Tambela na Nzapa na yâ ti ngoi ti wusuwusu so

“Hénoc atambela na Nzapa, na lo yeke pëpe, teti Nzapa akamata lo.”​—GENÈSE 5:24.

NGOI ti wusuwusu! Tënë so alingbi tâ na angu so wuluwulu nga na aye ti ngangu so ayeke si na azo a to nda ni na ngu 1914 juska laso. A yeke na ngu ni so si Royaume ti Messie abâ gigi. Ti londo na ngu ni so juska laso, azo ayeke na yâ ti ngoi so Bible ahiri ni “lâ ti nda ni”. Aye ti ngangu tongana kota nzara, kobela ti futi kodoro, yengingo ti sese nga na bira ayeke bi vundu na bê ti azo na mbeni lege so ade ti si kozoni pëpe (2 Timothée 3:1; Apocalypse 6:1-8). Aye ni so ayeke si nga na awakua ti Jéhovah. A lingbi ti tene so e kue e yeke tingbi na akpale nga e yeke gi bê ti e ngbanga ti aye so ayeke si laso. Ambeni ye so asala si gigi akiri akpengba ayeke kpale ti nginza, aye ti wusuwusu so alondo ngbanga ti tënë ti poroso, kpengo ndia pëpe nga na kobela.

² Na ndo ni, Satan angbâ ti tiri na ‘ala so ayeke bata komandema ti Nzapa, na ala yeke bata tënë ti témoin ti Jésus.’ Ye so asala si a yeke sala tâ ngangu mingi na awakua ti Jéhovah (Apocalypse 12:17). Nga, atâa tongana a yeke sala ngangu na e kue pëpe, a yeke ti e kue so e yeke atâ Chrétien ti tiri na Satan Zabolo nga na yingo ti sese so wala sioni bibe so lo yeke hulu wâ na gbe ni na popo ti azo (aEphésien 2:2; 6:12). Ti tene sioni bibe so alï e pëpe, a yeke ti e ti sala hange lakue, ngbanga ti so na place ti kua, na ekole nga na ambeni ndo nde, e yeke duti ndo oko na azo so nzara ti vorongo Jéhovah asala ala pëpe.

Tambela na Nzapa, me na azo ti sese so pëpe

³ Akozo Chrétien nga kue atiri lani ti ke yingo ti sese so wala sioni bibe so ayeke dä na ngoi ti ala. Ye so asala si ala yeke lani nde mingi na azo so ayeke na yâ ti kongregation ti ala pëpe. Ti fa kangbi so ayeke na popo ti ala na azo ni, Paul asû na mbeti: “Tongaso mbi tene ye so, na mbi yeke wa i na yâ Seigneur, a lingbi i tambela tongana aGentil mbeni pëpe, ala so atambela na fandara senge ti bibe ti ala. Bingo akanga bibe ti ala, na a kangbi ala na fini ti Nzapa, teti na bê ti ala, ala hinga ye pëpe, na ala sala si bê ti ala akpengba; kamene asala ala mbeni pëpe, ala mû tele ti ala ti sala ye ti pitan, na ti sala sioye kue teti bê ti wara ye asala ala.”​—aEphésien 4:17-19.

⁴ Tënë so afa biani atene na lege ti yingo nga na lege ti salango ye, azo ti ngoi ni kâ ayeke ândö na yâ ti kota bingo. Gi oko mara ti ye ni so la ayeke dä laso. Ye oko, legeoko tongana akozo Chrétien, aChrétien ti laso ayeke “tambela tongana aGentil [wala azo ti sese so] mbeni pëpe”. Nde na so, ala yeke tâ na pendere matabisi ti tambela na Nzapa. Me, ambeni zo alingbi ti hunda tele ti ala: A yeke tâ na lege ni ti tene so asenge zo, so ala yeke mbilimbili-kue pëpe ayeke tambela na Jéhovah? Bible atene so ala lingbi ti tambela na lo senge. Nga, Jéhovah ahunda na ala ti sala ni. Ngu 700 kozoni si a dü Jésus, Prophète Michée, so yingo vulu asala kua na ndo ti lo, atene: ‘L’Eternel ahunda ye nyen na tïtî mo?​—ti sala mbilimbili, ti ndoye nzobe, na ti tambela na Nzapa ti mo na tâ be-ti-molenge.’​—Michée 6:8.

Tambela na Nzapa: tongana nyen nga ngbanga ti nyen?

⁵ E yeke bâ Nzapa pëpe, nga lo yeke Nzapa ti ngangu ahon kue. Me tongana nyen si e lingbi ti tambela na lo? Ti tambela na Nzapa ni ayeke tongana ti so e yeke tambela na amba ti e so pëpe. Na yâ ti Bible, tënë “tambela” aye nga ti tene “ti sala gi ye so a fa”.a Tongaso, e yeke tambela na Nzapa na lege so e yeke sala gi ye so lo fa nga e yeke gi ti nzere na lê ti lo. Ti tâ tënë ni, ti sala ye so Nzapa afa asala si e yeke nde na azo so angoro e. Me, ti tambela na Nzapa ayeke tâ nzoni ye so mbeni Chrétien alingbi ti sala. Ngbanga ti nyen? Anda ti tënë ni ayeke mingi.

⁶ Kozo nda ti tënë ni ayeke so Jéhovah la asala e, nga lo la lo mû na e aye kue ti bata e na fini (Apocalypse 4:11). Tongaso, lo oko si lo yeke na droit ti fa na e ye so a lingbi e sala. Na ndo ni, ti tambela na Nzapa ayeke ga na aye ti nzoni mingi na zo. Na tapande, ala so asoro ti tambela na Jéhovah, lo leke ye ti pardone siokpari ti ala nga lo mû na ala tâ beku ti fini ti lakue lakue. Babâ ti e so ayeke na yayu ayeke na ndoye mingi. Ni la, lo mû nga anzoni wango so ayeke mû maboko na azo so atambela na lo ti sala si gigi ti ala aga nzoni, atâa so ala yeke mbilimbili-kue pëpe nga ala yeke na yâ ti mbeni sese so ayeke na maboko ti Satan (Jean 3:16; 2 Timothée 3:15, 16; 1 Jean 1:8; 2:25; 5:19). Mbeni nda ti tënë ni ayeke so tongana e yeda ti tambela na Nzapa, a yeke sala si siriri nga na beoko amaï na yâ ti kongregation.​—aColossien 3:15, 16.

⁷ Tanga ti nda ti tënë ni, nga so ayeke kota ahon atanga ni kue, ayeke so, tongana e tambela na Nzapa e yeke fa ndo so e yeke dä na ndo ti kota tënë so abâ gigi lani na yaka ti Eden, so ti tene tënë ti kota yanga-ti-komande ti Jéhovah (Genèse 3:1-6). A yeke na lege ti ye so e soro ti sala si e yeke fa so e yeke na mbage ti Jéhovah. E yeke fa nga na mbito oko pëpe so lo oko la lo yeke na droit ti duti Kota Gbia ti dunia kue (Psaume 83:19). Na lege so, e yeke sala ye alingbi na sambela so a tene, e ye iri ti Nzapa aga nzoni-kue nga a sala na sese ye so bê ti lo aye (Matthieu 6:9, 10). Azo so asoro ti tambela na Nzapa ayeke tâ azo ti ndara. Ala lingbi ti hinga biani so ala mû nzoni lege, ngbanga ti so Jéhovah “oko si ayeke na ndara”. Lo yeke sala faute lâ oko pëpe.​—aRomain 16:27, Fini Mbuki, 2001.

⁸ E yeke na yâ mbeni ngoi so aye ti wusuwusu ahon ndo ni nga azo mingi ayeke na nzara ti sala na Jéhovah pëpe. Atâa so kue, tongana nyen e lingbi ti sala ye tongana ti so a hunda na aChrétien? Ti wara kiringo tënë ni, zia e bâ tapande ti ambeni zo ti giriri so angbâ be-ta-zo atâa so ngoi ti ala ayeke lani ngangu mingi. Ambeni use na popo ti ala ayeke Hénoc na Noé. Ala use kue, ngoi ti ala ayeke tongana ti so e yeke dä laso. Ye ti sioni ahon ndo ni lani. Na ngoi ti Hénoc nga na ti Noé, salango ye ti ngangu nga na pitan ayeke lani mingi. Me Hénoc na Noé ake lani sioni bibe ti ngoi ni kâ na ala tambela na Nzapa. Nyen la amû lege na ala ti sala tongaso? Ti kiri tënë na hundango tënë so, e yeke bâ tapande ti Hénoc na yâ ti article so, nga tapande ti Noé na yâ ti article ti peko.

Hénoc atambela na Nzapa na yâ ti ngoi ti wusuwusu

⁹ Kozo zo so Bible atene lo tambela na Nzapa ayeke Hénoc. Bible atene: “Na peko ti dungo . . . Métusélah, Hénoc atambela na Nzapa.” (Genèse 5:22). Na pekoni, Bible afa ngu ti Hénoc. Tongana a haka ngu ti lo na ti e laso, Hénoc ate gigi ahon e. Me tongana a haka ngu ti lo na ti azo ti ngoi ti lo, ngu ti Hénoc ayeke mingi pëpe. Bible akiri atene: “Hénoc atambela na Nzapa, na lo yeke pëpe, teti Nzapa akamata lo.” (Genèse 5:24). Tongaso, a yeke Jéhovah si akpala Hénoc, so ti tene lo sala si Hénoc akui kozo si awato ti lo alingbi lani ti sala sioni na lo (aHébreu 11:5, 13). Nde na aversê so, Bible asala tënë na ndo ti Hénoc mingi pëpe. Ye oko, na lege ti atënë so e wara nga na ambeni tënë nde so a fa na ndo ti Hénoc, e lingbi biani ti tene so ngoi ti Hénoc ayeke lani ngoi ti wusuwusu.

¹⁰ Na tapande, gi na peko ti so Adam asala siokpari, salango ye ti azo aga tâ sioni mingi. Bible atene na e so Caïn, kozo molenge ti Adam, aga kozo zo ti fango zo tongana lo fâ ita ti lo Abel (Genèse 4:8-10). Na peko ti kuâ ti ngangu so Abel akui, Adam na Eve adü mbeni molenge, na ala zia iri ti lo Seth. Na ndo ti lo Seth ni, Bible atene: “Seth adü molenge nga, na lo di iri ti lo Enos. Na lâ ni kâ, azo akomanse ti di iri ti L’Eternel.” (Genèse 4:25, 26). Mawa ni ayeke so ‘dingo iri ti L’Eternel’ wala ti Jéhovah ni ayeke na mbeni lege so afa atene azo ake lo.b Angu mingi na peko ti dungo Enos, Lémec, mbeni hale ti Caïn, ahe mbeni bia na awali ti lo use. Na yâ ti bia ni, lo tene so ni fâ mbeni maseka-koli ngbanga ti so lo zia kä na tele ti ni. Lémec akiri atene: “Tongana a futa kula ti Caïn lege mbasambala, ka fade a futa kula ti Lémec lege bale-mbasambala na ndo ni mbasambala.”​—Genèse 4:10, 19, 23, 24.

¹¹ Aye so e londo ti sala tënë ni afa so ye ti sioni so Satan aga na ni na yaka ti Eden amû ndo lani hio mingi na popo ti ahale ti Adam. A yeke na yâ ti amara ti aye ni so la si Hénoc aduti prophète ti Jéhovah. Angangu tënë so lo fa andu même ngoi ti e laso. Atënë ti Hénoc so Jude akiri asû pekoni ayeke so: “Bâ, Seigneur mveni aga na azo ti Lo ti be-vulu [saki, NW ] mingi mingi ti fâ ngbanga na li ti azo kue, na ti fa na gigi sioni ti azo kue so ake Nzapa, ngbanga ti kusala kue so ake Lo, so ala sala na lege ti kengo Nzapa, na ngbanga ti tënë ti ngangu kue so awasiokpari so ake Nzapa atene na tele ti Lo.” (Jude 14, 15). Tënë so ayeke ga ande tâ tënë kue na Harmaguédon (Apocalypse 16:14, 16). Me, e lingbi ti tene biani so na ngoi ti Hénoc “awasiokpari so ake Nzapa” ayeke lani mingi, nga tënë so Hénoc afa azö bê ti ala zongo. A yeke tâ ndoye si Jéhovah afa tongana lo zi prophète so kozoni si ala lingbi ti sala sioni na lo.

Ye so amû ngangu na Hénoc ti tambela na Nzapa

¹² Lani na yaka ti Eden, Adam na Eve amä Satan na ala ke yanga ti Jéhovah (Genèse 3:1-6). Molenge ti ala Abel, amû peko ti ala pëpe, na tongaso Jéhovah abâ lo na nzoni lê (Genèse 4:3, 4). Mawa ni ayeke so mingi ti ahale ti Adam asala ye tongana Abel pëpe. Atâa so kue, Hénoc, so a dü lo ngu ngbangbo mingi na peko ti Abel, asala ye tongana Abel. Nyen la asala si Hénoc ayeke nde na mingi ti ahale ti Adam? Bazengele Paul akiri tënë, lo tene: “Na lege ti mabe A kpala Hénoc si lo bâ kui pëpe, na azo awara lo pëpe, teti Nzapa akpala lo; teti kozoni si Nzapa akpala lo, A sala tënë ti témoin ti lo, lo lingbi na lê ti Nzapa.” (aHébreu 11:5). Hénoc ayeke oko ti “atémoin mingi mingi” ti giriri so ayeke apendere tapande ti mabe (aHébreu 12:1). Lo sala gigi ahon ngu 300. Ngu ti lo so ahon fani ota ngu ti mingi ti azo na ngoi ti e. Me a yeke mabe la amû lege na Hénoc ti ngbâ ti sala ye nzoni na yâ ti angu so kue.

¹³ Paul afa mara ti mabe so Hénoc na ambeni wakua ti giriri ayeke na ni lani. Lo sû na mbeti: “Mabe ayeke ye so asala si e hinga biani fade e wara ye so e yeke ku, a yeke ye so afa na e ye so e bâ pëpe ayeke tâ ye.” (aHébreu 11:1). Tongaso, mabe ayeke hingango biani na bê ti e so aye so e yeke ku ni ayeke ga ande tâ tënë. Teti so e yeke ku ye ni na bê kue, a yeke mû lege na e ti hinga ye so a lingbi e bâ ni tongana kota ye na yâ ti gigi ti e. A yeke mara ti mabe so la amû lani lege na Hénoc ti tambela na Nzapa atâa so azo so angoro lo asala tongaso pëpe.

¹⁴ Tâ mabe ayeke luti ka na ndo mbilimbili hingango ye. Hingango ye wa si Hénoc ayeke na ni lani? (aRomain 10:14, 17; 1 Timothée 2:4). Kite ayeke dä pëpe so Hénoc ahinga aye so asi lani na yaka ti Eden. A lingbi ti tene so lo mä tongana nyen azo aduti lani na yâ ti yaka ti Eden ni. Na ndo ni, peut-être na ngoi ni kâ yaka ni so angbâ, atâa so a kanga lege na azo ti lï na yâ ni (Genèse 3:23, 24). Lo hinga nga so ye so Nzapa aye ayeke ti tene amolenge ti Adam asi ndo ti sese na ala sala si sese ni kue aga tongana kozo Paradis so (Genèse 1:28). Na ndo ni, kite ayeke pëpe so tënë ti Hale so Jéhovah amû zendo ti lo anzere na Hénoc. Hale ni so ayeke neka fade li ti Satan na lo yeke zi aye ti sioni so aga na peko ti so Satan ahanda azo (Genèse 3:15). Ni la, kamba ayeke na popo ti tënë so Hénoc afa, so a bata ni na yâ ti buku ti Jude, nga na futingo hale ti Satan. Teti so Hénoc ayeke na mabe, e hinga so lo voro Jéhovah nga lo bâ ândö Jéhovah tongana “Zo ti futa ye na ala so agi Lo” na bê ti ala kue (aHébreu 11:6). Tâ tënë, Hénoc ahinga pëpe aye kue so e hinga laso. Me lo yeke kamême na mbeni hingango ye so asala si lo wara mbeni ngangu mabe. Ngangu mabe so amû maboko na lo ti ngbâ be-ta-zo na yâ ti ngoi ti wusuwusu ni.

E mû tapande ti Hénoc

¹⁵ Ngoi ti e laso ayeke ngoi ti wusuwusu tongana ti Hénoc. Atâa so kue e ye ti nzere na lê ti Jéhovah. Ni la, a lingbi e mû tapande ti Hénoc. A lingbi e gi ti wara tâ hingango ye na ndo ti Jéhovah na e girisa hingango ye ni so pëpe. Me a lingbi e sala mbeni ye nga. E yeke na bezoin ti zia si tâ hingango ye so afa lege na e (Psaume 119:101; 2 Pierre 1:19). A lingbi e zia si ye so Nzapa atene afa lege na e, nga e sala ngangu ti tene abibe ti e na salango ye ti e anzere na lo lakue.

¹⁶ Mbeni ye so afa na e atene ambeni zo asala na Jéhovah na ngoi ti Hénoc ayeke dä pëpe. Me a yeke polele so gi lo oko wala lo na mbeni kete kete wungo ti azo si asala na Jéhovah. Wungo ti e nga ayeke mingi pëpe na yâ ti sese so; me ye so alingbi pëpe ti sala si e woko. Atâa azo asala nyen na e, Jéhovah ayeke mû maboko na e (aRomain 8:31). Hénoc afa lani tënë ti futingo azo so ake Nzapa na mbito pëpe. Atâa a kanga lege na e wala a sala ngangu na e, e nga kue e yeke fa “Tene-nzoni so ti royaume” na mbito pëpe (Matthieu 24:14). Ngu ti Hénoc ayeke lani gbâ ni tongana ti mingi ti azo ti ngoi ti lo pëpe. Ye oko, beku ti lo ayeke na ndo ti aye ti sese ti ngoi ni kâ pëpe, nde na so, lê ti lo ayeke lani na ndo ti mbeni ye so ayeke kota mingi ahon aye ti ngoi ni kâ (aHébreu 11:10, 35). E nga kue lê ti e ayeke gi na ndo gango tâ tënë ti ye so bê ti Jéhovah aye. Ni la e yeke sala ye na sese so ahon ndo ni pëpe (1 aCorinthien 7:31). Nde na so, ngangu ti e nga na aye ti e, e yeke mû ni kue ti sala na kua ti Jéhovah.

¹⁷ Hénoc ahinga so Hale so Nzapa amû zendo ti lo ayeke si lani tâ na ngoi ni so Jéhovah adiko. Laso, a sala ngu 2 000 tongaso awe so Jésus Christ, Hale ni, abâ gigi. Lo mû fini ti lo tongana sandaga ti zi e na gbe ti siokpari. Lo mû lege na e nga na awakua be-ta-zo ti giriri (so Hénoc ayeke na popo ti ala) ti wara fini ti lakue lakue. Hale ni, so laso lo yeke gbia ti Royaume ti Nzapa, atomba Satan na yayu lo bi lo na mbage ti sese ge. Ndani la e yeke bâ aye ti vundu nde nde kue na tele ti e (Apocalypse 12:12). Biani, laso, e hinga aye mingi ahon Hénoc. Ni la, zia e duti na kpengba mabe tongana Hénoc. Zia mabe so e yeke na ni na yâ gango tâ tënë ti azendo ti Nzapa asala ngangu na ndo aye kue so e yeke sala. Na tapande ti Hénoc, zia e tambela na Nzapa atâa so e yeke na ngoi ti wusuwusu.

[Akete tënë na gbe ni]

Mo yeke kiri tënë tongana nyen?

• Ti tambela na Nzapa aye ti tene nyen?

• Ngbanga ti nyen ti tambela na Nzapa ayeke tâ nzoni ye so zo alingbi ti soro?

• Atâa na yâ ti ngoi ti wusuwusu, nyen la amû lege na Hénoc ti tambela na Nzapa?

• Tongana nyen e lingbi ti mû tapande ti Hénoc?

[Ahundango tënë ti manda na ye]

1. Ambeni ye so asala si ngoi ti e akpengba ayeke nyen?

2. Awakua ti Jéhovah ayeke wara akpale wa?

3, 4. Tongana nyen aChrétien ayeke nde na azo ti sese so?

5. Tongana nyen mbeni zo so lo yeke mbilimbili-kue pëpe ayeke tambela na Nzapa?

6, 7. Ngbanga ti nyen ti tambela na Nzapa ayeke tâ nzoni ye so zo alingbi ti soro?

8. Tongana nyen ngoi ti Hénoc na ti Noé akpa tele na ngoi ti e?

9. Nyen la e hinga na ndo ti Hénoc nyen?

10, 11. (a) Na peko ti so Adam na Eve ake yanga, ye ti sioni amû ndo lani tongana nyen? (b) Tënë ti nyen la Hénoc afa lani, na azo ni asala ye tongana nyen?

12. Nyen la asala si Hénoc ayeke nde na azo ti ngoi ti lo?

13. Mabe ti Hénoc ayeke lani tongana nyen?

14. Aye so peut-être Hénoc ahinga ni mbilimbili si mabe ti lo aluti na ndo ni ayeke so wa?

15, 16. Tongana nyen e lingbi ti sala ye tongana Hénoc?

17. Aye so e hinga so Hénoc ahinga pëpe ayeke so wa? Tongaso, a lingbi e sala nyen?

[Foto na lembeti 15]

“Hénoc atambela na Nzapa” ndali ti so lo yeke na mabe

[Foto na lembeti 17]

E hinga biani so azendo ti Jéhovah ayeke ga ande tâ tënë

[Lingu ti foto na lembeti 13]

Wali so na mbage ti peko: FAO photo/B. Imevbore; collapsing building: San Hong R-C Picture Company