Atënë so azo ahunda

Na dikongo Apocalypse 20:8, e lingbi ti tene so wungo ti azo so Satan ayeke handa ala ande na ngoi ti ndangba tara ti lo na ndo azo ayeke hon ndo ni mingi?

Apocalypse 20:8 afa peko ti ndangba bira ti Satan na ndo azo ti sese na hunzingo ti Komandema ti Ngu Saki Oko ti Royaume ti Messie. Na salango tënë ti Satan, versê ni atene: “Fade lo sigigi ti handa amara so ayeke na mbundu [wala andangoro] osio ti sese, Gog na Magog, si lo bungbi ala ti tiri bira; wungo ti ala ayeke tongana mbutu ti kota ngu ti ingo.”

Atâa guengo na li ni ti senda-ye na senda-kode, zo ade ti hinga pëpe tâ wungo ti alê ti “mbutu ti kota ngu ti ingo”. Tongaso, a lingbi ti tene so tënë ni andu mbeni ye so a hinga tâ wungo ni pëpe wala so a lingbi pëpe ti fa ni. Me a ye ti tene mbeni ye so wungo ni ayeke kota mingi ahon, wala même so akono ahon ndo ni? Wala a ndu gi mbeni ye so a hinga wungo ni pëpe me so kamême ayeke gbâ ni?

Na yâ ti Bible, a yeke na alege nde nde mingi si a sala kusala na tënë “tongana mbutu ti kota ngu ti ingo.” Na tapande, na Genèse 41:49, e diko: “Joseph abata le-kobe tongana mbutu ti kota ngu ti ingo, mingi mingi, na lo zia ti diko teti zo alingbi diko pëpe.” Ge, ye so a gboto lê na ndo ni ayeke so a lingbi ti diko ni pëpe. Legeoko nga, Jéhovah atene: “Legeoko tongana zo alingbi diko wungo ti ye kue ti yayu pëpe, na lo lingbi diko mbutu ti kota ngu ti ingo pëpe, tongaso fade Mbi sala si ahale ti David boi ti Mbi awu”. Legeoko tongana ti so a lingbi biani pëpe ti diko wungo ti atongoro ti yayu, nga na alê ti mbutu ti kota ngu ti ingo, legeoko nga Jéhovah alingbi biani ti bata zendo so lo mû na David.​—Jérémie 33:22.

Fani mingi, tongana a sala tënë ti “mbutu ti kota ngu ti ingo”, a ndu mbeni ye so konongo ni wala wungo ni ayeke gbâ ni, na adö bê. Azo ti Israël awara kota gingo bê lani mingi na Guilgal teti aturugu ti Philistie so abungbi tele ti ala na Micmas, na so wungo ti ala ayeke “mingi mingi tongana mbutu na tele ti kota ngu ti ingo”. (1 Samuel 13:5, 6; aJuge 7:12). Nga, “Nzapa amû na Salomon ndara na bê ti hinga ye mingi na mayele ti hinga ye mingi mingi tongana ambutu na tele ti kota ngu ti ingo.” (1 aGbia 4:29). Atâa so aye so a sala tënë ni oko oko ge ayeke gbâ ni, a lingbi lakue ti diko wungo ni.

“Mbutu ti kota ngu ti ingo” alingbi nga ti duti mbeni ye so a hinga wungo ni pëpe, sân ti tene a fa so a wu mingi. Jéhovah atene na Abraham: “Fade Mbi sala si ahale ti mo awu tongana atongoro ti yayu, na tongana mbutu so ayeke na tele ti kota ngu ti ingo”. (Genèse 22:17). Na ngoi so lo kiri lo tene zendo so na Jacob, âta ti Abraham, Jéhovah akiri asala kusala na tënë “pupu-sese”, so Jacob asala tënë ni tongana “mbutu ti kota ngu ti ingo”. (Genèse 28:14; 32:12). Na nda ni, tongana a zia Jésus Christ nde, wungo ti “ahale” ti Abraham asi 144 000, na Jésus ahiri ala “kete kundu”.​—Luc 12:32; aGalate 3:16, 29; Apocalypse 7:4; 14:1, 3.

Ye nyen e manda na lege ti atapande so? E manda so tongana a sala tënë ti mbeni ye so wungo ni ayeke “tongana mbutu ti kota ngu ti ingo”, a yeke lakue pëpe mbeni ye so a hinga tâ wungo ni pëpe, wala so wungo ni ahon ndo ni; nga, a yeke sala kusala na ni lakue pëpe ti fa mbeni ye so akono ahon ndo ni. Fani mingi, a ye ti fa mbeni ye so a hinga wungo ni pëpe me so akono kamême. Ni la, a yeke na lege ni ti mä na bê so wungo ti azo mingi mingi so ayeke ke yanga ande, na so ayeke mû mbage ti Satan na yâ ndangba tara ti lo na ndo azo ti Nzapa ayeke kono ahon ndo ni pëpe, me kamême ala yeke duti gbâ ni, na wungo ti ala ayeke duti mingi ti ga ye ti gingo bê teti nzoni duti ti azo. Ye oko, juska fadeso, a hinga wungo ti azo ni pëpe.