo, wala na fonongo na ndo Internet. Ngbanga ti nyen ti mû tapande ti ala tongana mo lingbi ti mû tapande ti mbilimbili-kue so Wafango Lege ti e azia? Na ngoi so lo de molenge, lo wara ngia na yâ mandango ye na ndo Jéhovah. Na ye ti pekoni ayeke so wa? Ndali ti ndoye ti lo teti aye ti yingo, “Jésus amaï na ndara.” (Luc 2:52) Mo lingbi ti sala tongaso nga.

“I Mä Tënë na Popo ti I”

¹⁰ Da alingbi ti duti mbeni nzoni ndo ti siriri na ti tâ ngia, wala mbeni sioni ndo ti tiri na ti papa. (aProverbe 21:19; 26:21) Yengo dä ti e na fango lege ti Christ ayeke sala si siriri na tâ ngia amaï na yâ sewa. Biani, salango ye ti Jésus ayeke tapande teti asongo na popo ti azo ti sewa. Mbeti ti Nzapa atene: “I mä tënë na popo ti i na mbito ti Christ. Zia awali amä yanga ti akoli ti ala legeoko tongana ala mä Seigneur, teti koli ayeke mokonzi ti wali ti lo legeoko tongana Christ nga ayeke mokonzi ti kongregation, lo so ayeke zo ti sö tele so. . . . Akoli, i ngbâ ti ndoye awali ti i, legeoko tongana Christ andoye nga kongregation na lo mû lo mveni teti lo.” (aÉphésien 5:21-25, NW) Bazengele Paul asû mbeti so na kongregation ti Colosses: “Amolenge, i mä tënë ti ababâ na mama ti i na yâ ye kue, teti so ayeke nzoni na yâ Seigneur.”​—aColossien 3:18-20.

¹¹ Batango wango so aye ti tene koli ni ayeke mû li ni na yâ ti sewa, wali ti lo ayeke mû maboko na lo na be-biani, na amolenge ni ayeke mä yanga ti ababâ na mama ti ala. Ye oko, kusala ti koli ti mungo li ni ayeke ga na tâ ngia gi tongana a sala ni tâ na lege ni. A lingbi mbeni koli ti ndara amanda tongana nyen ti mû li ni na mungo tapande ti Beli na Wafango Lege ti lo mveni, Christ Jésus. (1 aCorinthien 11:3) Atâa so na pekoni, Jésus aga “beli ti ye kue ti kongregation ni,” lo ga lani na sese “ti tene a sala na lo pëpe, me ti sala na azo.” (aEphésien 1:22; Matthieu 20:28) Legeoko tongaso nga, mbeni koli Chrétien ayeke tara ti sala kusala ti lo ti mungo li ni, pëpe na lege ti kion ti wara nzoni teti lo mveni, me ti bâ lege ti aye ti wali ti lo na amolenge ti lo, biani, ti sewa ni kue. (1 aCorinthien 13:4, 5) Lo yeke gi ti sala ye alingbi na alengo ti Beli ti lo, Jésus Christ so ayeke nga alengo ti Nzapa. Legeoko na Jésus, lo yeke sala ye na ngangu pëpe na lo yeke na be-ti-molenge. (Matthieu 11:28-30) Tongana lo sala ye na lege ni pëpe a yeke duti ande ngangu pëpe teti koli ni ti tene atënë tongana “mbi gbu gere ti mo,” wala “mo yeke na raison.” Nzoni tapande ti lo asala si a yeke duti ngangu pëpe na wali ti lo ti duti mbeni “wamungo maboko,” mbeni “zo so alingbi na lo,” na mbeni “fon” lo, na mandango ye na mbage ti lo nga na salango kusala beoko na tele ti lo.​—Genèse 2:20; Malachie 2:14.

¹² Âdu ti wali ni, a lingbi lo duti na gbe ti koli ti lo. Ye oko, tongana bibe ti sese ayeke sala ngangu na ndo lo, a lingbi ti to nda ti buba bango ndo so lo yeke na ni na mbage ti kpengba-ndia ti mungo li ni, na tënë ti dutingo na gbe ti koli ti lo ayeke nzere ande na bê ti lo pëpe. Mbeti ti Nzapa atene pëpe so a lingbi koli akomande na ngangu, me lo hunda na awali ti duti na gbe ti koli ti ala. (aEphésien 5:24) Bible atene nga so koli wala babâ ayeke na kungba ti mû li ni na yâ sewa ni. Tongana lo sala ye alingbi na wango ti Bible, a yeke mû lege na siriri nga na nzoni dutingo ti maï na yâ sewa.​—aPhilippien 2:5.

¹³ A lingbi amolenge amä yanga ti ababâ na mama ti ala. Na lege so, Jésus azia mbeni pendere tapande. Na peko ti ye so asi na temple tongana a zia Jésus so ayeke na ngu 12 kâ teti alango ota, “Lo gue na ala [ababâ na mama ti lo], Lo si na Nazareth, na Lo mä yanga ti ala.” (Luc 2:51) Tongana amolenge amä yanga wala aduti na gbe ti ababâ na mama ti ala, a yeke mû lege ti maï siriri na mango tele na yâ sewa ni. Tongana zo oko oko kue na yâ ti sewa asala ye alingbi na fango lege ti Christ, ye ti pekoni ayeke mbeni sewa so aduti na tâ ngia.

¹⁴ Même tongana akpale abâ gigi na yâ ti sewa, kelele ti hon ndo ti ala ayeke ti mû tapande ti Jésus na ti yeda na fango lege ti lo. Na tapande, mariage ti Jerry (so ayeke na ngu 35) na Lana, mama ti mbeni maseka wali, aga na mbeni kpale so ala use kue abi bê lani pëpe so a lingbi ti si. Jerry atene: “Mbi hinga lani so ti duti mbeni nzoni mokonzi ti sewa, a lingbi mbi sala kusala na oko mara ti akpengba-ndia ti Bible so aga na ye ti nzoni na ambeni sewa nde. Me ngoi kete na pekoni, mbi bâ so a lingbi mbi sala kusala na ala na lege ti ndara nga na ti bango nda ti ye mingi ahon.” Molenge-wali ti wali ti lo abâ lo tongana mbeni zo so aga ti kangbi popo ti lo na mama ti lo, na lo bâ lo na sioni lê mingi. Jerry ayeke lani na bezoin ti duti na bango nda ti ye, ti bâ so bango ndo so ayeke sala ngangu na ndo ye so molenge ti wali ni ayeke tene na ayeke sala. Tongana nyen lo hon ndo ti kpale ni? Jerry akiri tënë: “Mbi na Lana e mä tele so kamême na tongo nda ni, a yeke duti ande Lana si ayeke se molenge ni, ti mbi, mbi yeke luti mingi na ndo lege ti leke mbeni nzoni songo na popo ti mbi na molenge ti wali ti mbi. Tongana ngoi ayeke hon, salango ye tongaso aga na anzoni lengo.”

¹⁵ Tongana e tingbi na aye ti ngangu na yâ da, a lingbi e duti na lengo ti bango nda ti ye ti hinga ngbanga ti nyen ambeni zo ti sewa ni ayeke sala tënë na ayeke sala ye tongana ti so ala yeke sala. E yeke nga na bezoin ti ndara ti bata akpengba-ndia ti Nzapa nzoni. Na tapande, Jésus abâ lani polele ngbanga ti nyen wali so ayeke hu pono ti kobela ti mênë andu lani lo, na lo sala ye na mbage ti lo na lege ti ndara nga ti be-nzoni. (Lévitique 15:25-27; Marc 5:30-34) Ndara na bango nda ti ye ayeke mbage ti asalango ye ti Wafango Lege ti e. (aProverbe 8:12) E yeke duti na tâ ngia tongana e sala ye legeoko tongana ti so lo yeke sala.

“I Ngbâ Lakue ti Gi Royaume”

¹⁶ Jésus afa polele ye so alingbi biani ti ga na kozo ndo na yâ fini ti ala so ayeda na fango lege ti lo. Lo tene: “Tongaso, i ngbâ lakue ti gi royaume na mbilimbili ti lo [Nzapa] kozoni.” (Matthieu 6:33, NW) Nga, na lege ti tapande ti lo, lo fa na e tongana nyen ti sala tongaso. Na hunzingo ti alango 40 so lo mû na peko ti batême ti lo ti zia kobe, ti gbu li na ti sambela, Jésus atingbi na mbeni tara. Satan Diable aye lani ti mû na lo “aroyaume kue ti sese na gloire ti ala.” Bi bê kete na fini so Jésus alingbi fade ti wara tongana lo yeda lani na ye so Diable aye ti mû na lo! Ye oko, lê ti Christ aluti kue na ndo salango ye so bê ti Babâ ti lo aye. Lo bâ nga so mara ti fini tongaso na yâ sese ti Satan ayeke duti ande gi teti kete ngoi. Fade fade, lo ke ye so Diable aye ti mû na lo, lo tene: “Mbeti ti Nzapa atene, A lingbi mo sambela Seigneur Nzapa ti mo, na mo sala gi na Lo oko.” Ngoi kete na pekoni, “Jésus ato nda ti fa tënë, Lo tene, I gbian bê ti i, teti royaume ti yayu ayeke ndulu.” (Matthieu 4:2, 8-10, 17) Teti tanga ti fini ti lo na ndo sese, Christ asala lani kusala tongana mbeni wafango tënë ti ngoi kue ti Royaume ti Nzapa.

¹⁷ E yeke sala nzoni ti mû tapande ti Wafango Lege ti e na ti zia pëpe si sese ti Satan ahanda e ti zia na gbele e warango mbeni kua so a futa nginza mingi ahon, wala mbeni kua nde tongana kozo ye so e gi na yâ fini. (Marc 1:17-21) So tâ ye ti buba si a yeke duti ande teti e ti sala si son ti tombango peko ti aye ti sese so asala si e zia aye ti Royaume na use ndo! Jésus amû na e kusala ti fango tënë ti Royaume na ti salango adisciple. (Matthieu 24:14; 28:19, 20) Biani, e lingbi peut-être ti duti na mbeni sewa wala ambeni kungba nde ti bâ lege ni, me e yeke na ngia pëpe ti mû angoi na lakui na anda ti yenga ti yô kungba ti e ti Chrétien so ayeke ti fa tënë na ti fa ye? So tâ ye ti mungo wâ na zo ti bâ so na yâ ngu ti kusala 2001, azo ndulu na 780 000 awara lege ti sala kusala tongana awakua ti ngoi kue, wala apionnier!

¹⁸ Atondo ti Évangile afa Jésus tongana mbeni zo so ayeke sala kusala nga tongana mbeni zo so ayeke na bê ti ndoye. Tongana lo bâ aye ti yingo so atia ala so angoro lo, mawa ti ala agbu bê ti lo, na lo duti ndulu ti londo ti mû maboko na ala. (Marc 6:31-34) Kusala ti e ayeke ga ye ti mungo ngia tongana e mû mbage ti e na yâ ni ndali ti ndoye teti ambeni zo, nga na tâ nzala ti mû maboko na ala. Me tongana nyen e lingbi ti duti na mara ti bibe tongaso? Mbeni pendere-koli so iri ti lo ayeke Jayson atene: “Na ngoi so mbi de lani maseka, mbi ye biani pëpe ti sigigi na fango tënë.” Ye nyen amû lani maboko na lo ti lë tâ ndoye teti kusala so? Jayson akiri tënë: “Na yâ sewa ti mbi, a bata lakue andapelele ti samedi nde teti kusala ti fango tënë. Ye so ayeke lani nzoni mingi teti mbi ngbanga ti so tongana mbi yeke sigigi na fango tënë mingi, mingi ahon mbi yeke bâ ye ti nzoni so a yeke sala, na mingi ahon nga mbi yeke wara ngia na yâ ni.” E nga kue a lingbi e ngbâ lakue ti bi tele ti e na bê kue na yâ kusala ti fango tënë.

¹⁹ Biani, yengo dä na fango lege ti Christ aga na zo dengo bê nga anzoye. Tongana e sala tongaso, lâ ti pendere ti e ayeke ga mbeni ngoi ti maïngo ni na yâ hingango ye nga na ndara. Dutingo ti sewa ayeke ga mbeni lingu ti siriri na ti tâ ngia, na kusala ti fango tënë ayeke mbeni kusala so amû ngia na nzerengo tele. Tongaso biani, zia e leke na bê ti e ti fa na yâ fini ti e ti lâ oko oko, nga na yâ adesizion so e yeke mû, so fango lege ti Christ ayeke tâ ye teti e. (aColossien 3:23, 24) Ye oko, Jésus Christ ayeke mû nga fango lege na yâ mbeni ye nde: kongregation ti aChrétien. Fade article ti peko ayeke fa ande tongana nyen e lingbi ti wara nzoni na lege ti ye so.

[Kete Tene na Gbe Ni]

Mo Dabe Mo na Ni?

• Na lege wa mungo peko ti Wafango Lege ti e so Nzapa asoro ayeke ga na ye ti nzoni na e?

• Tongana nyen apendere alingbi ti fa so ala ye ti mû peko ti fango lege ti Jésus?

• Ngangu wa fango lege ti Christ ayeke sala na ndo sewa ti ala so ayeda na ni?

• Tongana nyen kusala ti e ti fango tënë alingbi ti fa so fango lege ti Christ ayeke tâ ye teti e?

[Ahundango Tene ti Manda na Ye]

1. Zo wa lo oko ayeke Wafango Lege ti atâ Chrétien?

2, 3. Ti mä Jéhovah na ti yeda na Wafango Lege so lo soro ayeke sala ngangu wa na ndo fini ti e?

4. (a) Ye nyen asi tongana Jésus so ayeke na ngu 12 ague na vizite na Jérusalem na ngoi ti Pâque? (b) Hingango ndo ti Jésus ayeke lani tongana nyen na ngu 12?

5. Tongana nyen apendere alingbi ti tara nene ti bango ndo ti ala na mbage ti mandango Bible na sewa?

6, 7. Na lege wa mbeni kapa ti dikongo Bible lâ oko oko alingbi ti duti ye ti ngele ngangu teti apendere?

8. Ye wa Jésus ayeke sala ka lakue na yâ synagogue, na tongana nyen apendere alingbi ti mû tapande ti lo?

9. Tongana nyen apendere alingbi ti ngbâ ti ‘maï na ndara’?

10. Ye nyen ayeke mû ande maboko na sewa ti duti lingu ti siriri na ti tâ ngia?

11. Tongana nyen mbeni koli alingbi ti fa so fango lege ti Christ ayeke mbeni tâ ye teti lo?

12. Ye nyen ayeke mû ande maboko na mbeni wali ti yeda na bê kue na kpengba-ndia so andu mungo li ni na yâ sewa?

13. Tapande wa ti dutingo na gbe ti ababâ na mama Jésus azia teti amolenge?

14, 15. Ye nyen ayeke mû ande maboko na e ti hon na ngangu tongana e tingbi na mbeni kpale na yâ da? Mû mbeni tapande.

16. Ye wa alingbi ti ga na kozo ndo na yâ fini ti e, na tongana nyen Jésus afa ni na lege ti tapande ti lo?

17. Tongana nyen e lingbi ti fa so aye ti Royaume aga na kozo ndo na yâ fini ti e?

18. Ye nyen amû maboko na e ti wara ngia na yâ kusala ti fango tënë?

19. Ye wa a lingbi e leke na bê ti e ti sala na ndo fango lege ti Christ?

[Afoto na lembeti 9]

Lâ ti pendere ayeke tâ ngoi ti wara hingango ye ti Nzapa na ti lo so a soro lo ti ga Wafango Lege ti e

[Foto na lembeti 10]

Yengo dä na fango lege ti Christ ayeke maï ngia ti sewa

[Afoto na lembeti 12]

Giriri Jésus agi Royaume kozoni. Ka mo?