Hundango ndo

◼ A lingbi mbeni ita-wali akanga ye na li ti lo tongana lo na mbeni wafango tënë so ayeke koli ague ti sara étude na mbeni zo na lutingo ni na nduzu?

Tongana mbeni ita-wali ayeke manda Bible lakue na mbeni zo na ndo ti lo, na mbeni wafango tënë ti koli ayeke dä, a lingbi ita-wali ni akanga ye na li ti lo (1 aCor. 11:3-10). Tour ti Ba Ndo ti lango 15 ti nze ti juillet ngu 2002, lembeti 27 atene: “So ayeke mbeni programme ti fango ye so a leke kozoni awe, na lo so ayeke fa ye ni ayeke mû li ni biani. Na yâ aye tongaso, mandango ye ni ayeke tongana ti so a sara na yâ ti congrégation. Tongana mbeni Témoin ti wali so awara batême awe ayeke sara mara ti fango ye tongaso, na mbeni ita-koli Témoin ayeke na tere ti lo, a yeke na lege ni teti lo ti kanga ye na li ti lo.” A yeke tâ tënë atâa so ala yeke sara étude ni na yanga-da, na lutingo ni, wala na mbeni ndo nde.

Me, tongana ade gere ti mbeni étude so a sara ni na lutingo na nduzu ade ti luti nzoni pëpe, mbeni ita-wali ayeke pëpe na bezoin ti kanga ye na li ti lo tongana mbeni wafango tënë so ayeke koli ayeke dä, même na ngoi so ala gue ti sara vizite na mbeni zo ti fa na lo tongana nyen ti manda Bible na lege ti ambeti ti e. Teti so a yeke zia na sese yeke yeke mara ti a-étude tongaso, na pekoni so a sara vizite fani mingi na azo ni, a yeke na awafango tënë ni ti bâ na ngoi wa la a yeke nzoni ti tene aita-wali ni akanga ye na li ti ala.