A-assemblée internationale na ngu 2003

NA SAMEDI, lango 6 ti octobre 2001, a sala kota bungbi ti ngu oko oko ti azo ti Watch Tower Bible and Tract Society of Pennsylvania na Jersey City, New Jersey, États-Unis ti Amerika. Na peko ti bungbi so, azo ni nga na agene ti ala ayeke na ngia ti sala mbeni bungbi so ayeke nde. Na ndade ni, na ambeni bungbi so a sala na agbata osio na Canada nga na États-Unis, azo ti Wabatango Bungbi ti aTémoin ti Jéhovah asala kete tokua so ge na peko ti ndangba diskur ti ala:

“Tongana e bi lê ti e na ndo kekereke, a yeke kota ye mingi ti tene azo ti Nzapa kue azia lege ti bungbi tele pëpe. Bazengele Paul atene so a lingbi e bungbi tele na e wa tele mingi ahon ti kozoni na ngoi so e bâ so kota lâ ti Jéhovah, so amû mbito mingi, ayeke pusu ndulu ndulu (aHébreu 10:24, 25). Ti gue oko na komandema ti Bible so, e ye ti sala abungbi ti district na akodoro nde nde ti sese kue na ngu ti peko [2002]. Na pekoni, na ngu 2003, tongana Jéhovah aye, lege alingbi ti duti dä ti sala a-assemblée internationale na ambeni mbage ti sese. Fadeso ayeke ngoi ti tene lê ti e akpengba na e lango pëpe, ti bâ tongana nyen aye ayeke gue na li ni na ndo sese.”

Atâa akota kpale so azo ayeke wara na ndembe so sese ni aga ndulu ti hunzi, a lingbi kusala ti azo ti Nzapa ague na li ni. Zia si a fa nzo tënë ti Royaume, nga na tokua ti gbotongo mê so Bible amû, na amara kue, akete mara kue, azo ti yanga nde nde kue, na azo nde nde kue. A lingbi a hiri ala ti ‘kpe mbito ti Nzapa na ti mû gloire na lo, teti so l’heure ti fango ngbanga ti lo asi ndulu ndulu’. (Apocalypse 14:6, 7). Tongaso, na lege ti ye so bê ti Babâ ti e ti yayu aye nga na nzobe ti lo, a yeke leke ti sala a-assemblée internationale na ambage nde nde ti sese teti ngu 2003.

Kozoni kue, a yeke tara ti leke mara ti abungbingo tele so na ambeni gbata na Amerika ti Banga nga fade fade na pekoni na Poto. Kete na pekoni na ngu 2003, a yeke leke ti tene ambeni ita ague na ambeni gbata na Asie; nga na hunzingo ti ngu ni, ambeni bungbi nde ti aita ayeke gue na Afrika, Amerika ti Mbongo, nga na mbage ti Pacifique. A yeke hunda ande na ambeni filiale ti tokua mbeni kete wungo ti aita na ambeni kodoro so ayeke sala a-assemblée ni dä. Ni la, lege ayeke duti ande dä pëpe ti tisa azo kue ti gue. Me, a yeke duti ande nzoni tongana mbeni kete wungo ti aita ti akodoro nde nde ague na ando ti assemblée ni kue.

Na yâ ngoi kete, a yeke tokua ande ambeni sango na ndo abungbingo tele so na akongregation ti aTémoin ti Jéhovah. Fade afiliale ayeke mû asango na ndo ti ambilimbili lango ni nga na gbata so aita alingbi ti gue ande dä. Tongaso, a hunda na i ti sû mbeti wala ti hunda tënë na ndo ni na ngoi so pëpe.

Fade ala so ayeke soro ala ande ti gue na a-assemblée ni ayeke duti gi aTémoin so amû tele na Nzapa na awara batême awe, so alingbi ande ti duti anzoni tapande na ayeke fa nzobe na mbage ti aita ti kodoro ni. Na mbage, ambeni pendere lege ayeke zi ande na aita ti kodoro ni ti yamba agene ti ala na ndoye nga na ngia (aHébreu 13:1, 2). A yeke sala si ala kue ayeke ‘kpengba na lege ti mabe ti ala’. (aRomain 1:11, 12). Fade afiliale so ayeke tokua ande aita na ambeni kodoro so a soro ni awe ayeke mû ambeni sango na ndo ni.

Na akodoro mingi, a yeke leke ti sala akota bungbi ti district teti ngu 2003, tongana ti so a yeke sala ka lakue. Fade bungbingo tele so ayeke mû lege na zo kue ti ‘mä tënë, ti manda ye, na ti mä wango.’ (Deutéronome 31:12; 1 aCorinthien 14:31). A yeke zi lege na azo ti Nzapa kue ti ‘tara Jéhovah, na ti bâ so Lo yeke nzoni!’ (Psaume 34:9). Fade na a-assemblée internationale kue, nga na mingi ti akota bungbi ti district, amissionnaire ayeke duti dä, so ambeni na popo ti ala ayeke mû mbage ti ala na kapa ni.

Na ngu 2002 so, e yeke sala aKota Bungbi ti District “Awakua ti Royaume so ayeke na wâ”, so ayeke pusu e ti fa tënë mingi ahon ti kozoni. Na ndembe so e yeke sala bungbi so, e yeke duti ande na kota nzara ti bâ ye so Jéhovah abata na e teti ngu so ayeke ga. Ye so ayeke mû maboko na e ti ‘lango pëpe, na ti leke tele’, teti ngoi so e yeke dä ayeke ngangu na akpengba.​—Matthieu 24:42-44.