Amaseka, I yeke leke ye teti kekereke?

“Mbi hinga nzoni abibe so mbi yeke bi bê dä na mbage ti i, . . . abibe ti siriri, me ti vundu pëpe, ti mû na i mbeni gigi ti kekereke nga na beku.”​—JÉRÉMIE 29:11, NW.

MINGI ni, akota zo ayeke bâ lâ ti pendere ti zo tongana mbeni pendere ngoi na yâ ti fini. Ala yeke dabe ti ala na ngangu nga na wâ so ala yeke na ni tongana ala de maseka. Ala yeke dabe ti ala na ngia na mbeni ngoi so lani ala yô akungba mingi pëpe, mbeni ngoi so ala sala ngia mingi nga so ngoi angbâ mingi na yâ fini ti ala ti gbu alege nde nde so azi na ala.

² Ala so ayeke na popo ti i so ade maseka ayeke bâ peut-être aye ni na mbeni lege nde. Peut-être a yeke ngangu na ala ti luti na gbele akpale so tele ti ala nga na bibe ti ala, so ayeke gbian, aga na ni. Na ekole, a hunda na ala ti luti ngangu na gbele ngangu so akamarade ayeke sala na ndo zo. Wala a hunda na ala ti sala kue ti ke na kuru go nyongo mbangi, sämba nga na ye ti pitan. Mingi na popo ti ala ayeke luti nga na gbele tënë ti dutingo nde wala ambeni tënë so andu mabe ti ala. Biani, lâ ti pendere alingbi ti duti mbeni ngoi so ayeke ngangu. Ye oko, a yeke nga mbeni ngoi so lege azi na zo ti sala ambeni ye mingi. Hundango tënë ni ayeke so: Tongana nyen mo yeke sala ande kusala na alege so azi?

Wara ngia na lâ ti pendere ti mo

³ Akangba ayeke tene ande na mo so lâ ti pendere ayeke ninga pëpe, na atënë ti ala ayeke na lege ni. Gi na yâ ti akete ngu, lâ ti pendere ti mo ayeke hon. Ni la, wara ngia na ngoi so mo de maseka! So ayeke wango ti Gbia Salomon. Lo sû na mbeti: “Mo sala ngia, pendere-koli, na lâ ti pendere ti mo; na mo zia bê ti mo amû ngia na mo na lâ ti pendere ti mo, na mo tambela na lege ti bê ti mo, na bango ndo ti lê ti mo.” Ye oko, Salomon agboto mê ti amaseka: “Mo lungula vundu na bê ti mo, na mo lungula sioni na yâ mitele ti mo.” Lo tene nga: “Lâ ti molenge na lâ ti pendere ayeke senge senge.”​—Zo-ti-fa-tene 12:1, 2.

⁴ Mo gbu nda ti ye so Salomon aye ti tene? Zia e mû mbeni tapande: Tara ti bâ mbeni maseka so awara mbeni matabisi ti ngele ngangu, tongana nginza. Lo yeke sala nyen na ni? Lo lingbi ti buba ni kue na salango ngia, na tapande ti molenge so abuba ye ti lo kue ti yâ ti parabole ti Jésus (Luc 15:11-23). Me ye nyen ayeke si ande na pekoni tongana nginza ni ahunzi? Biani, lo yeke wara ande vundu teti so lo sala tâ ye ti buba tongaso. Nde na so, bâ so lo sala kusala na matabisi so ti leke na gigi ti lo ti kekereke. A lingbi ti si so lo sala kusala na kota mbage ti matabisi so na lege ti ndara. Na nda ni, tongana lo bâ nzoni na peko ti aye so lo sala na matabisi so, mo tene ti mo so lo yeke duti ande na vundu teti so lo buba fade nginza so kue pëpe ti sala na ngia na lâ ti pendere ti lo? Oko pëpe!

⁵ Bâ angu ti lâ ti pendere ti mo tongana mbeni matabisi so alondo na Nzapa. Na biani, a yeke tongaso. Mo yeke sala ande kusala na ni tongana nyen? Mo lingbi ti buba ngangu nga na wâ kue so mo yeke na ni ti kaï na anzara ti bê ti mo mveni, gi na guengo na peko ti angia nde nde sân ti bi bê na gigi ti kekereke. Ye oko, tongana mo sala tongaso, “lâ ti molenge na lâ ti pendere” ti mo ayeke duti biani “senge senge.” A yeke duti ye ti nzoni mingi tongana mo sala kusala na lâ ti pendere ti mo ti leke ye teti kekereke.

⁶ Salomon amû mbeni kpengba-ndia so alingbi ti mû maboko na mo ti sala ye na lege ti ndara na lâ ti pendere ti mo. Lo tene: “Fadeso, mo dabe mo na Lo so acréé mo, na lâ ti pendere ti mo.” (Zo-ti-fa-tene 12:3). Ti mä Jéhovah na ti sala ye so lo ye ayeke kelele ti sala si ye aga nzoni. Jéhovah afa na azo ti Israël ti giriri ye so lo ye ti sala teti ala: “Mbi hinga nzoni abibe so mbi yeke bi bê dä na mbage ti i, . . . abibe ti siriri, me ti vundu pëpe, ti mû na i mbeni gigi ti kekereke nga na beku.” (Jérémie 29:11, NW ). Jéhovah aye nga ti mû na mo “mbeni gigi ti kekereke nga na beku.” Tongana mo dabe ti mo na lo na yâ akusala, abibe nga na adesizion ti mo, gigi ti kekereke nga na beku so ayeke ga tâ ye teti mo.​—Apocalypse 7:16, 17; 21:3, 4.

“I ga ndulu na Nzapa”

⁷ Jacques awa e ti dabe ti e na Jéhovah tongana lo mû na e wango so: “I ga ndulu na Nzapa, na fade Lo ga ndulu na i.” (Jacques 4:8). Jéhovah ayeke Wasalango ye, Kota Gbia ti yayu, so alingbi na vorongo nga na sepela kue (Apocalypse 4:11). Ye oko, tongana e ga ndulu na lo, fade lo ga ndulu na e. Mara ti bingo bê na ndoye tongaso amû wâ na bê ti mo pëpe?​—Matthieu 22:37.

⁸ E yeke ga ndulu na Jéhovah na alege mingi. Na tapande, bazengele Paul atene: “I zia ti sambela pëpe, i bata lege ti sambela ni na i mû merci.” (aColossien 4:2). Ti tene ni nde, sala kue si sambela aduti lakue na yâ salango ye ti mo ti lâ oko oko. Ku gi pëpe ti tene amen na peko ti so babâ ti mo wala mbeni mba ti mo Chrétien ti kongregation asambela na iri ti mo. A si na mo lâ oko awe ti fa atënë ti bê ti mo na Jéhovah nga ti fa na lo bibe ti mo, ye so mo sala mbito ni nga na akpale so mo yeke na gbele ni? Mo fa na lo lâ oko awe aye so kamene asala mo ti sala lisoro na ndo ni na ambeni zo? Asambela so ayeke na lege ni nga so alondo na bê ayeke ga na siriri ti bibe (aPhilippien 4:6, 7). A yeke mû maboko na e ti ga ndulu na Jéhovah na ti hinga so lo yeke ga ndulu na e.

⁹ E yeke bâ mbeni lege nde ti ga ndulu na Jéhovah na yâ atënë so, so a sû na gbe ti yingo: “Mo mä wango, na mo mä wango-tene, si mo lingbi duti na ndara na nda ti fini ti mo.” (aProverbe 19:20). Biani, tongana mo mä Jéhovah na mo mä yanga ti lo, mo yeke leke ye teti kekereke. Tongana nyen mo lingbi ti fa so mo yeke mä Jéhovah? Kite ayeke dä pëpe so mo yeke gue lakue na abungbi ti aChrétien na mo yeke mä ambage nde nde ti kapa ni. Nga, mo yeke “yekia babâ na mama ti mo” na dutingo dä na mandango Bible na sewa (aEphésien 6:1, 2; aHébreu 10:24, 25). So ayeke nzoni. Ye oko, mo yeke “vo ngoi” ti leke abungbi, ti diko Bible lakue na ti gi nda ti ambeni ye? Mo yeke sala ngangu ti sala ye alingbi na aye so mo manda si mo tambela tongana ‘wandara’? (aEphésien 5:15-17, NW; Psaume 1:1-3). Tongana mo sala aye so, mo yeke ga ndulu na Jéhovah.

¹⁰ Na yâ akozo tënë ti buku ti aProverbe, wasungo ni na gbe ti yingo afa nda ti buku ti Bible so. Lo tene so nda ni ayeke ti “hinga ndara na wango-tene, ti hinga nda ti ye; ti mä wango-tene so ayeke na ndara, na tënë ti mbilimbili, na tënë ti fango ngbanga ti mbilimbili, na tënë ti salango ye na lege ni; ti sala si zo so li ti lo ayeke dä pëpe ahinga ye, ti sala si pendere-koli ahinga ye, na lo bi bê ti lo na lege ni.” (aProverbe 1:1-4). Ni la, tongana mo yeke diko na mo sala ye alingbi na atënë ti buku ti aProverbe, nga na tanga ti abuku ti Bible kue, mo yeke lë ande salango ye na lege ni nga mbilimbili, na fade Jéhovah ayeke duti na ngia ti bâ so mo ga ndulu na lo (Psaume 15:1-5). Na ndo ni, tongana mo gi ti lë fango ngbanga ti mbilimbili, ndara, hingango ye nga na ngangu ti bi bê na lege ni, mo yeke mû ande anzoni desizion.

¹¹ A yeke na lege ni biani ti ku mbeni maseka ti sala ye na ndara tongaso? A yeke na lege ni, teti so mingi ti amaseka Chrétien ayeke sala tongaso. Ye ti pekoni ayeke so ambeni zo ayeke yekia ala na ayeke ‘bâ ala tongana amolenge pëpe’. (1 Timothée 4:12). A yeke na lege ni so ababâ na mama ti ala ayeke na ngia na lege ti ala, na Jéhovah atene so ala yeke zia ngia na bê ti lo (aProverbe 27:11). Atâa so ala yeke amaseka, ala lingbi ti hinga biani so atënë so, so a sû ni na gbe ti yingo, andu ala: “Zia lê ti mo na ndo zo so ayeke na tënë na li ti lo pëpe na ngbâ lakue ti bâ zo ti mbilimbili, teti gigi ti kekereke ti zo so ayeke duti ande ti siriri.”​—Psaume 37:37, NW.

Soro ye na lege ni

¹² Lâ ti pendere ayeke mbeni ngoi ti sorongo aye, na ambeni ye so e soro ni ayeke ga na aye so ayeke ninga. Ambeni ye so mo soro fadeso ayeke sala ande ngangu na ndo ti mo na yâ angu mingi so ayeke ga na pekoni. Sorongo ye na lege ti ndara ayeke ga na ngia, nga gigi ti mo ayeke ga nzoni. Ti soro aye na lege ti ndara pëpe alingbi ti buba tanga ti fini ti mo kue. Zia e bâ tongana nyen ye so ayeke tâ tënë na yâ aye use so mo yeke soro. Kozoni, mo yeke soro ti sala kamarade na azo wa? Ngbanga ti nyen a yeke kota ye? Bâ kete, mbeni mato so a sû na gbe ti yingo atene: “Zo so atambela na awandara, fade lo ga wandara, me zo so aga ndeko ti awabuba, fade lo wara vundu dä.” (aProverbe 13:20). Ti tene ni nde, e yeke ga ande tongana ala so e sala kamarade na ala: wandara wala wabuba. Mo ye ti duti mara ti zo wa?

¹³ Tongana a sala tënë ti salango kamarade, mo yeke bi bê peut-être na ndo dutingo na tele ti ambeni zo. So ayeke na lege ni; me salango kamarade andu ye mingi ahon so. Tongana mo yeke bâ télé, mo yeke mä mozoko, mo yeke diko mbeni buku, mo gue ti bâ limon wala mo yeke sala kusala na ambeni ye na ndo Internet, so kue ayeke salango kamarade. Tongana akamarade so ayeke pusu mo ti sala ye ti ngangu nga na pitan, ti nyon mbangi wala sämba ahon ndo ni na ambeni ye kue so ague nde na akpengba-ndia ti Bible, mo yeke sala kamarade na “wabuba” so ayeke sala ye tongana ti so Jéhovah ayeke dä pëpe.​—Psaume 14:1.

¹⁴ Peut-être mo yeke tene na bê ti mo so, teti so mo yeke gue na abungbi ti aChrétien nga mo yeke sala kusala legeoko na kongregation, mbeni limon so afa salango ngangu wala mbeni mozoko so lego ni atoto nzoni, me so atënë ti yâ ni ayeke nzoni pëpe, alingbi pëpe ti sala ngangu na ndo ti mo. Peut-être mo bâ so ye ti sioni ayeke si pëpe tongana mo bi lê kete ti bâ porno na ndo Internet. Bazengele Paul atene na mo so bibe so ayeke na lege ni pëpe! Lo tene: “Asioni kamarade ayeke buba anzoni salango ye.” (1 aCorinthien 15:33, NW ). Mawa ni ayeke so, anzoni maseka Chrétien azia si sorongo akamarade na ndara pëpe abuba anzoni salango ye ti ala. Tongaso, leke na bê ti mo ti kpe mara ti salango kamarade so. Tongana mo sala tongaso, mo yeke mû peko ti wango ti Paul so: “I tambela na lege ti sese so pëpe, me i changé lege ti i na lege ti bibe ti fini, si i lingbi hinga ye so Nzapa aye, ye so ayeke nzoni, ye so alingbi na lê ti Lo, na ye so alingbi kue.”​—aRomain 12:2.

¹⁵ Bâ use ye ti soro so ayeke na gbele mo. Mbeni ngoi ayeke ga ande so mo yeke mû desizion na ndo ye so mo ye ti sala na ngoi so mo hunzi mandango mbeti ti mo awe. Tongana mo yeke na yâ ti mbeni kodoro so a yeke ngangu ti wara kua, mo lingbi ti yeda na loro na anzoni kua kue. Tongana mo yeke na yâ ti mbeni kodoro so mosoro ayeke dä mingi, ge, a lingbi mo soro popo ti akua mingi. Na ambeni kua ni ayeke zia zo na gbele tara. Na bingo bê na ndo nzoni duti ti mo, wafango mbeti wala babâ na mama ti mo alingbi ti wa mo ti sala mbeni kua so asala si mo yeke na kpale ti nginza pëpe, même mbeni kua so aga na mosoro mingi. Ye oko, warango afango lege so a hunda teti kua so ayeke mû kota mbage ti ngoi so mo lingbi ti mû ti sala na Jéhovah.

¹⁶ Girisa pëpe ti bi lê na yâ Bible kozoni ti mû mbeni desizion. Ti fa so e yeke na kungba ti bata tele ti e mveni, Bible awa e ti sala kusala ti wara kobe ti yanga (2 aThessalonicien 3:10-12). Ye oko, ambeni ye nde ayeke dä so andu sorongo kua so e yeke sala. E wa mo mingi ti diko aversê so ayeke na gbe ni ge, na ti gbu li na ndo lege so ala lingbi ti mû maboko na mbeni maseka ti sala ye na lege ni na ndo tënë ti sorongo mbeni kua ti sala: aProverbe 30:8, 9; Zo-ti-fa-tene 7:11, 12; Matthieu 6:33; 1 aCorinthien 7:31; 1 Timothée 6:9, 10. Na pekoni so mo diko aversê so, mo gbu nda ti bango ndo ti Jéhovah na ndo tënë ni?

¹⁷ A lingbi lâ oko pëpe kua ti mitele aga ye so ayeke tâ kota mingi si ahon ndo ti kusala ti e teti Jéhovah. Tongana, gi na peko ti so mo hunzi kota da-mbeti, mo lingbi ti wara mbeni kua so ayeke mû lege na mo ti wara aye so atia mo, so ayeke nzoni. Tongana mo yeke na bezoin ti ambeni fango lege na ndo ni, a hunda ti sala lisoro na babâ na mama ti mo. Ye oko, girisa lâ oko pëpe so aye ti yingo ayeke aye so “ayeke nzoni ahon”. (aPhilippien 1:9, 10). Sala ye pëpe tongana ti so Baruc, wakuasu ti Jérémie, asala lani. Lo girisa lani ti yekia amatabisi ti lo ti kusala na lo gi “kota ye teti [lo] mveni”. (Jérémie 45:5). Teti mbeni kete ngoi, lo girisa so mbeni “kota ye” ayeke dä oko pëpe na yâ sese ni, so alingbi ti ga na lo ndulu mingi na Jéhovah wala ti mû maboko na lo ti sö kuâ na futingo ti Jérusalem. A lingbi nga ti tene mara ti tënë so na ndo e.

Bâ aye ti yingo na nene ni

¹⁸ Mo bâ awe na yâ ambeti-sango wala na télé afoto ti amolenge na yâ ti akodoro so kota nzara ayeke dä? Tongana a yeke tongaso, mawa ti ala asala mo biani. Mawa ti azo so ayeke na yâ ti vaka ti mo asala mo nga tongaso? Ngbanga ti nyen a lingbi mawa ti ala asala mo? Ngbanga ti so mingi ti ala ayeke kui nzara nga. Ala yeke na kpale ti kota nzara so Amos asala tënë ni: “Seigneur L’Eternel atene, Bâ, lâ ni ayeke ga so fade Mbi to boma na sese ni. A yeke boma ti kobe pëpe, wala nzara ti ngu pëpe, me a yeke nzara ti mä tënë ti L’Eternel.”​—Amos 8:11.

¹⁹ A yeke tâ tënë so mingi ti ala so ayeke na kpale ti kota nzara so na lege ti yingo ahinga pëpe so “ye ti yingo amanke ala”. (Matthieu 5:3). Mingi ti ala ahinga pëpe so ala yeke na nzara na lege ti yingo. Ambeni alingbi même ti bâ so ala yeke te ye nzoni. Me ala yeke bâ ye tongaso ngbanga ti so ala yeke wara kobe ti ala na yâ “ndara ti sese”, so ayeke senge senge, so na popo ni kota nzara ti akungba, atënë ti senda-ye, abango ndo nde nde na ndo nzoni salango ye nga na ambeni ye nde. Ambeni abâ so “ndara” ti laso asala si afango ye ti Bible aga angbele ye. Ye oko, “sese so ahinga Nzapa pëpe na lege ti ndara ti [lo]”. Ndara ti sese so ayeke mû ande maboko na mo pëpe ti ga ndulu na Nzapa. A yeke ye oko pëpe, gi mbeni “tënë ti buba na lê ti Nzapa”.​—1 aCorinthien 1:20, 21; 3:19.

²⁰ Tongana mo yeke bâ foto ti amolenge so nzara ahon ndo ti ala, mo ye ti ga tongana ala? Oko pëpe! Ye oko, ambeni maseka so ayeke na yâ ti asewa so ayeke ti aChrétien ayeke sala nzara ti duti tongana azo so angoro ala, so ayeke kui nzara na lege ti yingo. Peut-être, amaseka tongaso abâ ti ala so ye ti songo amaseka ti sese so ayeke dä pëpe, ala yeke wara ngia na yâ fini ti ala. Ala girisa so amaseka ti sese so ayeke yongoro na Jéhovah (aEphésien 4:17, 18). Ala girisa nga asioni ye ti peko ti kota nzara na lege ti yingo so. Ambeni sioni ye ti peko ti kota nzara so ayeke ango so amaseka-wali aye ni pëpe, asioni ye so salango pitan aga na ni na lege ti mitele nga na ti bibe, nyongo manga, sämba nga na mbangi. Kota nzara ti yingo so aga na bibe ti kpengba-li, ti dutingo na beku pëpe nga ti dutingo pëpe na mbeni ye ti fango lege na zo na yâ fini.

²¹ Ni la, na ekole, tongana mo yeke na popo ti amba ti mo so avoro Jéhovah pëpe, zia si abibe ti ala ahon ndo ti mo pëpe (2 aCorinthien 4:18). Ambeni ayeke yekia tënë ti aye ti yingo oko pëpe. Na ndo ni, ndokua ti asango ayeke sigigi na asabango ti mayele ti fa so a yeke na lege ni ti sala aye ti pitan, ti nyon sämba ahon ndo ni wala ti duti na sioni yanga. Ke ngangu ti aye so kue! Ngbâ lakue ti duti kamarade ti azo so ‘abata mabe na nzo yingo-ti-hinga’. “Wu na kusala ti Seigneur lakue.” (1 Timothée 1:19; 1 aCorinthien 15:58). Ngbâ ti duti na aye mingi ti sala na Da ti Royaume nga na yâ kusala ti fango tënë. Na yâ ti angu so mo ngbâ ti gue na ekole, ngoi na ngoi mû mbage na kusala ti pionnier auxiliaire. Gi ti kpengba bango ndo ti mo ti yingo na lege so, na fade mo yeke girisa pëpe nzoni salango ye ti mo.​—2 Timothée 4:5.

²² Bango aye na lege ti yingo ayeke gue na mo ti mû adesizion so ambeni zo ahinga nda ni pëpe. Na tapande, mbeni maseka-koli Chrétien ayeke lani na kode ti pikango mozoko nga lo yeke wara anzoni note mingi na adevoir ti lo kue ti ekole. Tongana lo wara kota mbeti ti lo awe, lo mû peko ti babâ ti lo na yâ kua ti sukulango afenêtre si lo lingbi ti sala kusala so lo soro ni, wafango tënë ti ngoi kue, wala pionnier. Awafango mbeti ti lo ahinga lâ oko pëpe nda ti desizion so. Me tongana mo yeke ndulu na Jéhovah, e hinga biani so mo hinga nda ni.

²³ Tongana mo yeke gbu li na ndo lege so mo lingbi ti sala kusala na apendere mosoro ti ngele ngangu ti lâ ti pendere ti mo, “leke nzo gere teti lâ ni so ayeke ga, si [mo] lingbi gbu fini so ayeke tâ fini biani.” (1 Timothée 6:19). Leke na bê ti mo ti “dabe mo na Lo so acréé mo” na lâ ti pendere ti mo nga na tanga ti fini ti mo kue. So ayeke oko lege ti leke mbeni pendere gigi ti kekereke, mbeni gigi ti kekereke so ayeke hunzi ande lâ oko pëpe.

Tënë ti mo ti nda ni ayeke nyen?

• Wango wa so a sû na gbe ti yingo ayeke mû maboko na amaseka na yâ lekengo ye ti ala teti kekereke?

• Na ambeni lege wa mbeni maseka alingbi ti “ga ndulu na Nzapa”?

• Amaseka ayeke mû adesizion wa so ayeke sala ande ngangu na ndo kekereke ti ala?

[Ahundango tënë ti manda na ye]

1, 2. Na alege nde nde wa azo alingbi ti bâ lâ ti pendere?

3. Wango nga na gbotongo mê wa Salomon amû na amaseka?

4, 5. Ngbanga ti nyen a yeke lege ti ndara teti amaseka ti leke ye teti kekereke? Mû mbeni tapande.

6. (a) Wango wa so Salomon amû ayeke ye ti fango lege teti amaseka? (b) Ye nyen Jéhovah aye ti sala teti amaseka? Na tongana nyen mbeni maseka alingbi ti wara nzoni dä?

7, 8. Tongana nyen mbeni maseka alingbi ti ga ndulu na Jéhovah?

9. Tongana nyen mbeni maseka alingbi ti mä Jéhovah?

10, 11. Akota ye ti nzoni wa amaseka ayeke wara tongana ala mä Jéhovah?

12. Mbeni oko ti akota ye so mbeni maseka ayeke soro ayeke so wa? Ngbanga ti nyen aye so mo soro ayeke ndu fini ti mo a ninga?

13, 14. (a) Nde na dutingo na tele ti ambeni zo, salango kamarade andu aye wa? (b) Bibe wa so ayeke na lege ni pëpe a lingbi amaseka akpe ni?

15. Use ye ti soro wa ayeke na gbele amaseka? Na ndo tënë so, aye wa ayeke sala ngangu na ndo ala?

16, 17. Fa tongana nyen aversê nde nde alingbi ti mû maboko na mbeni maseka ti duti na mbeni nzoni bango ndo na ndo kua.

18, 19. (a) Kpale wa mingi ti azo so angoro mo ayeke na yâ ni, na a lingbi mo bâ ala tongana nyen? (b) Ngbanga ti nyen azo mingi abâ ti ala so ala yeke kui nzara na lege ti yingo pëpe?

20. Ngbanga ti nyen ayeke na lege ni pëpe ti sala nzara ti mû peko ti azo so avoro Jéhovah pëpe?

21. Tongana nyen e lingbi ti bata tele ti e yongoro na asioni bibe ti azo so avoro Jéhovah pëpe?

22, 23. (a) Ngbanga ti nyen fani mingi mbeni maseka Chrétien ayeke soro aye so ambeni zo ahinga nda ni pëpe? (b) A wa amaseka ti sala nyen?

[Afoto na lembeti 15]

Mo yeke zia ande lege na gingo aye teti mo mveni ti gboto ngangu nga na wâ ti mo kue ti lâ ti pendere?

[Foto na lembeti 16, 17]

Amaseka Chrétien so ayeke na ndara angbâ ti bâ ndo polele na lege ti yingo