Mungo ye juska a hon ngangu ti zo

“ALA lingbi ti tene mbi yeke zo ti hiringo nginza; a so mbi oko pëpe. Mbi yeke hiri nginza ndali ti Jésus.” Atënë so afa ye mingi, so mbeni pasteur Protestant atene, afa papa so ayeke ngoro ka na tele ti nginza ti alege ti vorongo. A bâ so akota lege ti vorongo ayeke ngbâ ti tambela gi tongana a mû gbâ ti nginza ndali ni. A hunda ti futa azo, ti leke nga ti bata atemple, ti mû nginza teti akota kapa ti fango na nzo tënë. Tongana nyen a lingbi ti wara nginza so ahunda ti sala na aye so kue?

Ti a-église mingi, a yeke gi na lege ti dîme.a Norman Robertson, mbeni wafango tënë ti Nzapa, atene: “A yeke na lege ti dîme si Nzapa ayeke futa nginza teti kusala ti royaume ti Lo so ayeke na ndo ti sese. A yeke kode ti Lo ti wara nginza so amû lege ti fa tënë ti Évangile.” Na dango bê na kamene oko pëpe na afon lo awamabe ti mû ye, lo tene na ngangu: ‘Dîme ayeke pëpe mbeni ye so mo yeke mû ngbanga ti so mo yeke na nginza ti mû ni. A yeke mbeni kusala so afa mango yanga. Tongana zo amû dîme pëpe, a yeke polele so lo ke akomandema ti Nzapa. A yeke nzingo nginza.’​—Mungo dîme, kode ti warango nginza ti Nzapa (Angl.).

Peut-être mo yeda so a lingbi mungo ye aduti mbage ti vorongo ti aChrétien. Me, tongana a hunda nginza lakue lakue, a yeke so même bê ti mo pëpe? Inácio Strieder, mbeni wandara ti fango ye na ndo Tënë ti Nzapa na Brésil, abi tënë na ndo a-église, so ala yeke hunda azo ti mû dîme ti “leke na akpale so ala wara na yâ abungbi ti ala,” nga so na lê ti lo, asalango ye tongaso “ayeke na lege ni oko pëpe, a gue nde na ye so Nzapa ahunda.” Lo tene so ye so asala si “azo so ayeke na kua ti nginza pëpe, awomua, ala so alango na asioni ndo, nga ala so ayeke gi ti gbu li ti ala pëpe, ayeke tene so Nzapa ake ala awe, nga so a yeke pusu ala na ngangu ti mû ye mingi na ‘pasteur ni’, si azo ti sewa ti ala akui nzara.”

Mo yeke hunda peut-être tele ti mo: ‘A-église so ahunda ti mû dîme ayeke sala ye alingbi na Mbeti ti Nzapa biani? Wala ambeni lege ti vorongo ayeke sala kusala na mbito ti Nzapa so ayeke na yâ azo ti mû na ngangu nginza ti azo ti ala? Nzapa aku biani ti tene e mû ye juska a hon ngangu ti e, tongana ti so ambeni zo ayeke tene?’

[Kete Tene na Gbe Ni]