Batango Da ti Royaume nzoni: Mbeni kota mbage ti vorongo ti e
1. Kota kusala wa a sara ni na yâ ti ngu mbasambala so ahon? Ye wa angbâ ti tene a sara?
1 Na yâ ti ngu mbasambala so ahon, a leke aDa ti Royaume 7 137, afini ni nga na angbene ni, so na popo ni 420 ayeke ti akodoro so ayeke diko Kusala ti Royaume so. E kiri singila mingi na ngangu kusala ti aita so ayeke na yâ ti abungbi ti lekengo Da ti Royaume nga na azo kue so amû maboko na ala. A sara kusala mingi na a mû nginza mingi ti leke na e anzoni ndo so alingbi na e na so e lingbi ti sara bungbi dä. Zia si e fa so e bâ ni na nene ni na mungo mbage ti e na batango aDa ti Royaume ti e nzoni. Tongana nyen e lingbi ti mû maboko na kusala so ayeke kota mbage ti kusala so e sara na Jéhovah?—Apoc. 7:15.
2. A lingbi e bâ Da ti Royaume ti e tongana nyen? A lingbi e sara nyen ndali ni?
2 Nzoni bango ndo na ndo Da ti Royaume: A lingbi e bâ Da ti Royaume ti e tongana nyen? Tongana “ye” ti ngere ngangu so Christ amû na e na lege ti ngbâa be-ta-zo na ti ndara (Mat. 24:42-47, MN ). Tongaso, a yeke nzoni e bâ ni tongana mbeni kota ye ti mû nginza ndali ni na ti sara si a duti na saleté pëpe, a duti pendere nga nzoni. Na yâ ni nga na gigi ni, a lingbi Da ti Royaume amû gonda na bungbi ti Jéhovah. Ti sara ni, e hunda na azo kue ti kongregation ni ti mû akode ti ala ti sara na kusala ti batango Da ti Royaume ti ala nzoni (Ps. 110:3). A lingbi azo kue aduti nduru ti sara kusala ni maboko na maboko (Ps. 133:1). A lingbi tënë ti batango “ye” ti Christ abâ zo kue, amaseka na ambakoro. A yeke nzoni a-ancien amû li ni na ala fa na aita ti duti na nzoni bango ndo na ndo Da ti Royaume na lege ti tënë ti yanga ti ala nga na tapande ti ala.—1 Pi. 5:3.
3, 4. Akusala wa a lingbi a sara: a) yenga oko oko? b) nze oko oko? c) ngu oko oko?
3 Lege ti leke mbeni kapa ti kusala ti batango Da ti Royaume nzoni: Ngbâa be-ta-zo na ti ndara amû awango, na lo fa ye na a-ancien nga na asurveillant so ague na ndo nde nde na ndo lege ti bata Da ti Royaume nzoni. A fa na ala so a lingbi a leke yâ ti da ni lakue na peko ti bungbi. A fa nga na ala so a lingbi ala bâ si nze oko oko a leke yâ ni mingi ahon ti so a sara yenga oko oko, nga ti bâ kota kusala so a lingbi a sara ngu oko oko. Yenga oko oko, a lingbi a leke yâ ti da ni lakue na peko ti bungbi, so ti tene ti balêe yâ ni kue nga na ndo so a sara use ekole dä, ti sukula yâ ti kabine, ti zi saleté na tere ti abanc wala achaise, ti ando so a yeke tanda ambeti dä nga na tableau so a zia ambeti dä. A hunda nga ti bâ lege ti ndo so a yeke tuku saleté dä. Groupe ti mandango buku oko wala use alingbi ti sara kusala so yenga oko oko. Na ngoi ti ngu, a hunda peut-être ti sara kua mingi ahon so ti tene yâ ti da ni angbâ nzoni.
4 Na ndo ti kapa so, akusala ti nze oko oko alingbi ti duti tongaso: ti bâ lege ti akeke, afleur na apere, amur, afenêtre na ayanga-da, abouton ti wâ, akamba ti micro nga na radio, lavabo wala seau ti ngu, kabine, asanduku ti offrande, na ambeni ye nde. Na peko ti akusala so, a yeke nzoni mbeni ancien asû na mbeti aye so a sara, nga lo sû maboko ti lo na gbe ni si lo tokua ni na komité so ayeke bâ lege ti Da ti Royaume wala na bungbi ti a-ancien. Nda ni ayeke ti fa so a sara kusala ni awe na ti fa wala mbeni ye ti kusala ni amanke wala ti fa ndo so a lingbi a sara ye dä hio. Na ndo ni, fani oko na yâ ti ngu oko, a yeke sara mbeni kota kusala. Kusala kue so a fa ti sara nze na nze, a lingbi a sara ni kue nga na ambeni, tongana ti leke akete ye so abuba na ti zia mbamba na tere ti da ni. Akongregation kue so asara bungbi na yâ ti Da ti Royaume ni alingbi ti leke mbeni kapa ti tene a sara kota kusala ti ngu oko oko so kozoni na lango ti Mémorial.
5, 6. a) Ye wa e manda na 2 Gbia 22:5, 6 nga na Zo-ti-fa-tene 10:18? b) Tongana nyen e lingbi ti sara ye alingbi na 2 Chronique 24:5 na ndo tënë ti batango Da ti Royaume nzoni?
5 Mbeni kota mbage ti kusala ti batango Da ti Royaume nzoni ayeke dutingo nduru ti leke hio ndo kue so ye abuba dä, tongaso si a mû nginza mingi pëpe ti sara ni mbeni lâ na ti tene kpale asi na zo pëpe. Ti tâ tënë ni, atâa da so a leke akpengba tongana nyen, mbeni lâ a lingbi a bâ lege ni. A leke ândö temple ti Jérusalem na akota nene tênë. Me a si na mbeni ngoi, a hunda ti leke pekoni ndali ti so amur ni ato nda ti suru (2 aGbia 22:5, 6). Gbia ti kodoro ni atene na aprêtre ni: ‘I gue na akodoro ti Juda kue, i bungbi nginza na tïtî azo ti Israël kue ngu na ngu ti leke na da ti Nzapa ti i; na i sara ye so fade fade.’ (2 Chron. 24:5). E lingbi ti sara legeoko laso tongana nyen?
6 Ti bata Da ti Royaume nzoni, a lingbi a leke hio ye kue so a hunda ti leke tongana a bâ ni. A-ancien na asurveillant so ague na ndo nde nde ayeke tambela ti bâ da ni na ti zia na mbeti ye kue so a lingbi a bâ lege ni. Na pekoni, a lingbi a ku pëpe juska na ngoi ti Mémorial si a sara ni. I girisa pëpe: “Na lege ti goigoi keke ti da atï; na lege ti sara kusala pëpe na maboko, li ti da ayuru.” (Zo-ti. 10:18). Legeoko tongana ti so a hunda nginza mingi pëpe ti mû yanga ti bongo na ngu na savon ti lungula na saleté na tere ti mur ahon ti zia fini mbamba na tere ti da ni kue, ti leke mur so asuru ayeke ngangu pëpe ahon ti leke ni na peko ti so a tï.—Bâ km 8/03, lembeti 3, 4.
7. A yeke nzoni azo wa amû li ni tongana a ndu tënë ti batango Da ti Royaume nzoni? Ye ti pekoni ayeke duti ande so wa?
7 Ye so zo oko oko alingbi ti sara: A yeke nzoni a-ancien oko oko kue na aserviteur ti mungo maboko amû mbage ti ala na akusala kue so a leke ndali ti kongregation. Tongana ala sara ni, fade kongregation ayeke mû tapande ti ala (aHéb. 13:7). Azo kue ayeke duti ande na nzara ti mû ngoi ti ala, ngangu ti ala na kode ti ala ndali ti kapa ti batango Da ti Royaume nzoni. Ala yeke bâ ni tongana mbeni mbage ti kusala so ala yeke sara na Jéhovah (Mat. 22:39; 1 aCor. 16:1, 2). E hinga so tongana a bata nzoni ando ti tâ vorongo, aDa ti Royaume ti e ayeke ngbâ ande lakue ti mû gonda na Jéhovah laso nga teti angoi mingi so ayeke ga.