Futa ti gbungo ngangu ayeke dä
1 “Fade i wara fini ti i na lege ti gbu[ngo] ngangu.” (Luc 21:19). Atënë so ayeke mbage ti atënë ti prophétie ti Jésus na ndo hunzingo ti aye ti “ngoi so” afa polele so, na batango be-biani ti e, a lingbi e leke tele ti e ti luti na gbele atara mingi. Me na yâ ngangu ti Jéhovah, zo oko oko na popo ti e alingbi ti “gbu ngangu juska na nda ni” na fade a “sö” e.—Mat. 24:3, 13; aPhil. 4:13.
2 Ye ti ngangu, kpale ti seni, ti nginza na vundu ti bê alingbi ti sala si lâ oko oko aga mbeni tara. Ye oko, a lingbi e girisa lâ oko pëpe so Satan ayeke tara ti kinda be-biani ti e na Jéhovah. Lâ oko oko so e ngbâ be-ta-zo na Babâ ti e ayeke mbeni lango so na yâ ni e mû mbage ti e na kiringo tënë na gingo yanga ti Satan. Bâ ye ti nzoni so ayeke dä na hingango so a girisa pëpe “ngule” ti e na gbele atara! Jéhovah abâ ni na nene ni, na be-biani ti e amû ngia na bê ti lo!—Ps. 56:9; aProv. 27:11.
3 A leke e nzoni na lege ti atara: Ye ti vundu alingbi ti fa na gigi wokongo so mabe ti e wala salango ye ti e ayeke na ni, tongana baba wala bê so anze. Ahon ti gi ti kpe wala ti sigigi na yâ atara na lege ti aye so Mbeti ti Nzapa ake, a lingbi e bata wango ti Tënë ti Nzapa ti zia lege na “bê so azia pëpe asala kusala ti lo kue”. Ngbanga ti nyen? Ngbanga ti so gbungo ngangu na yâ atara na ngbango be-ta-zo ayeke mû maboko na e ti “lingbi kue na yâ ye kue”. (Jacq. 1:2-4). Gbungo ngangu alingbi ti mû maboko na e ti lë apendere ye tongana salango ye na lege ni, bango mawa ti zo nga na be-nzoni.—aRom. 12:15.
4 Mabe so a tara ni awe: Na ngoi so e gbu ngangu na yâ atara, e yeke wara mabe so a tara ni awe so ayeke na ngele mingi na lê ti Nzapa (1 Pi. 1:6, 7). Mara mabe tongaso amû na e ye so alingbi si e yengi pëpe na gbele atara ti kekereke. Na ndo ni, e lingbi ti hinga so Nzapa ayeda na e. Ye so ayeke kpengba beku ti e na ayeke sala si a ga tâ ye na lê ti e.—aRom. 5:3-5.
5 A fa polele futa ti nzoni mingi teti gbungo ngangu na Jacques 1:12, so atene: “Ngia ayeke na zo so agbu ngangu na yâ ye so atara lo, teti tongana A tara lo A bâ lo lingbi, fade lo wara couronne ti fini ti lakue lakue so Seigneur azê na ala so andoye Lo.” Tongaso, zia e yengi pëpe na yâ mungo bê ti e kue na kusala ti Jéhovah, na hingango so lo yeke futa mingi “ala so andoye Lo.”