Tâ hingango ye ti Nzapa adë bê

TI AMBENI zo, tënë so Bible atene na ndo ndoye nga na be-nzoni ti Nzapa apusu ala ti hunda atënë so ala gi li ti ala na ni gbä. Ala hunda: Tongana Nzapa aye ti zi sioye, nga lo hinga lege ti zi ni, na lo yeke na ngangu ti sala ni, ngbanga ti nyen si sioni angbâ lakue ti wu tongaso? Ti ala, kpale ni ayeke ti tingbi atënë ota so ague nde nde: (1) Ngangu ti Nzapa ahon angangu kue; (2) Nzapa ayeke nzoni nga na ndoye; na (3) aye ti vundu angbâ lakue ti si. Ala tene na bê ti ala so teti so ndangba tënë ni ayeke gi tâ tënë, na popo ti ala use so angbâ, kamême oko alingbi ti duti tâ tënë pëpe. Ti ala, wala Nzapa ayeke na ngangu ti kanga lege na sioni pëpe wala tënë ni andu lo oko pëpe.

Ngoi kete na peko ti futingo ti World Trade Center na New York, mbeni mokonzi ti lege ti vorongo, so iri ti lo awu mingi na Amerika, atene: “Na yâ fini ti mbi, azo ahunda na mbi lege mingi ngbanga ti nyen Nzapa azia lege na kpale nga na pasi ti si. A lingbi mbi tene polele so ti tâ tënë ni mbi hinga kiringo tënë ni kue pëpe. Même mbi mveni, bê ti mbi adë kue pëpe.”

Tënë so apusu mbeni wafango ye na ndo tënë ti Nzapa ti sû na mbeti so “kpengba tënë ti mabe” so mokonzi ti lege ti vorongo so afa apika bê ti lo mingi. Lo ye nga dä na bibe ti mbeni wandara so atene: “Teti zo alingbi ti hinga nda ti Nzapa nzoni pëpe, lo lingbi nga pëpe ti hinga nda ti pasi so azo ayeke bâ.” Me zo alingbi biani pëpe ti hinga ngbanga ti nyen Nzapa azia lege na sioni?

Sioni alondo na ndo wa?

Nde na tënë so amokonzi ti lege ti vorongo alingbi peut-être ti tene, Bible atene pëpe so zo alingbi pëpe ti hinga nda ni so Nzapa azia lege na sioye. Kota ye so alingbi ti mû maboko na e ti hinga mbilimbili nda ti sioni, ayeke ti yeda so giriri Jéhovah aleke pëpe mbeni sese so sioni ayeke na yâ ni. Lo leke kozo koli na kozo wali mbilimbili-kue, siokpari ayeke lani na yâ ala pëpe. Jéhovah abâ aye so lo leke na a yeke lani “nzoni mingi” na lê ti lo (Genèse 1:26, 31). Lo ye lani ti tene Adam na Eve akono yâ ti Paradis ti Eden na ndo lê sese kue na ti tene sese ni asi singo na azo so ayeke na ngia, so aduti nzoni na gbe ti kota yanga-ti-komande ti lo ti ndoye.​—Esaïe 45:18.

Sioni ato nda ti bâ gigi na lege ti mbeni ange na yayu. Ange so ayeke lani be-ta-zo na Nzapa, me na pekoni lo zia si nzara ti tene azo avoro lo alï bê ti lo (Jacques 1:14, 15). Na sese ge, a bâ kengo yanga ti lo ni tongana lo pusu kozo koli na kozo wali ti bungbi oko na lo na yâ kengo yanga ti Nzapa. Ahon ti tene ala bata yanga so Nzapa amû, so ahunda mbilimbili ti tene ala te wala ala ndu pëpe lê ti keke ti hinga nzoni na sioni, Adam na Eve amû mbeni ate (Genèse 3:1-6). Na salango tongaso, ala ke pëpe gi yanga ti Nzapa me ala fa nga so ala ye ti duti yamba na lo.

Mbeni kota tënë abâ gigi

Kengo yanga so na Eden asala si mbeni kota tënë abâ gigi. Kota tënë so andu ndagigi kue. Kengo yanga ti azo asala si a hinga nzoni pëpe wala Jéhovah ayeke komande na lege ni azo so lo leke. Wasalango ye ayeke na droit ti hunda na azo ti mä yanga ti lo na yâ ye kue? Tongana fade azo asala gi ye ti bê ti ala nde na Nzapa, ka ala lingbi ti duti nzoni mingi ahon ti kozo?

Lege so Jéhovah aleke na kpale so andu komandema ti lo afa so salango kusala ti lo na ndoye, mbilimbili, ndara, nga na ngangu ayeke tâ na lege ni. Lo lingbi lani ti mû gi ngangu ti lo ti neka na kengo yanga so hio. Na a lingbi lani peut-être ti bâ ni tongana fango ngbanga ti mbilimbili, teti lo yeke na droit ti sala tongaso. Ye oko, salango tongaso ayeke kiri tënë pëpe na akota tënë so abâ gigi. Na mbeni mbage nde, Nzapa alingbi peut-être lani ti kanga gi lê na ndo siokpari ni. Ti ambeni zo laso, salango tongaso ayeke fango ndoye la. Me, ye so nga ayeke kiri tënë pëpe na tënë so Satan atene, so fade azo ayeke duti nzoni mingi tongana ala mveni akomande tele ti ala. Nga, mara ti ye tongaso ayeke pusu ambeni zo ti gue yongoro na lege ti Jéhovah pëpe? A yeke sala si zo ayeke bâ pasi teti lakue lakue.

Ndara ti Jéhovah apusu lo ti zia lege na azo ti duti yamba teti mbeni ngoi. Atâa so ye so ahunda ti tene a zia lege na sioni ti ngbâ teti mbeni ngoi, Nzapa azia si azo aduti na fini alingbi na ye so ala bâ ayeke nzoni na sioni na lê ti ala. Tongaso, ala wara lege ti fa wala ala lingbi ti komande tele ti ala mveni nzoni nde na lo. Me nyen si asi na pekoni? Na yâ mbaï ti azo, a yeke wara dä gi tënë ti bira, ti ye ti kirikiri, ti salango ngangu na azo, nga ti pasi. Teti kengo yanga ti Jéhovah aga na ye ti nzoni oko pëpe, a yeke leke ande teti biaku biaku atënë so abâ gigi na Eden.

Me kozoni na ngoi ni so, Nzapa afa ndoye ti lo na tokuango Molenge ti lo, Jésus Christ, so amû fini ti lo ti zo tongana sandaga ti kota ngele. Sandaga so amû lege ti zi azo so amä yanga na gbe ti ngbâa ti siokpari na ti kui so aga na lege ti kengo yanga ti Adam. Kota ngele so azi lege na azo kue so amä na bê na Jésus ti wara fini ti lakue lakue.​—Jean 3:16.

Jéhovah adë bê ti e so pasi so azo ayeke bâ ayeke ninga pëpe. Wasungo psaume atene: “A ngbâ kete, na fade azo ti sioni ayeke mbeni pëpe; fade mo bâ ndo so ala duti dä, na ala yeke mbeni pëpe. Me azo so ayeke na tâ be-ti-molenge, fade sese ni aga ye ti héritier ti ala, fade ala wara ngia na yâ siriri so awu mingi.”​—Psaume 37:10, 11.

Mbeni kekereke ti siriri na ngia

Gango tâ tënë ti aprophétie ti Bible afa so ngoi ti tene Nzapa azi kobela, vundu, na kui aga ndulu. Na yâ ti mbeni suma, bazengele Jean abâ kete mbage ti apendere ye so ayeke si ande. Bâ ye so lo sû na mbeti: “Mbi bâ fini yayu na fini sese, teti kozo yayu na kozo sese ahon awe, na kota ngu ti ingo ayeke mbeni pëpe. . . . na Nzapa mveni ayeke na popo ti [azo], Lo yeke Nzapa ti ala; fade Lo mbô ngule kue na lê ti ala, na kui ayeke mbeni pëpe. Vundu, wala toto, wala sana, ayeke mbeni pëpe teti kozo ye ni ahon awe.” Na yâ mbeni tënë so afa gango tâ tënë ti azendo so, a tene na Jean: “Sala tënë so na mbeti, teti tënë so ayeke tâ tënë na biani.”​—Apocalypse 21:1-5.

Ngbele ye so ake yanga na Eden, azo ngbundangbu mingi so tënë ayeke na li ti ala pëpe akui awe. Ti ala, a yeke duti ande tongana nyen? Jéhovah amû zendo so fade lo yeke kiri na fini azo so ayeke lango fadeso na yâ kuâ. Bazengele Paul atene: “Bê ti mbi ayeke ku ye na lege ti Nzapa, . . . mbi ku londongo ti awakinda kue, azo ti mbilimbili, na azo ti kirikiri.” (Kusala 24:15). Azo so ayeke wara ande beku ti duti na yâ mbeni sese so “mbilimbili aduti na yâ ni.”​—2 Pierre 3:13.

Na tapande, mbeni babâ ti ndoye ayeke zia si awanganga asuru molenge ti lo atâa so lo hinga ayeke so lo mingi, ngbanga ti so lo hinga so a yeke ga ande na molenge ti lo ni ye ti nzoni so aninga. Legeoko tongaso nga, Jéhovah azia si sioni asi na azo teti mbeni kete ngoi na ndo sese. Me, adeba nzoni ti lakue lakue ayeke ku azo kue so agi ti sala ye so bê ti Nzapa aye. Paul afa nda ni tongaso: “A sala si création aga ngbâa ti ye ti futi, a yeke ye so création mveni aye pëpe, me a yeke ye so Lo ye, Lo so asala si création aga ngbâa, teti création mveni aku si A zi lo na yâ ye ti futi so asala lo na ngbâa, na A zia lo na yâ liberté ti gloire ti amolenge ti Nzapa.”​—aRomain 8:20, 21.

So a yeke tâ sango! Pëpe mara ti asango so e yeke bâ na televizion, e yeke mä na radio wala e yeke diko na mbeti, me a yeke mbeni nzoni sango. Sango so ayeke nzoni ahon asango kue, na a londo na “Nzapa ti lungula vundu kue”, Nzapa so ayeke bi bê ti lo biani na e.​—2 aCorinthien 1:3.

[Afoto na lembeti 6]

Angoi so ahon afa so zo alingbi pëpe ti komande tele ti lo nzoni nde na Nzapa

[Lingu ti afoto]

Mbeni sewa ti Somalie: UN PHOTO 159849/M. GRANT; sungbango ti bombe atomique: USAF photo; kando ti pasi: U.S. National Archives photo