Atënë so azo ahunda

Na ngoi wa si a yeke na lege ni teti mbeni wali Chrétien ti kanga ye na li ti lo tongana lo yeke sala mbeni kusala so andu ye ti yingo?

Bazengele Paul asû na mbeti: “Wali so asambela, wala afa tënë na iri ti Nzapa, na lo kanga ye na li ti lo pëpe, lo mû kamene na beli ti lo”. Ngbanga ti nyen? Ngbanga ti kpengba-ndia so Nzapa amû na ndo tënë ti zo so ayeke na kungba ti mû li ni: “Koli ayeke beli ti wali”. Ti bâ nzoni, kungba ti sambela wala ti fa tënë na yâ kongregation ayeke ti koli. Tongaso, tongana mbeni wali Chrétien ayeke sala ambeni ye so andu vorongo, me so mingi ni gi koli ti lo wala mbeni koli so awara batême awe si ayeke fade na kungba ti sala ni, a lingbi lo kanga ye na li ti lo.​—1 aCorinthien 11:3-10.

Ambeni ye alingbi ti si na yâ mariage, so ahunda ti tene mbeni wali Chrétien akanga ye na li ti lo. Na tapande, tongana sewa ni abungbi ti manda Bible wala ti te kobe, a yeke na koli ni ti mû li ni na yâ fango ye na ala, na ti sambela Nzapa teti ala. Ye oko, tongana lo yeke na yâ ti tâ tënë pëpe, kungba ni alingbi ti kiri na wali ti lo. Tongaso, tongana lo yeke sambela na kota go teti lo mveni nga teti ambeni zo nde, wala tongana lo yeke manda Bible na amolenge ti lo na ngoi so koli ti lo ayeke na tele ti lo, a yeke na lege ni teti mbeni ita-wali Chrétien ti kanga ye na li ti lo. Tongana koli ti lo ayeke dä pëpe, wali ni abezoin pëpe ti kanga ye na li ti lo, teti so Nzapa amû nga na lo kungba ti fa ye na amolenge.​—aProverbe 1:8; 6:20.

Ka tongana mbeni kete molenge-koli ti sewa ni amû tele ti lo na Jéhovah Nzapa na awara batême awe, ye ni ayeke duti tongana nyen? Teti so molenge ni ayeke mbeni oko ti kongregation ti aChrétien, a yeke ti akoli ti kongregation ni ti fa lege na lo (1 Timothée 2:12). Tongana babâ ti lo ayeke na yâ ti tâ tënë, a yeke lo si alingbi ti fa ye na kete molenge-koli so. Ye oko, tongana babâ ni ayeke dä pëpe, a lingbi mama ni akanga ye na li ti lo tongana lo yeke manda Bible na kete molenge-koli so awara batême awe, nga na tanga ti amolenge ni. A yeke na lo ti bâ wala lo yeke hunda molenge-koli ni so awara batême awe ti sambela wala pëpe na ngoi ti mandango ye wala ti tengo kobe. Peut-être lo bâ so molenge-koli ni ade ti lingbi kue pëpe ti sambela na ngoi ni so, na tongaso lo soro ti sambela lo mveni. Tongana lo soro ti sambela na mbeni ngoi tongaso, a lingbi lo kanga ye na li ti lo.

Tongana ala yeke mû mbage na ambeni kusala na yâ kongregation, a lingbi peut-être ti hunda ti tene awali Chrétien akanga ye na li ti ala. Na tapande, a lingbi ti si so na mbeni lango ti yenga, gi aita-wali si ayeke dä na ngoi ti bungbi ti fango tënë, me ita-koli oko ayeke dä pëpe. Ambeni ngoi nde alingbi ti si so ita-koli oko ayeke dä pëpe na mbeni bungbi ti kongregation. Tongana a hunda ti tene mbeni ita-wali asala akusala so mingi ni a yeke mbeni ita-koli si alingbi fade ti sala ni na ngoi ti abungbi ti kongregation wala ti fango tënë, a lingbi lo kanga ye na li ti lo.

Me tongana a yeke mû mbeni diskur na ndo Bible, na mbeni ita-wali ayeke fa pekoni na mbeni yanga nde, wala na yanga ti awambongi, wala tongana mbeni ita-wali ayeke diko aparagraphe na yâ mbeni mbeti ti mandango ye na ndo Bible so a yeke sala na kusala na bungbi ti kongregation, a lingbi aita-wali so akanga ye na li ti ala? A lingbi ala kanga li ti ala pëpe. Aita-wali so ayeke sala akusala so ayeke mû li ni pëpe, na ala yeke fa ye pëpe. Legeoko nga, a hunda pëpe na aita-wali ti kanga ye na li ti ala tongana ala yeke sala ambeni démonstration, ala yeke fa peko ti mbeni ye so asi na ala, wala ala yeke sala devoir na Ekole ti Kusala ti aChrétien.

Ti fa ye na yâ ti kongregation ayeke kungba ti akoli so awara batême awe, me ti fa tënë na ti fa ye na gigi ti kongregation ayeke kungba so a mû na akoli nga na awali kue (Matthieu 24:14; 28:19, 20). Ni la, tongana mbeni wali Chrétien ayeke fa Tënë ti Nzapa na ambeni zo na tele ti mbeni ita-koli Témoin ti Jéhovah, ita-wali ni abezoin pëpe ti kanga ye na li ti lo.

Ye oko, ye ni ayeke nde tongana ita-wali ni ayeke manda Bible lakue na mbeni zo na ndo ti lo, na mbeni ita-koli so awara batême awe ayeke dä. So ayeke mbeni programme ti fango ye so a leke kozoni awe, na lo so ayeke fa ye ni ayeke mû li ni biani. Na yâ aye tongaso, mandango ye ni ayeke tongana ti so a sala na yâ ti kongregation. Tongana mbeni Témoin ti wali so awara batême awe ayeke sala mara ti fango ye tongaso, na mbeni ita-koli Témoin ayeke na tele ti lo, a yeke na lege ni teti lo ti kanga ye na li ti lo. Me a yeke na ita-koli ni so awara batême awe ti sambela. Fade mbeni ita-wali ayeke sambela pëpe tongana mbeni ita-koli so awara batême awe ayeke na tele ti lo; lo yeke sambela ande gi tongana mbeni kpale asi, na tapande tongana ita-koli ni alingbi pëpe ti sala tënë.

A lingbi ti si so mbeni ita-wali Chrétien ague ti manda Bible na mbeni zo, na lo gue legeoko na mbeni koli so ayeke wafango tënë me so ade ti wara batême pëpe. Tongana lo ye, lo lingbi ti hunda na lo ti mû li ni na mandango ye ni. Me teti so lo lingbi pëpe ti sambela Jéhovah na place ti ita-wali ni, a yeke na lege ni teti ita-wali ni ti sambela na ngoi ti mandango ye so. Tongana ita-wali ni ayeke mû li ni na mandango ye ni, na a yeke lo si asambela, a lingbi lo kanga ye na li ti lo. Atâa so koli ni ayeke wafango tënë so ade ti wara batême pëpe, azo ti gigi ayeke bâ lo tongana oko ti kongregation ngbanga ti so lo yeke fa tënë.

Bazengele Paul asû na mbeti: “A lingbi wali akanga ye na li ti lo ti ga fä ti komandema, ngbanga ti a-ange.” Biani, aita-wali ayeke na matabisi ti duti anzoni tapande teti a-ange kutu mingi so na be-biani angbâ lakue ti sala na Jéhovah tongana Beli ti ala. A yeke nzoni ti tene awali so akpe mbito ti Nzapa abâ na nene ni kangango ye na li ti ala, tongana ngoi ni ahunda ti sala tongaso.

[Afoto na lembeti 26]

Kangango ye na li ayeke fä ti yekiango ala so amû li ni