Warango nzoni mingi na lege ti Kota Bungbi ti District “Awakua ti Royaume so ayeke na wâ”

¹ Mbeni programme so amû ngangu: So tâ mbeni programme ti mungo ngangu na zo si e wara na ndangba kota bungbi ti e ti district! E bungbi lani kâ teti mbeni oko ye, ti wara ye kue so ayeke mû lege na e ti fa na tënë ti Royaume ti Nzapa na wâ. Mo dabe mo na lege so kozo wamungo diskur ni afa nda ti tënë “ti fa tënë”? Mo dabe mo na gingo nda ti ye wa a wa e lani ti sala na yâ diskur “Teti Jéhovah ayeke na e, zia e sala mbito pëpe”? Ambaï ti fini wa mo gi ti bâ ni juska fadeso?

² Diskur na mbage ota “Atara nde nde afa na gigi nene ti mabe ti e”, afa nda ti atënë ota so ngbanga ni Jéhovah azia lege na salango ye ti ngangu. Mo lingbi ti fa ni? Versê ti Bible wa ayeke na gunda ti dutingo nde ti e ti Chrétien? A wa e ti sala nyen ti leke tele ti e mveni teti akpale so ayeke ga na peko ti dutingo nde ti e? Tongana nyen gbungo ngangu ti e na dutingo be-ta-zo na gbele atara ayeke gonda Jéhovah?

³ Mbage wa na yâ drame “E gbu ngangu na ngoi ti sioni”, akpengba lani mo mbilimbili? Tongana nyen e lingbi ti duti tongana Jérémie?

⁴ Kota diskur “Ye ti sese so ayeke hon”, afa lani akota gbiango ye wa so ague na li ni ande ti si na lâ ti fango ngbanga ti Nzapa so amû mbito? Na mango diskur ti kongo nda ni “Teti e yeke awakua ti Royaume so ayeke na wâ, zia e si singo na anzo kusala”, tongana nyen mo zia kamba na popo ti atënë so mo mä nga na kusala ti mo mveni?

⁵ Akota tënë ti sala kusala na ni: Tongana ti so a fa lani na yâ diskur “Hinga ti kiri singila”, tongana nyen e lingbi ti fa kota ti bê ti kiri singila ti e na Jéhovah? Na yâ diskur na ndo kota li ti tënë “Awakua ti Royaume so asi singo na wâ”, a wa e lani ti mû tapande ti wâ ti zo wa? A hunda na e lani ti bâ nyen na tele ti e mveni?

⁶ Diskur na mbage ota “Prophétie ti Michée akpengba e ti tambela na iri ti Jéhovah”, agboto lê na ndo aye ota wa so a lingbi e sala ni si Jéhovah ayeda na e? E lingbi ti sala ni? (Mi. 6:8). Na lege ti diskur “Bata bê ti mo si mo ngbâ nzoni”, na yâ alege wa a lingbi e bata tambela ti e na sioni oko pëpe? Na yâ aye wa diskur “Kpe handa”, agboto mê ti e ti zia si a handa e pëpe nga si e handa ambeni zo pëpe?

⁷ Anzoni tënë wa ti diskur na mbage ota “Awakua ti Royaume so amû gloire na kusala ti ala”, mo to nda ti sala ni na yâ kusala ti mo? A gi lani nda ti aPhilippien 4:8 na yâ diskur “Alisoro ti yingo akpengba zo”. Tongana nyen versê so amû maboko na e ti sala si alisoro ti e angoro na ndo aye ti yingo, nga na ngoi wa a yeke nzoni ti sala ni?

⁸ Diskur “Zia bê kue na Jéhovah na ngoi ti vundu”, asala tënë na ndo lege so e lingbi hon ndo ti aye ti ngangu, akpale ti nginza, ngangu kobela, akpale ti sewa, na awokongo so aye pëpe ti hon na yâ tele ti e. Tongana nyen e lingbi ti zia beku na Jéhovah na ngoi so e yeke na gbele aye so?

⁹ Afini ye ti mosoro na lege ti yingo: E yeke lani na kota ngia ti wara fini buku Voro oko tâ Nzapa. Tongana nyen tënë so afa na ndo nda ti buku ni asala ngangu na ndo mo? Na lege wa a yeke duti ande ye ti mungo maboko na yâ kusala ti e ti salango adisciple tongana use buku ti manda?

¹⁰ Na pekoni e wara pendere buku Ga ndulu na Jéhovah. Ambeni mbage nde nde ti buku ni ayeke so wa? Afoto wa agbu bê ti mo mbilimbili? Dikongo ni asala si mo kiri mo ga ndulu na Jéhovah? Zo wa alingbi nga ti wara ye ti nzoni na lege ti buku ni?

¹¹ Kota Bungbi ti District so amû lani na e awango ti yingo so e yeke na bezoin ni, ti luti na gbele angoi ti kpale so e yeke dä. Ti wara aye ti nzoni mingi na lege ti aye ti yingo nde nde so, zia e sala kue ti dabe ti e na tënë so a tene lani, ti duti na bê ti kiri singila teti ye so e wara, na ti sala kusala na ye so e manda (2 Pi. 3:14). Fade salango tongaso ayeke kpengba e ti bata dutingo be-biani ti e, na ti duti awakua ti Royaume so ayeke na wâ na tapande ti Seigneur ti e Jésus Christ, so kue ti mû gloire na Jéhovah.​—aPhil. 1:9-11.