“I ga na mbi, . . . na fade mbi mû na i lege ti hu tele”
Amaseka so ayeke tongana angu ti mamio so adë bê
TONGANA Jésus Christ atene, “I ga na Mbi, . . . na fade Mbi mû na i lege ti hu tele”, biani lo ye nga ti sala tënë ti adisciple ti lo so ade maseka (Matthieu 11:28). Tongana azo ato nda ti ga na amolenge ti ala na lo, adisciple ti lo atara ti kanga lege na ala. Me Jésus atene: “I zia akete molenge aga na Mbi, i gbanzi ala pëpe”. Lo ‘kamata même amolenge ni na tïtî Lo, Lo hiri tënë nzoni na ndo ala’. (Marc 10:14-16). Biani, akete molenge ane mingi na lê ti Jésus.
Bible asala tënë ti abe-ta-zo, amaseka-koli na amaseka-wali; amolenge, akota ni nga na akete ni, so azia apendere tapande na salango na Nzapa. Na yâ mbeti ti aPsaume, a sala giriri tënë ti “apendere” so adë bê tongana ngu ti mamio. A sala nga tënë ti “apendere-koli” na “amasia” so asepela iri ti Jéhovah.—Psaume 110:3; 148:12, 13.
Ndo teti amaseka ti maï dä
A yeke tâ na lege ni ti haka amaseka na angu ti mamio, teti mamio ayeke fä ti deba nzoni na ti ye so awu mingi (Genèse 27:28). Angu ti mamio ayapu na ala dë bê. Na lâ ti singo ti Christ so, aChrétien mingi mingi so ade maseka amû tele ti ala mveni na bê kue. Legeoko tongana angu ti mamio so adë bê, na ngia na bê, amaseka-koli na amaseka-wali mingi asala na Nzapa nga amû maboko na afon ala awamabe.—Psaume 71:17.
A-Chrétien so ade maseka adë gi bê ti azo pëpe; me ala wara nga dengo bê na yâ kusala ti ala. Bungbi ti Nzapa aleke mbeni ndo so ala lingbi ti maï dä nzoni. Teti so ala bata anzoni tambela, amaseka-koli na amaseka-wali alë kpengba songo na Nzapa (Psaume 119:9). Na yâ ti kongregation, ala bi nga tele ti ala na yâ akusala so asala nzoni na ala nga ala wara anzoni kamarade. Aye so asala si gigi ti ala anzere na ane.
‘Tele ti mbi aga nzoni na mbi wara ngangu’
Amaseka ayeke bâ tele ti ala mveni tongana “angu ti mamio”? Bâ tapande ti Tania, mbeni maseka-wali so amû mbage mingi na yâ akusala ti kongregation, na so ayeke na ngia ti mû angbonga ahon 70 nze oko oko ti fa na tënë. Lo pensé ti lo nyen? Lo tene: “Bê ti mbi adë na mbi maï. Lengo songo na Jéhovah nga dutingo na yâ bungbi ti lo na sese ge asala si ‘tele ti mbi aga nzoni na mbi wara ngangu.’ ”—aProverbe 3:8.
Ariel, mbeni maseka nde so ayeke nga wakua ti ngoi kue, ayekia mingi kobe ti yingo so lo wara na yâ ti kongregation. Lo tene: “Tongana mbi gue na abungbi nga na akota bungbi ti aChrétien, si mbi te gbâ ti pendere kobe na table ti yingo so ayeke ti Jéhovah, a dë biani bê ti mbi na lege ti yingo. Nga, ti hinga so na ndo sese mobimba, mbi yeke na afon mbi na yâ kusala, a kpengba mbi.” Na fango kota lingu so aga na dengo bê, lo tene: “A yeke ye ti dengo bê mingi ti wara Jéhovah tongana kamarade ti mbi, mbilimbili tongana mbi mä wala mbi bâ asioni ye so sese so ayeke sala na ndo azo laso.”—Jacques 2:23.
Abishaï, so ayeke na ngu 20, asala kusala tongana mbeni wakua ti ngoi kue nga serviteur ti mungo maboko na yâ ti kongregation. Bâ tënë so lo tene na ndo ye so asi na lo: “Bê ti mbi adë teti mbi hinga tongana nyen ti hon ndo ti gbâ ti akpale so amaseka awara ni laso. Tâ tënë ti Bible amû maboko na mbi ti bata lê mbilimbili na ndo ye so a lingbi mbi sala ti sala na Jéhovah na bê kue.”
Lani, tongana Antoine angbâ pendere mingi lo yeke sala ngonzo hio hio. Mbeni lâ, lo pika mbeni kamarade ti klase ti lo na chaise, na lo kpo mbeni nde na crayon. Antoine adë lani bê ti azo oko pëpe! Me fango ye ti Bible achangé salango ye ti lo. Fadeso, lo yeke na ngu 19, na lo yeke sala kusala tongana mbeni serviteur ti mungo maboko nga na wakua ti ngoi kue na yâ ti kongregation ti lo. Lo tene: “Mbi mû merci na Jéhovah so lo zi lege na mbi ti hinga lo, na so lo mû maboko na mbi ti bâ so a yeke nzoni mbi kanga ndo ti ngonzo ti mbi na mbi changé salango ye ti tele ti mbi. Salango tongaso asala si mbi ti kpe akpale mingi.”
Ambeni zo nde ayeke bâ pendere tambela ti aChrétien so ade maseka. Matteo ayeke mbeni maseka Témoin na kodoro ti Italie. Wafango-mbeti ti lo amû mbeni desizion: a-élève kue so sioni tënë asigigi na yanga ti ala ayeke futa mbeni kete nginza. Ngoi kete na pekoni, a-élève ni ahunda ti tene a fâ yâ ti ndia so teti so, ala tene, “a yeke ngangu ti tene sioni tënë asigigi na yanga ti ala pëpe.” Matteo atene: “Me, wafango-mbeti ni atene so a yeke tongaso pëpe. Lo mû mbi, mbeni Témoin ti Jéhovah, tongana tapande, na lo gonda mbi na gbele a-élève ni kue teti anzoni tënë so ayeke sigigi na yanga ti mbi.”
Na yâ mbeni klase na Thaïlande, so li ti a-élève ni akpengba, wafango-mbeti ni ahunda na Racha, so ayeke na ngu 11, ti londo na gbele azo ni kue. Lo gonda lo ndali ti nzoni salango ye ti lo, lo tene na a-élève ni: “Ngbanga ti nyen ala kue asala ye tongana lo pëpe? Lo yeke manda mbeti ti lo nzoni na lo yeke sala ye na lege ni.” Na pekoni, lo tene na ala: “Mbi pensé so a lingbi ala ga aTémoin ti Jéhovah, tongana Racha, ti tene tambela ti ala aga biani nzoni.”
A yeke ye ti mungo ngia ti bâ so aChrétien saki mingi, so ade maseka, ayeke kono hingango ye ti ala na ndo Jéhovah na ayeke sala ye so bê ti lo aye. Mara ti amaseka tongaso, so asala ye nzoni, afa ndara so mingi ni a yeke wara gi na tele ti akota zo. Nzapa alingbi ti mû maboko na ala ti sala si gigi ti ala ti laso aduti nzoni, nga ti mû na ala mbeni pendere kekereke na yâ fini sese so aga ndulu (1 Timothée 4:8). Na yâ sese ti fadeso, so alë anzoni lengo oko pëpe na lege ti yingo, na so apendere so ayeke na vundu nga na ngonzo mingi asi singo dä, amaseka so ayeke tâ nde na ala dë bê biani!