Mû gloire na Nzapa me na zo pëpe
NA YÂ ti anze so ahon ade ti ninga pëpe, azo ti sese kue so aye mbilimbili amanda tongana nyen ti mû gloire na Nzapa na ngoi so ala sala Kota Bungbi ti District ti aTémoin ti Jéhovah “Mû gloire na Nzapa.” Zia e kiri e bâ kapa ti fango ye so ge.
Ti mingi ti azo so ague na kota bungbi so, programme ni so aluti na ndo Bible aninga lango ota. Me ti ala so ague na a-assemblée internationale, asala lango osio. Azo ni kue amä adiskur ahon 30 so aluti na ndo Bible. Ala mä adiskur so akono bê ti kiri singila ti ala ndali ti aye ti yingo, aye so asi so akpengba mabe ti zo, adémonstration so agboto lê na ndo nzoni salango kusala na akpengba-ndia ti Bible, nga mbeni drame so afa kpale so aChrétien ti kozo siècle awara ândö. Tongana mo sala lani mbeni oko ti abungbi so, na ngoi so mo yeke diko article so, mo lingbi ti bi lê ti mo na ndo note ti mo? Article so ayeke dabe ti mo ande na gbâ ti apendere ye ti yingo so mo manda lani.
Kota li ti tënë ti kozo lango ni: “Seigneur . . . Mo lingbi ti wara gloire”
Na peko ti bia nga na sambela ti tongo nda ni, kozo wamungo diskur ni atene na wâ gango nzoni na azo kue so aga. Diskur ti lo afa kota nda ni ti kota bungbi so: “E bungbi ti mû gloire na Nzapa.” Na fango peko ti Apocalypse 4:11, wamungo diskur ni agboto lê na ndo ali ti tënë ti kota bungbi ni kue. Na ndulu tënë, lo fa ye so aye ti tene mbilimbili ti mû gloire na Nzapa. Na lege ti buku ti Psaume, lo fa so mungo gloire na Nzapa andu ‘vorongo’, “sepela,” nga na ‘singila’.—Psaume 95:6; 100:4, 5; 111:1, 2.
Use diskur ni ayeke “Deba nzoni na ndo ala so amû gloire na Nzapa.” Wamungo diskur ni afa mbeni kpengba tënë. Teti so aTémoin ti Jéhovah ahon kutu omene ayeke na yâ ti akodoro 234, a lingbi ti tene so lâ ayeke kui lâ oko pëpe na ndo azo so ayeke mû gloire na Jéhovah (Apocalypse 7:15). Hundango tënë na ambeni ita Chrétien so ayeke na yâ mbeni mara kusala ti ngoi kue anzere na azo so aga na kota bungbi so.
Diskur so aga na pekoni ayeke “Aye so Nzapa aleke afa gloire ti lo.” Atâa so ala yeke sala tënë pëpe, ayayu so lê abâ ayeke gonda kota ti Nzapa, na ayeke mû maboko na e ti kono bê ti kiri singila ti e ndali ti bingo bê ti lo na e na ndoye. A fa nda ti akete kete ye kue so andu ni.—Esaïe 40:26.
Salango ngangu, kangango lege, aye ti sese so, nga na bibe ti siokpari atara be-biani ti atâ Chrétien. Ni la, diskur “Tambela na lege ti be-biani” ahunda na azo ti dengi mê ti ala nzoni. A fa nda ti aversê oko oko kue ti Psaume 26, na a hunda tënë na ambeni maseka Témoin so angbâ ti gue na ekole. Mbeni maseka ni afa tongana nyen lo luti ngangu na gbele salango pitan, nga mbeni afa aye so lo sala ti zia ti mû ngoi mingi ndali ti asalango ngia so ayeke nzoni pëpe.
Diskur na ndo kota li ti tënë “Apendere suma ti prophétie amû ngangu na e!” ahunzi programme ti ndapelele ni. Wamungo diskur ni afa tapande ti prophète Daniel, nga na ti abazengele Jean na Pierre tongana ti azo so pendere suma ti prophétie so afa ziango gere ti Royaume ti Messie nga na kusala ti lo akpengba mabe ti ala. Na bingo bê na ndo ala so ayeke bâ fadeso mbeni pëpe kota fä so afa atene e yeke na lâ ti nda ni, wamungo diskur ni atene: “E yeke biani na beku so mara ti azo tongaso ayeke kiri mbeni lâ ti bata lê na ndo singo ti Christ na yâ gloire ti Royaume na ayeke mû maboko na ala ti wara ngangu na lege ti yingo.”
Programme ti peko ti hungo tele ato nda ni na mbeni diskur, so li ti tënë ni ayeke “A fa gloire ti Jéhovah na abe-ti-molenge.” Wamungo diskur ni afa tongana nyen Jéhovah azia tapande ti salango ye na tâ be-ti-molenge, atâa so lo yeke Zo so ayeke kota mingi na yâ dunia kue (Psaume 18:36). Jéhovah ayeke fa nzobe na azo so ayeke na tâ be-ti-molenge, me lo ke ala so asala tele ti ala kete gi na gbele amba ti ala wala ala so ayeke na li ti ala, me so asala ye na ngangu mingi na mbage ti azo so ayeke na gbe ti ala.—Psaume 138:6.
Na pekoni, a gboto lê ti azo na ndo diskur na mbage ota so asala tënë na ndo aye nde nde ti kota li ti tënë ni: “Prophétie ti Amos, tokua ti lo teti ngoi ti e.” Na fango tapande ti Amos, kozo wamungo diskur ni agboto lê na ndo nene ni ti gboto mê ti azo so fango ngbanga ti Jéhovah aga ndulu. Li ti tënë ti diskur ti lo ayeke “Fa Tënë ti Nzapa na mbito pëpe.” Use wamungo diskur ni ahunda: “Jéhovah ayeke hunzi ande sioni nga na pasi mbeni lâ na ndo sese?” Diskur ti lo, “Fango ngbanga ti Nzapa na ndo azo ti sioni”, afa so fango ngbanga ti Nzapa ayeke ti lo lakue na lege ni, zo alingbi ti kpe ni pëpe, nga ayeke tï gi na ndo azo so alingbi na ni. Ota wamungo diskur ni agboto lê na ndo li ti tënë so: “Jéhovah agi nda ti bê.” A yeke ngbanga ti azo so aye ti nzere na lê ti Jéhovah ti bata atënë ti Amos 5:15 so: “I ke sioye, i ndoye nzoye.”
Asämba, tongana vin, ayeke zia ka ngia na bê ti zo. Me zo alingbi ti nyon ni ahon ndo ni. Na yâ diskur ti lo, “Kpe gbanda ti nyongo sämba ahon ndo ni”, wamungo diskur ni afa molongo ti asioni ye na lege ti yingo wala ti mitele so nyongo sämba ahon ndo ni alingbi ti ga na ni na tele ti zo, même tongana sämba asala zo ni pëpe. Lo mû mbeni kpengba-ndia so afa lege na zo: Teti ngangu so sämba ayeke sala na ndo ti azo ayeke nde nde, tongana sämba ni abuba ‘tâ ndara ti mo na mo bi bê ti mo na lege ni’ pëpe, andâ ahon ndo ti mo awe.—aProverbe 3:21, 22.
Teti so e yeke na yâ angoi ti ngangu, diskur so aga na pekoni, “Jéhovah, ‘Ndo ti bata tele ti e na lâ ti vundu’ ” adë bê ti azo. Sambela, yingo vulu, nga na afon e aChrétien alingbi ti mû maboko na e ti gbu ngangu.
Ndangba diskur ti lango ni, “ ‘Nzo sese’ ni, fä ti paradis”, ahunzi lango ni na fango mbeni pendere ye na azo kue: mbeni fini mbeti so andu akarte ti Bible mingi! Li ti tënë ni ayeke: “Voyez le bon pays.”
Kota li ti tënë ti use lango ni: “Fa tënë ti gloire ti Lo na popo ti amara”
Na peko ti bango versê ti lâ oko oko, a sala use diskur na mbage ota ti kota bungbi ni. Li ti tënë ni ayeke “ ‘E fa tongana tatara gloire ti Jéhovah.’ ” Kozo mbage ni azi yâ ti diskur “E fa nzo tënë na ndo kue”, nga a yeke na ahakango peko ti aye so asi biani na yâ fango tënë. Na ngoi ti use diskur ni, “E zi bongo na lê ti azo so akanga”, wamungo diskur ni ayôro na yâ ni mbeni démonstration ti salango fini vizite. Apendere Interview ti aye so asi na yâ fango tënë so a sala na ndangba mbage ni, “E fa tënë mingi ahon ti kozo” asala si diskur ni anzere mingi.
Li ti tënë ti diskur so aga na pekoni ayeke “A ke e senge senge.” Na yâ ni, a hunda tënë na abe-ta-zo so na lege ti ngangu ti Nzapa ala luti na gbele kangango lege.
Kota mbage ti assemblée so azo ayeke ku ni kungo ayeke diskur ti batême so na pekoni a yôro na yâ ngu azo kue so alingbi na ni. Batême ayeke fä ti mungo tele ti zo ni kue na Jéhovah. Ni la, kota li ti tënë ti diskur ni alingbi biani na ni. A yeke: “Salango ye alingbi na mungo tele ti e na Nzapa amû gloire na lo.”
Programme ti peko ti hungo tele ato nda ni na mbeni diskur so awa azo ti bâ tele ti ala mveni, “E gi ti duti na bango ndo ti Christ na ndo dutingo kota.” Wamungo diskur ni afa kpengba tënë so: A yeke na dutingo na tâ be-ti-molenge tongana Christ si zo alingbi ti ga kota. Tongaso, a yeke nzoni Chrétien agi ti wara akota kungba pëpe gi ti kaï na anzara ti bê ti lo. A lingbi lo hunda tele ti lo, ‘Mbi yeke na nzara ti sala akusala ti mungo maboko so azo ayeke ndulu pëpe ti bâ ni?’
Mbeni lâ, mo bâ so mo woko? Biani. Diskur “Ngangu ahunzi, me kue pëpe” azia ngia na bê ti azo kue. Atënë so a hunda na aTémoin so aninga na yâ ti tâ tënë afa so Jéhovah alingbi ti sala si e wara “ngangu . . . na lege ti yingo ti Lo”.—aEphésien 3:16.
Mungo ye na zo ayeke mbeni lengo so a dü e na ni dungo pëpe. A lingbi zo amanda ni. Kota tënë so asigigi na yâ diskur “ ‘Mû ye mingi na zo, na kangbi ye na zo.’ ” Nga a hunda tënë so apusu zo ti gbu li: “E yeke ndulu ti mû ambeni penze-ngbonga na yâ ti lango ni ti duti na aita ti e so aga mbakoro, ala so ayeke na kobela, ala so bê ti ala anze wala ala so ayeke gi ala oko?”
Diskur “Sala hange na ‘go ti awande’ ” agbu bê ti azo. Diskur so ahaka adisciple ti Jésus na angasangbaga so ayeke mä go ti lo tongana “Nzo Berger,” na so ake ti mä go ti “wande” so ayeke sigigi na yanga ti gbâ ti azo so Zabolo asala ngangu na ndo ti ala.—Jean 10:5, 14, 27.
Ti tene a mä yâ ti atënë ti bia ti mbeni bungbi ti azo ti hengo bia, a hunda ti tene go ti ala kue ague oko. Ti mû gloire na Nzapa, a lingbi atâ wakua ti lo aduti beoko. A yeke ndani la si diskur ‘E mû gloire na Nzapa “na yanga oko” ’ afa mbilimbili tongana nyen e kue e lingbi ti tene oko “yanga ti kodoro so ayeke nzoni-kue” na ti sala na Jéhovah “maboko na maboko.”—Sophonie 3:9, NW.
Ndangba diskur ti lango ni, “Amolenge ti e: Ye ti héritier ti ngele ngangu”, anzere mingi na bê ti ababâ na mama, mbilimbili ala so ayeke na akete molenge. A sigigi na mbeni fini buku ti alembeti 256, so adö bê ti azo na azia ngia na bê ti ala. Mä Kota Wafango ye ayeke mbeni buku so ayeke mû ande maboko na ababâ na mama ti fa ye na amolenge ti ala, so ayeke matabisi ti Nzapa.
Kota li ti tënë ti ota lango ni: “Sala ye kue teti gloire ti Nzapa”
Versê ti lâ oko oko ato nda ti ndangba lango ti kota bungbi ni na mbeni tënë ti yingo. Kozo mbage ti programme ti lango ni asala tënë mingi na ndo ti sewa. Kozo diskur, “Ababâ na mama, i kpengba sewa ti i,” aleke bibe ti azo ni ti mä atënë so ayeke ga na peko. Tongana lo fa awe akungba ti ababâ na mama ti mû aye ti mitele na sewa ti ala, wamungo diskur ni afa so tâ kozo kungba ti ababâ na mama ayeke ti mû ye ti yingo na amolenge ti ala.
Wamungo diskur so aga na pekoni asala tënë na amaseka na lo zi nda ti diskur ti lo “Lege so amaseka ayeke sepela na Jéhovah.” Lo tene so amaseka ayeke tongana “amamio” ngbanga ti so ala yeke mingi, na so wâ ti ala ayeke dë bê ti azo. Akota zo ayeke na ngia ti sala kua na tele ti ala na yâ kusala ti Jéhovah (Psaume 110:3). Na yâ mbage so, a hunda apendere tënë na amaseka so ayeke anzoni tapande.
Drame ayeke lakue mbeni pendere mbage ti aKota Bungbi ti District. Ni la, kota bungbi so ayeke nga na mbeni drame so li ti tënë ni ayeke “E fa tënë na mbito pëpe atâa kangango lege.” A fa ye so asi ândö na akozo disciple ti Jésus. A yeke pëpe gi mbeni senge ngoi ti hengo ngia, me mingi ahon so, a fa ye na zo. Diskur so aga na peko ti drame ni, “ ‘E zia pëpe’ ti fa nzo tënë” asigigi na angbongboro tënë ti drame ni.
Azo kue so aga na kota bungbi so ayeke ku kungo na bê kue kota diskur “Azo wa ayeke mû gloire na Nzapa laso?” so ayeke kota mbage ti programme ti lango ti dimanche. Wamungo diskur ni asigigi na ambeti so afa tongana nyen mingi ti abungbi ti awandara nga ti lege ti vorongo amû gloire na Nzapa pëpe. A yeke gi azo so ayô iri ti lo, ala so afa tâ tënë ti Jéhovah na azo, si ayeke mû biani gloire na iri ti lo laso.
Na peko ti kota diskur ni, a sala ndulu tënë ti Tour ti Ba Ndo teti nda-yenga ni. Na pekoni, a sala ndangba diskur ni, “ ‘Ngbâ ti lë mingi’ teti gloire ti Jéhovah.” Wamungo diskur ni afa amungo yanga bale-oko ti tene azo kue so aga ayeda na ni. Mungo yanga ni aluti na ndo alege nde nde so na yâ ni zo alingbi ti mû gloire na Jéhovah, Wasalango ye. Azo kue so aga na aKota Bungbi ti District so a sala na ndo lê sese kue akiri tënë “E yeda.”
Na hunzingo ti kota bungbi ni, li ti azo kue angbâ gi na ndo tënë “Mû gloire na Nzapa.” Nga zia si na ngangu ti yingo ti Jéhovah nga na bungbi ti lo so lê abâ, e kue e gi lakue ti mû gloire na Nzapa me na zo pëpe.
[Encadré/Afoto na lembeti 23]
A-assemblée internationale
A sala a-assemblée internationale ti lango osio na Afrika, Asie, Australie, Poto, na Banga nga na Mbongo ti Amerika. A tisa ambeni Témoin na ndo lê sese kue ti ga na akota bungbi so. Na lege so, “wango tele” aduti na popo ti agene nga na azo so ayamba ala (aRomain 1:12, NW ). Azo so a ninga mingi ala bâ tele pëpe akiri awara tele, nga ambeni awara afini kamarade. Kota mbage ti a-assemblée internationale so aduti lani diskur so li ti tënë ni ayeke “Atondo ti ambeni kodoro.”
[Encadré/Afoto na lembeti 25]
Afini mbeti so amû gloire na Nzapa
Na ngoi ti Kota Bungbi ti District “Mû gloire na Nzapa”, a sigigi na afini mbeti use. Carte ti Bible Voyez le bon pays ayeke na alembeti 36 so na yâ ni a wara acarte nga na afoto ti ando so Bible asala tënë ni. Ndo ti mbeti ni akpengba. Alembeti oko oko kue ayeke na nzoroko nga na acarte na ndo akodoro-togbia ti Assyrie, Babylone, Médo-Perses, Grèce, nga na Rome. Ambeni carte ayeke dä so afa kusala ti Jésus nga na ando so vorongo ti atâ Chrétien asi dä.
Buku Mä Kota Wafango ye ayeke mbeni buku ti lembeti 256 nga na ti afoto 230 tongaso. A lingbi ti mû ambeni ngoi ti ngia ti duti na amolenge gi ti bâ afoto ni nga ti kiri tënë na ahundango tënë ti yâ ti buku so, so apusu zo ti gbu li. A leke fini buku so ti kanga lege na Satan ti handa amolenge ti e, teti lo yeke gi ti buba nzoni salango ye ti ala.
[Foto na lembeti 23]
Amissionnaire ayeke fa aye so asi na ala, so akpengba mabe ti zo
[Afoto na lembeti 24]
Batême aduti mbeni kota mbage ti kota bungbi “Mû gloire na Nzapa”
[Afoto na lembeti 24]
Drame anzere lani na amaseka nga na ambakoro kue