Oko tâ mabe ayeke dä biani

JÉSUS CHRIST azia ândö na sese gi mbeni église oko wala kongregation. Kongregation so ayeke lani mbeni tele na lege ti yingo, mbeni sewa na lege ti yingo. Na lege so, e ye ti tene so a yeke lani mbeni bungbingo legeoko ti azo so yingo vulu ti Nzapa si asoro ala; Nzapa ayeda na ala kue tongana “amolenge” ti lo.​—aRomain 8:16, 17; aGalate 3:26.

Jésus afa lani so Nzapa ayeke sala kusala gi na mbeni lege oko ti gue na azo ti wara tâ tënë nga na fini. Ti gboto lê na ndo kpengba tâ tënë so, Jésus ahaka lege ti fini ti lakue lakue na mbeni senge lege: “I lï na kete yanga ni; teti lege ti gue na [futingo] ayeke kota na yanga ni ayeke kota, na azo mingi alï na lege ti yanga ni so. Teti lege ti gue na fini ayeke ngangu na yanga ni ayeke kete, na gi azo oko oko awara lege ni so.”​—Matthieu 7:13, 14; Jean 14:6; Kusala 4:11, 12.

Mbeni kongregation so aduti beoko

Mbeni bakari (The New Dictionary of Theology) atene so a lingbi e bâ pëpe kongregation ti kozo siècle tongana “mbeni bungbi ti azo na ndo sese kue so a leke yâ ni nzoni, mara ti ye so ayeke na ngoi ti e tongana e sala tënë ti église catholique.” Ngbanga ti nyen? Bakari ni atene: “Ngbanga ti so a yeke wara pëpe mara ti bungbi ti azo tongaso, so a leke yâ ni nzoni nga so ayeke na ndo sese kue.”

Kongregation ti aChrétien ti kozo siècle akpa oko pëpe bungbi ti a-église so a leke ni tongana ti so e yeke bâ laso; na zo oko alingbi pëpe tâ na lege ni ti ke tënë so. Ye oko a leke lani kongregation ni nzoni. Kongregation oko oko ayeke sala lani kusala nde na ambeni pëpe. Ala kue ayeda na ngangu ti komande ti mbeni wabatango bungbi na Jérusalem. Bungbi so, so na yâ ni a yeke wara abazengele nga na a-ancien ti kongregation ti Jérusalem, ayeke mû ândö maboko ti bata dutingo beoko ti kongregation tongana ‘tele oko’ ti Christ.​—aEphésien 4:4, 11-16; Kusala 15:22-31; 16:4, 5.

Ye nyen asi na oko tâ kongregation ni? A yeke lo la si aga kota Église Catholique? A yeke lo si ague na li ni ti ga lege ti vorongo ti église ti aProtestant so yâ ni akangbi kirikiri tongana ti so e yeke bâ na ngoi ti e so? Wala mbeni ye nde asi?

“Nzo blé” na “sio blé ti ngonda”

Ti wara akiringo tënë ni, zia e bâ nzoni ye so Jésus Christ mveni atene ayeke si ande. Bê ti mo alingbi ti dö ti hinga so Jésus aku lani ti tene a si na mbeni ngoi azo alingbi pëpe ti hinga nzoni kongregation ti lo, na lo yeke zia lege na mara ti kpale tongaso ti ninga asiècle mingi.

Na hakango kongregation ti lo na “Royaume ti yayu”, lo tene: “Royaume ti yayu ayeke tongana zo so alu nzo le-kobe na yaka ti lo; me tongana azo alango, wato ti lo aga alu sio blé ti ngonda na popo ti nzo blé ni, na lo gue. Me tongana blé aga kota na alë, tongaso blé ti ngonda so aga kota nga. Na aboi ti mveni ti da so aga ala tene na lo, Maître, mo lu nzo le-kobe na yaka ti mo pëpe? Tongaso blé ti ngonda so alondo na ndo wa? Na lo tene na ala, A yeke wato so asala ye so. Na aboi ni atene na lo, Tongaso mo ye e ti gue ti gboto blé ti ngonda so? Me lo tene, Pëpe; teti peut-être tongana i gboto blé ti ngonda so, fade i gboto nzo blé ni nga. I zia ala use amaï legeoko juska ngoi ti fango le-kobe, na ngoi ti fango le-kobe ni fade mbi tene na azo ti fâ le-kobe, I fâ sio blé ti ngonda so kozoni, i kanga na gbâ ti zö na wâ; me i bungbi nzo blé ni na gogoro ti mbi.”​—Matthieu 13:24-30.

Jésus afa lani so lo yeke “zo so alu” le-kobe ni. “Nzo le-kobe” ni ayeke fä ti adisciple ti lo. “Wato” ti lo ayeke Satan Zabolo. “Blé ti ngonda ni” ayeke lani aChrétien ti wataka so, yeke yeke, alï na yâ kongregation ti kozo siècle. Jésus atene so lo yeke zia ande “nzo blé” na “sio blé ti ngonda” amaï legeoko juska na “ngoi ti fango le-kobe” so ayeke ga na “nda ti ngoi so”. (Matthieu 13:37-43). Aye so kue aye lani ti tene nyen?

Kongregation ti kozo siècle aga lani kirikiri

Hio na peko ti kui ti abazengele, na yâ kongregation ni, awafango ye so abele mabe ti ala ato nda ti fa lege na ni. Ala sala “tënë ti kirikiri si adisciple ague na peko ti ala.” (Kusala 20:29, 30). Ye so asi na pekoni ayeke so, aChrétien mingi “azia mabe”. Ala “zia mê ti ala ti mä tënë ti pande.”​—1 Timothée 4:1-3; 2 Timothée 4:3, 4.

Mbeni bakari (The New Dictionary of Theology) atene so ti si na siècle osio ni ti ngoi ti e “lege ti vorongo ti aChrétien Catholique aga lege ti vorongo so Kodoro-togbia ti Rome ayeda na ni.” A yeke lani mbeni bungbingo ti lege ti vorongo nga na ti ngorogbia so ague tâ nde na aye so akozo Chrétien amä na bê dä (Jean 17:16; Jacques 4:4). Oko bakari ni atene so tongana ngoi ayeke hon, alege kue, salango ye ti église ni nga akpengba tënë ti mabe ti lo agbian lani biaku biaku “na gbe ti mbeni sioni ngangu so aga na lege ti bungbingo Testament ti Giriri legeoko na senda-ndara.” Tongana ti so Jésus Christ atene ândö, aChrétien ti wataka so ague na li ni mingi asala si a hinga nzoni pëpe atâ disciple ti lo.

Awamango Jésus ahinga so a yeke lani ngangu ti sala kangbi na popo ti tâ nzo blé na sio blé ti ngonda, legeoko tongana mbeni sioni pele so, na ngoi ti maïngo ti ale-kobe, akpa nzo blé. Tongaso Jésus afa so, teti kete ngoi, a yeke duti ande ngangu ti hinga atâ Chrétien na aChrétien ti wataka nde nde. Ye so aye ti tene pëpe so kongregation ti aChrétien ayeke lï ngu biaku biaku, teti so Jésus amû lani zendo ti ngbâ ti fa lege na aita ti lo ti yingo “lakue, même juska na nda ti ngoi so.” (Matthieu 28:20). Jésus atene so nzo blé ni ayeke ngbâ ande ti maï. Même atâa so kue, na yâ ti angu mingi, atâ Chrétien, zo oko oko wala tongana a bungbi ala kue, asala lani kue biani ti bata afango ye ti Christ. Ye oko, ala ga mbeni pëpe tele wala mbeni bungbi so lê alingbi ti bâ ni hio. Ala kpa lani pëpe alege ti vorongo ti a-apostat so asala ye dandara, so azia gi kota kamene na ndo iri ti Jésus Christ na yâ mbaï kue.​—2 Pierre 2:1, 2.

“Zo ti siokpari mveni asi na lê ti azo”

Bazengele Paul afa ândö kozoni mbeni ye nde so alingbi ande ti duti fä ti hingango na alege ti vorongo ti wataka so. Lo sû na mbeti: “I zia zo oko ahanda i na mbeni lege nde pëpe; teti fade [lâ ti Jéhovah] asi pëpe kozoni si azo mingi azia lege ni, na zo ti siokpari mveni asi na lê ti azo.” (2 aThessalonicien 2:2-4). “Zo ti siokpari” so ayeke biani gi bungbi ti amokonzi-nzapa ti alege ti vorongo so ala bâ tele ti ala tongana akota zo mingi na ndo kongregation ti “aChrétien” ni.

Kengo tënë ti mabe ato nda ni lani na ngoi ti bazengele Paul. Ye ni ague na li ni hio mingi gi na peko ti so abazengele akui nga ngangu ti ala ti kanga lege na ye so ayeke dä mbeni pëpe. Tongana ti so Paul atene, a yeke hinga ande ni na lege ti “kusala ti Satan, na lege ti kota ngangu, na fä nde nde, na ye ti kpene kue ti wataka, na lege ti handa kue ti ye ti kirikiri”. (2 aThessalonicien 2:6-12). Ye so afa tâ na gigi polele akusala so amokonzi-nzapa ti alege ti vorongo asala na yâ mbaï kue!

Ti sala si tënë so ala tene, so a yeke lege ti vorongo ti aCatholique ti Rome si ayeke tâ mbeni oko église ane biani, amokonzi-nzapa ni atene so akota-bua ti ala awara “kusala ti ala na mbage ti akozo bazengele na lege ti mbeni molongo so alondo na tongo nda ni.” Ti tâ tënë ni, a yeke wara gunda ti tënë ti ala so na yâ mbaï wala Bible oko pëpe. Mbeni tâ nzoni ye so afa biani na gigi so a yeke yingo vulu ti Nzapa si afa lege na abungbi ti a-église so asigigi na peko ti kui ti abazengele ti Jésus ayeke dä pëpe.​—aRomain 8:9; aGalate 5:19-21.

Ka ti ambeni lege ti vorongo so abâ gigi hio na peko ti ye so a hiri ni Kota Gbiango Ye ti Lege ti Vorongo ti aProtestant? Ala mû tapande ti kongregation ti aChrétien ti kozo siècle? Ala kiri na dutingo na sioni oko pëpe ti tâ kongregation ti aChrétien? A yeke tâ tënë biani so na peko ti Kota Gbiango Ye ti Lege ti Vorongo ti aProtestant, asenge zo mingi awara Bible na yanga ti kodoro ti ala mveni. Ye oko, mbaï afa so a-église so angbâ lakue ti fa atënë ti mabe so ayeke tâ na lege ni pëpe.a​—Matthieu 15:7-9.

Ye oko, bâ so Jésus Christ afa kozoni so a yeke kiri na tâ oko kongregation ti lo na ngoi ti hunzingo ti aye ti sese so (Matthieu 13:30, 39). Gango tâ tënë ti aprophétie ti Bible afa na gigi so e yeke fadeso na yâ ngoi ni so (Matthieu 24:3-35). Tongana a yeke tongaso, a lingbi e oko oko kue e hunda tele ti e, ‘Oko tâ église ni so ayeke na ndo wa?’ A lingbi a sigigi polele ahon ti kozo.

Mo lingbi peut-être ti bâ so mo wara église so wala kongregation ni awe. A yeke tâ kota ye mingi ti hinga ni biani. Ngbanga ti nyen? Ngbanga ti so legeoko tongana ti kozo siècle, gi oko tâ église si ayeke dä. Mo yeke mû ngoi ti hinga biani wala église ti mo amû biani peko ti tapande ti kongregation ti aChrétien ti kozo siècle, nga wala lo bata na be-biani afango ye ti Jésus Christ? Ngbanga ti nyen ti gi ti bâ ni fadeso pëpe? Fade aTémoin ti Jéhovah ayeke na ngia ti mû maboko na mo ti sala ni.​—Kusala 17:11.

[Kete tënë na gbe ni]

[Afoto na lembeti 5]

Ye nyen tapande ti Jésus na ndo blé nga sio blé ti ngonda afa na e na ndo tâ kongregation?

[Afoto na lembeti 7]

Église ti mo akpa ti aChrétien ti kozo siècle na ndo fango tënë nga mandango ye?