Use mvene ni: Asioni zo ayeke gue na enfer
Tënë so abâ gigi tongana nyen? Mbeni mbeti atene: “Na popo ti awasenda-ndara kue ti Grec ti giriri, lo so gbâ ti azo aye mingi peko ti bango ndo ti lo na ndo ti Enfer ayeke Platon.”—Histoire des enfers, so Georges Minois asigigi na ni, lembeti 50.
Mbeni kota bakari atene: “Ti londo na ngu 150 ti ga na ni, aChrétien so amanda senda-ndara ti aGrec ato nda ti bâ so a lingbi ala fa atënë ti mabe ti ala na mbeni lege so ague oko na bibe ti awasenda-ndara ti Grec . . . Tënë ti senda-ndara so agbu bê ti ala ahon atanga ni ayeke ti Platon.”—The New Encyclopædia Britannica (1988), Mbage 25 ni, lembeti 890.
Mbeni mbeti ni nga atene: “Eglize afa so enfer ayeke dä nga wâ ni ayeke mingo lâ oko pëpe. Tâ gi na peko ti kuâ ti ala, âme ti azo so akui na yâ ti siokpari ayeke gue na enfer; kâ, ala yeke bâ pasi na lê ti ‘wâ so ayeke mingo lâ oko pëpe.’ Na enfer ni kâ, pasi so ason ahon atanga ni kue ayeke so popo ti zo ni na Nzapa akangbi biani biani.”—Catechism of the Catholic Church, ti ngu 1994, lembeti 270.
Bible atene ti lo nyen? “Teti ala so ayeke na fini, ala hinga fade ala kui; me akinda ahinga ye oko pëpe, . . . teti kusala, ye ti bibe, hingango ye, na ndara, ayeke na ndo-ti-awakinda pëpe, ndo so mo yeke gue dä.”—Zo-ti-fa-tene 9:5, 10.
Tënë ti Hébreu so a kiri peko ni na tënë “ndo-ti-awakinda” na Bible ti Sango, na yâ ti ambeni bible, a kiri peko ni na tënë “enfer.” Versê so afa so tongana zo akui, nyen la ayeke si na lo, nyen? Lo yeke bâ pasi na ndo-ti-awakinda kâ ti lingbi na place ti asioni so lo sara? A yeke tongaso pëpe ndali ti so lo ‘hinga ye oko pëpe’. Nda ni la si na ngoi so Job ayeke bâ pasi ngangu mingi na mbeni sioni kobela, lo voro yanga na Nzapa, lo tene: “Mo honde mbi na yâ ndo-ti-awakinda.” (Job 14:13). Tongana fade ndo-ti-awakinda ayeke ndo so azo ayeke bâ pasi dä teti lakue lakue, a yeke na lege ni ti tene Job ahunda ti gue kâ? Na yâ ti Bible, enfer aye gi ti sara tënë ti ndo so a yeke lu azo dä, mbeni ndo so azo so ague dä alingbi pëpe ti sara mbeni ye.
Ge, lege so a fa na nda ti tënë ti enfer ayeke tâ na lege ni nga ague oko na aye so Mbeti ti Nzapa afa. Tâ ye ti sioni so mbeni zo asara na so alingbi ti pusu Nzapa ti ndoye ti sara lo na pasi teti lakue lakue ayeke so wa? (1 Jean 4:8). So tënë ti enfer ayeke mvene so, ka tënë ti guengo na yayu ni ayeke tongana nyen?
Bâ nga aversê so: Psaume 146:3, 4; Kusala 2:25-27; aRomain 6:7, 23
TÂ TËNË NI AYEKE SO:
Nzapa ayeke bi azo na lê ti wâ ti enfer pëpe
[Lingu ti foto na lembeti 5]
Barrators—Giampolo/The Doré Illustrations For Dante’s Divine Comedy/Dover Publications Inc