Mä ye so yingo atene!

“Lo so ayeke na mê ti mä, a lingbi lo mä ye so Yingo atene na a-église [“akongregation”, NW].”​—APOCALYPSE 3:⁠22.

A LINGBI awakua ti Jéhovah adengi mê ti mä atënë so Jésus Christ atene na gbe ti yingo ti Nzapa na akongregation mbasambala so a sala tënë ti ala na yâ mbeti ti Apocalypse. Biani, na yâ atokua ni oko oko, a yeke wara wango so: “Lo so ayeke na mê ti mä, a lingbi lo mä ye so Yingo atene na a-église [“akongregation”, NW].”​—Apocalypse 2:7, 11, 17, 29; 3:6, 13, 22.

² E bâ awe atënë ti Jésus na a-ange wala asurveillant ti Ephèse, ti Smyrne, na ti Pergame. Tongana nyen si e lingbi ti wara ye ti nzoni na peko ti ye so yingo vulu atene na tanga ti akongregation osio ni?

Tënë ti Christ na ange ti Thyatire

³ “Molenge ti Nzapa” agonda kongregation ti Thyatire, me lo zingo nga na lo (diko Apocalypse 2:18-29). Thyatire (so laso a hiri ni Akhisar) ayeke mbeni gbata so a leke ni na tele ti mbeni ngu so ague atï na yâ bale ti Gediz (so a hiri ni giriri Hermus) na mbage ti do ti Asie Mineure. A hinga gbata so lani mingi teti gbâ ti aye ti lo so a sala na kode. Azo ti lekengo peko ti anzoroko ti abongo asala kusala na gunda ti akete keke ti garance (so ayeke wara ngu ti bengba na yâ ni) ti sala na pourpre wala abengba bongo ti ngele ngangu so azo ahinga ni mingi. Lydie, so aga Chrétien na ngoi so Paul ayeke na kodoro ti Philippes na Grèce, ayeke lani ‘mbeni wali ti kodoro ti Thyatire so kua ti lo ayeke ti kango abengba bongo so ngele ni ayeke ngangu mingi’.​—Kusala 16:12-15, Buku ti Nzapa, Fini Mbuki, 2001.

⁴ Jésus agonda kongregation ti Thyatire teti anzo kusala ti lo, ndoye ti lo, mabe ti lo, gbungo ngangu ti lo, na kusala ti lo na yâ fango tënë. Biani, ‘kusala ti ala ti nda ni ahon kusala ti ala ti kozoni.’ Ye oko, atâa aye so e sala kozo ayeke nzoni tongana nyen, a lingbi e bâ lakue tambela ti e na nene mingi.

⁵ Kongregation ti Thyatire ayeke kanga lê lani na ndo vorongo yanda, fango ye ti wataka, na pitan. Na popo ti azo ti kongregation so, a yeke wara lani “wali so Jézabel”; peut-être a yeke lani mbeni bungbi ti awali so asalango ye ti ala akpa ti sioni Gbia-wali Jézabel ti amara bale-oko ti Royaume ti Israël. Ambeni wagingo nda ti ye atene so ‘aprophète-wali’ ti Thyatire ayeke tara lani ti gboto aChrétien na yâ vorongo anzapa nga anzapa-wali so ambeni wadengo-buze abungbi tele ti voro ni, nga ti mû mbage na amatanga so a hunda ti mû kobe na sandaga na ayanda. Zia si mbeni wali so atene ni yeke prophète agi lâ oko pëpe ti sala ngangu na ndo amba ti lo na yâ kongregation ti aChrétien laso!

⁶ Christ aleke tele ti lo giriri ti ‘bi wali Jézabel na ndo mbeni tange ti kobela, na ti bi ala so asala lango-sioni na lo na yâ kota ye ti vundu, tongana ala ke lege ti kusala ti lo pëpe.’ A lingbi asurveillant atï pëpe na gbe ti sioni fango ye tongaso, nga a lingbi ala zia pëpe si ambeni zo asala sioni ngangu tongaso na ndo ala. A lingbi Chrétien oko pëpe atï na yâ salango pitan na lege ti yingo na ti mitele wala abi tele na yâ vorongo yanda ti hinga wala “tâ nda ti ye ti Satan” ayeke biani sioni. Tongana e sala ye alingbi na agbotongo mê ti Jésus, ‘fade e yeke bata ye so ayeke na e’, na fade siokpari ayeke hon ndo ti e pëpe. Ngbanga ti so ala ke asalango ye, anzara ti aye ti pitan, nga na abibe so ake Nzapa, ala so a sa yingo na ndo ti ala na so azingo ala na popo ti akuâ ayeke wara ‘ngangu ti komande na ndo amara’, na fade ala bungbi oko na Christ ti fâ yâ ti amara so kue kete kete. A yeke wara na yâ akongregation ti ngoi ti laso atongoro na lege ti fä, na fade a yeke mû na ala so a sa yingo na ndo ti ala “Tongoro Ti Ndapelele so aza”, so ayeke Fini-koli ni, Jésus Christ, na ngoi so a yeke zingo ala na popo ti akuâ ti wara fini na yayu.​—Apocalypse 22:16.

⁷ A gboto mê ti kongregation ti Thyatire ti tene lo kanga lê pëpe na ndo sioni ngangu so awali so abele tâ tënë ayeke sala dä. Tokua so Christ amû ni na gbe ti yingo ti Nzapa na kongregation ni amû maboko laso na awali so akpe mbito ti Nzapa ti bata place so Nzapa amû na ala na yâ kongregation. Ala yeke gi ti komande pëpe na ndo akoli nga ti handa pëpe aita-koli ti tï na yâ pitan na lege ti yingo nga na ti mitele (1 Timothée 2:​12). Nde na so, mara ti awali tongaso azia tapande ti anzoni salango ye na kusala so amû gonda na Nzapa (Psaume 68:​12; 1 Pierre 3:​1-⁠6). Tongana kongregation ni abata ye so lo yeke na ni, so ti tene atënë ti mabe na tambela so ayeke sioni pëpe, nga kusala ti Royaume so ayeke tongana mosoro, fade Christ ayeke ga ti mû deba nzoni na lo, me pëpe ti fâ ngbanga na ndo lo.

Tënë ti Christ na ange ti Sardes

⁸ Kongregation ti Sardes ayeke lani na kota nzara ti wara mungo maboko hio ngbanga ti so lo kui na lege ti yingo (diko Apocalypse 3:1-6). Sardes ayo lani na Thyatire akilomètre 50 na mbage ti mbongo ni; a yeke lani mbeni gbata so awu mingi na kusala. Kusala ti dengo buze, nzoni maïngo ti ale-kobe na ndo ni, nga abongo ti laine na atapis so a yeke leke kâ asala si Sardes aga mbeni gbata ti mosoro mingi so na mbeni ngoi, azo 50 000 tongaso alango dä. Wasungo-mbaï Josèphe atene so na kozo siècle kozoni na ngoi ti e, na yâ gbata ti Sardes, a yeke wara gbâ ti aJuif dä. Na popo ti aye ti giriri ti gbata ni so angbâ laso, a yeke wara mbeni synagogue nga na mbeni temple teti nzapa-wali Artémis (Diane) ti azo ti Ephèse.

⁹ Christ atene lani na ange ti kongregation ti Sardes: “Mbi hinga kusala ti mo; ala tene mo yeke na fini, me mo kui awe.” Ka tongana a hinga e tongana mbeni zo so lê ti lo ayeke na zingo ni na lege ti yingo, me si mingi ni, e yeke lango na lege ti akungba ti e ti Chrétien, e yeke sala akusala ti e gi tongaso, na e ‘ga ndulu ti kui’ na lege ti yingo, fade e yeke sala nyen? Tongana a yeke tongaso, a lingbi e ‘dabe e na tënë [ti Royaume] so e wara na e mä awe’, na a lingbi e sala si ngangu so e mû ni na yâ kusala ti Nzapa akiri ahon ti kozo. Biani, a lingbi e to nda ti mû mbage ti e na bê kue na abungbi ti aChrétien (aHébreu 10:24, 25). Christ amû gbotongo mê so na kongregation ti Sardes: “Tongana mo bata pëpe, fade Mbi ga tongana wanzi, na fade mo hinga pëpe l’heure ni so Mbi yeke ga na ndo mo.” Tënë so abâ nga e laso? Na yâ ngoi kete, fade e yeke kiri tënë teti aye so e sala.

¹⁰ Même na yâ mbeni kongregation tongana ti Sardes so, a lingbi ti wara ambeni zo kete ‘so asala si bongo ti ala aga sioni pëpe na so alingbi ti tambela na Christ na vulu bongo, teti ala lingbi.’ Ala bata lakue aye kue so amû lege ti hinga ala tongana aChrétien, na salango kue ti duti na sioni oko pëpe na lege ti salango ye na ti vorongo ti sese so (Jacques 1:27). Tongaso, fade Jésus ‘ayeke mbô iri ti ala kete pëpe na mbeti ti iri ti azo so ayeke na fini; me fade lo sala tënë ti iri ti ala na gigi na gbele Babâ ti lo nga na a-ange ti Lo.’ Teti so a bâ bungbi ti ala so a sa yingo na ndo ti ala tongana bungbi ti fini-wali ti Christ so alingbi biani ti tambela na lo, fade a yeke yü ala na bongo ti lin ti nzoni mingi so aza, a vulu kue na so aduti fä ti asalango ye ti mbilimbili ti azo ti nzoni-kue ti Nzapa (Apocalypse 19:8). Apendere matabisi ti kusala so ayeke ku ala na yayu apusu ala ti hon sese so na ngangu. Adeba nzoni mingi ayeke ku nga ala so ayeke wara ande fini ti lakue lakue na sese. A sû nga iri ti ala na yâ mbeti ti fini.

¹¹ Zo oko na popo ti e aye pëpe ti duti na yâ mara ti sioni dutingo na lege ti yingo ti kongregation ti Sardes so. Me ka tongana e bâ so lango ayeke sala e na lege ti yingo, e yeke sala tongana nyen? Teti nzoni ti e, a lingbi e sala ye hio ti leke aye si a ga nzoni. A lingbi ti si so e yeke sala nzara ti aye so ague nde na ti Nzapa wala e yeke gue na abungbi na e yeke sigigi na fango tënë mingi tongana ti kozo pëpe. Tongana a yeke ni la, zia e sambela na bê kue ti gi mungo maboko ti Jéhovah (aPhilippien 4:6, 7, 13). Ti diko na ti manda lakue Bible na ambeti so ‘wabatango ye be-ta-zo’ asala ayeke mû lege ande na e ti lango pëpe na lege ti yingo (Luc 12:42-44). Na salango tongaso, fade e yeke duti tongana ala ti Sardes so Christ ayeda na ala, na fade e yeke duti mbeni deba nzoni teti aita ti e na yâ vorongo.

Tënë ti Christ na ange ti Philadelphie

¹² Jésus agonda lani kongregation ti Philadelphie mingi (diko Apocalypse 3:7-13). Philadelphie (so a hiri ni laso Alasehir) ayeke giriri kota gbata ti mosoro mingi ti mbeni ndo so a yeke leke vin dä na mbage ti do ti Asie Mineure. Biani, nzapa so azo ni mingi ayeke voro ayeke Dionysos, nzapa ti vin. Ti bâ ni nzoni, aJuif so ayeke na Philadelphie atara gbä ti pusu aChrétien so ayeke aJuif na ndo ni so ti bata ambeni salango ye so Ndia ti Moïse ahunda, wala ti kiri na mbage ti asalango ye so.

¹³ Christ “ayeke na clé ti David”, na tongaso a mû na lo aye kue so andu Royaume ni nga na ngangu ti bâ ndo na ndo da ti azo ti mabe (Esaïe 22:22; Luc 1:32). Jésus asala kusala lani na clé so ti mû akungba na amatabisi ti Royaume na aChrétien so ayeke na Philadelphie ti giriri nga na ambeni ndo nde. Ti londo na ngu 1919, lo zia na gbele ‘wabatango ye be-ta-zo’ mbeni “kota lege” so ague ti si na kusala ti fango tënë ti Royaume, na so wato oko alingbi pëpe ti kanga ni (1 aCorinthien 16:9; aColossien 4:2-4). Biani, a kanga lege ti amatabisi ti Royaume ni na ala so ayeke ti “synagogue ti Satan”, teti so ala yeke pëpe ti Israël ti yingo.

¹⁴ Jésus amû lani na aChrétien ti Philadelphie ti giriri zendo so: “Teti mo bata tënë ti Mbi na bê so azia pëpe, fade Mbi bata mo nga si mo si pëpe na yâ l’heure ti ye so atara azo, ye so ayeke ga na ndo sese kue ti tara ala so asala kodoro na ndo sese.” Ti fa tënë ahunda na mbage ti zo ti duti na mara ti bê so azia pëpe wala gbungo ngangu so Jésus afa ni giriri. Lo tï lâ oko pëpe na gbe ti wato, me lo ngbâ lakue ti sala ye so bê ti Babâ ti lo aye. Ni la, a zingo Christ na popo ti akuâ ti wara fini so alingbi ti kui pëpe na yayu. Tongana e ngbâ be-ta-zo na desizion ti e ti voro Jéhovah, na e mû mbage ti Royaume na lege ti fango nzo tënë, fade a yeke bata e si e tï pëpe na yâ ngoi ti tara ti fadeso, “l’heure ti ye so atara azo”. Fade e yeke ‘gbu ngangu’ ye so Christ amû na e na salango kue si aye ti Royaume amaï. Na salango tongaso, fade ala so a sa yingo na ndo ti ala ayeke wara na yayu mbeni couronne so alingbi ti fa ngele ni pëpe, na azo ni so aduti be-ta-zo na tele ti ala ayeke wara ande fini ti lakue lakue na sese.

¹⁵ Christ atene: “Zo so ahon na ngangu, fade Mbi sala si lo ga pilier na yâ Temple ti Nzapa ti Mbi, . . . na fade Mbi sala na ndo lo iri ti Nzapa ti Mbi, na fini iri ti Mbi, na iri ti kodoro ti Nzapa ti Mbi, fini Jérusalem so alondo na yayu na ndo ti Babâ ti Mbi, azu na sese.” A lingbi asurveillant so a sa yingo na ndo ti ala agbu koko ti tâ vorongo. A lingbi ala fa so ala lingbi ti ngbâ lakue na yâ “fini Jérusalem” na fango tënë na ndo Royaume ti Nzapa nga na batango tele ti ala si ala duti na sioni oko pëpe na lege ti yingo. Ye so ayeke kota ye mingi tongana ala ye ti duti apilier na yâ temple ti gloire so ayeke na yayu na tongana ala ye ti yô iri ti gbata ti Nzapa tongana azo ti kodoro ni kâ na yayu, na tongana ala mû iri ti Christ tongana azo so ayeke ga fini-wali ti lo. Na biani, a lingbi ala duti na mê ‘ti mä ye so yingo ayeke tene na akongregation’.

Tënë ti Christ na ange ti Laodicée

¹⁶ Christ azingo na kongregation ti Laodicée so abâ ti lo so dutingo ti lo alingbi awe (diko Apocalypse 3:14-22). Laodicée ayo lani akilomètre 150 na mbage ti tö ti Ephèse na a yeke na mbeni ndo so akota lege ti dengo buze ti azo atingbi tele dä na yâ popo-hoto ti Ngu ti Lycus, ndo so kobe alë mingi dä; Laodicée ayeke mbeni gbata so azo aleke aye dä mingi so aga na mosoro, na ayeke mbeni ndo ti nginza. Azo ahinga lani mingi abongo so a sala ni na vuko laine ti ndo ni. Teti na Laodicée a yeke wara mbeni kota ekole ti kaïngo kobela, a yeke peut-être na yâ gbata so si a leke yorö ti lê so a hinga ni na iri ti “fuku ti Phrygie”. Asclépios, mbeni nzapa ti kaïngo kobela, ayeke oko ti anzapa ti gbata ni so azo mingi ayeke voro. A lingbi ti tene so Laodicée ayeke lani na wungo ti aJuif mingi dä, na ambeni na popo ti ala ayeke na mosoro mingi.

¹⁷ Na salango tënë na kongregation ti Laodicée na lege ti “ange” ti lo, Jésus asala tënë na komandema tongana “tâ Témoin ti biani, Kozo ti ye kue so Nzapa acréé”. (aColossien 1:13-16). A zingo lani na aChrétien ti Laodicée teti so ala yeke “dê pëpe, wala wâ pëpe” na lege ti yingo. Teti so wâ ti ala ayeke gi kete kete, Christ ayeke ndulu ti dë ala na gigi. A lingbi fade ti duti ngangu pëpe na ala ti gbu nda ti tënë so. Na yâ Hiérapolis so ayeke ndulu na Laodicée, a yeke wara angu ti wâ so alondo na gbe ti sese, na Colosses ayeke ti lo na mbeni ngu so adë dengo. Ye oko, teti so a hunda ti gue na ngu ni juska na Laodicée so ayo na ando ni, peut-être na ngoi so ngu ni ayeke si na gbata ti Laodicée, wâ ti ngu ni adë kete. Na mbeni mbage, ngu ni so asua ayeke hon na yâ mbeni kanivo so mbeni ye akanga ndo ni pëpe. Tongana lo si ndulu na Laodicée ni, ngu ni ayeke hon na yâ atênë so a koro adû dä na a tingbi ni na tele ti mba.

¹⁸ Azo so laso ayeke tongana azo ti Laodicée ti giriri ayeke na wâ mingi pëpe so akpengba zo, wala na dê mingi pëpe ti dë bê ti zo. Fade a yeke dë ala na gigi tongana mbeni ngu so wâ ni ayeke gi kete kete! Jésus aye pëpe si ala sala tënë na iri ti lo, tongana ‘alembe na iri ti Christ’. (2 aCorinthien 5:20, FM 01). Tongana ala gbian bê ti ala pëpe, fade ala yeke girisa matabisi ti ala ti awafango tënë ti Royaume. A-Chrétien ti Laodicée ayeke gi lani amosoro ti sese, na ‘ala hinga pëpe so ala yeke azo ti vundu, azo ti pono, awanzinga, awaziba, na azo so tele ti ala ayeke senge.’ Ti lungula nzinga, ziba, na dutingo tele senge na lege ti yingo so, a lingbi zo kue so ayeke tongana ala laso avo na tïtî Christ ‘lor so a tö lo na yâ wâ’, so aduti fä ti mabe so a tara pekoni, nga “vulu bongo” ti mbilimbili, na “pommade ti lê” ti bâ ndo nzoni na lege ti yingo. Asurveillant so ayeke aChrétien ayeke na ngia ti mû maboko na ala ti hinga aye ti yingo so atia ala si ala ga “azo ti mosoro na lege ti mabe”. (Jacques 2:5; Matthieu 5:3). Na ndo ni, a hunda na asurveillant ti mû maboko na ala ti sala kusala na “pommade ti lê” so, so ti tene ti yeda na ti bata fango ye, wango, tapande, na bango ndo ti Jésus. So ayeke mbeni yorö ti lungula “nzara ti mitele, nzara ti lê, na fandara ti fini”.​—1 Jean 2:15-17.

¹⁹ Jésus azingo na ase ala so kue lo yeke na ndoye na mbage ti ala. A lingbi asurveillant so ayeke sala kusala na gbe ti lo asala ye tongaso nga, me na nzobe (Kusala 20:28, 29). A lingbi azo ti Laodicée ‘aduti na wâ na yâ kusala na achangé bê ti ala’, na gbiango aye na yâ bibe nga na salango ye ti ala. Biani, tongana ambeni zo na popo ti e atï na yâ mbeni fini so asala si ala pusu kusala ti Nzapa na peko, a yeke ti ala ti ‘vo pommade ti lê na tïtî Jésus’ si ala lingbi bâ nene ti gingo Royaume na wâ kozoni.​—Matthieu 6:33.

²⁰ Christ atene: “Bâ, Mbi luti na yanga ti da, Mbi golo [wala “Mbi yeke pika ni”, FM 01]; tongana mbeni zo amä yanga ti Mbi na lo lungula yanga ti da ni, fade Mbi lï na yâ ni na lo, Mbi te kobe na lo, na fade lo te na Mbi.” Fani mingi, Jésus ayeke mû wango na lege ti yingo tongana lo yeke kangbi kobe na ambeni zo (Luc 5:29-39; 7:36-50; 14:1-24). Fadeso, lo yeke pika yanga-da ti mbeni kongregation tongana ti Laodicée. Fade azo ni ayeke zi yanga-da ni, ala yeke kiri ti ndoye lo, ala yeke yamba lo na popo ti ala, na ala yeke zia si lo fa ye na ala? Tongana a yeke tongaso, fade Christ ayeke te kobe legeoko na ala teti nzoni ti ala na lege ti yingo.

²¹ Na lege ti fä, “ambeni ngasangbaga” ti fadeso ayeke zi yanga-da na Jésus ti tene lo lï, na mara ti salango ye ti ala so ayeke gue na fini ti lakue lakue (Jean 10:16; Matthieu 25:34-40, 46). Ti zo oko oko so a sa yingo na ndo ti lo na so ayeke hon na ngangu, fade Christ ayeke mû na lo matabisi ti ‘duti na lo na ndo trône ti Lo, legeoko tongana Lo hon na ngangu giriri, si Lo duti na Babâ ti Lo na ndo trône ti Lo.’ Biani, ti ala so a sa yingo na ndo ti ala so ahon na ngangu, Jésus amû zendo ti mbeni kota matabisi na ala, ti kangbi trône na lo na koti ti Babâ ti lo na yayu. Nga, ambeni ngasangbaga so ahon na ngangu aku kungo ti wara mbeni pendere ndo na sese ge na gbe ti komandema ti Royaume ni.

Aye ti manda teti e kue

²² Kite ayeke pëpe so aChrétien kue alingbi ti wara ye ti nzoni mingi na lege ti atënë ti Jésus na akongregation mbasambala ti Asie Mineure. Teti ala bâ so Christ ayeke mû lani gondango ndo na lege ni, bê ti a-ancien so ayeke sala ye na ndoye apusu ala ti gonda ambeni zo nga na akongregation so ayeke sala nzoni na lege ti yingo. Na ndo so a-ancien ni abâ so awokongo ayeke dä, ala yeke mû maboko na aita ti ala na yâ vorongo ti sala kusala na ayorö so Mbeti ti Nzapa amû. E kue e lingbi ti ngbâ lakue ti wara ye ti nzoni na lege ti awango nde nde so Christ amû na akongregation mbasambala so, na ngoi kue so e yeke sala ye alingbi na ni na yâ sambela nga na salango ye fade fade.a

²³ Ngoi ti lâ ti nda ni so ayeke pëpe ngoi ti pensé so ye ti sioni alingbi ti si na e pëpe, wala ti tomba peko ti aye ti mosoro, wala ti mbeni ye nde so alingbi ti pusu e ti sala kusala gi tongaso na Nzapa. Tongaso, zia akongregation kue angbâ lakue ti za lumière ti ala ngangu tongana afotoforo so Jésus abata na ndo ti ala. Teti e yeke aChrétien be-ta-zo, zia e ngbâ lakue ti dengi mê tongana Christ asala tënë, na e mä ye so yingo atene. Na salango tongaso, fade e yeke bata ngia ti e lakue tongana azo so aza lumière ti gloire ti Jéhovah.

[Kete tënë na gbe ni]

Fade mo kiri tënë tongana nyen?

• ‘Wali Jézabel’ ayeke lani zo wa? Na ngbanga ti nyen awali so akpe mbito ti Nzapa ayeke mû tapande ti lo pëpe?

• Kongregation ti Sardes ayeke lani tongana nyen? Na ye nyen e lingbi ti sala ti kpe ti ga tongana gbâ ti aChrétien so ayeke lani na yâ gbata so?

• Azendo wa Jésus amû na kongregation ti Philadelphie? Na tongana nyen ala ndu aChrétien laso?

• Ngbanga ti nyen Jésus azingo na aChrétien ti Laodicée? Me beku wa ayeke ku aChrétien so ayeke na wâ na yâ kusala?

[Ahundango tënë ti manda na ye]

1, 2. Wango wa asigigi fani mingi na yâ atënë ti Jésus na akongregation mbasambala so a sala tënë ti ala na yâ Apocalypse?

3. Thyatire ayeke lani na ndo wa? Na a hinga ni mbilimbili teti ye wa so a yeke leke kâ?

4. A gonda lani kongregation ti Thyatire teti aye wa?

5-7. (a) Zo wa ayeke “wali so Jézabel”? Na ye nyen a lingbi a sala ti kanga lege na ngangu so lo yeke sala? (b) Tënë ti Christ na kongregation ti Thyatire amû maboko na awali so akpe mbito ti Nzapa ti sala nyen?

8. (a) Sardes ayeke lani na ndo wa? Na ambeni ye nde wa e hinga na ndo lo? (b) Ngbanga ti nyen a lingbi kongregation so ayeke na Sardes awara mungo maboko?

9. Ye wa a lingbi e sala tongana e yeke sala akusala ti e gi tongaso?

10. Même na yâ mbeni kongregation so ayeke tongana ti Sardes, ye wa alingbi kamême ti bâ na mbage ti mbeni kete wungo ti aChrétien?

11. Ye wa a lingbi e sala tongana lango ayeke sala e na lege ti yingo?

12. Fa dutingo ti azo ni na ndo tënë ti vorongo na yâ Philadelphie ti giriri.

13. Tongana nyen Christ ayeke sala kusala na “clé ti David”?

14. (a) Zendo wa Jésus amû na kongregation ti Philadelphie? (b) Tongana nyen e lingbi ti sala ti tï pëpe na ngoi ti “l’heure ti ye so atara azo”?

15. Ye nyen a yeke ku na mbage ti ala so ayeke duti ande ‘apilier na yâ Temple ti Nzapa’?

16. Ambeni ye wa a hinga na ndo Laodicée?

17. Ngbanga ti nyen a zingo lani na aChrétien ti Laodicée?

18, 19. Tongana nyen a lingbi ti mû maboko na aChrétien ti ngoi ti fadeso so asala ye tongana ala so ayeke lani na Laodicée?

20, 21. Azo wa ayeke zi yanga-da laso na Jésus tongana lo yeke ‘pika ni’? Nga beku wa ala yeke na ni?

22, 23. (a) Tongana nyen aChrétien kue alingbi ti wara ye ti nzoni mingi na lege ti atënë ti Jésus na akongregation mbasambala? (b) Ye nyen a lingbi e gi lege kue ti sala?

[Foto na lembeti 16]

A lingbi a kpe asioni lege ti ‘wali Jézabel’

[Afoto na lembeti 18]

Jésus azia na gbele adisciple ti lo mbeni “kota lege” ti wara na amatabisi ti Royaume

[Foto na lembeti 20]

Mo yeke yamba Jésus na mo yeke mä lo?