Ala amaseka, ala dabe ti ala na kota Wasarango ala laso

“Fadeso, mo dabe mo na Lo so acréé mo, na lâ ti pendere ti mo.”—ZO-TI. 12:3.

1. Tongana nyen Jéhovah afa so lo zia bê ti lo kue na amaseka so ayeke voro lo?

JÉHOVAH abâ amaseka so ayeke na yâ ti bungbi ti lo na nene ni mingi. Nga, lo bâ so ala yeke dë bê ti zo tongana ti so pendere mamio ayeke sara nzoni na akeke nga na apere. Biani, lo fa kozoni awe so na lâ ti “bira” ti Molenge ti lo, fade amaseka-koli na amaseka-wali ayeke ‘mû ala mveni na nzobe’ na yâ ti kua ti Christ (Ps. 110:3). Prophétie so aga tâ tënë na mbeni ngoi so mingi ti azo ayeke kpe mbeto ti Nzapa pëpe, ala yeke mû tere ti ala kue ti gi aye so agbu bê ti ala, ti gi nginza nga ala yeke mä yanga pëpe. Ye oko, Jéhovah ahinga so amaseka so ayeke voro lo ayeke ti ala nde mingi. Ala amaseka, zia ala hinga so Jéhovah ahinga na bê ti lo kue so ala yeke sara ande ye so lo hunda na ala.

2. Ti dabe na Jéhovah aye ti tene nyen?

² Tara ti bâ ngia so Jéhovah ayeke wara tongana lo bâ so amaseka ayeke dabe ti ala na lo tongana Kota Wasarango ala (Zo-ti. 12:3). Ti dabe na Jéhovah andu ye mingi ahon gi ti bi bê na ndo ti lo. A ye ti tene ti sara aye so anzere na Jéhovah, ti yeda si andia ti lo nga na akpengba-ndia ti lo afa lege na e lâ na lâ. A ye nga ti tene ti zia bê kue na ndo ti Jéhovah, nga ti hinga so tënë ti nzoni duti ti e agbu bê ti lo mingi (Ps. 37:3; Es. 48:17, 18). A yeke ye so mo yeke sara na mbage ti Kota Wasarango mo la?

“Zia bê ti mo kue na L’Eternel”

3, 4. Tongana nyen Jésus afa so lo zia bê ti lo kue na Jéhovah? Ngbanga ti nyen a yeke kota ye ti tene zo azia bê ti lo kue laso na Jéhovah?

³ Ti tâ tënë ni, zo so azia bê ti lo kue na Jéhovah ahon tanga ti azo kue ayeke Jésus Christ. Lo sara ye lani alingbi na atënë ti aProverbe 3:5, 6, so atene: “Zia bê ti mo kue na L’Eternel, na zia bê ti mo na hingango ye ti mo mveni pëpe. Mo bi bê ti mo na Lo na lege ti mo kue, na fade Lo sara si lege ti mo aga mbilimbili.” Kete na peko ti batême ti Jésus, Satan aga nduru na lo, lo tara ti handa Jésus ti yeda ti komande sese nga ti wara gloire ni (Luc 4:3-13). Jésus ayeda na handa ti Satan pëpe. Jésus ahinga so tâ “mosoro, na yango-iri, na fini” ayeke “futa ti tâ be-ti-molenge na kpengo mbeto ti L’Eternel”.​—aProv. 22:4.

⁴ Laso, azo mingi ayeke na bê ti warango ye nga ala yeke sara ye na kion. Teti so e yeke duti na popo ti azo tongaso, e yeke sara ye na ndara tongana e mû peko ti tapande ti Jésus. Na ndo ni, girisa pëpe so Satan ayeke sara ande ye kue so lo lingbi ti sara ti handa awakua ti Jéhovah ti tene ala zia ti tambela na ndo ti kete lege so ague na fini. Lo ye si azo kue amû kota lege so ayeke gue na futingo. Zia si Satan ahanda mo pëpe. Leke na bê ti mo ti dabe ti mo na Kota Wasarango mo. Zia bê ti mo kue na ndo ti Jéhovah, na gbu “fini so ayeke tâ fini biani”, fini so azo ayeke wara ande ni biani na yâ ti kete ngoi.​—1 Tim. 6:19.

Ala amaseka, ala sara ye na ndara!

5. Mo bâ ti mo kekereke ti sese so tongana nyen?

⁵ Amaseka so ayeke dabe ti ala na Kota Wasarango ala ayeke na ndara ahon amaseka so ngu ti ala na ala ayeke oko. (Diko Psaume 119:99, 100.) Ndali ti so ala yeke na bango ndo ti Jéhovah, ala hinga nzoni so aye ti sioni so ala yeke bâ laso ayeke hunzi ande na yâ ti kete ngoi. Atâa so ngu ti ala ayeke mingi pëpe, kite ayeke dä pëpe so ala amaseka ala bâ so azo mingi ayeke na mbeto nga ala yeke gi bê ti ala mingi ahon ti kozo. Tongana mo ngbâ ti manda mbeti na ekole, biani mo mä tënë ti bubango ti pupu na ti ndowa so ayeke si na ndo ti sese kue. Mo yeke mä nga so azo ayeke buba agbako nga mo yeke mä tënë ti ambeni kpale tongaso. Azo ayeke gi bê ti ala mingi na ndo ti akpale so, me gi aTémoin ti Jéhovah la ahinga nzoni mingi so aye so ayeke si afa so aye ti sioni so e yeke bâ laso ndali ti komandema ti Satan aga nduru ti hunzi awe.​—Apoc. 11:18.

6. Aye wa ahanda ambeni maseka?

⁶ Mawa ni ayeke so ambeni wakua ti Jéhovah so ade maseka aduti na hango lê mbeni pëpe na ala girisa so a ga nduru ti futi aye ti sioni awe (2 Pi. 3:3, 4). Asioni kamarade nga na bango porno asara si ambeni ti ala atï na yâ ti kota siokpari (aProv. 13:20). A yeke tâ ye ti mawa mingi ti tene Nzapa azi maboko ti lo na tere ti mbeni zo laso, na ngoi so nda ni aga tâ nduru awe so! Ti tene mara ti ye tongaso asi na mo pëpe, gi ti manda ye na lege ti ye so asi na azo ti Israël na ngu 1473 kozo ti Christ. Ye ni so asi na ngoi so ala yeke se kando na yando ti Moab, mbeni ndo so ayeke tâ gi na yanga ti Sese ti Zendo. Nyen la asi lani na ndo ni so?

Ala tï tâ gi na yanga ti Sese ti Zendo

7, 8. (a) Kode wa Satan asara na kua na yando ti Moab? (b) Kode wa Satan ayeke sara na kua laso?

⁷ Na ngoi ni kâ, Satan aleke na bê ti lo oko ti kanga lege na azo ti Israël ti wara ye so a mû zendo ni na ala. Na pekoni so prophète Balaam agi lege gbä ti deba azo ti Israël, Satan aleke ti handa ala na mayele: lo tara ti pusu ala ti sara mbeni ye si Jéhovah ayeda na ala mbeni pëpe. Lo mû apendere wali ti Moab ti handa na azo ti Israël. Me ti so ni so, ye ni ayeke mo bâ mo tene Satan asö benda awe. Akoli ti Israël ato nda ti bungbi na amolenge-wali ti Moab nga ala kuku ti voro Baal ti Péor. Atâa so pendere Sese ti Zendo so a mû zendo ni na ala ayeke tâ na gbe ti lê ti ala, azo ti Israël 24 000 awara kuâ. So ye ti mawa ti nyen!—Nom. 25:1-3, 9.

⁸ Laso nga, e yeke tâ nduru mingi na yanga ti mbeni pendere sese so a mû zendo ni na e: aye ti ngoi so ayeke ga. Tongana ti so Satan asara kozo, lo yeke sara kusala na lango-sioni ti buba na awakua ti Jéhovah. Azo ayeke sara ye kirikiri mingi laso, na ye so asara si azo abâ lango-sioni tongana mbeni ye so ayeke na lege ni. Ala yeke bâ nga bungbingo ti koli na koli wala wali na wali tongana mbeni ye so a yeke na zo oko oko ti mû desizion na ndo ni. Mbeni ita-wali atene: “A yeke gi na yanga-da nga na Da ti Royaume la amolenge ti mbi aga ti hinga so bungbingo ti koli na koli wala bungbingo ti wali na wali nga na bungbingo na mbeni koli wala mbeni wali na gigi ti mariage ayeke sioni na lê ti Nzapa.”

9. Nyen la alingbi ti si na ngoi so mbeni zo ade maseka? Nyen la amaseka alingbi ti sara ti hon ndo ti ye so?

⁹ Amaseka so ayeke dabe ti ala na Kota Wasarango ala ahinga so bungbingo ti koli na wali ayeke mbeni matabisi so alondo na Nzapa na so amû lege na azo ti bâ gigi. Ni la, amaseka so ahinga so a yeke Nzapa la alu ndia na ndo ni: ala hinga so lo ye si gi azo so asara mariage awe si abungbi koli na wali (aHéb. 13:4). Ye oko, na ngoi so mbeni zo ade maseka, nzara ti bungbingo koli na wali ayeke sara ngangu mingi na ndo ti lo na asara si li ti lo alingbi ti gue kirikiri; na ngoi ni so, a lingbi ti duti ngangu na lo ti bata tere ti lo. Me, nyen la mo lingbi ti sara na ngoi so asioni pensé ayeke tambela na yâ ti li ti mo? Sambela Jéhovah na bê ti mo kue ti mû maboko na mo ti gbu li na ndo ti aye so ayeke nzoni. Jéhovah ayeke mä lakue azo so ayeda na bê ti ala kue ti tene lo mû maboko na ala. (Diko Luc 11:9-13.) Ti sara lisoro so ayeke kpengba zo alingbi ti mû maboko na mo ti gbu li na ndo ti mbeni ye nde.

Soro na ndara aye so mo ye ti sara

10. Abibe wa so ayeke ga na ye ti nzoni pëpe ayeke nzoni e kpe ni? A yeke nzoni e hunda tere ti e na atënë wa?

¹⁰ Mbeni raison so asara si amaseka so ayeke na bungbi ti Jéhovah pëpe agi ti sara ye kue so anzere na ala nga ala mû gigi ti ala ti sara gi na ngia ayeke so ala yeke na ‘fango tënë ti Nzapa’ pëpe. So ti tene Nzapa ayeke fa lege na ala pëpe nga ala yeke na beku ti kekereke pëpe (aProv. 29:18). Ala yeke tongana azo ti Israël ti ngoi ti Esaïe so akpe Nzapa pëpe, so amû tere ti ala kue ti “sara ngia, . . . ala te nyama na ala nyon vin”. (Es. 22:13). Ahon ti sara nzara ti ye so mara ti azo tongaso ayeke sara, a yeke nzoni ala amaseka so ayeke na bungbi ti Jéhovah agbu li ti ala na ndo ti pendere beku so Jéhovah azia na gbele awakua ti lo so ayeke be-ta-zo. Tongana mo yeke mbeni wakua ti Jéhovah so ade maseka, mo yeke na kota nzara ti duti na yâ ti fini sese ti Nzapa? Mo yeke sara ngangu ti ‘bata tere ti mo, na ngoi so mo yeke ku ti bâ beku so amû ngia’, beku so Jéhovah azia na gbele mo? (Tite 2:12, 13). Kiringo tënë ti mo ayeke sara ande ngangu na ndo ti aye so mo zia na gbele mo ti sara nga na aye so ayeke kota ye na lê ti mo.

11. Ngbanga ti nyen a hunda ti tene amaseka so avoro Jéhovah na so angbâ ti manda mbeti amanda ni nzoni?

¹¹ Azo mingi aye si amaseka amû ngangu ti ala ti gi na aye ti dunia so. A yeke na lege ni ti tene amaseka so angbâ ti manda mbeti amanda ni nzoni. Girisa pëpe so ye so mo zia na gbele mo ayeke gi ti wara mbeni nzoni kua ti nginza pëpe, me a yeke nga ti ga mbeni ita so ayeke sara nzoni kua na yâ ti kongregation nga ayeke fa tënë nzoni. Ti sara aye so, a lingbi mo hinga ti sara lisoro polele, ti gbu li nzoni nga ti pika patara yeke nga na nengo tere na azo. Ye oko, amaseka so ayeke manda Bible nga ayeke sara ngangu ti sara ye alingbi na akpengba-ndia ni na yâ ti fini ti ala amanda atâ nzoni ye. Na ndo ni, gigi ti ala ayeke ga ande nzoni nga ala yeke wara ande fini ti lakue lakue.​—Diko Psaume 1:1-3.a

12. Tapande wa ayeke nzoni ababâ na amama so ayeke aChrétien amû pekoni?

¹² Ândö na Israël, ababâ na amama abâ fango ye na amolenge ti ala tongana mbeni kota ye mingi. Mara ti fango ye tongaso andu aye nde nde so zo ayeke sara na yâ ti fini ti lo, na a bâ mbilimbili aye so andu vorongo Nzapa (Deut. 6:6, 7). Ni la, amolenge ti azo ti Israël so adengi mê ti mä ababâ na amama ti ala nga na akota zo so akpe mbeto ti Nzapa ayeke wara gi pëpe hingango ye. Me ala yeke wara nga ndara, ngangu ti bango popo ti aye, ngangu ti gbungo nda ti ye nga ala yeke gbu li ti ala nzoni, na a yeke asarango ye so gi azo so amanda ye na ndo ti Nzapa la ayeke na ni (aProv. 1:2-4; 2:1-5, 11-15). A yeke nzoni ababâ na amama so ayeke aChrétien laso abâ tënë ti fango ye na amolenge ti ala na nene ni.

Mä yanga ti Jéhovah na ti azo so aye lo

13. Mara ti awango wa a yeke mû na ambeni maseka? Ngbanga ti nyen a yeke nzoni ala sara hange?

¹³ Mara ti azo nde nde ayeke mû wango na amaseka. Na popo ti azo so a yeke wara awafango mbeti so fani mingi ayeke bi bê mingi na ndo ti lege so mbeni maseka alingbi ti ga zo na yâ ti gigi ti lo. Ala amaseka, e wa ala ti sambela Nzapa ti fa lege na ala na ngoi so ala yeke gi ti haka awango so azo so amû na ala na awango so ayeke na yâ ti Bible nga na ambeti so ngbâa be-ta-zo na ti ndara asigigi na ni. Na lege ti mandango Bible ti mo, mo hinga so akozo zo so Satan ayeke gi ti wara ala ayeke amaseka nga na azo so ahinga ye mingi pëpe na ndo ti aye ti dunia so. Na tapande, na yâ ti yaka ti Eden, Eve so ahinga ye mingi pëpe na ndo ti aye ti dunia so ayeda na ye so Satan atene na lo, atâa so Satan ayeke mbeni zo so lo hinga lo pëpe na so afa lâ oko pëpe so lo bi bê na lo. Tongana Eve ayeda fade ti mä yanga ti Jéhovah, so afa lani so lo ye lo, ka lo yeke wara kpale so lo wara lani so pëpe.​—Gen. 3:1-6.

14. Ngbanga ti nyen a yeke nzoni e mä wango ti Jéhovah nga na ti ababâ na amama ti e so avoro lo?

¹⁴ Kota Wasarango mo aye mo nga mingi, na lo sara tongaso ndali ti so tënë ti nzoni duti ti mo agbu bê ti lo. Lo ye ti tene mo wara ngia gi laso pëpe, me teti lakue lakue. Ni la, legeoko tongana ti so mbeni babâ wala mbeni mama so aye molenge ti lo mingi ayeke sara, Jéhovah atene na mo nga na azo kue so ayeke voro lo, lo tene: “So ayeke lege ni, i tambela dä.” (Es. 30:21). Tongana babâ na mama ti mo aye biani Jéhovah, ala lingbi ti mû maboko mingi na mo. Na ngoi so mo ye ti soro aye so a lingbi mo zia na kozo ndo, na mo ye ti zia ambeni ye na gbele mo ti sara, mä wango ti ala nzoni (aProv. 1:8, 9). Ala ye ti tene mo wara fini, mbeni ye so ayeke kota mingi ahon mosoro wala yango-iri.​—Mat. 16:26.

15, 16. (a) E hinga so Jéhovah ayeke sara ande ye tongana nyen? (b) Kpengba ye wa e manda na lege ti ye so asi na Baruc?

¹⁵ Azo so ayeke dabe ti ala na Kota Wasarango ala agi ti duti na ye mingi pëpe na yâ ti fini ti ala, na ala hinga so Jéhovah ayeke zia ti ‘sara na ala pëpe’ na lo yeke zia ala “lâ oko pëpe.” (Diko aHébreu 13:5.) Teti so mara ti nzoni bango ndo tongaso ague nde na ti mingi ti azo, a lingbi e sara hange si azo so bibe ti ala ayeke nde na ti Jéhovah asara ngangu na ndo ti e pëpe (aEph. 2:2). Na ndo ti tënë so, bâ tapande ti Baruc, wakuasu ti Jérémie, so aduti lani na fini na ngoi so a ga nduru ti futi gbata ti Jérusalem na ngu 607 kozo ti Christ.

¹⁶ Peut-être Baruc aye lani ti gi ti wara gbâ ti aye ahon ti so lo yeke na ni. Jéhovah ahinga bibe ti Baruc, na lo wa lo ti gi ‘akota ye’ teti lo wani pëpe. Baruc afa so lo yeke na tâ be-ti-molenge nga lo yeke na ndara ndali ti so lo mä ye so Jéhovah atene na lo, na lo sö kuâ na ngoi so a futi Jérusalem (Jér. 45:2-5). Na mbage, azo ti ngoi ti Baruc so awara ‘akota ye’, wala gbâ ti akungba, azia vorongo ti Jéhovah na use ndo. Kete na pekoni, ala girisa ye kue na ngoi so azo ti Chaldée (wala, azo ti Babylone) amû kodoro ni. Nga, azo mingi akui (2 Chron. 36:15-18). Ye so asi na Baruc amû maboko na e ti bâ so ti duti na nzoni songo na Nzapa ayeke kota ye mingi ahon ti wara gbâ ti mosoro nga na kota ndo.

Gi ti mû peko ti anzoni tapande

17. Ngbanga ti nyen Jésus, Paul na Timothée ayeke anzoni tapande ndali ti awakua ti Jéhovah laso?

¹⁷ Mbeti ti Nzapa amû na e gbâ ti anzoni tapande ti mû maboko na e ti sara aye so ayeke gue na e ti wara fini. Na tapande, Jésus ayeke lani na akode ahon tanga ti azo kue. Ye oko, lo mû ngoi ti lo mingi ti sara mbeni kua so ayeke mû maboko na azo teti lakue lakue: lo fa “Tene-nzoni ti royaume ti Nzapa”. (Luc 4:43). Ti mû lege na bazengele Paul ti sara kua ti Jéhovah na bê ti lo kue, lo ke mbeni kua so alingbi ti ga na nginza mingi na lo nga lo mû ngoi ti lo nga na ngangu ti lo ti fa nzoni tënë. Timothée, ‘tâ molenge ti Paul na yâ mabe’, amû tapande ti lo (1 Tim. 1:2). Jésus, Paul nga na Timothée abâ so ala sara nzoni ye pëpe na fini ti ala? Ên-ën. Biani, Paul atene so lo bâ aye so lo lingbi lani ti wara tongana “puru” tongana a haka ni na kota pasa so lo yeke na ni ti sara na Nzapa.​—aPhil. 3:8-11.

18. Akota gbiango ye wa mbeni ita-koli so ade maseka asara? Ngbanga ti nyen lo bâ so lo yeke sara nzoni ye na yâ ti fini ti lo?

¹⁸ Laso, aChrétien mingi so ade maseka ayeke sara ye na mabe tongana ti Jésus, ti Paul nga na ti Timothée. Na tapande, mbeni ita-koli so ade maseka na so ayeke lani na mbeni kua ti nginza so a futa lo nzoni mingi dä asû mbeti, lo tene: “Hio tongaso mbi wara kota ndo na place ti kua ti mbi ndali ti so mbi yeke sara ye alingbi na akpengba-ndia ti Bible. Atâa nginza so mbi yeke wara, mbi bâ so ye so kue ayeke gi tombango pupu senge senge. Na ngoi so mbi gue ti bâ akota zo ti ndokua ti mbi ti fa na ala so mbi ye ti mû ngoi mingi ti sara kua ti Nzapa, hio tongaso ala zia mbeni nginza na ndo ti nginza so mbi yeke wara na nda ti nze ti sara si mbi ke kua ni pëpe. Me mbi ngbâ lakue na ndo ti desizion ti mbi. Azo mingi agi li ti ala gbä na raison so apusu mbi ti zia lege ti kua so ayeke ga na mbi nginza mingi na ti gue ti fa tënë na ngoi kue. Mbi yeke tene na ala so mbi ye biani ti sara ye ague oko na mungo tere ti mbi na Nzapa. Ti fadeso, fini ti mbi aluti mingi na ndo ti aye ti yingo, na ye so asara si mbi bâ so mbi yeke na ngia so nginza wala kota ndo alingbi pëpe ti ga na ni.”

19. Desizion ti ndara wa a wa amaseka ti mû ni?

¹⁹ Na ndo ti sese kue, gbâ ti amaseka ayeke mû mara ti adesizion ti ndara tongaso. Ni la, ala amaseka, na ngoi so ala yeke gbu li ti ala na ndo ti gigi ti ala ti kekereke, ala girisa pëpe so lâ ti Jéhovah aga nduru awe (2 Pi. 3:11, 12). Ala gi pëpe ti sara bê na tere ti azo so ayeke gi ti wara anzoni ye ti dunia so. Ala mä azo so aye ala na bê oko. Ti bungbi ‘mosoro ti ala na yayu’ ayeke tâ nzoni lege ti lekengo gigi ti ala ti kekereke na ayeke oko lege so ala yeke bâ ande nzoni dä teti lakue lakue. (Mat. 6:19, 20; diko 1 Jean 2:15-17.) Ala amaseka, ala dabe ti ala na Kota Wasarango ala. Na sarango tongaso, Jéhovah ayeke iri tënë nzoni na ndo ti ala.

[Kete tënë na gbe ni]

Mo dabe ti mo na ni?

• E yeke fa tongana nyen so e zia bê ti e kue na Nzapa?

• Fango ye wa ayeke nzoni ahon atanga ni kue?

• Ye so asi na Baruc afa nyen na e?

• Azo wa la e lingbi ti mû anzoni tapande ti ala? Ngbanga ti nyen?

[Foto na lembeti 21]

Aye so Jéhovah ayeke fa na e ayeke nzoni ahon afango ye kue