Dengo bê na ngoi ti kpale

ASANGO ti laso ayeke dë bê oko pëpe. Mbeni koli asû na mbeti: “Aye ti fadeso ayeke tâ sioni mingi, na a sala si mingi ni a yeke ngangu na e ti hinga wala e lingbi ti kanga bê ti bâ asango ti lakui na televizion.” Sese asi singo na bira, aye ti mungo kota mbito, pasi, kengo ndia, na kobela. Asioye so, tongana ade a si na e pëpe, alingbi ti tï na ndo ti e na yâ ngoi so ayeke ga.

Bible afa giriri tâ na lege ni dutingo ti sese so. Na ndembe so lo yeke fa dutingo ti ngoi ti e, Jésus atene so fade akota bira, akobela ti futi kodoro, na akota nzara ayeke si, nga so sese ayeke yengi ngangu (Luc 21:10, 11). Legeoko nga, bazengele Paul asû mbeti na ndo “lâ ti ye ti ngangu”, ngoi so azo ayeke duti sioni mingi, ala yeke ndoye nginza, na ala yeke ndoye nzoye pëpe. Lo hiri lani ngoi so “lâ ti nda ni”.​—2 Timothée 3:1-5.

Na lege so, tongana a fa dutingo ti sese, asango ayeke fa kamême aye so akpa ti so Bible asala tënë ni giriri. Me lo ngbâ ti lo gi ge. Bible amû ti lo mbeni bango ndo so asango amû pëpe. Na lege ti Tënë ti Nzapa so a sû na gbe ti yingo, e lingbi ti hinga nzoni gi pëpe ngbanga ti nyen sioni ahon ndo ni tongaso, me nga ye so ayeke ku e kekereke.

Bibe ti Nzapa na ndo sioye

Bible afa bibe ti Nzapa na ndo dutingo ti aye ti laso, so amû vundu na bê mingi. Atâa so lo sala giriri tënë ti awusuwusu ti ngoi ti e, lo yeda na ni pëpe nga lo yeke zia si angbâ lakue lakue pëpe. Bazengele Jean atene: “Nzapa ayeke Ndoye.” (1 Jean 4:8). Jéhovah abi bê mingi na azo na lo ke na bê oko sioye kue. Nzapa ayeke na nzoni bê, lo yeke bâ mawa ti azo, lo ye nga lo yeke na ngangu ti zi sioye kue na ndo sese, ni la a yeke tâ na lege ni ti tene e bi lê ti e na mbage ti lo ti wara dengo bê. Wasungo psaume atene: ‘Fade [Gbia ti yayu so Nzapa asoro] asö zo so ye atia lo mingi tongana lo toto na Lo, na Lo sö zo ti vundu so ayeke na zo oko pëpe ti sala na lo. Fade Lo sala be-nzoni na wanzinga na zo so ye atia lo mingi, na Lo sö âme ti ala so ye atia ala mingi. Fade lo ton âme ti ala na yâ ye ti ngangu na sioye; na mênë ti ala ayeke ye ti ngele ngangu na lê ti Lo.’​—Psaume 72:12-14.

Peut-être bango azo na yâ ti pasi ayeke zia vundu na bê ti mo. A yeke na lege ni teti so bango mawa ayeke mbeni lengo so Jéhovah azia na yâ bê ti e, ngbanga ti so lo leke e na image ti lo (Genèse 1:26, 27). Ni la, e lingbi ti hinga biani so Jéhovah ayeke bâ gi bango na lê pëpe pasi ti azo. Jésus, so ahinga Jéhovah nzoni mingi ahon tanga ti azo kue, afa so Jéhovah abi bê mingi na e na lo si singo na nzobe.​—Matthieu 10:29, 31.

Création mveni afa so Nzapa ayeke bi bê na azo. Jésus atene lani so Nzapa ‘asala si lâ ti Lo asu na ndo azo ti sioni na azo ti nzoni, na Lo sala si ngu apika na ndo azo ti mbilimbili na azo ti kirikiri.’ (Matthieu 5:45). Bazengele Paul asala tënë so na azo ti gbata ti Lystre: ‘Nzapa abata tënë ti témoin ti Lo teti Lo sala nzoni, Lo mû na i ngu-nduzu na Lo mû na i ngoi ti lengo kobe, na Lo mû na i kobe, na ngia, alingbi na bê ti i.’​—Kusala 14:17.

Zo wa ayeke na gunda ti sioye?

Bâ so Paul atene nga tënë so na azo ti Lystre: ‘Na ngoi ti awagame ti giriri, Nzapa azia amara kue ti tambela na lege ti ala mveni’. Na lege ti tënë so, a yeke amara, wala azo ala mveni, si ayeke mingi ni na gunda ti aye ti vundu so asi na ala. A lingbi a tene pëpe so Nzapa si ayeke na gunda ni.​—Kusala 14:16.

Ngbanga ti nyen Jéhovah azia lege na aye ti sioni ti si? Fade mbeni lâ lo yeke sala ande ye ndali ni? E lingbi ti wara kiringo tënë na ahundango tënë so gi na yâ Tënë ti Nzapa. Senge pëpe teti kiringo tënë ni andu mbeni zo ti yingo nde, nga a ndu mbeni kota tënë so zo ti yingo so asigigi na ni.

[Afoto na lembeti 4]

Azo ayeke bâ mawa ti amba ti ala. Me pasi ti azo asala ye oko pëpe na Nzapa?

[Lingu ti afoto na lembeti 2]

KOZO LEMBETI: Char: UN PHOTO 158181/J. Isaac; sese ayengi: San Hong R-C Picture Company

[Lingu ti afoto na lembeti 3]

Na nduzu na gati, Croatie: UN PHOTO 159208/S. Whitehouse; molenge so akui nzara: UN PHOTO 146150 TI O. MONSEN