“I ga ndulu na Nzapa, na fade Lo ga ndulu na i”
Ândö nga laso: Akpengba-ndia ti Bible azi lege na lo ti gbian fini ti lo
TONGANA mbeni maseka, Adrian ayeke lani zo ti salango ngonzo mingi na zo so ayeke ndulu ti bata tënë na bê. Salango ngonzo ti lo hio hio ague na lo ti sala aye ti ngangu. Lo yeke nyon lani sämba, manga, na lo tï na yâ salango pitan kirikiri. A hinga lani Adrian tongana mbeni punk, wala mbeni oko ti bungbi ti amaseka so yungo bongo nga salango ye ti ala ayeke so gi bê ti azo songo, na lo yeke na dessin so a sala na tele ti lo ti fa na gigi bibe ti lo ti ke ti mä yanga-ti-komande. Na fango peko ti aye so lo sala na yâ fini ti lo teti angu mingi, lo tene: “Mbi yeke fâ kuali ti mbi tongana damba ti kondo, tongana ti a-punk, mbi zia ngangu colle dä ti tene kuali ni aluti lutingo, nga ngoi na ngoi, mbi yeke sala si kuali ti mbi aga bengba wala amû mbeni nzoroko nde.” Adrian ayü nga lani ye ti hôn.
Adrian na ambeni maseka ti kpengba-li ni alango na yâ mbeni gbagbara da. Kâ ala yeke nyon sämba na mbangi. Adrian atene: “Mbi yeke nyon lani mbeni ngangu yorö na mbi yeke kpo tele ti mbi na Valium nga ye kue so maboko ti mbi atï na ndo ni. Tongana mbi wara ambangi ti nyon pëpe wala acolle ti gboto ni pëpe, mbi nzi essence na yâ akutukutu ti azo ti gboto fion ni si a sala mbi tongana sämba.” Gigi ti lo ti godobe asala si ye oko azia mbito na bê ti Adrian pëpe, na lo ga tâ sioni mingi. Mingi ni, azo ayeke kpe lo kpengo. Na oko ngoi ni, sioni iri so lo yeke na ni ayeke gboto asioni zo na mbage ti lo.
Yeke yeke, Adrian abâ so “akamarade” ti lo ayeke ga ndulu na lo gi ti wara aye ti ala mveni. Na ndo ni, lo tene na nda ni so “salango ngonzo nga na ye ti ngangu mingi aga na ye oko pëpe.” Teti so lo hinga pëpe ye so lo yeke gi na yâ fini ti lo, bê ti lo aso na lo zia lege ti akamarade ti lo. Tongana lo wara lani, na ndo so azo ayeke leke ada, mbeni Tour ti Ba Ndo so atënë ni so aluti na ndo Bible agboto lê ti lo, ye so azi lege na mbeni mandango Bible na aTémoin ti Jéhovah. Adrian ayeda na bê kue na tisango ndo so: “I ga ndulu na Nzapa, na fade Lo ga ndulu na i.” (Jacques 4:8). Hio, Adrian abâ so a lingbi lo to nda ti sala ye alingbi na akpengba-ndia so a wara na yâ Ambeti ti Nzoni-Kue.
Hingango ye ti Bible so ayeke gue guengo na li ni asala nzoni na ndo yingo-ti-hinga ti Adrian na a kiri a fa lege na fini ti lo. A mû lani maboko na lo ti hon ndo ti salango ngonzo hio hio na ti maï ngangu ti kanga nzara ti tele. A yeke na lege ti ngangu ti Tënë ti Nzapa si Adrian agbian biani salango ye ti lo.—aHébreu 4:12.
Ye oko, tongana nyen Bible alingbi ti duti na mara ti ngangu tongaso? Hingango ye ti Bible ayeke mû maboko na e ti “yü zo-ti-fini”. (aEphésien 4:24). Biani, e yeke gbian salango ye ti e na salango kusala alingbi na tâ hingango ye so e wara na yâ Bible. Me tongana nyen mara ti hingango ye tongaso ayeke gbian fini ti azo?
Kozoni, Bible afa asioni salango ye so a lingbi a zi ni (aProverbe 6:16-19). Use ni, Mbeti ti Nzapa awa e ti fa na gigi apendere lengo so yingo vulu ti Nzapa alë ni. Alengo so andu “ndoye, tâ ngia, siriri, be-nze-pepe, nzobe, bê ti sala nzoye, [mabe], tâ be-ti-molenge, na ngangu ti kanga nzara ti tele”.—aGalate 5:22, 23.
Gbungo nda ti aye so Nzapa ahunda nzoni amû maboko na Adrian ti bâ tele ti lo mveni, ti bâ nzoni asalango ye so a lingbi lo lë, nga ala so a lingbi lo zia ni (Jacques 1:22-25). Ye oko, a yeke lani gi tongo nda ni. Na ndo ti hingango ye, a hunda ti duti na mbeni ye so apusu zo ti sala ye, mbeni ye ti pusu Adrian ti gbian fini ti lo.
Adrian amanda lani so a yeke nzoni a leke pendere fini zo ti yâ ni “na lege ti image ti Lo so acréé lo si lo hinga ye biani.” (aColossien 3:10). Lo ga ti bâ so a lingbi salango ye ti mbeni Chrétien akpa ti Nzapa mveni (aEphésien 5:1). Na lege ti Bible, Adrian amanda ye na ndo salango ye ti Jéhovah na mbage ti azo, na lo gbu li ti lo na ndo apendere lengo ti Nzapa tongana ndoye, nzobe, nzoye, be-nzoni nga na mbilimbili ti lo. Hingango ye tongaso apusu Adrian ti ndoye Nzapa na ti sala kue ti duti mara ti zo so Jéhovah ayeda na lo.—Matthieu 22:37.
Na nda ni, na mungo maboko ti yingo vulu ti Nzapa, Adrian awara lege ti hon ndo ti ngonzo ti lo ti wâ. Fadeso lo na wali ti lo ayeke na kusala mingi ti sala na mungo maboko na ambeni zo, na lege ti hingango ye ti Bible, ti gbian fini ti ala. Adrian atene : “Nde na angbele kamarade ti mbi so mingi ti ala akui fadeso awe, mbi ngbâ na fini, na mbi yeke na mbeni sewa so ayeke na ngia.” Lo yeke mbeni fä so afa na gigi polele ngangu so Bible ayeke na ni ti gbian fini ti azo si a duti nzoni.
[Tënë na lembeti 25]
“Salango ngonzo nga na ye ti ngangu mingi aga na ye oko pëpe.”
[Encadré na lembeti 25]
Ngangu ti akpengba-ndia ti Bible
A yeke wara na gbe ni ge, ambeni kpengba-ndia ti Bible so amû maboko na gbâ ti azo ti salango ngonzo nga na azo ti salango ngangu ti ga azo ti siriri:
“I duti na siriri na azo kue. . . . I futa kula ti i mveni pëpe, me i zia lege na ngonzo ti Nzapa”. (aRomain 12:18, 19). Zia si Nzapa afa ngoi nga azo wa futango kula ti lo ayeke ga na ndo ti ala. Lo lingbi ti sala ni na hingango yâ ti atënë ni kue nga fango ngbanga ti lo ayeke gue ande legeoko na mbilimbili ti lo so alingbi kue.
“Tongana ngonzo agbu i, i bata si i sala siokpari pëpe; i zia lâ akui na i na ngonzo na bê ti i pëpe, na i zia ndo na zabolo pëpe.” (aEphésien 4:26, 27). A yeke na lege ni ti tene ngoi na ngoi mbeni zo aduti na ngonzo. Tongana a si, a yeke nzoni lo ngbâ “na ngonzo na bê” ti lo pëpe. Ngbanga ti nyen? Ngbanga ti so a lingbi ti pusu lo ti sala mbeni ye ti sioni, na tongaso ti “zia ndo na zabolo”, na ti nzere mbeni pëpe na lê ti Jéhovah Nzapa.
“Mo sala ngonzo pëpe, na mo zia ngonzo ti wâ; zia bê ti mo agi mo pëpe, teti a handa mo ti sala sioni.” (Psaume 37:8). Abibe so a kanga lege na ni pëpe ayeke gue na zo ti sala aye so lo lingbi kanga lege na ni pëpe. Tongana mbeni zo azia lege na ngonzo ti wâ, lo lingbi peut-être ti tene wala ti sala ye so ayeke bi vundu na bê ti mbeni zo.