“Awafango tënë ti Royaume so ayeke na wâ” abungbi tele na ngia
ANGANGU kpale so andu tambela ti azo, tënë ti nginza, nga na ti poroso ayeke yengi sese. Ye oko, na popo ti wuluwulu so kue, aTémoin ti Jéhovah awara tele lani ti sala na yâ siriri kota bungbi ti ala ti lango ota so li ti tënë ni ayeke: “Awafango tënë ti Royaume so ayeke na wâ.” Ti to nda ni na nze ti mai, ngu 2002, a sala akota bungbi so na ndo sese kue.
Akota bungbi ni aduti lani tâ ngoi ti ngia biani. Zia e bâ gi ndulu atënë ti yâ ti programme ni so aluti na ndo Bible, na so akpengba zo.
Kozo lango ni aluti mingi na ndo wâ ti Jésus lani
Kota li ti tënë ti kozo lango ti kota bungbi ni ayeke: “Mû tapande ti wâ ti Seigneur ti e, Jésus.” (Jean 2:17). Diskur so li ti tënë ni ayeke “Wara ngia na yâ bungbingo ti awakua ti Royaume” atisa na wâ azo so aga na bungbi ni, ti wara mbage na ngia so a yeke bâ ni lakue na ngoi ti abungbi ti azo ti Nzapa (Deutéronome 16:15). Na peko ti diskur so, a hunda atënë na ambeni ita so ayeke fa nzo tënë na wâ.
Diskur so li ti tënë ni ayeke: “Wara ngia na yâ Jéhovah mveni” asala lisoro na ndo aversê oko oko ti Psaume 37:1-11. A wa e ti ‘zia pëpe si bê ti e agi e’ teti ye so akpa tongana nzoni maïngo ti azo ti sioni. Atâa so azo ti sioni alingbi ti sala tënë na lege ni pëpe na ndo ti e, na ngoi so alingbi, fade Jéhovah ayeke fa na gigi polele azo wa ayeke biani abe-ta-zo ti lo. Diskur so li ti tënë ni ayeke “Hinga ti kiri singila” afa tongana nyen e lingbi ti fa singila ti bê ti e na Nzapa. A lingbi aChrétien kue amû ‘sacrifice ti sepela’ na Jéhovah (aHébreu 13:15). Biani, ngoi so e yeke mû na yâ kusala ti Jéhovah abâ gi lege so bê ti e asi na singila, nga na aye so ayeke si na fini ti e.
Diskur na ndo kota li ti tënë ni ayeke: “Awakua ti Royaume so asi singo na wâ.” A fa Jésus Christ tongana pendere tapande so ahon atanga ni kue ti dutingo na wâ. Na pekoni so a zia Royaume na yayu na ngu 1914, atâ Chrétien ayeke na bezoin ti duti na wâ si ala fa nzo tënë ti Royaume so. Wamungo diskur ni asala tënë ti kota bungbi so atambela giriri na Cedar Point na États-Unis na ngu 1922, na lo dabe ti e na ndo kpengba tisango ndo so a mû lani: “I fa tënë ti Gbia ni na Royaume ti lo”! Tongana ngoi ayeke hon, wâ ti awakua be-ta-zo ti Nzapa apusu ala ti fa apendere tâ tënë ti Royaume na amara kue.
Diskur so li ti tënë ni ayeke “Teti Jéhovah ayeke na e, zia e sala mbito pëpe”, na so a mû ni na kozo lango ni na peko ti hungo tele, afa so Satan ayeke sala ngangu mbilimbili na azo ti Nzapa. Ye oko, atâa so a yeke kanga lege na e, gbungo li na ndo gbâ ti atapande so a wara na yâ Bible nga ala ti ngoi ti e amû na e ngangu ti luti na gbele atara na mbito pëpe.—Esaïe 41:10.
Na pekoni, a mû mbeni diskur na mbage ota so li ti tënë ni ayeke: “Prophétie ti Michée akpengba e ti tambela na iri ti Jéhovah.” Kozo wamungo diskur ni ahaka tambela ti kirikiri, kengo tënë ti mabe na gingo mosoro na ngoi ti Michée, na ti so ayeke dä na ngoi ti e laso. Lo tene: “Fade beku ti e na gigi ti kekereke ayeke kpengba biani tongana e gi ti wara mbeni bê so amä yanga, tongana e bata si tambela ti e aduti na sioni oko pëpe, na fini ti e asi singo na akusala so abata tënë ti Nzapa, na tongana e girisa lâ oko pëpe so fade lâ ti Jéhovah ayeke si biani.”—2 Pierre 3:11, 12, e si e sû agere ti mbeti so nde.
Use wamungo diskur ni asala tënë na ndo tënë ti fango ngbanga so Michée amû na ndo amokonzi ti Juda. Amokonzi ni ayeke sala ngangu lani na awanzinga, azo so ayeke na ngangu pëpe. Me Michée afa nga so tâ vorongo ayeke sö benda (Michée 4:1-5). Teti so yingo vulu ti Jéhovah amû ngangu na e, e leke na bê ti e ti fa tokua ti beku so adë bê ti zo. Me fade a yeke duti tongana nyen tongana e bâ so seni ti e ayeke nzoni pëpe wala mbeni ye ayeke kanga lege na e? Ota wamungo diskur ni atene: “Aye so Jéhovah ahunda ayeke na lege ni, na zo alingbi ti sala ni.” Na pekoni, lo luti mingi na ndo ambage nde nde ti Michée 6:8 so atene: “Lo [Jéhovah a] hunda ye nyen na tïtî mo?—ti sala mbilimbili, ti ndoye nzobe, na ti tambela na Nzapa ti mo na tâ be-ti-molenge.”
Teti so bubango ti sese na ndo tënë ti nzoni salango ye alingbi ti sala ngangu na ndo aChrétien, e kue e wara lani ye ti nzoni na peko ti diskur so li ti tënë ni ayeke: “Bata bê ti mo si mo ngbâ nzoni.” Na tapande, tongana e ngbâ ti duti na nzoni tambela, a yeke mû maboko na e ti sala nzoni mariage. Teti so e yeke aChrétien, a lingbi e pensé même pëpe ti mû mbeni lege so ague ti si na pitan.—1 aCorinthien 6:18.
Diskur so li ti tënë ni ayeke “Kpe handa” afa so a yeke lege ti ndara teti e ti bâ tongana sioni yorö atënë so yâ ni aba kirikiri, so ndambo ni ayeke tâ tënë na tanga ni ayeke mvene, nga na ambeni tënë so kue ayeke gi wataka, so a-apostat ayeke kangbi ni (aColossien 2:8). Legeoko nga, a lingbi e handa tele ti e pëpe ti pensé so e lingbi ti kaï anzara ti mitele ti e ti siokpari sân ti wara aye ti sioni na pekoni.
Li ti tënë ti ndangba diskur ti kozo lango ni ayeke so: “Voro oko tâ Nzapa.” Na ngoi so dutingo ti aye ni na sese ayeke ga gi sioni ahon ti kozo, a yeke ye ti ngia mingi ti hinga so na yâ ngoi kete, fade Jéhovah ayeke ga na fini sese ti lo ti mbilimbili! Fade azo wa si ayeke wara fini na ndo ni? Gi ala so avoro Jéhovah. Wamungo diskur ni afa tënë ti sigingo ti mbeni fini buku ti mandango ye so ayeke mû maboko na e, na amolenge ti e, nga na ala so e yeke manda Bible na ala ti si na ye so; a yeke buku Voro oko tâ Nzapa. So tâ ngia si e yeke lani na ni ti wara buku so!
Use lango ni afa nene ti duti na wâ teti ye so ayeke nzoni
Use lango ti kota bungbi ni aluti na ndo li ti tënë so: “Duti na wâ teti ye so ayeke nzoni.” (1 Pierre 3:13). Kozo wamungo diskur ni asala lisoro na ndo versê ti Bible ti lango ni. Lo fa so ti bâ lakue nga nzoni versê ti Bible ti lâ oko oko ayeke sala si wâ ti e ague na li ni.
Na pekoni, e mä diskur na mbage ota so li ti tënë ni ayeke: “Awakua ti Royaume so amû gloire na kusala ti ala.” Kozo mbage ni afa nene ti fa nda ti Tënë ti Nzapa na lege ni (2 Timothée 2:15). Tongana e sala kusala nzoni na Bible, a yeke zi lege na ni ti ‘sala ngangu’ na ndo fini ti azo (aHébreu 4:12). A lingbi e gboto lê ti azo na ndo Bible, na e sala kusala na ni ti ndu bê ti ala. Use mbage ti diskur ni awa e ti kiri lege mingi ti bâ azo so asala nzara ti tënë ni (1 aCorinthien 3:6). A hunda na mbage ti e ti leke tele nzoni nga ti tomba mbito tongana a yeke ti kiri hio ti bâ ala so asala nzara ti tënë ni. Ota mbage ni awa e ti bâ zo oko oko so e yeke wara, tongana mbeni zo so alingbi ti ga ande disciple, na a tene so na kozo ngoi so e tingbi na mbeni zo, tongana e tara ti fa na lo so lo lingbi ti manda Bible, ye so alingbi ti mû lege na e ti wara ngia ti mû maboko na azo ti ga adisciple.
Diskur so aga na pekoni aluti na ndo li ti tënë “Ngbanga ti nyen ti ‘sambela lakue’?” Bible awa aChrétien ti bâ ndo na mbage ti Nzapa ti wara fango lege na yâ ambage nde nde kue ti fini ti ala. E yeke na bezoin ti leke mbeni ngoi ti sambela Nzapa gi e oko. Na ndo ni, a lingbi e zia ti sambela pëpe, ngbanga ti so Jéhovah alingbi ti zia si, teti mbeni ngoi, e ngbâ ti sambela lo kozoni si e bâ polele kiringo tënë ti lo na sambela ti e.—Jacques 4:8.
Diskur so li ti tënë ni ayeke “Alisoro ti yingo akpengba zo” awa e ti sala kusala na matabisi ti e ti salango tënë si a ga na nzoni na e nga na ambeni zo (aPhilippien 4:8). Akoli na awali ti ala nga na amolenge ayeke na bezoin ti sala mbeni lisoro na popo ti ala lâ na lâ. Ti sala tongaso, a lingbi asewa asala kue ti tene, lâ oko oko, ala te kamême kobe fani oko na sewa; ye so ayeke mû lege tongaso ti sala lisoro so akpengba zo.
Programme ti ndapelele ni ahunzi na ndo mbeni diskur so amû wâ na bê, so li ti tënë ni ayeke “Mungo tele na batême ague na salut: Tongana nyen?” Ala so aye ti wara batême awara awe hingango ye; ala fa na gigi mabe awe; ala changé bê ti ala nga ala zia lege ti sioni; na ala mû tele ti ala na Nzapa awe. Wamungo diskur ni afa so na peko ti batême ti ala, a lingbi ala ngbâ ti maï na lege ti yingo, na ti bata wâ ti ala nga na nzo tambela ti ala.—aPhilippien 2:15, 16.
Na peko ti hungo tele ti midi, diskur so atene “Sala tele kete na zia lê ti mo angbâ nzoni” asigigi na akpengba tënë use. Ti sala tele kete aye ti tene so e hinga akatikati ti e nga na place ti e na gbele Nzapa. Ti sala tele kete ayeke mû maboko na e ti bata si lê ti e abâ ndo “nzoni”, so ti tene a luti mbilimbili na ndo Royaume ti Nzapa, me pëpe na ndo aye ti mitele. Tongana e sala tongaso, e yeke na bezoin ti duti na gingo bê ahon ndo ni pëpe, teti fade Jéhovah ayeke mû na e aye so atia e.—Matthieu 6:22-24, 33, 34.
Ita so amû diskur na pekoni afa ngbanga ti nyen a lingbi e “Zia bê kue na Jéhovah na ngoi ti vundu.” Tongana nyen e lingbi ti hon ndo ti akpale tongana awokongo so e yeke na ni, nga akpale ti nginza wala ti seni? Zia e hunda na Jéhovah ti mû na e tâ ndara, na e hunda mungo maboko ti ambeni zo. Ahon ti zia si aye so ayeke si amû kota mbito na e wala asala si e hinga pëpe ye ti sala, a lingbi e kpengba ziango bê ti e na Nzapa na lege ti dikongo Mbeti ti lo.—aRomain 8:35-39.
Ndangba diskur na mbage ota ti kota bungbi ni aluti na ndo li ti tënë so: “Atara nde nde afa na gigi nene ti mabe ti e.” Kozo mbage ni adabe ti e so atâ Chrétien kue ayeke tingbi na ye ti ngangu. Salango ngangu ayeke sala kusala tongana tënë ti témoin, a yeke kpengba mabe ti e, na a yeke mû lege na e ti fa na gigi be-biani ti e na Nzapa. Atâa so e yeke gi pëpe ti zia fini ti e senge senge si ye ti sioni awara ni, e yeke sala kusala lâ oko pëpe na ye so Mbeti ti Nzapa ake ni ti kpe salango ngangu.—1 Pierre 3:16.
Use wamungo diskur ni andu atënë na ndo dutingo nde ti Chrétien. Akozo Chrétien ake lani pëpe na bê oko mara ti abira kue; ye oko, ala hinga so be-biani ti ala ague kozoni kue na Nzapa. Legeoko nga laso, aTémoin ti Jéhovah agbu ngangu kpengba-ndia so: “I yeke ti sese so pëpe”. (Jean 15:19). Teti so aye alingbi ti si hio ti tara dutingo nde ti e, a ku na mbage ti asewa ti leke mbeni ngoi ti kiri ti bâ tënë so Bible afa na ndo ye so. Tongana ti so ota mbage ti diskur ni afa, ye so Satan ayeke gi ayeke peut-être pëpe ti fâ e, me ti sala ngangu na ndo e si e bele mabe ti e. Tongana e gbu ngangu na gbele hengo ndo, angangu so a yeke sala na ndo e ti tï na yâ pitan, vundu ti bibe, nga na akpale ti kobela, e yeke mû gonda na Jéhovah.
Tisango ndo na wâ ti “Ga ndulu na Jéhovah” aduti tongana li ti tënë ti ndangba diskur ti lango ni. Tongana e gbu nda ti akota lengo ti Jéhovah, ye so ayeke gboto e na mbage ti lo. Lo yeke sala kusala na ngangu ti lo so katikati ayeke na ni pëpe, ti bata azo ti lo, mbilimbili na lege ti yingo. Mbilimbili ti lo adë dengo pëpe, me a pusu lo ti sala si zo kue so asala ye na lege ti mbilimbili awara fini ti lakue lakue. Ndara ti Nzapa asigigi polele na yâ lege so lo sala kusala na azo so ayeke mbilimbili-kue pëpe ti sû Bible. Lengo so agboto zo mingi ahon tanga ti alengo ni kue ayeke ndoye ti lo, so apusu lo ti leke mbeni ye na lege ti Jésus Christ teti salut ti azo (Jean 3:16). Wamungo diskur ni ahunzi diskur ti lo na salango tënë ti sigingo ti mbeni fini buku so li ti tënë ni ayeke Ga ndulu na Jéhovah.
Ota lango ni aluti na ndo wâ so azo ayeke na ni teti anzo kusala
Kota li ti tënë ti ota lango ni ayeke so: “Azo so ayeke na wâ teti anzo kusala.” (Tite 2:14). Programme ti ndapelele ni ato nda ni pendere na mbeni sewa so asala lisoro na ndo versê ti lango ni. Na pekoni, a mû diskur so li ti tënë ni ayeke “Mo zia bê ti mo kue na Jéhovah?” Amara aduti na ziango bê so ayeke na lege ni pëpe teti ala bi bê gi na ndara nga na ngangu ti ala mveni. Me nde na ala, awakua ti Jéhovah azia bê ti ala kue na Lo na mbito pëpe nga na ngia, atâa aye ti ngangu so ayeke si.—Psaume 46:2-4, 8-12.
Mbage so li ti tënë ni ayeke “I amaseka: I leke kekereke ti i legeoko na bungbi ti Jéhovah” aluti na ndo hundango tënë so: Tongana nyen mbeni maseka alingbi biani ti wara ye ti nzoni mingi na yâ fini? Ala lingbi pëpe ti sala tongaso tongana ala tomba peko ti nginza, mosoro, na yango-iri. Wasalango e awa amaseka na lege ti ndoye ti dabe ala na lo na ngoi so ala de pendere. Wamungo diskur ni ahunda tënë na ambeni ita so abi tele ti ala na yâ kusala ti Chrétien na ngoi so ala de pendere, na e lingbi ti bâ ngia ti ala. Nga, a yeke lani ye ti nzoni mingi ti wara fini tract Jeunes gens: Qu’allez-vous faire de votre vie?; a sigigi na ni ti mû maboko na amaseka Témoin ti leke mbeni kekereke ti lakue lakue na yâ bungbi ti Jéhovah!
Na pekoni, a fa pendere drame ti Bible so li ti tënë ni ayeke “E gbu ngangu na ngoi ti sioni.” Drame ni afa tënë ndulu na ndo kusala ti Jérémie so ato nda ni na ngoi so lo de pendere na so aninga juska na futingo ti Jérusalem so lo fa tënë ni kozo awe na wâ. Jérémie abâ tele ti lo so lo lingbi pëpe na kusala so a mû na lo, me lo sala ni atâa so a gi ti kanga lege na lo, na Jéhovah azi lo lani na yâ ye ti sioni.—Jérémie 1:8, 18, 19.
Na peko ti drame ni, a mû mbeni diskur so li ti tënë ni ayeke: “E fa Tënë ti Nzapa na mbito pëpe tongana Jérémie.” Lege mingi a yeke sala tënë ti wataka nga ti sioni na ndo ti awafango tënë ti Royaume na ngoi ti laso (Psaume 109:1-3). Me legeoko na Jérémie, e lingbi ti sala si bê ti e awoko pëpe na warango ngia na yâ Tënë ti Jéhovah. Nga, e yeke na mabe so ala so ayeke tiri na e ayeke hon na ngangu pëpe.
Kota diskur ni atï tâ na ngoi ni biani; li ti tënë ni ayeke: “ ‘Ye ti sese so ayeke hon.’ ” Aye agbian ngangu mingi na ngoi ti e. Bible afa so aye so, nga na dekongo ti ‘siriri na nzoni dutingo’, ayeke gue ande ti si na lâ ti fango ngbanga ti Nzapa so amû mbito (1 aThessalonicien 5:3). Fade lâ ti fango ngbanga so ayeke ga na agbiango ye ti nzoni: abira, kengo ndia, salango ngangu, na même kobela ayeke hunzi ande kue. Ni la, ahon ti zia bê kue na sese so, a yeke ngoi ti duti ndulu na Nzapa na ti duti lakue na tambela ti nzoni-kue.
Na pekoni so a sala ndulu tënë ti Tour ti Ba Ndo ti yenga ni, a mû ndangba diskur ti kota bungbi ni, so li ti tënë ni ayeke “Teti e yeke awakua ti Royaume so ayeke na wâ, zia e si singo na anzo kusala.” Wamungo diskur ni afa tongana nyen programme ni amû wâ na e na lege ti yingo na a wa e ti zia bê kue na Jéhovah. Na hunzingo ti diskur ni, a wa e ti duti awafango tënë ti Royaume ti Nzapa so ayeke na sioni oko pëpe, so ayeke na ndoye, nga so ayeke na wâ.—1 Pierre 2:12.
A yeke na mara ti bibe so awakua ti Jéhovah ti ngoi ti Néhémie aduti giriri na ni si na kite pëpe e kiri lani na yanga-da na ngia mingi teti adeba nzoni ti yingo so e wara na kota bungbi ti district “Awafango tënë ti Royaume so ayeke na wâ.” (Néhémie 8:12). Kota bungbi so amû ngia na mo, nga a pusu mo pëpe ti sala ngangu kue ti duti lakue mbeni wafango tënë ti Royaume so ayeke na wâ?
[Tënë na foto na lembeti 23]
Mbeni fini gbakuru ti manda na ye!
Na hunzingo ti kozo lango ti kota bungbi ni, ala so aga awara ngia ti mä tënë ti sigingo ti fini buku Voro oko tâ Nzapa. A leke ni ti manda ye na ala so ahunzi mandango ye ti ala awe na yâ buku Hingango Ye So Ague na Fini ti Lakue Lakue. Kite ayeke dä pëpe so fade buku ni ayeke kpengba mabe ti ala so “bê ti ala alingbi na ye so a hunda teti fini ti lakue lakue.”—Kusala 13:48, NW.
[Lingu ti foto ni]
Foto ti ndo ti buku ni: U.S. Navy photo
[Tënë na afoto na lembeti 24]
Buku so amû maboko ti ga ndulu na Nzapa
Ndangba wamungo diskur ti lango use ti kota bungbi ni asala tënë ti sigingo ti mbeni fini buku so li ti tënë ni ayeke Ga ndulu na Jéhovah. Na yâ ni, a yeke wara akota mbage ni osio, na mbage oko oko aluti na ndo akota lengo osio ti Jéhovah so ayeke ngangu, mbilimbili, ndara na ndoye ti lo. Na yâ akota mbage ni oko oko, a yeke wara mbeni chapitre so afa tongana nyen Jésus Christ afa na lege ti akpengba tapande tongana nyen alengo ti Nzapa ayeke sala kusala. A sala fini buku so kozoni kue ti mû maboko na e nga na ala so e yeke manda Bible na ala, ti ga atâ ndeko ti Jéhovah Nzapa nga ti kpengba songo ti ala na lo.
[Tënë na afoto na lembeti 26]
Mbeni ye so amû fango lege ti yingo na amaseka
Mbeni ye so apika bê mingi na ota lango ti kota bungbi ni ayeke sigingo ti mbeni tract so ayeke nde, so li ti tënë ni ayeke: Jeunes gens — Qu’allez-vous faire de votre vie? A leke fini tract so ti mû maboko na amaseka Témoin ti mû anzoni desizion so andu kekereke ti ala, na tract ni amû wango so aluti na ndo Mbeti ti Nzapa, so afa tongana nyen ti leke mbeni kekereke ti lakue lakue na yâ kusala ti Jéhovah.