Mungo ye so anzere na Nzapa

JÉSUS, adisciple ti lo, nga ambeni kamarade ti lo so ayeke ndulu na lo, tongana Marie, Marthe na Lazare so azingo na kuâ ade ti ninga pëpe, ayeke te mbeni pendere kobe na Béthanie. Tongana Marie amû lani mbeni yombo ti ngele ngangu na so ane kamême kete na lo tuku na gere ti Jésus, bê ti Judas Iscariote aso na lo sala tënë ti bê ti lo. Lo tene: “Teti nyen ala kä yombo so pëpe teti denier ngbangbo ota [nginza ti ngu oko ti mbeni zo ti kua]? si a mû nginza ni na awanzinga.” Hio, ambeni disciple ti Jésus afa nga mara ti demango tele so.​—Jean 12:1-6; Marc 14:3-5.

Ye oko, Jésus akiri tënë: “Zia lo; . . . Teti awanzinga ayeke na i lakue, na lakue tongana i ye, i lingbi sala nzoni na ala; me Mbi yeke na i lakue pëpe.” (Marc 14:6-9). Amokonzi ti alege ti vorongo ti aJuif afa so mungo ye na azo ti mawa ayeke pëpe gi nzoni salango ye, me a lingbi même ti kanga ndo ti asiokpari. Na mbeni mbage, Jésus afa polele so mungo ye so anzere na Nzapa angbâ gi pëpe na salango matabisi na azo ti mawa.

Mbeni kete bingo lê na ndo lege so akozo Chrétien ayeke mû na ye ândö ayeke gboto ande lê ti e na ndo ambeni nzoni lege ti mû maboko na zo, so na yâ ni, e lingbi fa na gigi bingo bê ti e na ndo ala, na tongaso, ti sala si mungo ye ti e anzere na Nzapa. Fade a yeke fa nga mbeni oko lege ti mû ye so ayeke sala tâ ye ti nzoni mingi.

‘Mû nginza na azo ti mawa!’

Fani mingi Jésus awa lani adisciple ti lo ti ‘mû nginza na azo ti mawa!’ (Luc 12:33, Fini Mbuki, 2001). Ye oko, Jésus agboto mê na ndo salango ye na fandara ti mû gi gloire na wamungo ye ni mveni ahon ti mû gloire na Nzapa. Lo tene: “Tongana mo mû matabisi, mo sala si zo ahulu trompette na gbele mo pëpe, tongana awandendia asala na yâ synagogue wala na lege, si azo amû gloire na ala.” (Matthieu 6:1-4). Na mungo peko ti wango so, akozo Chrétien akpe salango ye na fandara ti amokonzi ti alege ti vorongo ti ngoi ni kâ so atene ala yeke mbilimbili-kue. Ala soro ti sala mbeni ye ti mû maboko na azo so ye atia ala wala ti mû na ala amatabisi na hondengo ni, ti tene azo ahinga pëpe.

Na tapande, na Luc 8:1-3, a fa na e so Marie ti Magdala, Jeanne, Susanne, na ambeni amû lani “mbeni ye ti ala” na dengo kongo na ni pëpe ti sala na Jésus nga na abazengele ti lo. Atâa so akoli so ayeke lani awanzinga pëpe, ala zia alege ti warango kobe ti yanga ti ala ti bata ngangu ti ala kue gi teti kusala ti fango tënë (Matthieu 4:18-22; Luc 5:27, 28). Na mungo maboko na ala ti hunzi kusala so Nzapa amû na ala, awali so amû lani biani gloire na Nzapa. Na Nzapa afa bê ti kiri singila ti lo na batango na yâ Bible tënë ti bibe ti kangbingo ye ti ala so, ti tene azo kue so ayeke ga ande adiko ni.​—aProverbe 19:17; aHébreu 6:10.

Dorcas ayeke nga giriri mbeni wali ti nzobe so “asi na nzo kusala, na lo mû matabisi na azo.” Lo yeke fü abongo teti awomua so ye atia ala na yâ gbata ti lo Joppé, so ayeke na tele ti kota ngu-ingo. E hinga pëpe wala a yeke lo mveni si afuta nginza ti vo na abongo ni kue wala lo mû gi ngangu ti lo ti fü ni. Ye oko, nzoni kusala ti lo asala si azo kue so lo mû maboko na ala andoye lo mingi, nga na lege ti be-nzoni, Nzapa adeba nzoni na ndo nzobe ti lo.​—Kusala 9:36-41.

Tâ ye so apusu zo ayeke kota ye mingi

Ye nyen apusu lani azo so ti mû ye? Ala londo pëpe ti mû maboko gi ngbanga ti so toto ti mbeni zo andu bê ti ala. Ala mveni abâ so a yeke na lege ni ti sala ye kue so ala lingbi ti sala lâ oko oko ti mû maboko na ala so ayeke na yâ nzinga, ala so ye ti ngangu asi na ala, ala so ayeke na kobela wala na ambeni kpale (aProverbe 3:27, 28; Jacques 2:15, 16). So ayeke mbeni lege ti mungo ye so anzere na Nzapa. A yeke kozoni kue kota ndoye teti Nzapa nga nzara ti mû tapande ti be-nzoni nga na bibe ti mungo ye ti lo si apusu zo ti sala tongaso.​—Matthieu 5:44, 45; Jacques 1:17.

Bazengele Jean agboto lani lê na ndo kota mbage ti mungo ye so tongana lo hunda tënë so: “Zo so ayeke na ye ti sese so, na lo bâ ita ti lo so ye amanke lo mingi, na bê ti lo ake ti mû ye na lo, ndoye ti Nzapa aduti na yâ lo tongana nyen?” (1 Jean 3:17). Kiringo tënë ni ayeke polele. Ndoye teti Nzapa apusu azo ti mû ye na azo ti mawa. Nzapa ayeke bâ na nene ni na lo yeke futa azo so, legeoko tongana lo, afa na gigi bibe ti mungo ye na azo (aProverbe 22:9; 2 aCorinthien 9:6-11). E yeke bâ mara ti bibe ti mungo ye so laso? Bâ ye so asi ade ti ninga pëpe na yâ mbeni kongregation ti aTémoin ti Jéhovah.

A hunda lani ye mingi ti leke da ti mbeni ita-wali Chrétien so ayeke mbakoro. Lo yeke gi lo oko na lo yeke pëpe na mbeni sewa ti mû maboko na lo. Na yâ ti angu mingi, lo zia lakue da ti lo ti tene a sala abungbi ti aChrétien dä, na fani mingi lo yeke kangbi kobe na zo kue so ayeda na tisango ndo ti lo (Kusala 16:14, 15, 40). Na bango ye ti ngangu so asi na lo, aita na yâ kongregation abungbi lani oko ti mû maboko na lo. Ambeni amû nginza, na ambeni amû ngangu ti ala ti sala kua ni. Na yâ ambeni kete nda ti yenga tongaso, aita ni aleke mbeni fini li ti da nga mbeni fini ndo ti sukulango ngu, ala zia ciment na peinture na tele ti achambre kue so ayeke na mbage ti gbe ni ti da ti étage ti lo, na ala leke ambeni fini ndo ti batango akungba na yâ cuisine ni. Mungo ye ti ala anzere, pëpe gi na bê ti ita-wali ni, me a sala nga si songo ti aita na yâ kongregation akiri akpengba ahon ti kozo, na a sala si bê ti avoizin adö tongana ala bâ tâ mungo ye ti aChrétien.

Alege ayeke mingi so e mveni e lingbi ti mû maboko na ambeni zo. E lingbi ti mû ngoi ti e ti duti na mbeni molenge ti koli wala ti wali so babâ ti lo ayeke dä pëpe? E lingbi ti vo aye wala ti fü bongo teti mbeni womua so aga mbakoro na so e hinga lo? E lingbi ti to mbeni kobe wala ti futa mbeni ye teti mbeni zo so ayeke na nginza mingi pëpe? A hunda pëpe ti duti na gbâ ti nginza ti sala ni. Bazengele Paul asû na mbeti: “Tongana mbeni zo ayeke na nzara ti mû ye, na lo mû ye so alingbi na ye so ayeke na lo, so ayeke nzoni; a hunda lo pëpe ti mû ye so ayeke na lo pëpe.” (2 aCorinthien 8:12). Ye oko, a yeke gi oko mara ti mungo ye tongaso, so amû gi na zo ni mveni si fade Nzapa ayeke deba nzoni na ndo ni? Oko pëpe.

Ti leke ye ti mû maboko na azo mingi ayeke tongana nyen?

Ngoi na ngoi ngangu so zo mveni asala ti mû ye alingbi kue pëpe. Biani, Jésus na abazengele ti lo ayeke bungbi ândö nginza ti mû na awanzinga, na ala yeke yeda na nginza so azo ti nzoni bê so, ala wara ala na yâ kusala ti fango tënë, ayeke mû (Jean 12:6; 13:29). Legeoko nga, akongregation ti kozo siècle ayeke bungbi nginza na ngoi so ye atia azo, na ala yeke leke ti mû ye na azo mingi.​—Kusala 2:44, 45; 6:1-3; 1 Timothée 5:9, 10.

Mara ti ye tongaso asi na ngu 55 ti ngoi ti e. Akongregation ti Judée atï na yâ kota nzinga, peut-être na peko ti kota nzara ti kobe so asi kâ lani ade ti ninga pëpe (Kusala 11:27-30). Teti so lo yeke bi bê lakue na ndo awanzinga, bazengele Paul ahunda mungo maboko ti akongregation so ayeke yongoro tongana kongregation ti Macédoine. Lo mveni lo bâ lege ti bungbingo nginza ni na lo zia kungba ni na tïtî akoli so alingbi ti zia bê na ala, ti kangbi ni (1 aCorinthien 16:1-4; aGalate 2:10). Bazengele Paul wala ambeni zo nde ahunda pëpe ti tene a futa ala teti kusala ti ala.​—2 aCorinthien 8:20, 21.

Laso, aTémoin ti Jéhovah ayeke nga ndulu ti mû maboko tongana ye ti ngangu asi. Na tapande, na nze ti juin ti ngu 2001, mbeni kota pupu ti ngu aya ngangu na a sala si ngu asuku mingi na amû gbata ti Houston, Texas, na kodoro ti Amerika. Ada ti aTémoin 723 abuba, ambeni na popo ni abuba mingi. Fade fade a soro ambeni ancien so alingbi ti ga mbeni komite ti mungo maboko na ngoi ti ye ti ngangu. Hio ala gi ti bâ aye so atia azo na ti mû nginza na aita ti gbata ni ti hon ndo ti kpale ni na ti leke ada ti ala. Aita ti akongregation so ayeke ndulu na ndo ni amû tele ti ala senge ti sala kua ni kue. Mbeni Témoin afa bê ti kiri singila ti lo mingi na lege so tongana ndokua ti assurance ti lo afuta na lo nginza ti leke na da ti lo, fade fade lo mû nginza ni na komite ti mungo maboko ni, tongaso a lingbi ti mû maboko na ambeni zo so aye atia ala.

Ye oko, tongana a ndu mungo ye na andokua so aba tënë ti azo ti mawa, a yeke nzoni e duti na donzi tongana e yeke bâ yâ ti ahundango ye mingi so e yeke wara. Ambeni ndokua so abâ tënë ti azo ti mawa ayeke futa nginza mingi na azo so asala kusala na yâ ni wala ti sala sabango ti hiringo nginza. Ye so asala si a mû gi kete ndambo ti nginza so ala wara ti sala na ye so ala leke ti sala. A-Proverbe 14:15 atene: “Zo so li ti lo ayeke dä pëpe, lo yeda na tënë kue, me zo ti ndara abata lege ti lo nzoni.” Biani, a yeke na lege ti ndara ti bâ yâ ti aye ni nzoni.

Mungo ye so aga na tâ ye ti nzoni mingi

Mbeni lege ti mungo ye so ayeke na nene ni mingi ahon mungo ye na

andokua so abâ tënë ti azo ti mawa ayeke dä. Jésus asala tënë ni giriri tongana mbeni mokonzi so ade maseka na so ayeke na nginza mingi ahunda na lo ye so lo lingbi ti sala ti wara fini ti lakue lakue. Jésus atene na lo: “Mo gue mo kä ye ti mo kue, mo mû nginza ni na awanzinga, na fade mo yeke na mosoro na yayu. Na mo ga mo tambela na peko ti Mbi.” (Matthieu 19:16-22). Bâ so Jésus atene gi pëpe ‘Mû nginza na awanzinga na fade mo wara fini.’ Nde na so, lo kiri lo tene “Mo ga mo tambela na peko ti Mbi.” Ti tene ni nde, atâa so mungo ye na azo ti mawa alingbi na gonda na ayeke ga na aye ti nzoni, dutingo disciple ti Christ andu aye mingi ahon so.

Kota ye so Jésus abi bê ti lo dä ayeke lani ti mû maboko na ambeni zo na lege ti yingo. Kete ngoi kozoni na kui ti lo, lo tene na Pilate: “A dü Mbi teti so, na Mbi ga na sese teti so, si Mbi sala tënë ti témoin ti tene-biani.” (Jean 18:37). Atâa so lo mû li ni na mungo maboko na awanzinga, savango kobela, na mungo kobe na azo so nzara asala ala, Jésus afa lege kozoni kue na adisciple ti lo ti fa tënë (Matthieu 10:7, 8). Biani, na popo ti andangba wango ti lo na adisciple ti lo, a yeke wara tënë so: “Tongaso i gue, i fa tënë na amara kue si ala ga adisciple”.​—Matthieu 28:19, 20.

Biani, fango tënë ayeke kaï ande pëpe akpale ti sese kue. Ye oko, fango nzo tënë ti Royaume ti Nzapa na amara ti azo kue ayeke mû gloire na Nzapa ngbanga ti so fango tënë asala si ye so Nzapa aye aga biani, na a yeke zi lege na azo so ayeda na tokua ti Nzapa ti wara aye ti nzoni teti lakue lakue (Jean 17:3; 1 Timothée 2:3, 4). Ngbanga ti nyen ti mä pëpe ye so aTémoin ti Jéhovah ayeke na ni ti tene na ngoi so ala si na yanga da ti mo? Ala yeke ga na mbeni matabisi ti yingo. Na ala hinga so a yeke tâ nzoni lege so ala lingbi ti mû ye na mo.

[Afoto na lembeti 6]

Alege ayeke mingi so e lingbi ti fa na gigi so e yeke bi bê na ndo azo

[Foto na lembeti 7]

Fango nzo tënë ti e ayeke nzere na Nzapa na ayeke zi lege na azo ti wara aye ti nzoni teti lakue lakue