Lege ti zia na gbele mo aye ti sara na yâ ti kua ti Jéhovah na ti sara ni

1. Aye wa la e peut ti gi ti sara na yâ ti kua ti Jéhovah?

SO E yeke atâ Chrétien, e ye Jéhovah mingi. E ye ti sara kua ti Jéhovah nzoni mingi. Me ti sara ye kue so e peut ti sara ndali ti Jéhovah, e bezoin ti zia na gbele e ambeni ye ti sara na yâ ti kua ti lo, na tapande ti gi ti duti na asarango ye ti aChrétien, ti manda ambeni nzoni kode nga ti gi alege ti sara kua ndali ti amba ti e.

2. Ngbanga ti nyen la a yeke nzoni e zia na gbele e aye ti sara, na e sara ngangu ti sara ni?

² Ngbanga ti nyen la a yeke nzoni e duti na nzara ti gue na li ni na yâ ti kua ti Jéhovah? Kota raison ni ayeke so e ye ti zia ngia na bê ti Babâ ti e ti yayu so aye e. Tongana Jéhovah abâ so e sara kua na akode ti e nzoni mingi na yâ ti kua ti lo, lo yeke na ngia. Na ndö ni, e ye ti gue na li ni tongaso si e peut ti aidé aita ti e nzoni mingi (1 aThes. 4:9, 10). Atâa e sara ngu oke na yâ ti tâ tënë, e kue e peut ti gue na li ni na yâ ti kua ti Jéhovah. Zia e bâ tongana nyen la e peut ti sara ni.

3. Tongana ti so a fa na 1 Timothée 4:12-16, nyen la bazengele Paul awa lani Timothée ti sara?

³ Na ngoi so bazengele Paul atokua kozo lettre ti lo na Timothée so ade maseka, Timothée ayeke ancien a sara ambeni ngoi awe. Me Paul awa lo ti ngbâ ti gue na li ni na yâ ti kua ti Jéhovah. (Diko 1 Timothée 4:12-16.) Tongana mo gbu li na ndö ti atënë ti Paul so, mo yeke bâ so lo ye lani ti tene Timothée ague na li ni na yâ ti aye use: lo ye lani ti tene lo gi ti duti na asarango ye ti aChrétien, na tapande ndoye, mabe nga na dutingo so ayeke na sioni oko pëpe. Lo ye nga lani ti tene lo gi ti hinga nzoni ti diko ye na gbele azo, ti mû wango na azo nga ti fa ye na azo. E yeke sara lisoro na ndö ti tapande ti Timothée ti bâ tongana nyen la ti zia na gbele e aye so e peut ti sara apeut ti aidé e ti gue na li ni na yâ ti kua ti Jéhovah. E yeke bâ nga ambeni ye so e peut ti sara ti fa tënë mingi.

GI TI DUTI NA ASARANGO YE TI ACHRÉTIEN

4. Ti gue oko na aPhilippien 2:19-22, nyen la asara lani si Jéhovah amû na Timothée akua mingi?

⁴ Nyen la asara lani si Jéhovah amû na Timothée akua mingi? A yeke apendere sarango ye ti aChrétien so lo yeke na ni. (Diko aPhilippien 2:19-22.) Aye so Paul atene na ndö ti Timothée asara si e peut ti bâ so lo sara terê ti lo kete, lo yeke be-ta-zo, lo sara kua ngangu nga lo yeke zo ti confiance. Lo yeke zo so ayeke sara ye na ndoye, nga lo yeke pensé mingi na aita. Aye so asara si Paul aye Timothée nga lo sara mbeto ape ti mû na lo akua so ayeke ngangu (1 aCor. 4:17). Legeoko nga, Jéhovah ayeke ye e nga lo yeke mû na e akua mingi na yâ ti congrégation tongana e gi ti duti na asarango ye so lo ye.—Ps. 25:9; 138:6.

5. (a) Tongana nyen la mo peut ti soro mbeni sarango ye ti aChrétien so mo ye ti gi ti duti na ni? (b) Tongana ti so a fa na yâ ti foto so, tongana nyen la ita-wali so ade maseka so ayeke gi ti sara ye so lo ye ti sara, so ayeke ti zia terê ti lo mingi na place ti amba ti lo?

⁵ Soro sarango ye so mo ye ti duti na ni. Sambela nga gbu li na ndö ti asarango ye so mo bezoin ti gi ti duti na ni mingi. Soro mbeni oko so mo ye ti maï ni mingi. Na tapande, mo peut ti bâ so mo bezoin ti gi ti zia terê ti mo mingi na place ti aita wala ti duti na kota nzara ti aidé ala. Wala mo peut ti gi ti duti na siriri na aita nga ti pardonné ala mingi ahon ti kozo. Mo peut ti bâ so a yeke nzoni mo hunda mbeni kota kamarade ti mo ti fa na mo aye so mo peut ti changé ni.—aProv. 27:6.

6. Nyen la mo peut ti sara ti duti na sarango ye so mo ye ti maï ni?

⁶ Sara effort ti sara ye so mo leke ti sara. Mo peut ti sara ni tongana nyen? Mbeni lege ni ayeke ti manda ye nzoni na ndö ti sarango ye so mo ye ti maï ni. Bâ so mo ye ti pardonné azo mingi ahon ti kozo. Mo peut ti komanse ti diko na yâ ti Bible tapande ti azo so apardonné azo na bê ti ala wani nga na azo so asara ni ape, nga gbu li na ndö ni. Gbu li na ndö ti tapande ti Jésus. Lo pardonné azo na bê ti lo wani (Luc 7:47, 48). Lo bâ gï afaute ti ala ape me lo bâ aye so ala peut ti sara. Me, aFarizien na ngoi ti Jésus ‘abâ tanga ti azo tongana senge ye’. (Luc 18:9). Na peko ti so mo gbu li na ndö ti atapande so awe, hunda terê ti mo: ‘Nyen la mbi yeke bâ na mbage ti amba ti mbi? Asarango ye ti ala wa la mbi ye ti bâ ni mingi?’ Tongana a yeke ngangu na mo ti pardonné mbeni zo, sû na mbeti anzoni sarango ye ti lo. Na pekoni, hunda terê ti mo: ‘Jésus abâ zo ni so tongana nyen? Eskê lo yeke pardonné lo?’ Tongana e sara tongaso, e peut ti changé bango ndo ti e. Na tongo nda ni, peut-être e doit ti sara ngangu ti pardonné mbeni zo so ason bê ti e. Me tongana e ngbâ ti gi ti sara ni, na nda ni e yeke pardonné azo na bê ti e kue.

GI TI DUTI NA ANZONI KODE

7. Ti gue oko na aProverbe 22:29, laso na alege wa la Jéhovah ayeke sara kua na azo so ahinga ti sara kua ti ala nzoni?

⁷ Mbeni ye so mo peut ti leke ti sara ayeke ti gi ti duti na mbeni nzoni kode. Gbu li na ndö ti gbâ ti azo so a bezoin ala ti leke aDa ti Béthel, aDa ti assemblée nga na aDa ti Royaume. Ala mingi awara akode na lege so ala sara kua na terê ti aita so ahinga kua ni nzoni. Tongana ti so a fa na yâ ti foto so, aita-koli na aita-wali ayeke manda akode so ala bezoin ni ti bâ lege ti aDa ti assemblée nga na aDa ti Royaume si angbâ nzoni. Na alege so nga na ambeni nde, Jéhovah Nzapa, “Gbia ti lakue lakue,” nga na Christ Jésus, “Gbia ti . . . agbia”, ayeke sara kua na aita so ayeke na akode so ti sara akota ye. (1 Tim. 1:17; 6:15; diko aProverbe 22:29.) E ye ti sara kua ngangu nga ti sara kua na akode ti e ti mû gloire na Jéhovah, me na e wani ape.—Jean 8:54.

8. Nyen la mo peut ti sara ti wara mbeni kode?

⁸ Soro kode so mo ye ti wara. Kode wa la mo peut ti gi ti wara ni? Hunda a-ancien ti congrégation ti mo nga peut-être surveillant ti circonscription kode wa la ala pensé mo peut ti gi ti wara ni. Na tapande, tongana ala wa mo ti gi ti maï kode ti sarango tënë nga na ti fango ye ti mo, hunda ala ti aidé mo ti hinga mbilimbili kode ti sarango tënë so mo bezoin ti maï ni. Na pekoni, sara ngangu ti maï ni. Mo peut ti sara ni tongana nyen?

9. Tongana nyen la mo peut ti wara kode so mo ye ti wara ni?

⁹ Sara effort ti wara kode so mo ye ti wara. Bâ so mo ye ti maï kode ti fango ye ti mo. Mo peut ti manda nzoni brochure Mû bê ti mo kue na dikongo mbeti nga na fango ye. Tongana a mû na mo mbeni mbage ti sara na ngoi ti bungbi ti milieu ti yenga, mo peut ti hunda mbeni ita-koli so ahinga ti fa ye nzoni ti mä mo kozoni nga ti fa na mo ambeni ye so mo peut ti changé. Leke ambage so a mû na mo kozo tongaso si azo abâ so mo sara effort nga so mo yeke zo ti confiance.—aProv. 21:5; 2 aCor. 8:22.

10. Mû mbeni tapande ti fa tongana nyen ti ngbâ ti maï mbeni kode.

¹⁰ Ka tongana kode so mo ye ti gi ti wara ayeke mbeni ye so a yeke ngangu na mo ti sara ni? Découragé ape. Mbeni ita-koli so iri ti lo ayeke Garry ayeke lani na kpale ti dikongo mbeti. Lo dabe ti lo so kamene ayeke sara lo lani mingi na ngoi so lo yeke gi ti diko ye na kota go na ngoi ti abungbi. Me lo ngbâ lani ti sara effort. Lo tene so ndali ti so a fa ye na lo, lo peut ti mû adiskur na Da ti Royaume nga na akota bungbi.

11. Legeoko tongana Timothée, nyen la ayeke aidé e ti sara akua mingi?

¹¹ Eskê Timothée aga lani zo so ayeke sara tënë nzoni mingi wala ayeke fa ye nzoni mingi? Bible afa ape. Me kite ayeke dä ape so Timothée asara lani akua ti lo nzoni ndali ti so lo mä wango ti Paul (2 Tim. 3:10). Legeoko nga, tongana e maï akode ti e, e yeke wara lege ti sara aye mingi na yâ ti kua ti Jéhovah.

GI ALEGE TI SARA KUA NDALI TI AMBA TI MO

12. Tongana nyen la mo bâ nzoni na lege ti kua so amba ti mo asara?

¹² E kue e bâ nzoni na lege ti kua ti amba ti e. Tongana e yeke na hôpital, e kiri singila mingi na a-ancien so ayeke na yâ ti Komite so abâ lege ti songo na ada-nganga wala Bungbi ti aita so ayeke gue na yâ ti ada-nganga ti bâ aita so ayeke na kobela so aga abâ e. Tongana e yeke na yâ ti kpale si mbeni ancien apensé na e, lo mû ngoi ti mä e nga ti dë bê ti e, a yeke nzere na e mingi. Tongana e bezoin ti tene a aidé e ti sara mbeni étude si mbeni pionnier so ayeke fa tënë nzoni ayeda ti duti dä na ngoi ti étude ni nga ti fa na e ambeni ye ti sara, a yeke nzere na e mingi. Aita so kue ayeke na ngia ti aidé e. E peut ti wara mara ti ngia ni so tongana e yeda ti sara kua ndali ti aita ti e. Jésus atene: “Mungo ye na zo aga na ngia mingi ahon warango ye na tïtî zo.” (Kus. 20:35). Tongana mo ye ti sara kua ti Jéhovah mingi na alege so wala na ambeni nde, nyen la ayeke aidé mo ti sara ni?

13. Tongana e ye ti zia na gbele e mbeni ye ti si dä, nyen la a yeke nzoni e girisa ape?

¹³ A yeke nzoni e zia na gbele e mbeni mbilimbili ye ti si dä. Na tapande, mo peut ti pensé, mo tene: ‘Mbi ye ti sara akua mingi na yâ ti congrégation.’ Me a peut ti duti ngangu na mo ti hinga tongana nyen la mo yeke sara ni, nga a yeke duti ngangu na mo ti hinga lawa la mo sara ni. Tongaso, soro mbeni mbilimbili ye so mo ye ti sara. Mo peut ti sû na mbeti ye so mo ye ti sara nga tongana nyen la mo leke ti sara ni.

14. Ngbanga ti nyen la a yeke nzoni e duti nduru ti changé yâ ti aye so e leke ti sara?

¹⁴ A yeke nzoni e duti nga nduru ti changé yâ ti aye so e leke ti sara. Ngbanga ti nyen? Ngbanga ti so e hinga pëpe aye kue so apeut ti si na e. Bâ mbeni tapande so afa ni: Bazengele Paul a-aidé lani ti tene mbeni fini congrégation asigi na gbata ti Thessalonique. Kite ayeke dä ape so lo leke lani ti ngbâ kâ ti aidé afini Chrétien so. Me awato aforcé Paul ti quitté gbata ni (Kus. 17:1-5, 10). Tongana Paul angbâ lani kâ, lo yeke zia fini ti aita ti lo na yâ ti kpale. Me Paul azia ti gi ti aidé ala ape. Lo sara ye lani alingbi na aye so asi. Lo tokua Timothée ti aidé afini Chrétien ti Thessalonique ti duti na kpengba mabe (1 aThes. 3:1-3). Terê ti aita ti Thessalonique adoit lani ti nzere mingi so Timothée ayeda ti gue na ndo kue so bezoin ayeke dä.

15. Tongana nyen la aye so e leke ti sara apeut ti changé tongana dutingo ti e achangé? Mû mbeni tapande ti fa ni.

¹⁵ E peut ti manda ye na lege ti ye so asi na Paul na Thessalonique. E peut ti leke ti sara mbeni ye, me dutingo ti e apeut ti changé na akanga lege na e ti sara ni (Zo-ti. 9:11). Tongana a yeke ye so asi na mo, duti nduru ti gi ti sara mbeni ye nde so mo peut ti sara. A yeke ye so Ted na wali ti lo, Hiedi, asara lani. Ala doit lani ti quitté Béthel ndali ti mbeni kpale ti seni. Me so ala ye Jéhovah mingi apusu ala ti gi ambeni lege ti fa tënë mingi. Kozoni, ala ga apionnier permanent. Na pekoni, ala ga apionnier spécial, nga a fa na Ted ti sara kua tongana suppléant ti surveillant ti circonscription. Na pekoni, ngu so zo apeut ti ngbâ ti sara kua ti surveillant ti circonscription achangé. Ted na Hiedi abâ so ngu ti ala amû lege na ala ti ngbâ ti sara kua ni ape. Atâa so vundu asara ala, ala bâ so ala peut ti sara na Jéhovah na ambeni lege nde. Ted atene: “E manda lani so e peut ti sara na Jéhovah na alege mingi.”

16. A-Galate 6:4 afa na e nyen?

¹⁶ E lingbi pëpe ti hinga aye kue so apeut ti si na e. Tongaso, a yeke kota ye ti tene e pensé ape so Jéhovah abâ e na nene ni gï ndali ti akua so e yeke sara, nga e haka terê ti e pëpe na aita so ayeke na akua so e yeke na ni ape. Hiedi atene: “Tongana mo haka fini ti mo na ti amba ti mo, mo yeke duti na ngia ape.” (Diko aGalate 6:4.) A yeke kota ye ti gi alege ti aidé amba ti e nga ti sara na Jéhovah.b

17. Nyen la mo peut ti sara tongaso si mo lingbi ti sara ambeni kua?

¹⁷ Mo peut ti wara lege ti sara aye mingi na yâ ti kua ti Jéhovah tongana mo duti na aye mingi na yâ ti gigi ti mo ape nga mo mû bon senge senge ape. Zia na gbele mo akete ye so ayeke aidé mo ti si na akota ye so mo leke ti sara. Na tapande, tongana mo ye ti ga ande pionnier permanent, eskê mo peut ti sara kua ti pionnier auxiliaire fadeso sân ti fâ yâ ni? Tongana mo ye ti ga ande wakua ti mungo maboko, eskê mo peut ti fa tënë mingi nga ti gue ti bâ aita so terê ti ala ason nga na ambakoro so ayeke na yâ ti congrégation ti mo? Aye so mo manda laso apeut ti mû lege na mo ti wara ambeni kua na yâ ti congrégation na yâ ti angoi so ayeke ga. Leke na bê ti mo ti sara ye kue so mo peut ti sara ti sara kua kue so a mû na mo.—aRom. 12:11.

18. Tongana ti so foto so afa, nyen la tapande ti Beverley afa na mo?

¹⁸ Atâa ngu ti e ague na li ni, e peut lakue ti zia na gbele e ti sara ambeni ye na ti sara ni. Bâ tapande ti Beverley, mbeni ita-wali so ayeke na ngu 75. Lo yeke lani na mbeni ngangu kpale ti seni so asara si a yeke ngangu na lo ti tambela. Me lo ye lani ti fa tënë mingi na ngoi ti kapa ti tisango azo na Mémorial. Tongaso, lo leke ambeni mbilimbili ye ti sara. Na ngoi so Beverley asi na aye so lo leke ti sara na ngoi ti kapa ni, lo yeke lani na ngia mingi. A-effort so lo sara apusu ambeni ita ti fa tënë mingi. Jéhovah abâ na nene ni kua ti aita ti e so ayeke mbakoro, même tongana dutingo ti ala amû lege na ala ti sara aye mingi ape.—Ps. 71:17, 18.

19. Ambeni ye wa la e peut ti gi ti sara na yâ ti kua ti Jéhovah?

¹⁹ Zia na gbele mo aye so mo peut ti sara. Gi ti duti na asarango ye so anzere na Jéhovah. Manda akode so ayeke aidé mo ti sara akua mingi na Nzapa ti e nga na yâ ti bungbi ti lo. Gi alege ti sara kua mingi ndali ti aita ti mo.c Tongana ti Timothée, grâce na tufa ti Jéhovah, “azo kue [ayeke bâ] polele maïngo ti mo.”—1 Tim. 4:15.