Ala sala na aita ti ala Chrétien na akodoro wande
MO MÄ awe tënë ti awakua wala ala so ayeda ti gue na ambeni kodoro wande ti mû maboko na yâ lekengo ada teti kusala ti vorongo? A yeke aTémoin ti Jéhovah so ayeda ti mû ngoi nga na akode ti ala ti mû maboko na yâ alekengo ada so amû lege ti pete na ti kangbi ambeti so afa tokua ti Royaume so ayeke na yâ Bible. Aita tongaso, so ayeda na bê ti ala kue ti sala akusala so, ayeke mû maboko nga na yâ lekengo aDa ti Assemblée na aDa ti Royaume, so a yeke sala na kusala ti fa tënë ti Bible na azo. Ti fadeso, awakua so ayeke mû maboko na yâ apialo ti lekengo ada na yâ akodoro 34, mbilimbili na ando so mosoro ayeke dä mingi pëpe. Akpale na angia wa mbilimbili awakua so awara na ngoi so ala yeke sala na aita ti ala Chrétien na yâ akodoro wande? Ala bâ ti ala “kusala ti nzoni-kue” so ala yeke sala ni tongana nyen? (Apocalypse 7:9, 15, NW). Ti wara kiringo tënë na ni, zia e bâ ambeni wakua ni so ayeke sala kusala ti ala na Mexique.
Kozo singo ni na Mexique ti awakua ti lekengo ada teti kusala ti vorongo na so alondo na akodoro wande ayeke na nze ti mai, 1992. Kete na pekoni, ala mû li ni na kusala ti kono yâ ti filiale ni so ayeke bâ ndo na ndo kusala ti aTémoin ti Jéhovah na Mexique. Pialo so a zia na sese ti kono yâ ti da ti filiale ni aleke ti sala afini da 14 na tele ni; na popo ni a yeke wara ada ti lango teti ala so ayeke sala kusala na filiale ni, mbeni ndo so a yeke pete ambeti dä, nga mbeni da so a yeke zia abiröo ti awakua ni dä.
Ti mû maboko si pialo ti lekengo da so ague nzoni, awakua so wungo ti ala ahon 730, so alondo na Canada, na Grande-Bretagne, na Amerika, nga na ambeni kodoro wande ayeda ti ga ti sala kusala maboko na maboko na tele ti awakua ngbangbo mingi so alondo na ambage nde nde ti Mexique. Na ndo ni, aTémoin so wungo ti ala ahon 28 000 ti akongregation 1 600 tongaso so alango ndulu na filiale ni amû maboko na yâ kusala ti lekengo ye so na anda-yenga oko oko. Ala kue ayeke ndulu ti sala kusala na ti mû akode ti ala ti sala na kua ni na hundango pëpe ti tene a futa mbeni nginza na ala. Ala bâ so a yeke mbeni matabisi teti ala ti sala na Jéhovah na lege so. Na ngoi so kusala ti lekengo da ni ayeke tambela, ala bata na li ti ala tënë so a sû ni na gbe ti yingo ti Nzapa na so a wara na Psaume 127:1; versê so atene: “Tongana L’Eternel asala da ni pëpe, kusala ti ala so asala da ni ayeke senge senge.”
Akpale so ala wara
Akpale wa awakua so ague na akodoro wande ngbanga ti kusala ti lekengo ada teti kusala ti vorongo atingbi na ni na ngoi so ala yeke na yâ ando so? Zia e fa ambeni tënë ti bê ti ambeni na popo ti ala. Curtis na Sally, mbeni koli na wali ti Amerika, amû mbage ti ala na yâ apialo ti lekengo ada teti kusala ti Royaume na Zamani, Inde, Mexique, Paraguay, Roumanie, Russie, Sénégal, na Zambie. Curtis atene: “Kozo kpale ti e ayeke ti zia molenge ti e ti wali so ayeke sala kusala tongana pionnier [wakua ti ngoi kue ti aTémoin ti Jéhovah] ti hon, nga ti zia kongregation ti e so e maï dä na Minnesota. Mbi na wali ti mbi e sala kusala na yâ kongregation so teti angu 24, na e ye lani kongregation ti e ni so mingi.”
Sally atene: “Ti duti na mbeni ndo so mo hinga ni kozo pëpe ayeke kete ye pëpe, peut-être même a yeke ngangu mingi teti mbeni wali ti duti na ndo so ahon ti mbeni koli; me mbi manda so lege ayeke dä ti leke ye na yâ fini ti mbi ti duti na yâ mara ti ando tongaso. Mbi manda même ti kanga bê tongana mbi bâ gbâ ti akete nyama!” Lo tene nga na ndo ni: “Na mbeni kodoro, li ti e bale-oko si e kangbi mbeni da oko so place ti tongo kobe ayeke dä pëpe, na a yeke wara dä gi aplace ti sukulango ngu use senge. Ge so, mbi manda ti duti na be-nze-pepe mingi.”
Ti manda mbeni fini yanga ti kodoro ayeke mbeni kpale nde so a hunda ti sala ngangu nga ti duti na tâ be-ti-molenge. Sharon, so asala kusala na tele ti koli ti lo na yâ apialo ti lekengo ada teti kusala ti vorongo na yâ akodoro nde nde, atene: “Tongana mo hinga pëpe yanga-ti-kodoro so mo yeke sala kusala dä, a yeke mbeni kpale teti mo. Na tongo nda ni, a yeke ngangu ti ga ndulu na aita ti mo ti koli na ti wali na lege ti yingo tongana mo lingbi pëpe ti fa na ala atënë ti bê ti mo. So ayeke tâ ye ti sala si zo anze. Me aita so e wara na yâ akodoro so a tokua e dä ayeke tâ na be-nze-pepe mingi na mbage ti e, na ala bi bê ti ala ngangu na ndo dutingo ti e. A ninga mingi pëpe na pekoni, e to nda ni kamême ti sala lisoro na popo ti e.”
Ti mû mbage na kusala ti fango tënë ahunda bê so akpengba
Awakua so agbanzi aye mingi na tele ti ala mveni, na tongana ala mû mbage mingi na yâ guengo na li ni ti kusala ti lekengo ada teti kusala ti vorongo, ala bâ so ala yeke kozoni kue awafango nzo tënë ti Royaume ti Nzapa. Tongaso, ala mû mbage ti ala kue na kusala ti fango tënë so ayeke tambela na yâ akongregation so a zia ala dä. Åke na wali ti lo Ing-Mari amû mbage ti ala lani na apialo ti lekengo ada teti kusala ti vorongo na Guadeloupe, na Malawi, na Mexique, nga na Nigéria. Ala yeda so ti fa tënë na mbeni yanga nde na yâ mbeni kodoro wande ahunda ti duti na bê so akpengba.
Ing-Mari atene: “Na tongo nda ni, e yeke zi yanga mingi pëpe ti fa tënë, teti lakue a yeke zia e na tele ti aTémoin ti kodoro ni, na ti tene kamene agbu e pëpe, fani mingi e yeke zia ala si afa tënë. Ye oko, na mbeni ndapelele, e mû desizion ti gue na fango tënë gi e mveni. Tongana e yeke gue na fango tënë ni, tele ti e ayeke dö na bê ti e apika ngangu. E tingbi na mbeni maseka-wali so amä mbi tongana mbi yeke fa na lo tënë so mbi leke kozoni awe. Mbi diko mbeni versê na mbi zia ambeti. Na pekoni, wali ni atene: ‘Mbi ye ti hunda mbeni ye. Mbi hinga mbeni fami ti mbi so ayeke manda Bible na aTémoin ti Jéhovah. Tongana nyen mbi kue mbi lingbi ti sala ti tene a manda na mbi?’ Bê ti mbi adö, na mbi hinga tënë ti tene pëpe. Tongaso, mbi gi mbeni tënë hio ti tene, na mbi hunda lo ti manda Bible na lo.”
Ing-Mari atene na pekoni: “Tara ti bâ gi ngia so mbi wara nga singila ti mbi na Jéhovah teti so lo hiri deba nzoni na ndo e ndali ti so e mû li ni ti sala ye na e sala nzara ti kangbi tâ tënë.” Wali so ague na li ni nzoni na lo wara batême tongana Témoin na mbeni kota bungbi ti district na gbata ti Mexico. Åke na Ing-Mari afa peko ti kusala ti ala ti fango tënë na ndulu tënë tongaso: “E yekia mingi kusala ti e ti mû mbage na apialo nde nde ti lekengo ada teti kusala ti vorongo. Me ye oko pëpe alingbi ti hon ngia na nzerengo tele ti mû maboko na mbeni zo ti yeda na tâ tënë.”
Mbeni bibe ti gbanzi ye na tele
Tâ tënë, awakua so azia sewa ti ala na akamarade ti ala teti mbeni kusala na kodoro wande ayeke gbanzi tele ti ala na aye mingi ti sala na aita ti ala na akodoro so; me ala wara nga angoi ti ngia so ahon atanga ni kue. A yeke angoi ti ngia wa?
Howard, so asala kusala na tele ti wali ti lo Pamela na Angola, Colombie, Équateur, Salvador, Guyane, Mexique, na Porto Rico atene: “A yeke ye ti matabisi mingi ti tingbi na aita ti koli na ti wali ti akodoro nde nde, na ti bâ na lê ti e mveni tâ kamba ti ndoye so ayeke na popo ti aita ti e ti ndo sese kue. E diko ye na ndo sewa ti aita so fani mingi, me tongana mo bâ ni tongaso mo mveni na mo sala kusala na ambeni zo so ayeke na angobo ti salango ye nde nde, na so alondo na ando nde nde, mo yeke yekia biani bungbi ti aita so ahon ti kozo.”
Gary, so amû maboko lani ti leke ada teti kusala ti vorongo na Colombie, na Costa Rica, na Équateur, na Mexique, nga na Zambie, abâ nga so programme so aga na lo aye ti nzoni mingi. Lo tene: “Fango lege so mbi wara na yâ angu so ahon, tongana mbi sala kusala na tele ti aita biazo na yâ afiliale ti akodoro so a tokua mbi dä amû maboko na mbi ti lingbi kue ti hon ndo ti akpale so mbi wara na yâ ando so mbi gue dä. A kpengba mabe ti mbi mingi ngbanga ti so a mû lege na mbi ti bâ biani dutingo beoko so ayeke na yâ bungbi ti Jéhovah na ndo sese kue; na a yeke mbeni dutingo beoko so ahon na li ti akatikati ti yanga ti kodoro, ti mara wala ti angobo ti salango ye.”
Na oko ngoi ni, a hunzi kusala ti konongo yâ ti filiale ti Mexique, na a zi yanga ti ada ni gi na yâ ngu ni so. Ndali ti ndoye so ala yeke na ni na mbage ti Nzapa, awakua so ayeda ti gue na ambeni kodoro wande ti leke ada teti kusala ti vorongo Jéhovah amû mbage nga mingi na guengo na li ni ti tâ vorongo na Mexique nga na ambeni ndo nde. Bibe ti ala ti duti ndulu ti sala na aita ti ala Chrétien na akodoro wande nga ti gbanzi aye na tele ti ala ti sala tongaso ayeke mbeni ye so amû ngia mingi na aTémoin ti Jéhovah na ndo sese kue.
[Foto na lembeti 25]
Équateur
[Foto na lembeti 25]
Colombie
[Foto na lembeti 25]
Angola
[Foto na lembeti 26]
Ndo so a lu akongö dä ti filiale ni
[Foto na lembeti 26]
Kusala ato nda ni na yâ afini ndo so a leke na yâ filiale ti Mexique
[Foto na lembeti 26]
Na gbe ni ge: Ambeni ita so ayeke sala kua na yâ Ndokua ti lekengo ada; na peko ti ala, a lingbi ti bâ ambeni fini ndo ni so a leke
[Foto na lembeti 27]
Awakua so amû tele ti ala ti leke ada teti kusala ti vorongo na akodoro wande ayeke na ngia ti mû mbage ti ala na kusala ti fango tënë na yâ akongregation ti kodoro ni