Jéhovah ayeke bâ ye so mo sala?

FADE mo yeke kiri tënë tongana nyen na hundango tënë so? Azo mingi ayeke tene: ‘Mbi mä na bê so Nzapa abâ giriri aye so akoli tongana Moïse, Gédéon, na David asala; me mbi dë kite so lo yeke bi bê ti lo na ndo mbeni ye so mbi lingbi ti sala. Mbi lingbi ti haka tele ti mbi pëpe na Moïse, Gédéon, na David.’

A yeke tâ tënë biani so ambeni koli be-ta-zo ti ngoi ti Bible asala akpengba kusala ti mabe. Ala ‘hon aroyaume na ngangu, ala kanga yanga ti abamara, ala mingo ngangu ti wâ, na ala kpe épée’. (aHébreu 11:33, 34). Ye oko, ambeni zo ni nde afa ti ala mabe ti ala na gigi na ambeni lege so apika bê ti zo mingi pëpe; na Bible adë bê ti e so Nzapa abâ lani nga akusala ti ala ti mabe. Tongaso, zia e bâ ambeni tapande ti Mbeti ti Nzapa, so andu mbeni berger, mbeni prophète na mbeni womua.

Mbeni berger amû sandaga

Ye nyen mo hinga na ndo Abel, use molenge ti Adam na Eve? Peut-être mo dabe mo so a fâ lo lani ndali ti mabe ti lo, na a yeke mbeni ye so ayeke si ande peut-être na azo mingi pëpe na popo ti e. Me kozoni kue Nzapa abi lê ti lo na ndo Abel teti mbeni nda ti tënë nde.

Mbeni lâ, Abel asoro na popo ti kundu ti anyama ti lo, ambeni so ayeke nzoni ahon atanga ni kue, na lo mû mbeni sandaga na Nzapa. Peut-être laso, a yeke bâ so ye so lo mû lani na sandaga ayeke tâ kete mingi; me Jéhovah abi lê ti lo na ndo ni, na lo yeda na ni. Me ye ni angbâ gi ge pëpe. Ndulu na angu saki osio na pekoni, Jéhovah ato yingo ti lo na bazengele Paul ti sû tënë na ndo ni na yâ buku ti aHébreu. Atâa so angu mingi ahon awe na pekoni, Nzapa agirisa oko pëpe senge sandaga so!​—aHébreu 6:10; 11:4.

Abel asala tongana nyen ti soro mara ti sandaga so a lingbi lo mû? Bible afa ni pëpe, me a lingbi ti tene so lo gbu li lani nzoni na ndo ni. Lo yeke lani mbeni berger, na tongaso bê ti e adö pëpe so lo mû gi sandaga ti ambeni nyama ti kundu ti lo. Bâ so lo mû lani gi anyama ti nzoni ni, “mafuta” ni (Genèse 4:4). Peut-être lo gbu li nga na ndo atënë so Jéhovah atene na ngbo na yâ yaka ti Eden: “Fade Mbi zia tënë ti ke na popo ti mo na wali so, na popo ti hale ti mo na hale ti lo; fade lo mboko li ti mo, na fade mo mboko ndagere ti lo.” (Genèse 3:15; Apocalypse 12:9). Atâa so lo hinga lani pëpe “wali so”, nga na “hale ti lo” ni, Abel abâ peut-être so ‘ti mboko ndagere’ ti hale ti wali ni, a yeke hunda ti tene a sa mênë. Lo hinga lani biani so mbeni ye ti hon ngele ti mbeni créature so ayeke na fini alingbi ti duti dä pëpe. Atâa ye ni ayeke lani tongana nyen, sandaga so lo mû ayeke tâ na lege ni biani.

Legeoko na Abel, aChrétien laso ayeke mû asandaga na Nzapa. Me ala yeke mû pëpe akozo nyama ti kundu ti anyama ti ala; ala yeke mû “sacrifice ti merci [“sandaga ti gondango”, Fini Mbuki, 1995] na Nzapa . . . sacrifice so ayeke lengo ti yanga so asepela iri ti Lo.” (aHébreu 13:15). E yeke sepela Nzapa na yanga ti e tongana e kangbi mabe ti e na ambeni zo.

Mo ye si sandaga so mo yeke mû aga nzoni ahon ti kozo? Tongaso, gi ti hinga biani aye so atia azo ti territoire ti mo. Agingo bê ti ala ayeke so wa? Aye wa agbu bê ti ala? Atënë wa ti Bible alingbi ti nzere na ala mingi? Na ngoi so mo yeke fa tënë, gbu li ti bâ tongana nyen si mo yeke fa tënë ni, na gi ti bâ lege so mo lingbi ti maï kode ti fango ye ti mo ahon ti kozo. Nga, tongana mo yeke sala tënë na ndo Jéhovah, sala ni na bê ti mo kue. Sala si sandaga so mo yeke mû aduti tâ biani ‘sandaga ti gondango.’

Mbeni prophète afa tënë na azo so aye ti mä ni pëpe

Fadeso, bâ tapande ti prophète Hénoc. Peut-être lo yeke gi oko Témoin ti Jéhovah Nzapa na ngoi ni so. Legeoko na Hénoc, mo yeke gi mo oko na yâ sewa ti mo ti sala na Jéhovah na be-biani? Mo yeke gi mo oko élève na yâ klase ti mo wala gi mo oko na place ti kua ti mo ti bata akpengba-ndia ti Bible? Tongana a yeke tongaso, peut-être mo yeke tingbi na aye ti ngangu. Akamarade ti mo, afami ti mo, azo ti klase ti mo, wala azo ti place ti kua ti mo ayeke pusu mo peut-être ti doro andia ti Nzapa. Ala lingbi peut-être ti tene: “Zo oko ayeke hinga ye so mo yeke sala pëpe. Fade e yeke sala tënë ni pëpe na mbeni zo.” Ala lingbi ti luti mingi ti tene so a yeke ye ti buba ti gi bê mingi na ndo akpengba-ndia ti Bible na ndo tambela ngbanga ti so Nzapa ayeke gi bê ti lo pëpe na ye so mo sala. Teti bê ti ala aso ngbanga ti so mo yeke gbu li na mo yeke sala ye pëpe tongana ti ala, ala lingbi peut-être ti sala ye kue so ayeke na ngangu ti ala ti pusu mo ti mû peko ti ala.

Tâ tënë, a yeke kete ye pëpe ti luti na gbele mara ti ye ti ngangu tongaso; me e tene pëpe so e lingbi lâ oko pëpe ti sala ni. Gbu li na ndo Hénoc, hale mbasambala ni ti Adam (Jude 14). Na ngoi so a dü Hénoc, mingi ti azo ayeke na kamene oko pëpe ti sala sioni. Tënë ti yanga ti ala ayeke gi sioni; tambela ti ala ayeke ‘ye ti songo bê ti zo’. (Jude 15, NW). Salango ye ti ala akpa mingi salango ye ti gbâ ti azo laso.

Hénoc asala lani tongana nyen ti duti nde? Kiringo tënë ni agbu bê ti e laso mingi. Atâa so Hénoc ayeke peut-être gi oko koli na ndo sese so ayeke voro Jéhovah na ngoi ni so, lo yeke tâ gi lo oko pëpe. Hénoc ayeke tambela na Nzapa.​—Genèse 5:22.

Ye so agbu bê ti Hénoc lani ayeke ti gi ti nzere na lê ti Nzapa. Lo hinga lani so ti tambela na Nzapa aye ti tene ye mingi ahon gi senge tambela wala salango ye so ayeke nzoni. Jéhovah ayeke ku lani na mbage ti lo ti fa tënë (Jude 14, 15). A lingbi a gboto mê ti azo ni so Nzapa ayeke bâ asalango ye ti ala so ake lo. Hénoc angbâ ti tambela na Nzapa teti angu ahon 300, na zo oko na popo ti e agbu ngangu a ninga angu mingi tongaso pëpe. Juska na kuâ ti lo, lo ngbâ lakue ti tambela na Nzapa.​—Genèse 5:23, 24.

Legeoko na Hénoc, e nga kue e wara tokua ti fa tënë (Matthieu 24:14). Nde na fango tënë da na da, e yeke tara ti fa nzo tënë na asewa ti e, na azo so e hinga ala na so ayeke dë buze, nga na azo ti klase ti e. Ye oko, ngoi na ngoi, e lingbi ti sala mbito kete ti fa tënë ni. Mo yeke na mara ti kpale tongaso nga? Zia si bê ti mo anze pëpe. Mû tapande ti akozo Chrétien, na sambela Nzapa ti sala si mo duti na mbito pëpe (Kusala 4:29). Girisa lâ oko pëpe so na ngoi kue so mo yeke tambela na Nzapa, mo yeke gi mo oko biani lâ oko pëpe.

Mbeni womua atö kobe

Tara ti bâ na yâ li ti mo mbeni womua so a fa iri ti lo pëpe, me so a wara aye ti nzoni use ngbanga ti so lo tö gi mbeni senge kobe! Lo yeke lani pëpe mbeni wali ti sese ti Israël, me lo yeke mbeni wande so ayeke lani na fini na yâ angu 900 kozoni na ngoi ti e na gbata ti Sarepta (Tsarphath). A yeke lani mbeni ngoi ti buru na ti kota nzara so aninga mingi na so ayeke ndulu ti hunzi; kobe ti womua ni ayeke nga ndulu ti hunzi. Ye kue so lo yeke lani na ni tongana kobe ti te ayeke gi fuku so alingbi na yâ ti maboko oko, nga kete kete mafuta ti tö na ndangba kobe teti lo na molenge ti lo ti koli.

A yeke na ngoi ni so si mbeni gene aga ndulu na lo. A yeke lani prophète Elie. Lo hunda na womua ni ti te mbeni mbage ti kobe ti lo ni. Kobe ni ayeke kete mingi na alingbi nga na lo na molenge ti lo ni pëpe, na biani lo yeke na mbeni ye nde pëpe ti kangbi ni na gene ni. Me Elie adë bê ti lo na lege ti tënë ti Jéhovah, lo tene so tongana wali ni ayeda ti kangbi kobe ti lo na ni, fade lo na molenge ti lo ti koli ni ayeke kui na nzara pëpe. A hunda lani mabe na mbage ti wali so ti yeda so lê ti Nzapa ti Israël ayeke na ndo lo wali womua ti kodoro wande so. Ye oko, lo mä na bê na tënë ti Elie, na Jéhovah afuta lo nzoni. “Fuku so ayeke na yâ ti ta a hunzi pëpe, na mafuta so ayeke na yâ ti ngbenda awe pëpe, alingbi na tënë ti L’Eternel so Lo tene na lege ti Elie.” Wali ni na molenge ti lo awara kobe ti tengo ni lakue lakue juska na hunzingo ti kota nzara ni.​—1 aGbia 17:8-16.

Ye oko, mbeni ye ti nzoni nde ayeke ku nga womua so. Ngoi kete na peko ti miracle so, molenge ti lo ti koli ni so lo ndoye lo mingi atï kobela na akui. Mawa agbu Elie mingi na tongaso lo toto na Jéhovah ti kiri na molenge-koli so na fini (1 aGbia 17:17-24). Ye so ayeke hunda ande ti sala mbeni ye ti kpene so a sala ni lâ oko pëpe. A wara mbeni tondo oko pëpe na yâ Bible ti mbeni zo so a zingo lo na kuâ kozoni! Fade Jéhovah ayeke kiri ti fa be-nzoni na womua ti kodoro wande so? Biani, a yeke ye so lo sala. Jéhovah amû ngangu na Elie ti kiri na molenge-koli ni na fini. Angu mingi na pekoni, Jésus asala tënë ti wali so na matabisi so lo wara, lo tene: “Giriri awomua ayeke mingi na sese ti Israël . . . na Nzapa ato Elie . . . gi na womua na kodoro ti Sarepta, na sese ti Sidon.”​—Luc 4:25, 26.

Laso, dutingo ti azo na lege ti nginza aluti nzoni oko pëpe, même na yâ akodoro so amaï mingi na lege ti mosoro. Ambeni kota ndokua azi na kua awakua ti ala so asala nzoni kusala na ala teti angu mingi. Teti so lo ye pëpe ti girisa kua ti lo, mbeni Chrétien alingbi peut-être ti duti na nzara ti mû ngoi ti lo ahon ndo ni ti sala kua ti lo, na dutingo na beku so fade ndokua so lo yeke dä ayeke bata ande lo na kua ni. Na salango tongaso, lo lingbi ti duti na ngoi mingi pëpe ti ga na abungbi ti aChrétien, ti fa tënë, wala ti bata azo ti da ti lo na lege ti bibe nga na ti yingo. Ye oko, lo bâ so a lingbi lo sala kue ti bata kua ti lo so.

A yeke na lege ni teti mbeni Chrétien so ayeke na yâ mara ti ye ti ngangu tongaso ti gi bê ti lo. A yeke tâ ngangu ti wara mbeni kua ti nginza na lâ ti nda ni so. Mingi ti e ayeke tiri pëpe ti ga zo ti mosoro, me legeoko na womua ti Sarepta so, e ye biani ti gi ti wara ye so alingbi na e teti fini ti e. Ye oko, bazengele Paul adabe e so Nzapa atene: “Fade Mbi zia ti sala na mo pëpe, na Mbi zia mo lâ oko pëpe.” E lingbi ti tene na mbito pëpe: ‘Jéhovah ayeke Zo ti sala na mbi, fade mbito asala mbi pëpe; zo alingbi sala nyen na mbi?’ (aHébreu 13:5, 6). Paul aduti lani ndulu ti kui teti zendo so, na Jéhovah abata lo lakue. Fade Nzapa ayeke sala tongaso nga na e tongana e zia lo pëpe.

E lingbi ti pensé so e lingbi lâ oko pëpe ti sala aye ti kpene tongana Moïse, Gédéon, na David so ayeke lani azo so andoye aye ti yingo mingi; me e lingbi kamême ti mû tapande ti mabe ti ala. Nga, e lingbi ti dabe ti e na akete kusala ti mabe so Abel, Hénoc, na womua ti Sarepta asala giriri. Jéhovah ayeke bi bê ti lo na ndo akusala kue so a sala na lege ti mabe, atâa kusala ni ayeke gi kete. Tongana mbeni élève so akpe mbito ti Nzapa ake ti mû mbangi so mbeni kamarade ti lo ayôro na lo, wala tongana mbeni Chrétien so asala kua ti nginza ake atara ti pitan na place ti kua ti lo, wala tongana mbeni Témoin so ayeke mbakoro ayeke sala kue ti ga na abungbi ti kongregation atâa so lo woko na lo yeke na nzoni seni pëpe, biani aye so kue Jéhovah ayeke bâ ni. Na a yeke mû ngia na lo!​—aProverbe 27:11.

Mo yeke bâ ye so amba ti mo asala?

Biani, Jéhovah ayeke bâ ye so e yeke sala. Ni la, teti e ye ti mû tapande ti lo, a lingbi e duti ndulu ti hinga ngangu so amba ti e ayeke sala (aEphésien 5:1). Ngbanga ti nyen pëpe ti bi lê ti mo nzoni na ndo angangu so aita ti mo Chrétien ayeke sala ti ga na abungbi ti kongregation, ti sigigi na fango tënë, na même ti sala akusala ti ala ti lâ oko oko?

Tongaso, mû lege na aita so ayeke voro Jéhovah legeoko na mo ti hinga so mo yekia angangu so ala yeke sala. Fade ala yeke duti na ngia mingi ti hinga so mo bâ angangu so, na gingo bê ti mo na ndo ala alingbi ti dë bê ti ala so Jéhovah kue ayeke bâ ye so ala sala.