Mo dabe mo na ni?

Mo yekia mingi dikongo a-article ti Tour ti Ba Ndo so asigigi ade ti ninga pëpe? Tongaso, bâ wala mo lingbi ti kiri tënë na ahundango tënë so ge:

• “Bingo bê na lege ni” alingbi ti bata zo tongana nyen? (aProverbe 1:4)

A lingbi ti gboto lê ti e na ndo akpale ti yingo so alingbi ti si, nga ti pusu e ti bâ ye so e yeke sala ande kozoni si mbeni kpale asi, na tapande ti kpe ye ti pitan na place ti kua. A mû maboko na e ti hinga so afon e aChrétien ayeke mbilimbili-kue pëpe. Na fade hingango ye so ayeke pusu e ti sala ye na loro pëpe tongana a sala ye ti songo bê na e. A lingbi nga ti mû lege na e ti tï pëpe na gbele tara ti tombango peko ti aye ti mosoro, so a lingbi ti pusu e yeke yeke ti mû mbeni lege nde na lege ti yingo.​—15/8, alembeti 21-24.

• Tongana nyen zo alingbi ti duti mbeni voizin so amû maboko?

Ti tene zo aduti mbeni nzoni voizin, aye ni ayeke use: Kozoni, a lingbi lo mû ye mingi, na use ni, a lingbi lo kiri singila tongana a mû ye na lo. A yeke kota ye ti duti mbeni nzoni voizin tongana mbeni kpale asi. A-Témoin ti Jéhovah ayeke sala ngangu ti duti anzoni voizin na fango na azo ye so aga ndulu ti si, so ayeke kusala ti Nzapa ti hunzi sioye kue.​—9/1, alembeti 4-7.

• Na lege ti Bible, azo wa ayeke biani asaint? Ala yeke mû ande maboko na azo tongana nyen?

Akozo Chrétien kue ayeke lani asaint biani, wala azo ti be-vulu. A yeke Nzapa si ahiri ala ti ga asaint, pëpe azo wala abungbi ge na sese (aRomain 1:7). Tongana a zingo ala na kuâ, na ala gue na yayu awe, azo ti be-vulu, legeoko na Christ, ayeke hiri deba nzoni na ndo abe-ta-zo na ndo sese (aEphésien 1:18-21).​—15/9, alembeti 5-7.

• Ti hinga ye na ndo angia ti wanguru ti Grèce ti giriri alingbi ti mû maboko na aChrétien tongana nyen?

Na yâ ti ambeti so bazengele Pierre na Paul asû, atapande so ala mû dä aluti na ndo angia ti giriri so, wala aye so andu ni (1 aCorinthien 9:26; 1 Timothée 4:7; 2 Timothée 2:5; 1 Pierre 5:10). Ti mbeni wanguru ti giriri, a yeke kota ye lani ti duti na mbeni nzoni zo ti lekengo lo, ti kanga nzara ti tele, na ti leke ngangu ti lo nzoni. Tongana a ndu tënë ti ngangu so aChrétien asala laso na lege ti yingo, a yeke oko tongaso nga.​—1/10, alembeti 28-31.

• Akpale nga na anzoni ye ti pekoni ti batango amolenge na kodoro wande ayeke so wa?

Nde na ababâ na mama ti ala, mingi ti amolenge ayeke manda hio mbeni fini yanga ti kodoro. Ti ababâ na mama ni, a lingbi ti duti ngangu na ala ti gbu nda ti alege so amolenge ni ayeke gbu na li ti ala, nga na asalango ye ti ala. Nga amolenge ni alingbi ti gbu hio pëpe nda ti afango ye ti Bible na yanga ti kodoro ti ababâ na mama ti ala. Ye oko, tongana ababâ na mama ni afa yanga ti kodoro ti ala na amolenge ti ala, songo ti ala ayeke kpengba. Na tongaso, amolenge ni alingbi ti tene ayanga ti kodoro use, na ti bâ so ala yeke na angobo ti salango ye use.​—15/10, alembeti 22-26.

• Ngbanga ti nyen mandango ti hunda pardon ayeke kota ye?

Hundango pardon na bê kue ayeke mingi ni nzoni lege ti leke mbeni songo so yâ ni afâ. Bible amû ambeni tapande so afa ngangu so hundango pardon ayeke na ni (1 Samuel 25:2-35; Kusala 23:1-5). Mingi ni, tongana azo use amä tele pëpe, peut-être a yeke ala use kue si asala mbeni ye na lege ni pëpe. Tongaso, a hunda ti tene ala ngbâ gi na ndo ti tënë ti ala mveni pëpe, na ala hunda pardon na popo ti ala.​—1/11, alembeti 4-7.

• Ngbanga ti nyen a yeke sioni ti sala ngia ti nginza, même tongana nginza ni ayeke gi kete?

Salango ngia ti nginza alingbi ti pusu zo ti lë ambeni ye so Bible ake, tongana fandara, sioni bibe ti hon gi amba ti lo, nga na kota nzara ti sö gi benda (1 aCorinthien 6:9, 10). Azo mingi so aga ngbâa ti ngia ti nginza ato nda ti parié akete nginza na ngoi so ala de kete.​—1/11, alembeti 31.

• Teti so a sû mingi ti abuku ti Bible na yanga ti Grec, ngbanga ti nyen a hunda ti kiri ti sû peko ti Bible na yanga ti Grec? Nga ye ti pekoni ayeke nyen?

Yanga ti Grec ti laso ayeke tâ nde mingi na yanga ti Grec so a sû na Bible ti Septante, so a sû kozoni na Hébreu, na a yeke nga nde mingi na mbage ti Mbeti ti Nzapa so aChrétien asû na yanga ti Grec. Na yâ ti angu gbangbo mingi so ahon ade ti ninga pëpe, azo mingi atara ti kiri peko ti ambeni mbage ti Bible, wala Bible ni kue na yanga ti Grec so azo atene. Laso, a yeke wara aBible ndulu na 30 na yanga so, atâa ala bungbi abuku ti Bible kue wala gi mbeni mbage ni, na senge zo so ayeke tene Grec alingbi ti diko ni, na ti gbu nda ni nzoni. Mbeni oko ni so azo ahinga ni mingi ayeke Bible ti yanga ti Grec ti Les Saintes Écritures — Traduction du monde nouveau so a bâ gigi na ngu 1997.​—15/11, alembeti 26-29.

• Ngbanga ti nyen a hunda pëpe na aChrétien ti mû dîme?

Na gbe ti Ndia so a mû ândö na Israël ti giriri, dîme ayeke lani mbeni lege ti mû maboko na azo ti mara ti Lévi, nga na ala so ye atia ala (Lévitique 27:30; Deutéronome 14:28, 29). Kui ti Jésus tongana sandaga alungula Ndia ni, nga na dîme so Ndia ni ahunda ti mû (aEphésien 2:13-15). Na kongregation ti kozo siècle, a hunda na Chrétien oko oko ti mû ye alingbi na ye so lo yeke na ni nga tongana ti so bê ti lo aye (2 aCorinthien 9:5, 7).​—1/12, alembeti 4-6.

• Na dikongo Apocalypse 20:8, a lingbi ti tene so wungo ti azo so Satan ayeke handa ande na ngoi ti ndangba tara ti lo na ndo azo ayeke hon ndo ni?

Versê ni atene so ala so a handa ala ayeke duti ande “tongana mbutu ti kota ngu ti ingo”. Na yâ Bible, tënë ni so aye mingi ni ti duti mbeni ye so a hinga wungo ni pëpe, sân ti tene a fa so a wu mingi. A ga ti bâ so hale ti Abraham, so a haka ni na “mbutu so ayeke na tele ti kota ngu ti ingo” ayeke azo so wungo ti ala asi 144 000, nde na Jésus Christ (Genèse 22:17; Apocalypse 14:1-4).​—1/12, lembeti 29.