Ngbâ Lakue ti Sala na Jéhovah na Bê So Ayengi Pëpe

“Mbi leke bê ti mbi awe [“bê ti mbi ayengi pëpe,” NW], O Nzapa, mbi leke bê ti mbi awe.”​—PSAUME 57:8

JÉHOVAH alingbi ti sala si e yengi pëpe na yâ mabe ti e ti Chrétien, tongaso si e lingbi gbu tâ vorongo ti aChrétien ngangu tongana awakua so amû tele ti ala kue na lo. (aRomain 14:4) Tongaso, e lingbi ti yeda biani na bibe ti wasungo psaume, David, so ahe na bia: “O Nzapa, mbi leke bê ti mbi awe [wala “bê ti mbi ayengi pëpe,” NW].” (Psaume 108:2) Tongana e yeke na bê so ayengi pëpe, fade e yeke duti ndulu ti sala ye alingbi na mungo tele ti e na Nzapa. Na ndo ni, tongana e gi fango lege nga na ngangu na mbage ti lo, e lingbi ti fa so e yengi pëpe, me e yeke luti ngangu tongana azo so ayeke be-ta-zo, na so ‘awu na kusala ti Seigneur lakue.’​—1 aCorinthien 15:58.

² Bazengele Paul amû lani wango na adisciple ti Jésus so ayeke na Corinthe ti giriri, me atënë ti lo angbâ lakue na ngangu teti aChrétien ti ngoi ti laso. Lo tene: “I bata, i duti kpô na mabe, i sala tongana akoli, i kpengba.” (1 aCorinthien 16:13) Na yanga ti Grec, akomandema oko oko kue na yâ wango so ahunda na zo ti sala ye fade fade na ti ngbâ dä. Wango so aye ti tene nyen?

³ E lingbi ti “bata” si e lango pëpe na lege ti yingo, tongana e ke Diable na e ngbâ lakue ndulu na Nzapa. (Jacques 4:7, 8) Ziango bê kue na Jéhovah ayeke mû lege na e ti ngbâ lakue ti sala kusala beoko na ti ‘duti kpô na mabe ti aChrétien.’ Atâa e yeke akoli wala awali, e kue e yeke “sala ye tongana akoli,” tongana e sala na Nzapa na mbito pëpe na lege ti fango tënë ti Royaume. (Psaume 68:12) E yeke “kpengba,” tongana e ngbâ lakue ti gi ngangu na mbage ti Babâ ti e ti yayu ti sala ye so bê ti lo aye.​—aPhilippien 4:13.

⁴ E fa lani so e yeda na tâ tënë tongana e mû tele ti e kue na Jéhovah na e fa ni na gigi na lege ti batême. Me akapa wa e hon na yâ ni ti wara batême? Kozoni kue, e wara lani tâ hingango ye ti Tënë ti Nzapa. (Jean 17:3) Hingango ye so asala si mabe ti e amaï, na a pusu e ti gbian bê ti e, ti fa na gigi tâ vundu ti bê teti aye ti sioni so e sala kozoni. (Kusala 3:19; aHébreu 11:6) Na pekoni, e gbian lege ti e, teti so e vi peko ti e na asioni salango ye, na e to nda ti sala ye alingbi na ye so bê ti Nzapa aye. (aRomain 12:2; aEphésien 4:23, 24) Na nda ni, e mû tele ti e kue na Jéhovah na lege ti sambela. (Matthieu 16:24; 1 Pierre 2:21) E hunda lani na Nzapa ti mû na e mbeni nzoni yingo-ti-hinga, na e wara batême tongana fä ti mungo tele ti e kue na lo. (1 Pierre 3:21) Tongana e gbu li ti e lakue na ndo akapa so oko na oko, a yeke mû ande maboko na e ti ngbâ lakue ti sala ye alingbi na mungo tele ti e na Jéhovah, nga ti ngbâ lakue ti sala na lo na bê so ayengi pëpe.

Ngbâ Lakue ti Gi Tâ Hingango Ye

⁵ Ti sala ye alingbi na mungo tele ti e na Nzapa, a lingbi e ngbâ lakue ti gi hingango ye ti Mbeti ti Nzapa so ayeke kpengba mabe. Tongana e hinga tâ tënë ti fani oko ni, e yeke lani na kota ngia mingi ti te kobe ti yingo! (Matthieu 24:45-47) “Akobe” so anzere lani mingi, na ala kpengba e mingi na lege ti yingo. Fadeso, ti ngbâ lakue mbeni wakua ti Jéhovah so bê ti lo ayengi pëpe, a yeke kota ye mingi teti e ti ngbâ lakue ti te nzoni kobe na lege ti yingo.

⁶ A hunda ti sala ngangu mingi ti wara hingango ye ti Mbeti ti Nzapa mingi ahon. A yeke tongana gingo amosoro so ahonde, mbeni kusala so ahunda ti sala ngangu mingi. Me ye ti nzoni so aga na pekoni ayeke so e yeke wara “hingango ye ti Nzapa”! (aProverbe 2:1-6) Tongana mbeni wafango tënë ato nda ti manda lani Bible na mo, lo sala peut-être kusala na buku Hingango Ye So Ague na Fini ti Lakue Lakue. Peut-être ala mû ngoi lani mingi ti hunzi chapitre oko oko; ala kangbi peut-être chapitre ni na mbage use wala ahon so. Aversê so a diko, na alisoro so ala sala aga na ye ti nzoni mingi na mo. Tongana mo si na ndo ti mbeni tënë so a yeke ngangu lani na mo ti gbu nda ni, a sala kue ti zi nda ni na mo. Lo so ayeke manda lani Bible na mo ayeke leke kozoni tele ti lo nzoni, lo yeke sambela ti wara yingo ti Nzapa, na lo yeke mû maboko na mo ti yekia tâ tënë na bê ti mo kue.

⁷ Angangu so a sala alingbi lani biani, teti Paul asû na mbeti: “Zo so ayeke manda Tënë ti Nzapa, a lingbi lo kangbi ye ti nzoni ti lo kue, lo mû mbeni na zo so ayeke fa nda ti tënë ni.” (aGalate 6:6) Na ndo so, tënë ti yanga ti Grec ni afa so a yeke yôro Tënë ti Nzapa na yâ bibe nga na bê ti ‘zo so ayeke manda Tënë ni.’ Fango ye na mo tongaso asala si mo lingbi kue ti fa ye na ambeni zo nde na peko. (Kusala 18:25) Tongana mo ye ti duti be-ta-zo na mungo tele ti mo na Nzapa, a lingbi mo bata seni nga na ngangu ti mo na lege ti yingo na ngbango lakue ti manda Tënë ti Nzapa.​—1 Timothée 4:13; Tite 1:13; 2:2.

Dabe Mo na Gbiango Bê nga na Lege ti Mo

⁸ Mo dabe mo na dengo bê so mo wara lani tongana mo manda tâ tënë, mo gbian bê ti mo, na pekoni mo bâ so Nzapa amû pardon na mo teti mabe ti mo na yâ sadaka ti kota ngele ti Jésus? (Psaume 32:1-5; aRomain 5:8; 1 Pierre 3:18) Biani, mo ye pëpe ti kiri na yâ mbeni fini ti siokpari. (2 Pierre 2:20-22) Sambelango Jéhovah lakue ayeke mbeni oko ti aye so ayeke mû ande maboko na mo ti bata mbeni tambela so anzere na Nzapa, ti sala ye alingbi na mungo tele ti mo na lo, na ti ngbâ lakue ti sala na lo na be-biani.​—2 Pierre 3:11, 12.

⁹ Teti so mo gbian lege ti mo awe na vingo peko ti mo na asalango ye ti siokpari, ngbâ lakue ti gi mungo maboko ti Nzapa ti bata bê ti mo si a yengi pëpe. A lingbi ti tene so mo yeke mû lani mbeni sioni lege; me na pekoni so mo bi lê ti mo na ndo mbeni nzoni carte, mo to nda ti mû nzoni lege ni. Fadeso, gue yongoro pëpe na lege so. Ngbâ lakue ti zia bê na fango lege ti Nzapa, na leke na bê ti mo ti ngbâ lakue ti tambela na ndo lege ti fini.​—Esaïe 30:20, 21; Matthieu 7:13, 14.

Glisa Lâ Oko Pëpe Mungo Tele ti Mo na Nzapa nga na Batême ti Mo

¹⁰ Glisa pëpe so mo mû lani tele ti mo na Jéhovah na yâ sambela, na so mo zia na gbele mo ti sala na lo na be-biani teti lakue lakue. (Jude 20, 21) Tongana mbeni zo amû tele ti lo na Nzapa, lo fa so lo zia tele ti lo nde, so ti tene lo bata tele ti lo nde teti mbeni kusala ti Nzapa. (Lévitique 15:31; 22:2) Mo mû lani tele ti mo teti kete ngoi pëpe, nga teti kusala ti azo pëpe. Me mo mû tele ti mo na Kota Gbia ti Ndagigi Kue ti sala na lo teti lakue lakue, na ye so a hunda ti tene mo duti be-ta-zo na Nzapa teti alâ ti fini ti mo kue. Biani, ‘même tongana e ngbâ na fini wala e kui, e yeke ti Jéhovah.’ (aRomain 14:7, 8) Tâ ngia ti e aga na lege so e yeda ti sala ye so bê ti lo aye, na e ngbâ lakue ti sala na lo na bê so ayengi pëpe.

¹¹ Dabe mo lakue na batême ti mo so ayeke fä ti mungo tele ti mo kue na Nzapa. A gbu mo lani na ngangu pëpe ti mû batême; a yeke desizion so mo mveni mo mû. Fadeso, mo yeke leke na bê ti mo ti sala ye so bê ti Nzapa aye teti tanga ti fini ti mo kue? Mo hunda lani na Nzapa ti wara nzoni yingo-ti-hinga, na mo wara batême ti fa so mo mû tele ti mo na lo. Bata nzoni yingo-ti-hinga so na salango ye alingbi na mungo tele ti mo na Nzapa; na fade Jéhovah ayeke mû na mo gbâ ti adeba nzoni.​—aProverbe 10:22.

Bibe ti Mo Ayeke na Kusala ti Sala

¹² Biani, mungo tele na Nzapa nga na batême aga na apendere deba nzoni awe na azo kutu mingi na ndo lê sese kue. Tongana e fa na gigi so e mû tele ti e na Nzapa na lege ti batême, a yeke tongana e kui na lege ti ngbele salango ye ti e. Me, e kui pëpe na lege ti bibe ti e mveni. Teti so e yeke awamabe so afa ye na e mbilimbili, e sala lani kusala biani na bibe ti e na ngoi so e mû tele ti e na Nzapa na yâ sambela na e wara batême. Ti mû tele na Nzapa na ti wara batême ahunda na e ti manda kozoni ye so bê ti Nzapa aye, nga na pekoni ti soro biani ti sala ni. (aEphésien 5:17) Na salango tongaso, e yeke mû tapande ti Jésus, so asoro na bê ti lo ti zia kusala ti lo ti wakpakango keke, ti gue ti wara batême, na ti mû fini ti lo kue ti sala ye so bê ti Babâ ti lo ti yayu aye.​—Psaume 40:8, 9; Jean 6:38-40.

¹³ Jéhovah Nzapa aleke ti tene Molenge ti lo aga mbilimbili-kue wala “alingbi kue na lege ti apono.” Tongaso, a hunda lani na Jésus ti sala kusala na bibe ti lo ti tene lo gbu ngangu na gbele apono tongaso. Ti sala tongaso, lo “hunda mingi na totongo ngangu na ngule, Lo sambela . . . na [Nzapa a]mä Lo teti Lo kpe mbito ti Nzapa.” (aHébreu 2:10, 18; 5:7, 8) Tongana e fa na gigi mara ti kota kpengo mbito tongaso na mbage ti Nzapa, fade Nzapa ayeke “mä” e nga, na e lingbi ti duti na beku so fade Lo yeke sala si e duti aTémoin ti Jéhovah so ayengi pëpe.​—Esaïe 43:10.

Mo Lingbi ti Bata Mbeni Bê So Ayengi Pëpe

¹⁴ Ye nyen ayeke mû ande maboko na mo ti bata mbeni bê so ayengi pëpe na ti sala ye alingbi na mungo tele ti mo na Nzapa? Diko Bible lâ oko oko ti gi ti wara hingango ye ti Mbeti ti Nzapa mingi ahon. A yeke mbeni ye so “ngbâa ti be-ta-zo na ti ndara” ayeke wa e lakue ti sala. Ngbanga ti nyen a mû mara ti wango tongaso? Ngbanga ti so ti tene e ngbâ be-ta-zo na mungo tele ti e na Nzapa, a lingbi e ngbâ lakue ti tambela na ndo lege ti tâ tënë ti lo. Tongana bungbi ti Jéhovah ayeda na bê kue na afango ye ti wataka, ka lo yeke hunda lâ oko pëpe na aTémoin ti Jéhovah, nga na azo so ala yeke fa tënë na ala, ti diko Bible.

¹⁵ Tongana mo yeke mû adesizion, gi lakue ti bâ tongana nyen ala lingbi ti ndu ye so mo yeke sala ti lingbi na mungo tele ti mo na Jéhovah. Ye so alingbi peut-être ti ndu kusala ti mitele so mo yeke sala. Mo yeke sala ngangu kue ti tene kusala so amû maboko na mo ti gue na li ni na yâ tâ vorongo? Apatron mingi abâ aTémoin ti Jéhovah tongana azo so a lingbi ti zia bê na ala, na so asala kusala ti ala na lege ni. Me ala bâ nga so aChrétien so amû tele ti ala na Nzapa ayeke gbugburu pëpe kota ndo na sese so, nga ala yeke sala mandako pëpe na ambeni zo ti wara ando so a futa nginza dä akono. A yeke ngbanga ti so aTémoin ayeke pëpe azo ti tombango peko ti mosoro, yango-iri, gonda, wala ngangu. Ti ala so ayeke gi ti sala ye alingbi na mungo tele ti ala na Nzapa, kota ye ni ayeke ti sala ye so bê ti Nzapa aye. Kua ti nginza ti ala ayeke ti mû lege na ala ti wara aye so aita ala na yâ fini. Me ala bâ ti ala so a yeke gi mbeni kusala so aga na use ndo na yâ fini ti ala. Legeoko na bazengele Paul, kusala so aga kozo na yâ fini ti ala ayeke kusala ti fango tënë. (Kusala 18:3, 4; 2 aThessalonicien 3:7, 8; 1 Timothée 5:8) Mo yeke bata aye ti yingo na kozo ndo na yâ fini ti mo?​—Matthieu 6:25-33.

¹⁶ Peut-être ambeni zo ayeke lani na agingo bê mingi kozoni si ala to nda ti manda tâ tënë. Me na ngoi so ala yeda na beku ti Royaume, bê ti ala asi na ngia, na tene ti singila, nga na ndoye teti Nzapa! Tongana ala gbu li na ndo aye ti nzoni so ala wara ngbele ye na ngoi ni so, a lingbi biani ti mû maboko na ala ti sala ye alingbi na mungo tele ti ala na Jéhovah. Na mbeni mbage nde, a lingbi ti si so mo yeke gi bê ti mo ahon ndo ni teti akpale so ayeke si na zo kue na yâ sese so; na fadeso agingo bê ni ayeke tara ti kanga lege na “Tënë ti Nzapa” ni, legeoko tongana ti so akî ayeke kanga lege na akete keke ti maï juska ti lë. Tongana a si tongaso, ye nyen mo lingbi ti sala? (Luc 8:7, 11, 14; Matthieu 13:22; Marc 4:18, 19) Tongana mo bâ so ye tongaso aye ti si na mo wala na sewa ti mo, zia gingo bê ti mo na ndo Jéhovah, na sambela lo ti mû maboko na mo ti maï na ndoye nga na kiringo singila. Tongana mo zia kungba ti mo na ndo lo, fade lo yeke mû maboko na mo, na lo yeke mû ngangu na mo ti ngbâ lakue ti sala na lo na ngia nga na bê so ayengi pëpe.​—Psaume 55:23; aPhilippien 4:6, 7; Apocalypse 2:4.

¹⁷ Legeoko tongana mo sambela Jéhovah Nzapa na ngoi so mo mû tele ti mo na lo, ngbâ lakue ti sambela lo. (Psaume 65:3) Tongana mbeni ye ayeke pusu mo ti sala ye ti sioni, wala tongana mo tingbi na mbeni tara ti ngangu, hunda na Nzapa ti fa lege na mo, na ti mû maboko na mo ti sala ye alingbi na ni. Glisa pëpe so mo yeke na bezoin ti mabe, teti disciple Jacques asû na mbeti: “Tongana mbeni zo na popo ti i amanke ndara [ti hon ndo ti mbeni tara], a lingbi lo hunda Nzapa, Lo so amû ye na azo kue senge senge, Lo zingo na ala pëpe, na fade Lo mû na lo. Me a lingbi lo hunda na mabe, na kite pëpe; teti lo so adë kite ayeke legeoko tongana mapo ti kota ngu ti ingo so pupu aïa, na a yengi kirikiri. A lingbi zo tongaso atene na bê ti lo pëpe, fade lo wara mbeni ye na tïtî Seigneur; lo yeke zo ti bê use, na lo yeke kirikiri na lege ti lo kue.” (Jacques 1:5-8) Tongana mbeni kpale atara ti hon ndo ti e, e lingbi ti dabe e na tënë so: “Handa nde asala i pëpe, gi handa so asala azo kue; me Nzapa ayeke Be-Ta-Zo, fade Lo zia handa ahon ngangu ti i pëpe; me legeoko na handa so, fade Lo leke lege ti sigigi nga, si i lingbi gbu ngangu.”​—1 aCorinthien 10:13.

¹⁸ Tongana mo sala mbeni siokpari si mo honde ni, na siokpari ni ayeke ne yingo-ti-hinga ti mo, na a yeke woko ngangu so mo yeke sala ti duti be-biani na Nzapa, ye nyen mo lingbi ti sala? Tongana mo gbian bê ti mo awe, mo lingbi ti wara dengo bê na hingango so Jéhovah ‘ayeke ke pëpe bê so afâ awe na ayeke na vundu.’ (Psaume 51:19) Gi mungo maboko na mbage ti a-ancien so ayeke na ndoye, na hinga so teti ala yeke mû tapande ti Jéhovah, ala yeke bâ na nene ni nzala ti bê ti mo ti kiri ti lë nzoni songo na Babâ ti mo ti yayu. (Psaume 103:10-14; Jacques 5:13-15) Na pekoni, teti so mo kiri mo wara ngangu na lege ti yingo, nga mbeni bê so ayengi pëpe, fade mo yeke sala si lege ti mo ague mbilimbili, na mo yeke bâ so mo lingbi biani ti sala ye alingbi na mungo tele ti mo na Nzapa.​—aHébreu 12:12, 13.

Ngbâ Lakue ti Sala na Nzapa na Bê So Ayengi Pëpe

¹⁹ Na yâ angoi ti ngangu so, a lingbi e tiri ngangu ti sala ye lakue alingbi na mungo tele ti e na Nzapa na ti ngbâ lakue ti sala na Lo na bê so ayengi pëpe. Jésus atene: “Zo so agbu ngangu juska na nda ni, fade a sö lo.” (Matthieu 24:13) Teti so e yeke na “lâ ti nda ni,” hunzingo ni alingbi ti si na ngoi kue. (2 Timothée 3:1) Nga, zo oko na popo ti e ahinga pëpe wala lo yeke ngbâ ande na fini kekereke. (Jacques 4:13, 14) Tongaso, a yeke kota ye mingi ti tene e ngbâ lakue ti sala ye alingbi na mungo tele ti e na Nzapa laso!

²⁰ Bazengele Pierre agboto lê mingi na ndo ye so na yâ use mbeti ti lo. Lo fa so na “lâ ti Seigneur [“Jéhovah,” NW],” fade a yeke futi azo ti sioni legeoko tongana ti so a futi ala giriri na yâ Kota Moa. Tongaso, Pierre atene na ngangu: “A lingbi i ga azo so ayeke nzoni-kue na azo so abata tënë ti Nzapa”! Lo wa nga ala tongaso: “I so mbi ndoye i mingi, teti i hinga ye so kozoni, i bata nzoni si azo ti sioni [na awafango ye ti wataka] ahon na i pëpe na lege ti tënë ti kirikiri ti ala, si i zia kpengba ndo ti i.” (2 Pierre 3:5-17) A yeke duti ande ye ti vundu mingi tongana a gue na mbeni zo so awara batême awe yongoro na tâ tënë, na lo si na nda ti fini ti lo tongana mbeni zo so azia lege si bê ti lo ayengi!

²¹ Mo lingbi ti kpengba ngangu ti mo ti sala ye alingbi na mungo tele ti mo na Nzapa, tongana mo dabe mo lakue na lango so mo mû na batême. Mo lingbi nga ti hunda na Nzapa ti mû maboko na mo si atënë ti mo nga na asalango ye ti mo azia ngia na bê ti lo. (aProverbe 27:11) Jéhovah ayeke mû vundu lâ oko pëpe na azo ti lo, na biani a lingbi e duti be-ta-zo na lo. (Psaume 94:14) Lo fa lani be-nzoni ti lo na gigi tongana lo buba yâ ti aye so awato aleke ti sala, nga tongana lo sö David. Ti fa singila ti lo teti ye so, David atene so ndoye ti lo teti Nzapa, Lo so Aton lo, ayeke kpengba lakue, na a yeke yengi lâ oko pëpe. A yeke na bê kue si lo he bia so: “Mbi leke bê ti mbi awe, O Nzapa, mbi leke bê ti mbi awe. Fade mbi sala bia, biani, fade mbi sala bia ti sepela.”​—Psaume 57:8.

²² Legeoko na David, atâ Chrétien ayengi pëpe na yâ mungo tele ti ala na Nzapa. Na bê so ayengi pëpe, ala yeda so a yeke Jéhovah si asö ala na abata ala na fini, na ala he bia na ngia ti sepela lo. Tongana bê ti mo ayengi pëpe, fade a yeke luti na ndo Nzapa, na mungo maboko ti Lo ayeke mû lege na mo ti sala ye alingbi na mungo tele ti mo na lo. Biani, mo lingbi ti duti tongana “zo ti mbilimbili” so wasungo psaume atene na ndo lo: “Mbito asala lo pëpe tongana lo mä tënë ti sioye; bê ti lo aduti kpô, lo zia bê ti lo na L’Eternel.” (Psaume 112:6, 7) Tongana mo yeke na mabe na Nzapa, na mo zia bê kue na lo, mo lingbi lakue ti sala ye alingbi na mungo tele ti mo na Jéhovah, na ti ngbâ lakue ti sala na lo na bê so ayengi pëpe.

Mo Dabe Mo?

• Ngbanga ti nyen a lingbi e ngbâ lakue ti gi tâ hingango ye ti Bible?

• Ngbanga ti nyen a lingbi e dabe e lakue na gbiango bê nga na lege ti e?

• Tongana e dabe e lakue so e mû tele ti e na Nzapa na e wara batême, ye ti nzoni wa e yeke wara?

• Ye nyen a yeke mû ande maboko na e ti ngbâ lakue ti sala na Jéhovah na bê so ayengi pëpe?

[Ahundango Tene ti Manda na Ye]

1. Ngbanga ti nyen e lingbi ti yeda na bibe ti David?

2, 3. Akomandema oko oko so Paul asû ni na 1 aCorinthien 16:13 aye ti tene nyen?

4. Akapa wa e hon na yâ ni kozoni ti wara batême tongana aChrétien?

5. Ngbanga ti nyen a lingbi e ngbâ lakue ti wara hingango ye ti Mbeti ti Nzapa?

6. Tongana nyen a mû maboko lani na mo ti yekia tâ tënë na bê ti mo kue?

7. Ye nyen asala si mbeni zo alingbi kue ti fa tâ tënë ti Nzapa na ambeni zo nde?

8. Tongana nyen mo lingbi ti bata tambela so anzere na Nzapa?

9. Teti so e vi peko ti e awe na asalango ye ti siokpari, a lingbi e mû lege wa?

10. Na ndo mungo tele ti e na Nzapa, ye nyen a lingbi e glisa lâ oko pëpe?

11. Ngbanga ti nyen a lingbi mo dabe mo lakue na batême ti mo nga na ye so a ye ti tene?

12, 13. Na lege wa bibe ti e mveni ague oko na mungo tele ti e na Nzapa nga na batême?

14. Ngbanga ti nyen a lingbi e diko Bible lâ oko oko?

15. (a) Tongana mo yeke mû adesizion, ye nyen a lingbi mo gi ti bâ? (b) Ngbanga ti nyen a lingbi ti tene so kua ti nginza aga na use ndo na yâ fini ti Chrétien?

16. Tongana agingo bê aye ti kanga lege na e ti sala ye alingbi na mungo tele ti e na Nzapa, ye nyen e lingbi ti sala?

17. Tongana nyen e lingbi ti hon ndo ti akpale ti ngangu?

18. Tongana mbeni kota siokpari so mo sala, me so mo honde ni, ayeke woko ngangu ti mo ti sala ye alingbi na mungo tele ti mo na Jéhovah, ye nyen mo lingbi ti sala?

19, 20. Ngbanga ti nyen a yeke kota ye mingi ti ngbâ lakue ti sala ye alingbi na mungo tele ti e na Nzapa?

21, 22. Tongana nyen atënë ti Psaume 57:8 aga tâ tënë na ndo David nga na atâ Chrétien?

[Afoto na lembeti 18]

Ti zia fango tënë na kozo ndo na yâ fini ti e ayeke mû maboko na e ti ngbâ lakue ti sala na Jéhovah na bê so ayengi pëpe

[Foto na lembeti 18]

Mo yeke bata seni ti mo nga na bê ti mo na lege ti yingo na mandango Mbeti ti Nzapa lakue?