“Ngia ayeke na zo so agbu ngangu na yâ ye so atara lo”
1 A lingbi a-Chrétien kue awara tara (2 Tim. 3:12). Atara alingbi ti ga na lege ti kobela, kpale ti nginza, handa, kangango lege wala na ambeni lege nde nde. Atara so Satan aga na ni na ndo ti e ayeke ti sara si e kiri na peko, ti sara si e bâ kusala ti e ti Chrétien tongana ye senge wala même ti zia lege ti sara na Nzapa (Job 1:9-11). Tongana nyen gbungo ngangu na yâ tara aga na ngia na zo?—2 Pi. 2:9.
2 Lekengo tere ndali ti atara: Jéhovah amû na e Tënë ti lo so ayeke tâ tënë, so na yâ ni e yeke na mbaï ti fini ti Jésus nga na aye so lo fa. Na mango tënë ti Jésus nga na sarango ye alingbi na ni, gere ti e ayeke luti nzoni, na tongaso e yeke leke tere ti e ti luti na gbele atara (Luc 6:47-49). E yeke wara nga ngangu na yâ ti ambeni ye nde: na lege ti aita ti e ti yingo, abungbi ti kongregation nga na ambeti so ngbâa be-tâ-zo na ti ndara amû na e. E yeke sara kusala mingi na sambela, matabisi so Nzapa amû na e.—Mat. 6:13.
3 Jéhovah amû na e nga beku. Tongana e kpengba mabe ti e na yâ azendo ti Jéhovah, beku ti e ayeke ga tongana “ndondo [wala wen so a bi na yâ ti ngu ti kale mangboko] ti âme so agbu ngangu, a yengi pëpe”. (aHéb. 6:19). Na ngoi so a sû na Bible, amangboko alingbi ti mû lê ti ngu sân ti mû wen so pëpe, même tongana lê ti nduzu ayeke nzoni. Tongana kota ngu-nzapa apika fade fade, wen so a bi ni na ngu alingbi ti sara si pupu apusu mangboko ni na tere ti tênë pëpe. Legeoko nga, tongana e kpengba mabe ti e na yâ azendo ti Nzapa laso, beku ti e ayeke sara si e luti nzoni tongana akpale asi tongana kota ngu-nzapa. Akpale alingbi ti si gi tongaso. Atâa so ti kozoni azo ayamba na nzoni bê fango tënë ti Paul na Barnabas na kodoro ti Lystre, ye ni agbian hio tongana aJuif so aye tënë ni pëpe asi lani kâ.—Kus. 14:8-19.
4 Gbungo ngangu aga na ngia: Ti gbu ngangu na yâ kusala ti fango tënë atâa na gbele kangango lege ayeke mû na e siriri ti bê. E yeke na ngia tongana a bâ e tongana azo so a bi kamene na lê ti ala ndali ti Christ (Kus. 5:40, 41). Gbungo ngangu na yâ tara ayeke mû maboko na e ti duti na tâ be-ti-molenge, mango yanga nga gbungo ngangu na yâ aye kue (Deut. 8:16; aHéb. 5:8; Jacq. 1:2, 3). Gbungo ngangu afa na e ti zia bê ti e na Jéhovah, ti mä na bê na azendo ti lo na ti ga na mbage ti lo ti bata tere ti e.—aProv. 18:10.
5 E hinga so atara ayeke gi teti kete ngoi (2 aCor. 4:17, 18). Atara amû na e lege ti fa kota ti ndoye ti e na mbage ti Jéhovah. Na gbungo ngangu na gbele atara, e lingbi ti kiri tënë na atënë so Satan abi na sese. Tongaso, e zia pëpe! “Ngia ayeke na zo so agbu ngangu na yâ ye so atara lo, teti tongana a tara lo A bâ lo lingbi, fade lo wara couronne ti fini ti lakue lakue.”—Jacq. 1:12.
[Kete tënë na gbe ni]
(Tanga ni na l. 7)
[Kete tënë na gbe ni]
Gbungo ngangu (A ngbâ ti gue)